//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་རེ་གཉིས་པ། ཕྲན་བུའི་ནད་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 16:53:44 ཀློག་གྲངས། 10 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། ཕྲན་བུའི་ནད་ཀྱི་གསོ་ཐབས་བསྟན་པ་ནི།། ཉྭ་ལོག་འཁྲུ་སྐྱུག་བྱུང་ན་མཐེབ་སྲིན་བསྲེག། འདོད་ཆགས་རྩེ་མོ་ཞེ་སྡང་ཚིལ་བུ་དང་།། གཏི་མུག་འཁོར་ལོ་བནྡེའི་མཁྲིས་པ་དང་།། བོན་པོའི་ཐལ་བ་འདྲེ་འཇིགས་ཐང་ཆུ་དང་།། བརྟན་པོའི་དྲེག་པ་དྲི་ཅན་ལྟེ་བ་རྣམས།། དྲི་ཆུར་སྦྱར་བ་ཕྱིར་བྱུག་ཁོང་དུ་བཏང་།། ཡང་ན་བྱ་ཟེ་ཕག་སྣ་ངུར་པའི་ཤ། རྡོ་དྲེག་གླ་རྩི་བུལ་ཏོག་ཤུ་དག་དང་།། སུག་སྨེལ་ཆུ་གྲང་འཕུལ་བཏང་གོས་ཀྱིས་བྱིབ།། ཡང་ན་སྦལ་པ་སྡིག་པ་སྟག་ཁྲ་བོ།། གླ་རྩི་དོམ་མཁྲིས་གི་ཝཾ་དྲི་ཆུར་སྦྱར།། གུ་གུལ་ཐང་བཏང་ཉྭ་སུལ་ལྕགས་ཀྱིས་བསྲེག། སྐྱུག་ན་སྐེ་སྟོང་དྲུག་པ་ལྷེན་སྣ་བསྲེག། སྲེ་ལོང་ཐང་བཏང་འཁྲུ་ན་ལྟེ་འོག་བསྲེག། ཁ་ཟས་བསིལ་དྲོད་ནད་ཀྱི་ཟོ་དང་སྦྱར།། མེས་འཚིག་རྨ་ལ་ཉ་ཡི་མཁྲིས་པ་དང་།། དོམ་མཁྲིས་སྦལ་པའི་ཁྲག་དང་སྦྱར་ལ་གདབ།། ཡང་ན་བུལ་ཏོག་བྲག་སྤོས་ཕྱེ་མ་གདབ།། ཚབས་ཆེ་བ་ལ་ཁོང་དུ་ག་པུར་དང་།། ཙན་དན་གུར་ཀུམ་གི་ཝཾ་མཁྲིས་སྣ་བཏང་།། ཆུ་རུག་ཤོ་མང་ཞོ་བཙགས་སྦང་འཇིབ་བྱ།། ཆུ་ལ་གནས་པའི་མཁྲིས་པ་མཐའ་དག་དང་།། ག་པུར་ཅུ་གང་གུར་ཀུམ་ཧོང་ལེན་དང་།། བུལ་ཏོག་བྲག་སྤོས་ཆུ་རྩ་རྨ་བཙིར་གདབ།། ཁབ་བམ་མདེ་འུ་ཁོང་དུ་ཤོར་བ་ལ།། ཨ་བར་སྐྱུར་གསུམ་གོང་མས་ཆ་བསྐྱེད་ལ།། ཁབ་ལེན་ཕྱེ་མ་སྲིན་བལ་ཆུ་སྦྱར་བཏང་།། མགུལ་དུ་མི་གཞུག་གན་རྐྱལ་ཉལ་ལ་བསྡད།། སྲིན་གྱིས་དྲིལ་ནས་བཤང་སྒོར་འབྱིན་པར་འགྱུར།། ཤ་འམ་ཟན་ལ་སོགས་པས་བརྣངས་གྱུར་ན།། རྐང་པའི་མཁྲིག་མ་གཉིས་ནས་ལག་པས་བཟུང་།། རྒྱབ་ཏུ་ཁ་བུབ་ཁུར་ལ་ཅུང་ཟད་སྒུར།། སྐེ་རགས་རྡོ་ཡིས་རྐང་མཐིལ་གཉིས་སུ་བརྡེག། དེ་ནས་རོ་སྟོད་རྒྱབ་པས་ཅུར་གྱིས་འབྱིན།། གྲེ་བར་གྲ་མ་ཟུག་ན་སྦྲུལ་ཚིལ་བྱུག། ནས་ཕུབ་ཐང་བཏང་བ་ཤ་ཁམ་ཆེར་བཟའ།། གྲེ་བར་རུས་པ་ཟུག་ན་གོ་བོ་ཡི།། གྲེ་བ་གྲོ་ཆང་ནང་སྦངས་ཁུ་བ་བྱིན།། ཉ་རུས་ཟུག་ན་སོ་བྱའི་ཤ་ཁུ་འམ།། སྲམ་གྱི་སྣ་དང་མཆེ་བའི་ཁུ་བ་བཏང་།། གནའ་བའི་རྭ་རུའི་དུམ་བུ་མུར་བར་བྱ།། སྡོམ་དང་སྡིག་པ་ཁོང་དུ་སོང་བ་ལ།། སྲད་དཀར་རམ་པ་ཆང་སྦྱར་ཁོང་དུ་བཏང་།། ཆང་ནད་སྒ་གཡེར་ཚྭ་བཏགས་ཆང་སྦྱར་བཏང་།། འཕྱི་མཁྲིས་དྲོན་མོ་མིད་ན་ཆང་ནད་འབྱང་།། ཤ་བ་གནའ་བའི་ཁྲག་གཉིས་དྲོན་མོ་ལ།། ཚྭ་བཏབ་བཏང་ན་ཆང་ནད་གཏན་དུ་འབྱང་།། སྔོ་སྒའི་ཚ་བ་སྨན་ཆུ་བསྟེན་པར་བྱ།། སྣེ་འུ་ལྷགས་ན་རང་གི་དྲི་ཆུ་བྱུག། ཕྱིང་པ་ཚ་ཆུར་བཙོས་པས་སྐྲངས་པ་མནན།། མཐེ་བོའི་སེན་མོ་སེར་ཙམ་བསྲེག་པར་བྱ།། གཉའ་རེངས་ལྟག་དགྱེ་ཚྭ་མར་བྱུགས་ལ་མཉེ།། བསེ་དྲི་ཏི་ཚ་ཤུག་ཐལ་རྔུལ་སར་བྱུག། རྐང་ལག་ཁ་བས་ཕྱིད་ན་ཆུ་ཡིས་བསྒྲང་།། རྣ་བར་སྲོག་ཆགས་ཤོར་ན་རྒྱ་ཚ་དང་།། ཤིང་ཀུན་མར་ནག་དུགས་བསྲོས་ཚུགས་ཚད་བླུག། ནུ་མ་སྐྲངས་ན་ལྟོ་བཀུག་ཐང་གིས་སྦྱང་།། སྤེན་ཐལ་གནའ་བའི་གཞུག་སྤུ་རྒྱ་ཚ་རྣམས།། བྱིས་པའི་ཆུ་ལ་སྦྱར་ལ་ཐོ་རངས་བཏང་།། ཕིགས་ནས་དཔྱི་རུས་བསྲེགས་ཐང་ལྕག་ཏུ་བཏང་།། ཟུག་ཆེ་སྤང་རྒྱན་དྲོད་སྨན་ཤིང་མངར་ལྕག། ནུ་མའི་ཚབས་དང་སྤུ་འགགས་སྐྲངས་པ་སྦྱོང་།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཕྲན་བུའི་ནད་གསོ་བའི་ལེའུ་སྟེ་དྲུག་ཅུ་རྩ་གཉིས་པའོ།། །།

X