//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་རེ་གཅིག་པ། པགས་པའི་ནད་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 16:53:01 ཀློག་གྲངས། 13 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། ལྤགས་ནད་རྒྱུ་རྐྱེན་དབྱེ་བ་བཅོས་ཐབས་གསུམ།། རྒྱུ་ནི་སྲིན་དང་ཆུ་སེར་འཕེལ་བ་ལ།། གདོན་དང་འདུ་བ་འཁྲུགས་པས་ལྤགས་ནད་སྐྱེད།། དབྱེ་བ་ཤ་བཀྲ་གླང་ཤུ་མཛེར་པ་དང་།། ཟ་རྐོང་ཤུ་བ་སྲིན་ཐོར་ངོ་ཤིག་དང་།། ཁབས་དང་ཁྱེ་མ་ལ་སོགས་སྒྲ་ཡིས་བརྟག། བཅོས་ཐབས་སྦྲུལ་ནག་པགས་པ་ནུས་ལྡན་བསྲེགས།། བ་རུའི་མར་སྦྱར་གླང་ཤུ་ཤ་བཀྲ་སེལ།། སོ་མ་ར་ཛ་ལྡོང་རོས་བ་ཆུ་བྱུག། ཕག་ཚིལ་མུ་ཟི་གླང་ཤུ་ཤ་བཀྲ་སེལ།། མཛེར་པ་ལྤགས་ལ་དྲངས་ཏེ་བཙོད་ཤེལ་བསྲེག། ཟ་རྐོང་གང་ཉེ་གཏར་ལ་ཆུ་ལུམས་བྱ།།ཟ་འཕྲུག་རྩབས་བཀྲུས་ནིམ་པ་ནག་མཚུར་ཏིལ།། གི་ཝཾ་རྩབས་དང་སྦྱར་བའི་ལྡེ་གུ་བྱུག། སོ་མ་ར་ཛ་ཤུ་དག་ཙི་ཏྲ་ཀ། ལི་ཤི་ཟོ་མར་ཤུ་བ་ཟ་རྐོང་སེལ།། ཤུ་བ་ཐང་ཤིང་རུ་རྟ་ལྡོང་རོས་མར།། ཡང་ན་མུ་ཟི་ཚ་ཕབས་དུ་བ་བྱུག། སྔོ་ཡི་ཚ་བ་གསུམ་དང་ར་དུག་པ།། ཐར་ནུ་ཆུ་རྩ་མར་དཀར་ཤུ་བ་སེལ།། སྲིན་ཐོར་དྭ་བའི་རྩ་བ་ཙི་ཏྲ་ཀ། བྱི་ཏང་ག་དང་བཙན་དུག་སྦྱར་བ་བྱུག། ངོ་ཁབས་ཁྱེ་མ་སྦྲང་བཙོད་ལྡེ་གུ་བྱུག། རྟ་དཀར་རྨིག་པ་བསྲེགས་ཐལ་མར་གསར་རམ།། ཟི་ར་དཀར་ནག་ཡུངས་ཀར་འོ་མ་ཏིལ།། ཡང་ན་སྐྱེར་པ་སེང་ཕྲོམ་བྲྀ་ཧ་ཏི།། སེང་ཕྲོམ་སྤྲ་ཚིལ་སྤོས་དཀར་པུ་ཤེལ་རྩེ།། བུ་རམ་སྦྲང་མར་བ་གཅིན་བསྐོལ་བ་བྱུག། རྨེ་བ་ངོ་ཁབས་ཁྱེ་མ་སེལ་བར་བྱེད།། གདོང་པ་པདྨ་ཟླ་བ་ལྟ་བུར་འགྱུར།། སེར་པོ་གཉིས་དང་རུ་རྟ་དུག་མོ་ཉུང་།། དུད་པའི་ལྡེ་གུས་ཤུ་བ་ཤ་བཀྲ་དང་།། གཡན་པ་ལྤགས་ནད་མ་ལུས་སེལ་བར་འགྱུར།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལྤགས་པའི་ནད་གསོ་བའི་ལེའུ་སྟེ་དྲུག་ཅུ་རྩ་གཅིག་པའོ།། །།

X