//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་རེ་བདུན་པ། རྨེན་བུ་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 17:04:20 ཀློག་གྲངས། 8 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། རྨེན་བུའི་ནད་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་ཡིས་བསྟན།། རྒྱུ་རྐྱེན་དྲག་ཤུལ་རྐྱེན་གྱིས་འགྲམས་པ་འམ།། རླུང་ཁྲག་འཁྲུགས་པ་རྨེན་བུ་ལ་བརྟེན་སྐྲངས།། ཕལ་ཆེར་སྐེ་མཇིང་མིག་ཟུར་སྣེ་ས་མང་།། དབྱེ་བ་རླུང་མཁྲིས་ཁྲག་དང་བད་ཀན་དང་།། ཤ་ཚིལ་རྩ་དང་འབྲས་དང་བརྒྱད་དུ་བཤད།། དེ་རྟགས་རླུང་གྱུར་རྒྱ་ཆེ་བུས་འདྲར་གཡོ།། མཁྲིས་གྱུར་དམར་སེར་དྲོད་ཆེ་ཚ་ལ་རྣག། ཁྲག་གྱུར་དྲོད་ཆེ་ཚ་དམར་རྩ་ཐོག་འབྱུང་།། བད་ཀན་ཟུག་ཆུང་སྲ་བསིལ་སྐྱ་བ་ཡིན།། ཤ་རྨེན་སྲ་ལ་རྒྱ་ཆེ་འཇམ་ཞིང་སྣུམ།། ཚིལ་རྨེན་མདོག་དཀར་བསིལ་ཞིང་འཕེལ་འབྲི་ཆེ།། རྩ་རྨེན་རྩ་སྟེང་སྙི་ལ་འགུལ་བ་འོ།། འབྲས་མཁྲང་སྲ་འདྲིལ་གཏིང་ཟུག་འཕེལ་འབྲི་ཆུང་།། ཁ་ཅིག་རང་བཞིན་ཞིའམ་འཕེལ་རྒྱས་བྱེད།། ཁ་ཅིག་ཟུག་མེད་ཁ་ཅིག་ཟུག་གཟེར་ཆེ།། ལ་ལ་སྨིན་དཀའ་ལ་ལ་མྱུར་དུ་རྣག། སྲ་ལ་སྨིན་དཀའ་ཉུང་གཤེར་འཁྱགས་འདྲ་དང་།། འབྲོས་ཤིང་འཕེལ་སྐྱེན་འགས་པ་སྤང་བར་བྱ།། བཅོས་ཐབས་གསར་དུས་ནད་སྟོབས་ཆུང་བ་ལ།། སྤྲ་ཚིལ་ཤོག་བུ་ལ་བསྐུས་བསྲོས་པ་གླན།། རྒྱམ་ཚ་བཅའ་སྒ་ཚན་དོས་བདུག་ཅིང་མཉེ།། མ་ཞི་སྟེང་དུ་མེ་ཡིས་འཚོས་པར་བསྲེག། ནད་སྟོབས་འབྲིང་ལ་བྲག་ཞུན་དྲི་ཆུ་བྱུག། ཡང་ན་ཀླད་རུལ་ཚྭ་དང་སྦྱར་བ་བྱུག། ཨ་རུ་གུ་གུལ་སྐྱེར་པ་བ་ཆུ་བཏུང་།། མ་ཞི་འབམ་པོ་བྱ་བྲས་རྣག་ཏུ་དགུག། རྙིངས་ཤིང་རྒྱས་ནས་སྣུམ་འཆོས་དུགས་བྱས་ལ།། ལྟོ་དང་རྩས་སྦྱང་གང་ཉེའི་རྩ་ལ་གཏར།། ཆུ་མ་ཙི་དང་སྒོང་ཐོག་བྲག་ཞུན་དང་།། བུལ་ཏོག་དྲི་ཆུ་སྦྱར་བས་བྱུག་པར་བྱ།། མ་ཐུབ་བསྲེགས་སྟེང་ཁྲ་བོའི་ལུམས་ཀྱིས་གདུལ།། རྣག་ཏུ་ཁུགས་ནས་འབྲས་ལྟར་བཅོས་པར་བྱ།། ཟུག་ཆུང་རབ་འཕྱང་རྩ་བར་བཅད་ལ་བསྲེག། བད་རླུང་སྟག་ཚེར་སེང་ཚེར་ཙི་ཏྲ་ཀ། པི་པི་ལིང་གི་སྨན་མར་སྣུམ་རྗེས་སྦྱང་།། རྒྱམ་ཚ་སྒ་མར་བྱུགས་སྟེང་ཨ་སས་བདུག། ཁྲག་མཁྲིས་ཨ་རུ་རྒྱ་སྐྱེགས་ཙན་དན་དང་།། ཧོང་ལེན་ཤུ་དག་སྦྲང་དང་སྦྱར་ལ་བཏང་།། ཀྱི་ལྕེ་བྲག་ཞུན་ཧོང་ལེན་དྲི་ཆུ་བྱུག། ཤ་རྨེན་གཅན་གཟན་ཤ་སྣ་བཙོས་ལ་བདུག། ཚིལ་གྱུར་གུ་གུལ་བཟའ་ཞིང་བྱེ་རུག་བདུག། རྩ་རྨེན་གོང་འོག་བསྲེག་ཅིང་གང་ཉེ་གཏར།། འབྲས་མཁྲང་ལུམས་ཀྱིས་བཏུལ་ལ་དེ་རྗེས་བསྲེག། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རྨེན་བུ་བཅོས་པའི་ལེའུ་ སྟེ་དྲུག་ཅུ་རྩ་བདུན་པའོ།། །།

X