//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་རེ་བཞི་པ། གཞང་འབྲུམ་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 16:55:19 ཀློག་གྲངས། 21 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། དགྲ་ལྟར་སྲོག་འཕྲོག་གཞང་འབྲུམ་གསོ་བ་ལ།། རྒྱུ་རྐྱེན་དབྱེ་བ་རྟགས་དང་བཅོས་ཐབས་བཞི།། རྒྱུ་རྐྱེན་ཁྲུས་དྲགས་བཤང་ལམ་གཅེ་འུས་བཙན།། སྟན་སྲབ་ཙོག་འདུག་བཤང་གཅི་ཕྱེན་འགག་བཙིར།། བཞོན་བསྟེན་ཐུར་སེལ་རླུང་འཁྲུགས་གཞང་འབྲུམ་སྐྱེད།། དབྱེ་བ་བད་རླུང་ཁྲག་མཁྲིས་སྐམ་གཤེར་རོ།། དེ་རྟགས་འབྲུམ་པས་གཞང་བཀག་ཐུར་སེལ་ལོག། ཉེས་པ་འཁྲུགས་ཏེ་དྲོད་ཆུང་ཡན་ལག་ན།། རླུང་འཁྱིམ་ཁོང་སྦོ་མགོ་འཁོར་ཡི་ག་འཆུ།། སྟོབས་ཆུང་ཤ་སྐམ་མཆིལ་མང་རུས་ཚིགས་ན།། གཅིན་མང་བཤང་བ་ཉུང་ཞིང་འཁྲུའམ་སྐམ།། ཆུ་སྲི་མཚན་མ་ན་འབྲབ་གཞང་ཁ་གཟེར།། དྲི་མ་ཁྲག་བཅས་སུལ་ལས་གྲངས་ཕྱོགས་དཔག། ཁྱད་པར་བད་གྱུར་སྦོ་ཞིང་མེ་དྲོད་ཆུང་།། ཡི་ག་འཆུ་ཞིང་ཆམས་འདེབས་མཆིལ་མ་མང་།། གཅིན་སྲི་ཆུ་སོར་ཟུག་ཅིང་ན་ལ་གཟེར།། འཁྲུ་མདོག་སྐྱ་ལ་བད་ཀན་བེ་སྣབས་མང་།། ཁྲག་དང་ཆུ་སེར་མི་འཛག་འབྲུམ་པ་དཀར།། གཡའ་ཞིང་འཕྲུག་འདོད་ཚོར་བ་ཆུང་བ་ལ།། པགས་པ་སེན་མོ་མིག་སྤྲིན་གདོང་པ་སྐྱ།། རླུང་གྱུར་དྲི་མ་བཤང་སྐམ་ཚ་ལ་འཚག། སྒྲ་དང་བཅས་ཤིང་སྐ་སླ་འདྲེས་མར་འཁྲུ།། མགོ་དང་ཕྲག་པ་བརླ་དང་རྩིབ་ལོགས་དང་།། ཆུ་སོ་ན་ཞིང་དབུགས་རྒོད་ལུས་དྲོད་ཆུང་།། པགས་པ་སེན་མོ་གདོང་མིག་འབྲུམ་པ་ནག། ཁྲག་གྱུར་འབྲུམ་པ་བྱུ་རུ་འོལ་སེ་འདྲ།། ཤིན་ཏུ་ཚ་ཞིང་ན་ལ་ཁྲག་མང་འཛག། མཁྲིས་གྱུར་ཚ་བ་སྐྱེ་ཞིང་སྐོམ་དད་ཆེ།། ལུས་རྔུལ་གཞང་ནག་དམར་སེར་དྲི་བཅས་འཁྲུ།། འབྲུམ་པ་དམར་སེར་སྔོ་ལ་ཁྲག་སླ་འཛག། པགས་པ་སེན་མོ་མིག་ཆུ་སྔོ་སེར་ལྗང་།། གཞང་སོར་ཕྱེད་དང་ལྔ་ལས་གཉེར་མ་གསུམ།། ཕྱིར་བྱུང་གསར་པ་གསོ་བ་སླ་བ་སྟེ།། བར་མར་བྱུང་དང་ལོ་གཅིག་འདས་གསོ་དཀའ།། ནང་གནས་འདུས་པ་ལོ་འདས་གསོ་བ་ཙམ།། ལུས་སྐྲངས་གཞང་རྣག་རིམས་བཏབ་སྐྱུག་པ་དང་།། སྙིང་ག་རྩིབ་ལོགས་ན་དང་ལྷན་སྐྱེས་སྤང་།།བཅོས་པའི་ཐབས་ལ་སྤྱི་དང་བྱེ་བྲག་གཉིས།། དང་པོ་ཨ་རུ་ར་དང་བྱི་ཏང་ག། དུག་ཉུང་ཙི་ཏྲ་ཀ་དང་དར་བ་བླུད།། ཨ་རུ་ཀཎྡྲི་ཀ་རི་ཙི་ཏྲ་ཀ། གང་རུང་སྦྱར་བྱུགས་དར་བ་བླུག་ལ་བླུད།། ཛཱ་ཏི་རུ་རྟ་ཐལ་ཏྲེས་ཨ་ག་རུ།། ཤུ་ཏི་བསེ་ཡབ་ཐང་ཤིང་རོ་སྨད་བྱུག། བཤང་གཅི་འགགས་ན་འོ་མ་མར་གསར་བྱུག། གཟེ་མ་བ་སྤྲུ་ཐང་ཤིང་ཁུ་བ་བླུད།། ཆུ་མཚན་ཚནལུས་སྤྱིང་སྤ་འབྲུ་ཞུན་མར་བྱུག། བྱ་བྲུན་པི་པི་ལིང་དང་འོལ་མོ་སེ།། ཡུང་བ་བ་གཅིན་བྱུག་དང་རེང་བུ་གཞུག། མི་སྐྲ་བྱི་ལ་སྦྲུལ་ལྤགས་མོན་ཆ་ར།། མར་སྦྱར་དུད་བདུག་དེ་དག་གཞང་འབྲུམ་འཇིག། ཐོར་པ་བྲུད་དང་གཏར་བས་ཁྲག་ངན་དབྱུང་།། མ་ཞིག་ལྟོས་སྦྱངས་ཉི་མ་བདེ་འདེབའི་སར།། རྡེའུ་འདོན་པ་ལྟ་བུར་ལུས་བཅོས་ལ།། བལྟ་དང་བཅད་པའི་ཆ་བྱད་ཚད་ལྡན་པས།། ཐོར་པ་བཞར་ཞིང་ལྕགས་དང་མར་གྱིས་བསྲེག། དེ་རྗེས་རོ་སྨད་སྨན་མར་བྱུག་པར་བྱ།། གཡས་གཡོན་མདུན་རྒྱབ་ཐོར་པ་རིམ་པ་ཡིས།། ཞག་བདུན་བར་བཅད་འབྲུམ་པ་རེ་རེ་བསལ།། ཙི་ཏྲ་ཀ་བཏབ་ཞོ་བསྣན་དར་བ་བཏུང་།། ཤ་ཁུའམ་སྲན་ཁུ་དར་བར་བཅས་པ་བཟའ།། དར་བ་འཇམ་རྩུབ་བར་མ་མེ་དྲོད་དཔག། དར་བས་གཞང་འབྲུམ་ནད་བཅོམ་སླར་མི་ལྡོག། བྱེ་བྲག་བད་གྱུར་རྒོད་མ་ཁ་ཕྱེ་སྦྱར།། སོ་ཆ་དུད་པ་པི་པི་ལིང་དང་མར།། རེང་བུའམ་འབྲུ་མར་སྦྱར་བ་མས་བཏང་བྱ།། རླུང་གྱུར་སེ་འབྲུའི་ཁུ་བ་ཟི་ར་གཉིས།། ལ་ལ་ཕུད་དང་པ་ཏྲ་སྒ་སྦྱར་བཏང་།། ཨ་རུ་བ་ཆུར་བཙོས་ཕྱེ་བུར་སྦྱར་བྱིན།། ཁྲག་གྱུར་དྲི་མནམ་ཟུངས་བསྲུང་མི་བཅད་བཞག། མཚལ་འདྲ་བཅད་དེ་ཤ་མ་ལི་ཡི་ཤུན།། སེང་ཕྲོམ་བཙོད་དང་ཧོང་ལེན་དུག་མོ་ཉུང་།། ཙན་དན་ཤིང་མངར་པུ་ཤེལ་ནཱ་གེ་སར།། ཞིབ་བཏགས་འབྲས་བཀྲུས་ཆུ་དང་སྦྱར་ལ་བླུད།། དུག་མོ་ཉུང་ཤུན་འབྲས་བུ་ཨ་བྱག་དང་།། གེ་སར་ཨུཏྦལ་སེང་ཕྲོམ་སྨན་མར་བཏང་།། སྟང་ཟིལ་ཙན་དན་པུ་ཤེལ་ར་ཁྲག་དང་།། ཀ་ར་འབྲས་ཀྱི་ཆུ་བླུད་ཏིལ་ནག་གི། ལྔ་འགྱུར་ཤ་ཁ་ར་དང་འོ་སྦྱར་བྱིན།། མཁྲིས་པ་ལས་གྱུར་ཨིནྡྲ་བཞི་ཐང་བཏང་།། དུང་དུགཉུང་བོང་ང་སྐྱེར་ཁཌྷྜྷཱ་སྦྲང་སྦྱར་བཟའ།། སྤོས་དཀར་དོང་གྲ་ཨ་རུ་ཁྲོན་བུས་སྦྱང་།། གཞང་འབྲུམ་རློན་ལ་དུག་མོ་ཉུང་ཤུན་མཆོག། སྐམ་ལ་བསེ་འབྲས་ཀུན་ལ་དར་བ་མཆོག། བླ་གཉན་གང་བྱུང་ནད་གཞི་བརྟགས་ལ་བསལ།། ཤུགས་བཙིར་སྟན་སྲབ་ཉལ་པོ་བཞོན་པ་དང་།། རླན་གྲངས་མེ་ཉིས་གདུང་བ་རྟག་ཏུ་སྤང་།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གཞང་འབྲུམ་གསོ་བའི་ལེའུ་སྟེ་དྲུག་ཅུ་རྩ་བཞི་པའོ།། །།

X