//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་ང་དགུ་པ། ཆུ་སེར་གྱི་ནད་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 16:51:40 ཀློག་གྲངས། 6 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། ཆུ་སེར་ནད་ལ་གྱུར་ཚུལ་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་ཡིས་བསྟན།། དང་པོ་གྱུར་ཚུལ་ཁ་ཟས་དངས་མ་དེ།། མཁྲིས་པ་དམར་སྐྱུར་སྒྱུརལས་ཀྱིས་ཁྲག་ཏུ་འགྱུར།། ཁྲག་གི་སྙིགས་མ་མཁྲིས་པའི་ནང་དུ་གསོག། མཁྲིས་པའི་དངས་མ་ཆུ་སེར་ཉིད་དུ་འགྱུར།། གནས་ནི་ཤ་རུས་དོན་སྣོད་ཕྱི་ནང་ཁྱབ།། ཁྱད་པར་ཤ་མདངས་བར་དང་ཚིགས་པར་གནས།། ཚད་ནི་རང་གི་སྙིམ་པ་བཞི་རུ་བཤད།། དབྱེ་བ་ཆུ་སེར་རིགས་དང་འཇུག་པའི་སྒོ།། རིགས་ནི་ཆུ་སེར་དཀར་པོ་ནག་པོ་གཉིས།། ཆུ་སེར་དཀར་པོ་བད་རླུང་གྲང་བར་བསྡོངས།། ཆུ་སེར་ནག་པོ་ཁྲག་མཁྲིས་ཚ་བར་བསྡོངས།། འཇུག་སྒོ་ལྤགས་གྲམ་ཤར་རྒྱས་རྩ་རུ་རྒྱུག། རུས་ཞེན་དོན་བབས་སྣོད་དུ་ལྷུང་བ་འོ།། དེ་ཡི་རྟགས་ལ་སྤྱི་དང་བྱེ་བྲག་གཉིས།། སྤྱི་རྟགས་ཟ་འཕྲུག་ཐོར་པ་ལེབ་མོར་འོང་།། སྐབས་སུ་ལུས་ཀུན་སྦོ་ཞིང་སྐྲངས་པ་དང་།། ཤ་མདོག་སྔོ་ལ་རྩུབ་ཅིང་འབྲུམ་པ་འོང་།། གྲ་མ་ཕུབ་མས་རེག་ན་ཟ་འཕྲུག་བྱེད།། སྐྲ་དང་སྨིན་མ་བྱི་ཞིང་འདྲུགས་པ་འོ།། ཁྱད་པར་ཆུ་སེར་དཀར་པོ་རྩ་ཆུ་གྲང་།། ནམ་ཞོད་རླན་དུགས་ཆུར་ཞུགས་གྲངས་ཚེ་ལྡང་།། ལུས་དྲོས་དྲོད་བཅུད་ཟོས་རྗེས་བདེ་བར་མངོན།། ཆུ་སེར་ནག་པོ་རྩ་ཆུའི་ཚ་བ་སྐྱེ།། མེ་ཉིས་དྲོས་ཤིང་ཆང་འཐུངས་སྟོན་དུས་ལྡང་།། ཆུ་སེར་ལྤགས་གྲམ་ཁྱད་པར་ཟ་འཕྲུག་བྱེད།། ཐོར་ཆུང་མང་ལ་ཕྲུགས་ན་ཆུ་སེར་འཛག། ལྤགས་མདོག་སྔོ་རྩུབ་གྱོང་ལ་སྲིན་ཐོར་མང་།། ཤ་ལ་རྒྱས་ན་ཉྭ་སྒང་ཤུ་བ་འབྱུང་།། ཤ་ཀུན་འགུལ་འཕྲིག་སྐྲངས་ཤིང་སྦོ་བ་ཡིན།། རྩར་རྒྱུག་རྩ་ཀུན་སྦྲིད་དང་འཁྱུག་པ་དང་།། ཚ་མྱག་ཚ་བར་གྲང་བསིལ་ཟ་བེར་འོང་།། རྩ་མིག་ནང་དུ་སྲོག་ཆགས་རྒྱུ་བ་འདྲ།། རུས་ཞེན་རུས་པ་ལྷང་ལྷང་ན་བ་དང་།། ཚིགས་དམིགས་ན་ཞིང་བརྐྱང་བསྐུམ་འགྲོ་འདུག་དཀའ།། ཚིགས་ཁ་སྐྲངས་ཤིང་ཟ་ལ་ཤུ་ཐོར་འབྱུང་།། དོན་བབས་སྙིང་ལ་ཆུ་སེར་ཞུགས་པ་ཡིས།། ཤེས་པ་འཕྱོ་འདར་སྟོད་རྒྱངས་སྙིང་མི་དགའ།། དངངས་ཤིང་ཚིག་པ་ཟ་ལ་ཁྲོ་ཚིག་བྱེད།། བྲང་ལ་སྲིན་ཐོར་ཤ་བཀྲ་འོང་བ་དང་།། ལྕེ་ལ་ཐོར་པ་རྒྱུན་དུ་འོང་བ་ཡིན།། གློར་ཞུགས་གློ་མང་མིག་དང་རྐང་བོལ་སྐྲངས།། བྲང་རྒྱབ་གཟེར་ལ་སྐད་འགགས་མཚུལ་པ་སྐམ།། མཆིན་ཞུགས་མིག་ནས་མཆི་མ་རྒྱུན་དུ་འཛག། ལུས་ལྕི་སྣ་ཁྲག་འོང་ཞིང་ཕོ་མཆིན་ན།། མཆེར་ཞུགས་སྦོ་འཁྲོག་མཆུ་ནད་རྒྱུན་དུ་འབྱུང་།། མཁལ་ཞུགས་རྐེད་པ་དཔྱི་དང་བརླ་སུལ་ན།། སྨད་ལྕི་རྐང་པ་སྦྲིད་ཅིང་རྩ་ཀུན་འཁྱུག། སྣོད་བབས་མིག་སེར་ཚ་འགྱུར་སྣ་གླང་ལྡང་།། སྐབས་སུ་ཆུ་སྡོམ་སྐབས་སུ་སེར་སྨུག་འཁྲུ།། བཅོས་པའི་ཐབས་ལ་སྤྱི་དང་བྱེ་བྲག་གཉིས།། སྤྱི་ལ་བཅོས་ཐབས་སྨན་དཔྱད་ཟས་སྤྱོད་བཞི།། ཆུ་སེར་དཀར་ནག་གཉེན་པོ་སོ་སོར་བསྟེན།། ཆུ་སེར་དཀར་པོ་ཆང་དང་ལུག་ཤ་དང་།། མར་རྙིང་འཕྱི་བ་རྟ་བོང་ཤ་རྣམས་དང་།། བུ་རམ་ཆང་སྦྱར་གཟེ་མའི་ཟན་ཆང་དང་།། ར་མཉེ་རྩ་བའི་ཟན་ཆང་བུར་སྦྱར་བཏང་།། སྤྱོད་ལམ་རླན་གྲངས་བསེར་བུ་ཕུབ་ལས་སྤང་།། སྨན་དུ་ར་མཉེ་ལྕ་བ་གཟེ་མ་དང་།། ཉེ་ཤིང་བ་སྤྲུ་གོང་མས་ཆ་བསྐྱེད་པའི།། བསྡུས་ཁུའི་ཁཎྡྲི་སྦྲང་དང་བུ་རམ་སྦྱར།། བཅའ་སྒ་པི་པི་ལིང་དང་ཙི་ཏྲ་ཀ། སུག་སྨེལ་ཛཱ་ཏི་སྦྱར་ཏེ་བཏང་བར་བྱ།། རྩ་བ་ལྔ་དང་སེང་ལྡེང་འབྲས་བུ་གསུམ།། ཟོ་མར་བཅས་པའི་མར་ཁུ་བུ་རམ་སྦྱར།། བཅའ་སྒ་ལ་སོགས་ཕྱེ་མ་ཁ་ཚར་གདབ།། གྲང་བའི་ཆུ་སེར་མ་ལུས་འཇོམས་པར་བྱེད།། སྦྲང་སྨྱོན་ཆ་ཡིས་གོམས་པས་བྲིད་ལ་བསྟེན།། བཙན་དུག་ཨ་རུ་གུ་གུལ་ཤུ་དག་དང་།། རུ་རྟ་ཤིང་ཀུན་ཛཱ་ཏི་བྱི་ཏང་ག། ཙི་ཏྲ་ཀ་དང་དྲོད་སྨན་བུ་རམ་སྦྱར།། རིལ་བུ་སྲན་ཙམ་བསྟེན་ན་ཆུ་སེར་སྐེམ།། མུ་ཟི་འབྲི་མར་ནང་དུ་བསྡུས་པ་ཡིས།། མར་ནག་མདོག་འགྱུར་སྦྲང་དང་སྦྱར་ལ་བཟའ།། དཔྱད་དུ་གང་བབས་གསང་ལ་མེ་བཙའ་བྱ།། ཆུ་སེར་ནག་པོ་ཟས་སྤྱོད་བསིལ་བས་བཅོས།། བ་ར་མཛོ་ཡི་ཞོ་དར་མར་གསར་དང་།། ཆབ་ཚ་བ་ལང་རི་དྭགས་ཤ་གསར་བསྟེན།། ཆང་དང་མར་རྙིང་རུལ་སུངས་བུ་རམ་སྤང་།། སྤྱོད་ལམ་བསིལ་སར་དལ་བར་གནས་པར་བྱ།། སྨན་དུ་སྔོན་བུ་ལྕུམ་རྩ་ཨ་རུ་ར།། ཐར་ནུ་རེ་ལྕག་ཆུ་རྩ་བྱི་ཏང་ག། ཆུ་སེར་སྨན་གསུམ་བ་ཆུར་སྦངས་པས་བཀྲུ།། དེ་རྗེས་རྩ་བཤལ་བཏང་ལ་ཆུ་སེར་སྦྱངས། སྐྱེར་པ་སེ་རྒོད་སེང་ལྡེང་བ་རུ་ཡི།། ཕྱེ་མ་གུ་གུལ་བཅུ་དང་སྦྱར་ལ་བཏང་།། བ་ཡི་རྣམ་ལྔ་སེང་ལྡེང་སྨན་མར་སྦྱར།། དངུལ་ཆུའི་རིལ་བུ་བསྟེན་པས་ཆུ་སེར་སྐེམ།། དཔྱད་དུ་གང་ལ་བབས་པའི་རྩ་ལ་གཏར།། བྱེ་བྲག་ཆུ་སེར་ཤ་ལྤགས་རྒྱས་པ་ལ།། སྔོན་བུ་སྲུབ་ཀ་ཞོ་དང་སྦྱར་བས་བྱུག། སོ་མ་ར་ཛ་ཤུ་དག་ལི་ཤི་དང་།། ཙི་ཏྲ་ཀ་དང་མར་སྦྱར་བྱུག་པར་བྱ།། སྲད་དཀར་ཐལ་བ་རྟ་བོང་འོ་མས་བྱུག། ཐལ་ཀ་རྡོ་རྗེ་གཡེར་མ་མར་སྦྱར་བྱུག། སྦུར་བ་དོང་གྲ་འོ་མ་སྦྱར་བ་འམ།། བ་རུ་ར་དང་སྦྲུལ་ཐལ་མར་སྦྱར་བྱུག། སོ་མ་ར་ཛ་བ་བླ་བ་གཅིན་བྱུག། མ་ཕན་རྩ་སྦྱོངས་སེང་ལྡེང་སྨན་མར་སྦྱར།། རྩར་རྒྱུག་གཏར་དང་རྩ་སྦྱོངས་རྗེས་ལ་སྐམ།། རུས་ཞེན་ལྟོ་དང་རྩ་ནས་སྦྱངས་བྱས་ལ།། རྩ་བ་ལྔ་དང་མུ་ཟིའི་སྨན་མར་སྦྱར།། ཚིགས་དམིགས་ཆུ་སེར་ལྟ་བུར་མེ་ཐུར་བྱ།། ཤ་ལྤགས་རྩ་རུས་ཀུན་ལ་ཆུ་ལུམས་བསྔགས།། དེ་རྗེས་སེང་ལྡེང་སྨན་མར་ནད་རྗེས་བཅད།། སྙིང་ལ་ཞུགས་ན་སྦལ་རྒྱབ་ཆིག་ཐུབ་དང་།། གསེར་རྡོ་མཚལ་དཀར་ཕ་ཝཾ་ལོང་བུ་དང་།། ཚ་ལ་བཟང་དྲུག་ཆུ་སེར་སྨན་གསུམ་དང་།། གུ་གུལ་ཤིང་ཀུན་གླ་རྩི་སྙིང་ཞོ་ཤ། རུ་རྟ་སྐྱུ་རུ་ར་དང་ཨ་ག་རུ།། ཨ་རུ་ར་དང་ཀ་ར་སྦྱར་ལ་བཏང་།། སྙིང་རྩ་གཏར་ཞིང་ཚིགས་པ་དྲུག་པ་བསྲེག། བཙན་དུག་རིལ་བུ་སེང་ལྡེང་སྨན་མར་སྦྱར།། གློར་ཞུགས་ཅུ་གང་རུ་རྟ་ཤིང་མངར་དང་།། ཙན་དན་རྒུན་འབྲུམ་ཆུ་སེར་སྨན་གསུམ་དང་།། ག་དུར་དམར་པོ་གསུམ་དང་སྦྲང་སྦྱར་ལ།། གློ་ཡི་རྩ་གཏར་ཚིགས་པ་བཞི་ལྔ་བསྲེག། མཆིན་མཆེར་ལ་ཞུགས་རྩ་ལྟོས་སྦྱང་བ་གཅེས།། གུར་ཀུམ་བྲག་ཞུན་གླ་རྩི་པི་པི་ལིང་།། ཀ་ར་སྦྱར་བཏང་མཆིན་པའི་རྩ་ལ་གཏར།། མཁལ་བབས་དམར་པོ་བཞི་ཡི་ཐང་བཏང་ཞིང་།། རྩ་སྦྱོངས་རྗེས་ལ་རྩ་བའི་སྨན་མར་སྦྱར།། གང་དུ་བབས་པའི་གསང་དུ་མེ་བཙའ་བྱ།། སྣོད་དུ་ཆུ་སེར་བབས་པ་སྦྱོངས་ཀྱིས་དབྱུང་།། མདོར་བསྡུས་ཆུ་སེར་འཕེལ་བས་ནད་འགྱུར་ཏེ།། ཤ་བཀྲ་གླང་ཤུ་སྲིན་ཐོར་ཁྱེ་མ་དང་།། ཤུ་བ་ཟ་རྐོང་ཟ་འཕྲུག་ཆུ་སེར་བྱེད།། འོར་དང་སྐྱ་རྦབ་དམུ་ཆུ་ཆུ་སེར་བྱེད།། སུར་ཡ་མེ་དབལ་དྲེག་གྲུམ་གག་ལྷོག་དང་།། རྙོགས་པའི་ཚ་བ་ཐམས་ཅད་ཆུ་སེར་བྱེད།། མགོ་དང་ཡན་ལག་བྱང་ཁོག་ལ་སོགས་པ།། རྨ་ཡི་ཉེས་པ་ཐམས་ཅད་ཆུ་སེར་བྱེད།། འབྲས་དང་མཛེ་ནད་ཆུ་སེར་ལས་འབྱུང་བས།། དེ་ཕྱིར་ཆུ་སེར་ནད་ལ་བྱ་ར་གཅེས།། དངུལ་ཆུ་མུ་ཟི་སེང་ལྡེང་སོ་མ་ར།། ཐལ་ཀ་རྡོ་རྗེ་གུ་གུལ་དཀར་ནག་གཉིས།། སྐྱེར་པ་བྲག་ཞུན་སྔོ་ཡི་ཚ་བ་གསུམ།། བྱང་པ་རྩ་བ་ལྔ་དང་བོང་བུའི་ཤ། སྦྲང་རྣམས་ཆུ་སེར་འཇོམས་པའི་གཉེན་པོ་ཡིན།། ནད་གང་བསྡོངས་པའི་གཉེན་པོ་བསྡེབས་ཏེ་བསྟེན།། ཆུ་སེར་ཟད་ན་ཤ་དང་ལྤགས་པ་སྐམས།། ཉམ་སྟོབས་མི་སྐྱེ་ཤ་དང་ཆང་གིས་གསོ།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཆུ་སེར་གྱི་ནད་གསོ་བའི་ལེའུ་སྟེ་ལྔ་བཅུ་རྩ་དགུ་པའོ།། །།

X