//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ང་བརྒྱད་པ། གྲུམ་བུའི་ནད་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 16:20:04 ཀློག་གྲངས། 14 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། གྲུམ་བུའི་ནད་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་ཡིས་བསྟན།། རྒྱུ་རྐྱེན་རླན་སྣུམ་ཡུལ་དང་སྣུམ་བཅུད་ཟས།། དངས་མ་གནས་སུ་མ་སྨིན་ཆུ་སེར་རྒྱས།། ཤ་རུས་རྩ་རྒྱུས་ལ་གནས་གྲུམ་བུ་སྐྱེད།། དབྱེ་བ་ཤ་ཏྲེམ་རུས་ཏྲེམ་རྩ་ཏྲེམ་དང་།། ཆུ་ཏྲེམ་ཏྲེམ་དཀར་ཏྲེམ་ནག་རྣམ་པ་དྲུག།དེ་ཡི་རྟགས་ལ་སྤྱི་དང་བྱེ་བྲག་གཉིས།། སྤྱི་རྟགས་གྲང་ཤུམ་ཡུན་རིང་ཤ་ལྤགས་བརྩེ།། གདོང་སྣུམ་མགོ་བོ་རྐེད་པ་དཔྱི་མིག་ཟུག། ཤེད་ཆུང་སྒྱིད་སྐྱུར་ཤ་འབྲོས་རྔུལ་ཁ་སྙི།། རུས་ཚིགས་ཤ་རུས་འཁོལ་ཞིང་ཆུ་རྒྱུས་གྱོང་།། འགུལ་ཚེ་ལྷག་པར་ན་ཞིང་སྐད་ངན་འཆོར།། ཆུ་དམར་རྩ་འཁྱུག་ཕྲ་མགྱོགས་གཏིང་ན་རྒྱུག། བྱེ་བྲག་ཤ་ཏྲེམ་བད་མཁྲིས་ཤས་ཆེ་སྟེ།། ཤ་སྦོ་མདོག་ནག་ཡན་ལག་སྦྲིད་པ་དང་།། གློ་སྙིང་མི་བདེ་སྣ་ཁྲག་མང་དུ་འཛག། ཤ་རུས་འབྱེད་སྙམ་བེམ་པོར་བྱེད་པ་ཡིན།། རུས་ཏྲེམ་རླུང་གི་ཤས་ཆེ་སྐོམ་དད་ཆེ།། རུས་པ་ཚ་བ་སྐྱེ་ཞིང་འཇུ་ལ་སྐམ།། ཚིགས་རྣམས་གྲམ་ཞིང་ཟུག་ཆེ་འགུལ་མི་ནུས།། བསྒུལ་དང་སྒྲ་ཆེར་མི་བཟོད་གཡང་སྐྱུར་སེམ།། རྩ་ཏྲེམ་ཁྲག་གི་ཤས་ཆེ་བཀྲག་མདངས་ཉམས།། གློ་སྙིང་མི་བདེ་ལྟག་ཤ་ཆད་སྙམ་བྱེད།། རྩ་རྣམས་སྦོས་ཤིང་སྲ་ལ་ན་བ་ཡིན།། ཆུ་ཏྲེམ་ཆུ་རྒྱུས་གྱོང་འདར་རེངས་འཁུམས་སྐམས།། ཏྲེམ་དཀར་ཆུ་སེར་དཀར་པོ་གྲང་ཤས་ཆེ།། ཏྲེམ་ནག་ཆུ་སེར་ནག་པོ་ཚ་ཤས་ཆེ།། བཅོས་པའི་ཐབས་ལ་སྤྱི་དང་བྱེ་བྲག་གཉིས།། སྤྱི་བཅོས་དང་པོ་ཞག་ལྔའི་བར་དག་ཏུ།། བད་ཀན་ཆུ་སེར་སྦྱང་ཕྱིར་འབྲས་བུ་གསུམ།། སླེ་ཏྲེས་ཐང་བསྟེན་ཆུ་བསྐོལ་ཡང་ཡང་བཏུང་།། དེ་རྗེས་ཙན་དན་དཀར་དམར་གི་ཝཾ་དང་།། བཟང་དྲུག་ཆུ་སེར་སྨན་གསུམ་གེ་སར་གཉིས།། ཏིག་ཏ་སླེ་ཏྲེས་སྤྱི་ཞུར་འབྲས་བུ་གསུམ།། གླ་རྩི་སྤང་རྒྱན་བེ་དོ་བ་ཤ་ཀ། བོང་ཁྲག་ཀ་ར་སྦྱར་བ་ཉི་ཤུ་ལྔ།། དགུང་གཉིས་སེང་ལྡེང་ཁུ་བས་འཕུལ་ལ་བཏང་།། སེ་འབྲུ་ལྔ་པ་ནང་ནུབ་ཆུ་སྐོལ་བཏུང་།། དངས་མ་གནས་འཇོག་ཆུ་སེར་ཚ་བ་སྐེམ།། གླ་རྩི་གུར་ཀུམ་སྒ་རྒོད་གཉེན་པོའི་སྨན།། ཞོ་འམ་བོང་ཁྲག་ལ་སྦྱར་ལྡེ་གུར་བཏང་།། སྨན་རྗེས་འབྲས་བུ་གསུམ་གྱི་རྒྱུན་སྦྱོངས་བྱ།། ཤ་སྦོས་ཆུ་བ་འཁུམས་སམ་རུས་ཚིགས་ཟུག། ར་མཉེ་བ་སྤྲུ་ཉེ་ཤིང་ཆུ་ལུམས་བྱ།། རྗེས་ལ་སྤང་སྤོས་མར་དཀར་སྦྱར་བ་བྱུག། ཚིགས་མིག་ཆུ་སེར་གྲང་ཐུར་སྦྱོར་བས་འདོན།། ཁ་ཟས་འབྲས་དང་ཆག་ཚེ་སྲན་ཆེན་དང་།། ཁུར་མང་བ་ཡི་ཞོ་དར་བསྐོལ་གྲངས་ཆུ།། ཇ་སོགས་བསིལ་ལ་ཡང་བའི་ཟས་སྐོམ་བསྟེན།། རུས་སྐྱུར་སྣུམ་ལྕི་ཚ་སོགས་དུག་འདྲ་སྤང་།། མེ་ཉི་ཉིན་གཉིད་རླན་གྲངས་ཀུན་ལ་གཟབ།། ཚ་བ་བྱང་བའི་རྟགས་བྱུང་སྦྲང་ཆང་དང་།། བ་ཡི་རྣམ་ལྔས་ཆུ་སེར་ཚད་ལྷག་སྐམ།། སྐམ་སར་མི་རྔུལ་ཙམ་དུ་དལ་བར་བཅག། བྱེ་བྲག་ཤ་ཏྲེམ་གཟེ་མ་བ་སྤྲུ་བ།། ཤིང་ཚ་དོང་གྲ་མར་སྦྱར་ལྡེ་གུ་བཏང་།། ལྕ་བའི་ཁཎྡྲི་གཡེར་ཆུ་སྒ་ཆུ་བསྟེན།། རུས་ཏྲེམ་ག་པུར་བཟང་དྲུག་ཙན་དན་དཀར།། ཤིང་ཚ་བ་ལེ་ཀ་དང་པུ་ཤེལ་རྩེ།། བཅའ་སྒ་ནག་མཚུར་ཀ་ར་སྦྱར་ལ་བཏང་།། བོང་ཁྲག་དྲོན་མོ་གླ་རྩི་སྒ་སྦྱར་རམ།། བུ་རམ་སྦྲང་རྩི་མར་སྦྱར་ཏིང་ཁྲོལ་བཏང་།། གཏར་བསྲེག་མི་བྱ་རྗེས་ལ་བཤུལ་ཤ་བསྟེན།། རྩ་ཏྲེམ་དང་པོ་བ་ལེ་ཀ་ཡི་ཐང་།། དེ་འོག་གཡེར་ཆུ་བསྡུས་ཐང་བཏང་བར་བྱ།། རུ་རྟ་སེ་འབྲུ་ཤིང་ཚ་པི་པི་ལིང་།། སྒ་སྐྱ་ཨ་རུ་ར་དང་ཁ་རུ་ཚ།། སྦྲང་དང་སྦྱར་བའི་ལྡེ་གུ་བཏང་བར་བྱ།། གླ་རྩི་གུར་ཀུམ་ཨ་རུ་ལི་དོང་གྲ།། སྦྲང་རྩི་མར་དང་སྦྱར་བའི་ལྡེ་གུ་བཏང་།། རྩ་ཡི་དྲོད་འཆོར་གཏར་ག་མི་བྱ་སྤང་།། ཆུ་ཏྲེམ་འབྲས་བུ་གསུམ་དང་མཱུ་ལ་གསུམ།། འུ་སུ་ཚ་བ་གསུམ་དང་ཚྭ་སྣ་གསུམ།། སྦྲང་རྩི་མར་དང་སྦྱར་བའི་ལྡེ་གུ་བཏང་།། ཨ་རུ་རྒུན་འབྲུམ་འུ་སུ་ཤུ་མོ་ཟ།། ཚ་བ་ལྔ་དང་སྦྲང་རྩི་མར་སྦྱར་བཏང་།། བྱིན་གཞུག་རྩ་གཏར་ཚ་བ་བྱང་བ་དང་།། བཅོ་ལྔ་བཅུ་དྲུག་དཔྱི་མིག་གར་བབས་བསྲེག། ཆུ་རྒྱུས་འཁུམས་ན་བསྐུ་མཉེ་དྲག་ཏུ་བྱ།། ཏྲེམ་དཀར་ཆང་ནང་ཤིང་ཚ་ལི་དོང་གྲ།། སྦྲང་སྦྱར་རྩ་བའི་ཟན་ཆང་ཆུ་ལུམས་བྱ།། ར་མཉེ་བ་སྤྲུ་ཉེ་ཤིང་སྦྲང་མར་བསྟེན།། ཏྲེམ་ནག་ཨ་རུ་ཆུར་བསྡུས་ཞག་འགར་བཏང་།། གུར་ཀུམ་བཤལ་བྱ་གཟེ་མའི་སྨན་མར་སྦྱར།། ཀུན་ལ་སྐྱེད་ཆུང་རུས་རྩ་གཏར་བ་དང་།། གཟེབ་ཏུ་བཅུག་ལ་ཁ་བཅིང་ལན་མང་སྒྲིལ།། རྟ་ལ་བསྐྱོན་ཏེ་གསངས་ལ་ཆུ་ནང་སྐྱུར།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གྲུམ་བུའི་ནད་བཅོས་པའི་ལེའུ་སྟེ་ལྔ་བཅུ་རྩ་བརྒྱད་པའོ།། །།

   

X