//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ང་དྲུག་པ། ཚད་པའི་འཁྲུ་བ་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 16:17:40 ཀློག་གྲངས། 5 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། རྒྱ་ནད་ཚད་འཁྲུ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་ཡིས་བསྟན།། རྒྱུ་རྐྱེན་མེ་དྲོད་མི་སྙོམས་ཆུང་བ་ལ།། དྲོད་རླངས་ཆེ་བའི་ཡུལ་སར་ཆུ་མང་འཐུངས།། ཟས་ཚོད་མ་ཟིན་ཤ་རིད་ཤིང་ཐོག་འབྲུ།། བཅུད་མེད་ཟས་ཀྱིས་མེ་དྲོད་ཕྱིར་ལ་བཏོན།། ཕྱི་ཡུལ་དྲོད་རླངས་ཆེ་བས་མཆིན་ཚད་སྐྱེས།། ལུས་ཀྱི་ཆུ་ཁམས་ཐུར་བསྐྱོད་འཁྲུ་བར་འགྱུར།། དབྱེ་བ་རླུང་མཁྲིས་ཁྲག་དང་བད་ཀན་བཞི།། དེ་རྟགས་སྙིང་ག་རྩིབ་ལོགས་བཤང་ལམ་ཟུག། ལུས་སྙོམ་ཁོང་པ་སྦོ་ཞིང་ཟས་མི་འཇུ།། མ་སྨིན་ཆུར་འབྱམ་སྨིན་པ་དེ་ལས་ལྡོག། རླུང་གྱུར་ལྦུ་བ་སྒྲ་བཅས་བུར་ཁུ་འདྲ།། ཆུར་འཁྲུ་སྐབས་སུ་འགག་ཅིང་གོང་བུར་འབྱུང་།། གཟེར་ཞིང་ཁ་སྐམ་བ་སྤུ་ལྡང་བ་ཡིན།། མཁྲིས་གྱུར་སེར་ནག་སྔོ་ལ་དྲི་མ་ཆེ།། བཤང་ཁ་ཚ་ཞིང་ལུས་རྔུལ་སྐོམ་དད་ཆེ།། ཁྲག་གྱུར་ཁྲག་ཏུ་འཁྲུ་ཞིང་གཞང་ཁ་འདྲུལ།། བད་གྱུར་སྐམ་འབྱར་གཉིད་ཆེ་ཡི་ག་འཆུ།། བཅོས་ཐབས་མ་སྨིན་དང་པོའི་དུས་ཉིད་དུ།། ནང་ནུབ་ཆུ་ཚན་བཏུང་ཞིང་སྨྱུང་བར་བྱ།། སེ་འབྲུ་བིལ་བ་ད་ཏྲིག་ཟུར་པ་སྒ།། འུ་སུའི་ཐང་གིས་སྨིན་བྱེད་འཁྲུ་བ་གཅོད།། བཤང་འགྱིངས་བྱི་ཏང་ག་དང་འབྲས་བུ་གསུམ།། པི་པི་ལིང་བསྐོལ་ཁྲུས་བཏང་ནི་རུས་དྲང་།། འབྲས་སམ་ཕྱེ་ཐུག་སྒ་སྤོད་བྲན་པ་དང་།། ལུག་དང་བ་ལང་སྐམ་སའི་ཤ་གསར་དང་།། དར་གསར་ཆང་གསར་བསྐོལ་གྲངས་མེ་དྲོད་སྦྱར།། ཟས་སྤྱོད་བསིལ་དྲོད་མཉམ་ཞིང་ཟས་ཚོད་བཟུང་།། གླ་སྒང་བོང་ང་དཀར་པོ་བིལ་བ་སྒ།། ཤིང་ཀུན་དུག་མོ་ཉུང་ཁུ་བསྡུས་འཇམ་བཏང་།། བིལ་བ་འུ་སུ་གླ་སྒང་བ་ལེ་ཀ། དོང་ག་བསྐོལ་གྲངས་ཁུ་བ་བླུད་པར་བྱ།། འཁྲུ་བ་མ་སྨིན་མི་བཅད་ཉེས་པ་ཆེ།། སྟོབས་ཆུང་ཟས་སྤྱོད་གཟབ་ཅིང་བཏང་སྙོམས་བཞག། རླུང་གྱུར་བིལ་བ་སྒ་དང་པི་པི་ལིང་།། བུ་རམ་ཏིལ་མར་སྦྱར་བཏང་འོ་དྲོན་བླུད།། མཁྲིས་གྱུར་དུག་མོ་ཉུང་དང་བོང་ང་དཀར།། འབྲས་ཁུ་སྦྲང་དང་སྦྱར་ལ་བླུད་པར་བྱ།། བོང་ང་དུག་མོ་ཉུང་དང་བ་ལེ་ཀ། བིལ་བ་གླ་སྒང་འབྲས་ཁུ་སྦྲང་སྦྱར་བླུད།། ཁྲག་གྱུར་ཏིལ་ནག་ཀ་ར་རའི་འོ་མ།། ཡང་ན་ཙན་དན་འབྲས་ཁུ་སྦྲང་སྦྱར་བཏང་།། ཧོང་ལེན་སྐྱེར་ཤུན་རྒྱ་སྐྱེགས་པི་པི་ལིང་།། སྨན་མར་འབྲས་ཀྱི་ཐུག་པ་སྦྱར་ལ་བཏང་།། བད་ཀན་ལས་གྱུར་བིལ་བ་ཨ་རུ་ར།། སྒ་དང་གླ་སྒང་བསྐོལ་བའི་ཁུ་བ་བླུད།། པ་ཏྲ་གླ་སྒང་བིལ་བ་མོན་ཆ་ར།། སྒ་དང་འུ་སུ་བུ་རམ་དར་བཅས་བྱིན།།བཅོས་རྗེས་གཅིན་མང་བཤང་བ་ཉུང་ལ་བསྐ།། ཕྱེན་གྱི་སྒྲ་ཐོན་ཟས་འཇུ་ནད་བྱང་རྟགས།། ཟས་དང་སྤྱོད་ལམ་གཟབས་པས་འཚོ་བར་འགྱུར།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཚད་པའི་འཁྲུ་བ་གསོ་བའི་ལེའུ་སྟེ་ལྔ་བཅུ་རྩ་དྲུག་པའོ།། །།

X