//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ང་བདུན་པ། དྲེག་ནད་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 16:18:44 ཀློག་གྲངས། 7 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། དྲེག་གི་ནད་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་ཡིས་བསྟན།། རྒྱུ་རྐྱེན་ཁྲག་འཁྲུག་བྱེད་པའི་ཟས་སྤྱོད་བསྟེན།། ཉིན་པར་གཉིད་ལོག་སྐྱིད་པར་འདུག་པ་དང་།། དྲག་ཤུལ་རྐྱེན་གྱིས་རླུང་ཁྲག་འཁྲུགས་པ་ཡིས།། རྐང་པའི་མཐེབ་མོ་ལག་པའི་གྲུ་མོར་གནས།། དང་པོ་ཁོལ་བུ་རྙིང་ནས་མཆེད་པར་འགྱུར།། དབྱེ་བ་རླུང་མཁྲིས་ཁྲག་དང་བད་ཀན་བཞི།། དེ་རྟགས་མངོན་ཚུལ་བརླ་རྐེད་ཚིགས་རྣམས་ན།། གཡའ་འགུལ་ཆག་སྙམ་ཚོར་མེད་ལྕི་བ་སྟེ།། ཡང་ཡང་ལྡང་ཞིང་སླར་ལྕི་འགྱུར་བ་ཡིན།། ནད་རྒྱས་གསར་དུས་པགས་པ་ཁྲག་ལ་གནས།། སྐྲངས་དམར་དྲོད་ཆེ་སྲ་ལ་སྔོ་ཐིག་བཅས།། ཤིན་ཏུ་ན་ཞིང་བྱ་རྨྱང་མང་བ་སྟེ།། རྟོགས་སླའི་དུས་ཡིན་དུས་འདིར་བཅོས་པ་གཅེས།། ཐ་མ་རྙིངས་ནས་རྩ་ཆུ་རུས་ཚིགས་ཁྱབ།། ལྷག་པར་སྐྲངས་ཤིང་མི་བཟོད་སྲ་ལ་ཧྲེམ།། གཞང་ཁ་རུས་ཚིགས་ཆད་པ་སྙམ་དུ་སེམ།། ཤུགས་རྒྱས་ཞ་འཐེང་འདི་དུས་གསོ་དཀར་འགྱུར།། ཁྱད་པར་རླུང་གྱུར་གཟེར་འཕྲིག་འཕེལ་འགྲིབ་བྱེད།། སྐྲངས་ལ་ནག་པོ་སྔོན་པོའི་ཐིག་ལེ་འོང་།། མཁྲིས་གྱུར་དྲོད་ཆེ་དམར་ལ་རེག་མི་བཟོད།། ཁྲག་གྱུར་ཚ་འབྲབ་མདོག་དམར་འདྲུལ་བར་བྱེད།། བད་ཀན་ལས་གྱུར་གཡའ་ལྕི་ཚོར་བ་མེད།། བཅོས་ཐབས་རླུང་བཅོས་ཅི་རིགས་རླུང་བསལ་ལ།། དེ་རྗེས་མང་དུ་གཏར་ལ་ཉུང་དུ་དབྱུང་།། ཙག་ཙག་ལྷང་ལྷང་ན་སར་རྔབས་རུ་གཟུགས།། སྐྲངས་ཆེ་དམར་ལ་ཐུར་མས་བཙག་པར་བྱ།། རླུང་གྱུར་བ་གཅིན་སྤོས་དཀར་འོ་མས་སྦྱང་།། དེ་འོག་སླེ་ཏྲེས་བསྐོལ་བའི་ཁུ་བ་དང་།། འོ་མ་བསྐོལ་བ་ཀ་ར་བཏབ་ལ་བཏང་།། རྒུན་འབྲུམ་ཤིང་མངར་ཀ་ར་མར་བསྐོལ་བླུད།། མཁྲིས་གྱུར་ཉེ་ཤིང་ཧོང་ལེན་འབྲས་བུ་གསུམ།། སླེ་ཏྲེས་པ་ཏོལ་འོ་མ་མར་བསྐོལ་བླུད།། གུར་གུམ་སྐྱེར་པ་བསྐོལ་ལ་སྦྲང་སྦྱར་བྱིན།། དེ་འོག་དུར་བྱིད་རྒུན་འབྲུམ་འོ་མར་སྦྱར།། བད་གྱུར་འབྲས་བུ་གསུམ་དང་སྦྲང་རྩི་བཏང་།། གླ་སྒང་གུར་གུམ་སྐྱེར་བསྐོལ་སྦྲང་སྦྱར་བླུད།། ནད་སྟོབས་ལྡན་ན་སྐྱུགས་རྗེས་རྩུབ་བཅོས་བྱ།། ཀུན་ལ་འབྲས་བུ་གསུམ་དང་ཚ་བ་ལྔ།། གནྡྷ་པ་ཏྲ་ཤིང་ཚ་བ་ཤ་ཀ། པི་ལིང་མཱུ་ལ་ཅུ་གང་བྱི་ཏང་ག། ཤུ་དག་སྤང་སྤོས་ལྕགས་གཡའི་ལྡེ་གུ་ཡིས།། དྲེག་ནད་གཟེར་བཅས་མ་ལུས་སེལ་བར་བྱེད།། དུར་བྱིད་ཨ་རུ་རྒྱམ་ཚ་པི་པི་ལིང་།། བཀྲུ་འཇམ་སྦྱོར་བ་དྲེག་འཇོམས་སྨན་མཆོག་ཡིན།། ནད་ནངསྐྱོན་སོལ་ན་ཕྱི་ནས་བྱུག་པས་བཅོས།། ཏིལ་མར་སྦྲང་རྩི་གུ་གུལ་ཐལ་ཏྲེས་བཙོད།། བསྐོལ་བའི་ལྡེ་གུ་བྱུགས་པས་དྲེག་ནད་སེལ།། ཁྲག་མཁྲིས་ལས་གྱུར་སྟག་ཚེར་ཤིང་མངར་བཙོད།། སྐྱེར་པ་ཙན་དན་རྒྱ་ཤུག་པུ་ཤེལ་རྩེ།། སྲན་ཆུང་ཀ་རའི་ལྡེ་གུ་གྲང་མོ་བྱུག། ཤུ་དག་རུ་རྟ་དུད་པ་སེར་པོ་གཉིས།། ཤུ་ཏིའི་ལྡེ་གུས་བད་རླུང་དྲེག་ནད་སེལ།། རྙིངས་ནས་མས་བཏང་བཀྲུ་སྨན་སྣུམ་འཆོས་བྱ།། ཀུན་ལ་བད་ཚིལ་རླུང་ཁྲག་གཙོ་བོར་བཅོས།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དྲེག་ནད་གསོ་བའི་ལེའུ་སྟེ་ལྔ་བཅུ་རྩ་བདུན་པའོ།། །།

X