//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་དོན་གཉིས་པ། བྱིས་པའི་ནད་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 17:20:01 ཀློག་གྲངས། 11 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགབྱིས་པའི་ནད་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་ཡིས་བསྟན།། དང་པོ་རྒྱུ་ནི་རླུང་མཁྲིས་བད་ཀན་ལ།། རྐྱེན་ནི་མ་ཡི་རྐྱེན་དང་བུ་རྐྱེན་གཉིས།། མ་རྐྱེན་མ་ཡིས་ཟས་སྤྱོད་གང་འཕེལ་བའི།། མ་ཡི་རླུང་མཁྲིས་ཁྲག་དང་བད་ཀན་ནད།། བུ་ལ་ལྷུང་དང་མི་གཙང་གདོན་རྐྱེན་གྱིས།། འོན་ལོང་དིག་པ་ཞ་སྒུར་ཤོར་སོགས་འབྱུང་།། འདི་རྣམས་ལྷན་སྐྱེས་ནད་ཡིན་གསོར་མི་ནུས།། བུ་རྐྱེན་གདོན་དང་སྤྱོད་ལམ་ཁ་ཟས་གསུམ།། གདོན་རྐྱེན་མང་ཡང་བྱིས་གདོན་བཅུ་གཉིས་ཡོད།། ལས་མཁན་ཕོ་ཉ་རྒྱལ་བསེན་གཉིས་ཀྱིས་བྱེད།། སྤྱོད་ལམ་མ་དང་བུ་རྫི་མ་བཟོ་བས།། ལྷུང་ངམ་བརྡབས་སམ་སྤྲུགས་དང་བསླང་སྔས་དང་།། ལྟེ་བ་འཐེན་དང་ངུ་དྲགས་རླན་དྲགས་དང་།། ཟས་སྐོམ་ཚ་ཆེས་བསིལ་ཆེས་བསྟེན་དྲགས་པས།། བྱིས་པའི་ནད་རིགས་ཉི་ཤུ་རྩ་བཞི་སྐྱེད།། དབྱེ་བ་ལྷན་སྐྱེས་ནད་དང་གློ་བུར་གཉིས།། མ་ནད་བུ་ལ་ལྷུང་བ་ལྷན་སྐྱེས་ཡིན།། གློ་བུར་ནད་ལ་ཕྲ་རགས་ཞིབ་ཚགས་གསུམ།། རགས་པ་བྲང་དང་གློ་མཆིན་འཁྲུ་སྐྱུག་དང་།། རིམས་དང་ལྟེ་བ་རྡེ་འུའི་ནད་དང་བརྒྱད།། ཕྲ་བ་མགོ་སྐྲངས་གྲེ་བ་འགགས་པ་དང་།། མཆེར་མཁྲིས་ཕོ་ལོང་ས་ཟོས་ཞོ་རས་བརྒྱད།། ཞིབ་ཚགས་མིག་དང་རྣ་བ་ཁ་ནད་དང་།། རྨེན་བུ་སྲོག་རྩ་ཤ་ནད་སྲིན་ཕོལ་བརྒྱད།། བརྟག་པའི་ཐབས་ལ་སྤྱི་དང་བྱེ་བྲག་གཉིས།། འཚོ་འཆི་བཏང་གཅོད་ཁ་དམར་གདགས་དང་གསུམ།། སྤྱི་རྟགས་རྟག་ཏུ་ངུ་ལས་ནར་ཤེས་བྱ།། གང་ནར་འཇུ་དང་དེར་མནན་ན་བ་དང་།། མིག་འབྱེད་དཀའ་ཞིང་ངོ་ནག་དོང་དངག་འགག། རྩེད་མོ་མི་རྩེ་དབུགས་མི་བདེ་བ་དང་།། སྐད་གཉའ་འཁུན་ཞིང་སེན་མོ་རྣོ་བ་འོ།། ཁྱད་པར་བྲང་ནད་རྒོད་གཡུང་ཚ་གྲང་གཉིས།། བྲང་རྒོད་ཚ་བ་བྲང་དང་རོ་སྟོད་སྐྲངས།། ལུས་ཚ་ནུ་མ་མི་འདོད་ངུ་བ་དྲག། མགོ་དང་རོ་སྟོད་ཕྱིར་འདོན་ལྟག་པ་དགྱེ།། རྩ་དང་འཕར་སྒོ་དྲག་ལ་ཨ་འབྲས་བཟློག། ཁ་ལྕེ་སྐམ་ལ་དྲེག་པ་ཆགས་པ་དང་།། རྟིང་པ་འཛུགས་པ་མི་ཤེས་ཧྲེང་ཧྲེང་རྨྱང་།། བྲང་དེ་གློ་དང་བསྡོངས་ན་ལུད་པ་ལུ།། ཕོ་བར་བསྡོངས་ན་མིག་སེར་སྟོང་སྐྱུགས་བྱེད།། བྲང་གཡུང་གྲང་བ་དབུགས་བདེ་ཉད་ཉོད་མང་།། ཁ་འཛུམ་མི་ཤེས་མཇིང་རེངས་རོ་སྟོད་གྱོང་།། གློ་ནད་ཚ་གཟེར་ཚ་སུབས་ཐང་པོ་གསུམ།། ཚ་གཟེར་རྩ་གྲིམས་འཐིབས་ཆེ་གཏིང་ནས་འཁུན།། དབུགས་ཐུང་གློ་ལུ་ཁ་མིག་བཙུམས་ནས་ལུ།། ལུད་པ་འགོག་ལ་སྙིང་བརྡུངས་སྐྱུག་མི་ཤེས།། ཚ་སུབས་འགོག་ཏུ་མི་འདོད་དྲག་ཏུ་ལུ།། ལུས་པོ་ཚ་ལ་རྩ་དང་འཕར་སྒོ་དྲག། གློ་བསྟུད་འོང་ཞིང་བྲང་དང་མ་ལ་འབྲད།། རྗེས་ལ་ལུས་རྔུལ་འཁུན་ཞིང་སྐྱུག་ཚུལ་སྟོན།། ཐང་པོ་གློ་ནད་རྙིངས་པ་རླུང་ལྡན་ཏེ།། དྲག་ཏུ་ལུ་ཞིང་ལུད་པ་འགོག་རྒྱུ་མེད།། མིག་དང་མཆུ་སྐྲངས་ལྕེ་རྙིལ་དཀར་བ་འོ།། མཆིན་པའི་ནད་ལ་ཚ་བབས་གྲང་བབས་གཉིས།། རྒོད་བབས་ཚ་བ་མཆིན་སྣ་ཕྲ་ལ་འཕར།། རྩ་རྒྱུག་ཆུ་ཚ་དབུགས་རྒོད་ཕོ་སྟོད་གྲང་།། ལུས་ཚ་གཡལ་བར་འདོད་ལ་གཡལ་མི་ཐོན།། མཆུ་དང་རྙིལ་ལ་དྲེག་པ་ནག་པོ་ཆགས།། མིག་དམར་སྣ་སྒོ་སྐམ་ལ་ལྕེ་གཞུང་སེར།། རེ་འུའི་སྐད་འབྱིན་ཞིང་རྣ་རྩ་ནག་ལ་སྦོམ།། གཡུང་བབས་གྲང་བ་རྩ་དལ་ཆུ་ཡང་གྲང་།། ལག་པ་འཇིབ་ཅིང་ལྕེ་མུར་སྟོང་ལྡད་བྱེད།། དྲོད་ཆུང་མཆིན་སྣ་མི་འཕར་མདན་ཤིག་འཕྲུག། ནུབ་མོ་ངུ་ཞིང་ངུ་སྐད་ཕྲ་ལ་འཛེར།། ཤ་མདོག་སྔོ་སེར་མཆིན་སྣ་སྲབ་ལ་རིང་།། སྤྱི་རྟགས་ཚ་གྲང་གཉིས་པོ་གང་བབས་ཀྱང་།། མིག་སྔོ་གྱེན་ལྡོག་བྱད་དང་མཐིལ་བཞི་སེར།། ལུས་ལྕི་རྔམ་པ་རིང་ཐུང་ལྡང་དུབ་ན།། འཁུན་ཞིང་སྔ་དྲོ་བདེ་ལ་དགོངས་དུས་ན།། མཆིན་པས་ཕོ་བ་མནན་པས་འཁྲུ་སྐྱུག་བྱེད།། འཁྲུ་བའི་ནད་ལ་ཚ་འཁྲུ་གྲང་འཁྲུ་གཉིས།། ཚ་འཁྲུ་དབུགས་ཐུང་རྩ་དང་འཕར་སྒོ་དྲག། བཞིན་སྣུམ་ཕྱི་ཚད་ཆེ་ལ་ཤེས་པ་འཐིབ།། འཁྲུ་མདོག་དམར་སེར་ལྗང་གུ་དུད་ཁུར་འཁྲུ།། གྲང་འཁྲུ་དབང་པོ་གསལ་ལ་འཕར་སྒོ་དལ།། འཁྲུ་མདོག་ནུ་ཞོ་རྩམ་མདོག་སྐྱ་བོར་འཁྲུ།། རྒྱུ་ལོང་འཁྲོག་ཅིང་ལྦུ་བ་སྒྲ་བཅས་འཁྲུ།། སྐྱུག་པའི་ནད་ལ་ཚ་དང་གྲང་བ་གཉིས།། ཚ་བས་སྐྱུག་པའི་ནད་རྟགས་ཚ་བར་འབྱུང་།། ཁྲག་གམ་མཁྲིས་པར་སྐྱུག་པ་ཚ་བ་ཡིན།། གྲང་བས་སྐྱུག་པ་ཞོ་འཐུངས་སྐྱུག་པ་དང་།། རྩམ་པ་མ་ཞུ་གང་ཟོས་སྐྱུག་པ་དང་།། ལྦུ་བ་བད་ཀན་སྐྱུག་ཅིང་ཕྱི་རྟགས་གྲང་།། རིམས་ནད་མེ་ལྟར་ཚ་ཞིང་འཕར་རྩ་རྒྱུག། ངུ་འཚིག་རྔུལ་འཐིབས་བ་སྤུ་ལོག་པ་དང་།། སྐོམ་འདོད་རྨྱོང་ཞིང་ཁ་སྣ་ལག་པས་སུབ།། ལྟེ་ནད་ལྟེ་མཁྲང་ལྟེ་འཁོར་ལྟེ་མཁྲེགས་དང་།། ལྟེ་རྣག་བཞི་སྟེ་དང་པོ་ལྟེ་མཁྲང་ནི།། ལྟེ་འབུར་རྐང་པ་སྡུད་ལ་རྐྱོང་མི་ཤེས།། གྲང་ནད་རྟགས་ལྡན་ངུ་སྐད་གཅོད་སྡོམ་བྱེད།། ལྟེ་འཁོར་སྨུག་པོར་སྐྲངས་འབུར་རེག་མི་བཟོད།། ལྟེ་མཁྲེགས་སྨུག་ཅིང་སྲ་ལ་ཏྲེབ་བེ་ན།། ལྟེ་རྣག་ལྟེ་བ་ཆད་ཤུལ་རྣག་ཞུགས་ནས།། ཁུང་བུར་ཟོས་ནས་རྒྱུ་ལོང་ལུག་པར་བྱེད།། རྡེ་འུའི་ནད་ལ་ཕུགས་རྡེ་ལམ་རྡེ་གཉིས།། ཕུགས་རྡེ་ལ་ཡང་འཕྱོ་རྡེ་ཟུག་རྡེ་གཉིས།། ལམ་རྡེ་ཆུ་ལམ་རྡེ་འུས་འགགས་པ་ཡིན།། དྲི་ཆུ་མི་ཐོན་མཚན་མ་ཆུ་རྐྱལ་འདྲ།། འཕྱོ་རྡེ་འོང་བའི་འཕྲོ་ལ་འཕྲལ་དུ་འགག། ཆུ་ཡི་གསེབ་ཏུ་ཤ་ཡི་ནལ་ནོལ་འོང་།། ཟུག་རྡེ་ཁ་ལ་ཟུག་ན་ན་ལ་སྲི།། ཕུགས་སུ་ཟུག་ན་མི་སྲི་ན་ལ་གཟེར།། གང་ཡང་སྤྱི་རྟགས་ཆུ་སྲི་ཡང་ཡང་འཛག། ཟུག་ཆེ་ཁུ་ཚུར་འཆང་ངམ་འབྲད་ཅིང་ངུ་།། མགོ་འདར་སོ་སྡོམ་ལྒང་པ་རྒྱས་པར་འགྱུར།། བུ་ཆུང་མགོ་བརྡབས་རྒྱ་ཞིག་སྐྲངས་པ་ན།། རྣག་ཡོད་བཞིན་དུ་མར་མེར་སྐྲངས་པར་བྱེད།། གྲེ་བ་འགགས་ན་སྐད་འཛེར་ཁ་ཆུ་མང་།། མཆེར་པའི་ནད་ནི་ཁོང་ལྕི་ལྡང་དུབ་བྱེད།། ནུ་མ་སོས་འདེབས་བག་རེ་རྔུལ་དུ་འོང་།། མཁྲིས་ནད་རྣ་རྒྱབ་ཤ་མདངས་སེར་ལ་དངས།། རྩ་གསལ་ལྕེ་སྐྱ་སེན་མོ་ནག་ལ་རིང་།། ཁ་ཟས་བྱིན་ན་མི་ཟ་འདོད་ཚུལ་བྱེད།། ཕོ་བའི་ནད་ནི་ཤ་ཆུང་དྲེག་པ་ཆགས།། ཁ་ཟས་འཇུ་དཀའ་ཕོ་བ་སྐྱེ་འབྲི་བྱེད།། ལོང་ནད་འཁྲོག་འུར་སྒངས་འཁུན་འཕེལ་འབྲི་བྱེད།། ས་ཟོས་ཕོ་བ་སྒྲངས་སྒངཤིང་དྲི་མ་འགག། ཞོ་རས་ནད་ལ་རླུང་མཁྲིས་བད་ཀན་གདོན།། རླུང་གྱུར་ནུ་ཞོ་ལྦུ་བཅས་ཆུ་སྟེང་འཕྱོ།། དེ་ཡིས་ཕོ་བ་སྦོ་སྐྱུག་བཤང་གཅི་སྲི།། མཁྲིས་གྱུར་སེར་སྣང་རོ་སྐྱུར་ཚད་པ་སྐྱེ།། བད་ཀན་སྔོ་ནལ་ཆུར་འབྱིང་མ་ཞུས་སྐྱེད།། ཚོམ་བུར་ཆད་ན་གདོན་ངོ་ཡོད་པ་ཡིན།། མིག་གི་ནད་ལ་སྒྲ་ངན་འཕྲལ་ཚག་གཉིས།། དེ་གཉིས་མིག་དམར་ཚ་ཞིང་མཆི་མ་འཛག། རྣ་བའི་ནད་ལ་མ་རླུང་འགྲམས་པ་གཉིས།། མ་རླུང་རྣག་འཛག་འགྲམས་པ་རྣ་རྩ་སྐྲངས།། ཁ་ཡི་ནད་ལ་བཙའ་ཐོར་བསེན་ཐོར་གཉིས།། བཙའ་ཐོར་ནད་ཟུག་མེད་ལ་ཐོར་བ་འོང་།། བསེན་ཐོར་ཐོར་པ་དཀར་ལ་ཚ་བ་སྐྱེ།། རྨེན་བུ་རྐང་ལག་འཁུམས་ནས་རྐྱོང་མི་ཤེས།། སྲོག་རྩའི་ཆུ་སེར་མིག་སྐྱ་ཤ་སེར་སྐམ།། སྲིན་ནད་ལྡང་དུབ་ཆེ་ལ་སྐུམ་སྐུམ་བྱེད།། མི་སྐད་ཁྱི་སྐད་ལ་ངུ་ནད་ཟུག་ལྡང་།། ཤ་ནད་ལྕེ་མུར་ལག་པའི་མགོ་བོ་འཇིབ།། སེར་ཤའི་ཚོད་མ་འདྲ་བ་རྒྱུན་དུ་འཁྲུ།། ཕོལ་ནད་འཕོངས་ཀྱི་རྩར་སྐྲངས་རྣག་ཏུ་འགྱུར།། འཚོ་འཆི་བཏང་གཅོད་ཁ་དམར་གདགས་པ་ནི།། རྐང་ལག་མཐིལ་བཞི་དཀར་ལ་ཧྲིད་པ་དང་།། རྣ་བ་སྐམས་ཤིང་མགོ་ལ་འབྱར་བ་དང་།། སྣ་བུག་སྐམས་ལ་བ་རྒྱ་ཆགས་པ་དང་།། མིག་གི་མདངས་ཤོར་ཁུང་དུ་བྲོས་པ་དང་།། ལྟག་མིག་བལྟ་ཞིང་འཛུམ་མི་ཤེས་པ་དང་།། ལྕེ་ནི་སྐམ་ཞིང་ཐུང་ལ་སོ་དྲེག་ཆགས།། ཕོ་བ་རྡོ་ལྟར་སྲ་དང་ཟོས་ཚད་སྐྱུག། དབུགས་ཐུང་གྲེ་བ་གསོག་ཅིང་ངར་བ་དང་།། འཁྲུ་བ་ཆུ་ལྟར་འབྲུབ་དང་ནུ་མ་ཤོར།། མགོ་སྲུབས་བྱེ་དང་ལྤགས་མདོག་གསེར་ལྟར་སེར།། ཤ་ལྤགས་སྦོས་དང་ཕོ་བ་ཆུ་ཡིས་ཁེངས།། མཆིན་པས་ལྟེ་བར་སླེབ་ན་མི་འཚོ་སྤང་།། མིག་ལྕེ་ལ་སོགས་དབང་པོའི་བཀྲག་མ་ཤོར།། དབུགས་བདེ་རྩ་དལ་མཐིལ་བཞི་དམར་བ་དང་།། ནུ་མ་ཟས་ལ་སྲེད་ལ་སེན་མོ་འདྲུག། སྨན་ལེན་གསོས་སྐྱེད་ཚེ་ཆེན་བླང་བར་བྱའོ།། བཅོས་པའི་ཐབས་ལ་སྤྱི་དང་བྱེ་བྲག་གཉིས།། སྤྱི་བཅོས་དུས་གསུམ་ཟས་སྤྱོད་སྨན་དཔྱད་བཞི།། ཞོ་འཐུང་དུས་ན་སྨན་དཔྱད་མ་ལ་བྱ།། ཟས་འདྲེས་དུས་ན་མ་བུ་གཉིས་ཀ་ལ།། ཞོ་སྤངས་ཟས་ཟའི་དུས་ན་བུ་ལ་བྱ།། ཟས་ནི་ཡང་ཞིང་འཇུ་སླ་བྱིན་པ་དང་།། སྤྱོད་ལམ་ངུ་རུ་མི་གཞུག་གྲངས་མི་བྱ།། སྨན་གྱིས་བཅོས་པ་ཞི་དང་སྦྱང་བ་གཉིས།། ཞི་བྱེད་བཟང་ཞིང་འཇམ་ལ་འཇུ་སླ་བ།། ཀར་བུར་ཁ་བླངས་མངར་ཤས་ཆེ་བ་བྱིན།། སྔོ་ཐང་བཤལ་སྨན་ལ་སོགས་རྩུབ་མོ་རྣམས།། ལེགས་པར་བསྡུས་ཁུ་འཇམ་ཞིང་འཇུ་སླ་བསྟེན།། བཤལ་རྗེས་འབྲས་ཀྱི་ཚོད་མ་ཤིས་པ་ཡིན།། དཔྱད་ཀྱི་བཅོས་པ་གཏར་བསྲེག་ཆུ་ལྕག་འདྲེན།། གཏར་ག་གང་ཐེབས་རྩ་ཁ་ཕྱེ་ཙམ་སྟེ།། ལོ་མ་ལོན་ན་ལག་མགོ་ཁྲག་ཐོན་གཏར།། མེ་བཙའི་སྤྲ་བ་སྲན་མ་སྦོས་པ་ཙམ།། གསུམ་ལས་མི་མང་སྐྱི་ཚོས་ཙམ་གྱིས་ཆོག། ཆུ་ལྕག་སྐར་ཆུ་བུམ་པར་བླུག་པས་བསྒྲེང་བསྒྲང།།མས་འདྲེན་ལོ་མ་ལོན་ལ་རེང་བུ་བྱ།། ལོ་ལོན་པ་ལ་ནི་རུ་ཆུ་སྲང་གཅིག། དེ་ནས་ལོ་རེ་ལོན་གྱིན་སྲང་རེ་བསྐྱེད།། སྨན་དཔྱད་དྲག་པོ་མི་བྱ་འཇམ་པོས་བཅོས།། བྱེ་བྲག་བཅོས་ཐབས་བྲང་ནད་ཚ་བ་ལ།། ཟས་སྨན་ཆུ་མདའ་གཏར་དང་མེ་བཙས་བཅོས།། ཟས་སུ་ཤ་མར་གསར་པ་ཞོ་དར་བཏང་།། དྲོད་བཅུད་མི་བཏང་སྨན་དུ་ག་པུར་དང་།། ཅུ་གང་གུར་ཀུམ་ཙན་དན་ཀར་སྦྱར་བཏང་།། གློ་ལ་ག་དུར་ཕོ་བར་སུག་སྨེལ་བསྣན།། སྐྲངས་ན་ཆུ་མདའ་བྲན་ཞིང་དྲུག་འགོ་གཏར།། སྟོད་དུ་སྐྲངས་ན་སྤྱི་གཙུག་བྱ་རོག་མིག། ཅ་ར་ཁུང་ནས་ཐུར་མཚོན་དོ་རུ་བསྲེག། སྨད་དུ་སྐྲངས་ན་སྙིང་རྩེ་དཀར་ནག་མཚམས།། གློ་ལ་ལྔ་པ་ཕོ་བ་ལྷེན་གསང་བསྲེག། བྲང་ནད་ཤིན་ཏུ་རྙིངས་ཏེ་ཤ་མདོག་སེར།། ཁོང་སྙོམ་འགུལ་ན་ངུ་ཞིང་མ་ལ་འཆང་།། འཁུན་ཞིང་ནུ་མ་ཙེ་གུར་བཅད་ཅིང་འཐུང་།། དེ་ལ་ཙན་དན་གི་ཝཾ་བསིལ་གསུམ་སྦྱར།། རྗེས་ལ་ཚིགས་པ་བདུན་དང་ལྷེན་སྣ་བསྲེག། བྲང་ནད་གྲང་བ་ཛཱ་ཏི་སུག་སྨེལ་དང་།། ལ་ལ་ཕུད་ཀྱི་ཐང་བཏང་ཤིང་ཀུན་དང་།། དོང་གྲ་ཁ་རུ་ཚ་དང་བུར་དཀར་སྦྱར།། ཟས་ནི་བསིལ་དྲོད་ཁྲེ་འུར་བཏང་བར་བྱ།། ཆུ་མདའ་མི་བྱ་སྣུམ་ནན་ཚན་དོ་བྱ།། མེ་ནི་གོང་གི་སྟེང་དུ་བཞི་པ་བསྲེག། མཇིང་པ་རེངས་ན་ལྟག་པ་བསྲེག་པར་བྱ།། མདོར་ན་སྨན་གཏར་ཆུ་ཡིས་ཚ་བ་གདོན།། དེ་རྗེས་མེ་ཡིས་བསྲེག་པ་མཆོག་ཏུ་ཤིས།། ཚ་གཟེར་གློ་ལ་གསོ་ཐབས་ཞི་སྦྱང་གཉིས།། ཧོང་ལེན་བོང་ང་དཀར་པོའི་བསྡུས་ཁུ་ལ།། གི་ཝཾ་གུར་གུམ་གླ་རྩི་ཤུ་དག་དཀར།། སྦྲུལ་ཤ་རུ་རྟའི་ཕྱེ་མ་སྦྱར་ལ་བཏང་།། ཨ་རུ་ཧོང་ལེན་དུར་བྱིད་བསྡུས་ཁུ་ལ།། ཤ་ཆེན་གླ་རྩི་བཏབ་ལ་འཁྲུ་རུ་གཞུག། དེས་མ་ཐུབ་ན་ག་པུར་རྒྱལ་བློན་གསུམ།། ཚ་སུབས་ནད་ལ་སྨན་དང་གཏར་གྱིས་བཅོས།། གུར་གུམ་ཤུ་དག་ཅུ་གང་ཀར་སྦྱར་བཏང་།། ཤིང་མངར་སྲོ་ལོའི་ཐང་བཏང་ག་པུར་དང་།། ལི་ཤི་སུག་སྨེལ་འབྲས་གསུམ་ད་ཏྲིག་དང་།། ཅུ་གང་གུར་གུམ་གི་ཝཾ་རྒུན་འབྲུམ་དང་།། ཤིང་མངར་ཀ་ར་སྦྱར་བཏང་རྔུལ་མང་དབྱུང་།། གཏིང་ཐོན་དཀའ་ན་ཅུ་གང་གུར་གུམ་དང་།། ཙན་དན་དཀར་དམར་བསེ་རུ་ཤིང་མངར་མཚལ།། ལི་ཤི་སུག་སྨེལ་སྲ་འབྲས་ད་ཏྲིག་དང་།། སྟར་བུ་རུ་རྟ་སྒ་སྐྱ་པི་པི་ལིང་།། འདམ་བུ་ཀ་ར་ནས་སྔོན་འབྲུ་བདུན་རྣམས།། ཞོ་ལ་བཏབ་ཀྱིན་རྒྱུན་དུ་བསྟེན་པར་བྱ།། སྣོད་ཀ་རུ་ཐུང་ཁྲག་དང་སྦྱར་ལ་གཏར།། ཚ་སུབས་རྒས་ནས་ལུད་པ་རྣག་ཅན་ལ།། བྱ་བོ་ཙི་ཙི་སྟར་བུ་ཤིང་མངར་དང་།། སུག་སྨེལ་ཀ་ར་སྦྱར་བས་རྣག་རྣམས་དྲང་།། ཙན་དན་བསིལ་གསུམ་བསེ་རུས་རྣག་ཚད་སྐེམ།། རོ་སྟོད་ཆུས་བྲན་གསར་འཇམ་ཟས་ཀྱིས་བཅོས།། རླུང་གློ་ཐང་པོ་སྨན་ཟས་བཤལ་མེས་བཅོས།། སྨན་ནི་ད་ཏྲིག་ཀ་ར་པི་པི་ལིང་།། མར་གསར་སྦྱར་བའི་ལྡེ་གུ་བཏང་བ་དང་།། ཅུ་གང་ཤིང་ཚ་སུག་སྨེལ་པི་པི་ལིང་།། མར་གསར་སྦྲང་དང་སྦྱར་བའི་ལྡེ་གུ་བཏང་།། ག་དུར་ཛཱ་ཏི་ཤིང་ཀུན་བུར་དཀར་བྱིན།། མར་དཀར་བུར་དཀར་ལུག་ཤ་གསར་འཇམ་བཏང་།། སྐྱེད་ཆུང་ལུས་སྐྲངས་སྤོས་དཀར་བཤལ་གྱིས་སྦྱང་།། དེ་རྗེས་གློ་གསང་ཚིགས་པ་བཞི་ལྔ་བསྲེག། མཆིན་ནད་ཚ་བ་ཟས་སྨན་གཏར་བ་དང་།། བཤལ་དང་མེ་བཙའ་ཆུ་ཡིས་བཅོས་པར་བྱ།། ཁ་ཟས་མ་བུ་གཉིས་ཀ་དྲོད་བཅུད་སྤང་།། ཤ་གསར་མར་གསར་ཞོ་དར་བསྟེན་པར་བྱ།། སྨན་དུ་ཏིག་ཏ་བ་ཤ་ཀ་བསྡུས་ཁུར།། བྲག་ཞུན་དུལ་མ་སྦངས་ལ་མང་དུ་བླུད།། ཨ་རུ་སྐྱུ་རུ་བསྡུས་པའི་ཁུ་བ་ལ།། གུར་གུམ་གསུམ་བཏབ་ཀར་སྦྱར་བུ་ལ་བླུད།། ག་པུར་ཅུ་གང་གུར་གུམ་རུ་རྟ་དང་།། མ་ནུ་འཇིབ་རྩི་ཀ་ར་དཀར་སྦྱར་བཏང་།། ཡང་ན་གུར་གུམ་ཅུ་གང་བྲག་ཞུན་དང་།། ཛཱ་ཏི་དོམ་མཁྲིས་ཏིག་ཏ་ཨ་རུ་ར།། ཀ་ར་དཀར་པོ་སུམ་འགྱུར་སྦྱར་ལ་བཏང་།། ཡང་ན་གུར་གུམ་གི་ཝཾ་ཨ་རུ་ར།། ཀ་ར་སྦྱར་བཏང་སྐྱེད་ཆུང་ཨ་རུ་ར།། ཧོང་ལེན་དུར་བྱིད་བསྡུས་ཁུར་ཀར་སྦྱར་བཏང་།། སྐྱུག་ན་ཕུས་གདབ་འགྱིངས་ན་རེང་བུས་བསུ།། དམར་སེར་དྲི་ཆེ་ནི་རུ་ལུགས་སུ་སྦྱང་།། དཀར་སྔོ་རྩམ་པ་ཞོ་འཁྲུ་མྱུར་དུ་བཅད།། རུ་ཐུང་སྣོད་ཀ་ལོང་རྩ་ཁྲག་སྦྱར་གཏར།། ཆུ་མདའ་ཕོ་སྟོད་ཚིགས་པ་དགུ་ལ་བརྡེག། ཡང་ན་ལྒང་ཕུག་ཆུ་ཡིས་བཀང་ལ་བདུག། དེ་ཡིས་མཆིན་སྣ་མི་འཕར་ཚ་སྟོབས་ཞི།། མཆིན་སྣ་སྦྲུལ་མིག་དགུ་དང་བཅུ་གཉིས་བསྲེག། ཚ་བ་མ་ཆོམས་བསྲེགས་ན་མེ་དྲོད་སྐྱེད།། རྗེས་ལ་མ་བསྲེགས་མཆིན་པ་སར་མི་ཁྱོལ།། དེས་ན་བསྲེག་པའི་དུས་ཚོད་ཤེས་པ་གཅེས།། གྲང་བབས་སྨན་ཟས་ལུམས་སྦྱང་མེ་ཡིས་བཅོས།། སྨན་དུ་འབྲས་བུ་གསུམ་གྱི་བསྡུས་ཁུ་ལ།། གུར་གུམ་ཅུ་གང་བསིངས་ལ་བཏང་བར་བྱ།། སྒ་སྐྱ་ཛཱ་ཏི་སུག་སྨེལ་བསྡུས་ཐང་བཏང་།། གླ་སྒང་གུར་གུམ་གི་ཝཾ་ཀ་ར་སྦྱར།། རྒྱམ་ཚ་གསུམ་དང་ལྟག་པ་སྤྲད་ལ་བཏང་།། ཡང་ན་ཛཱ་ཏི་སུག་སྨེལ་ཤིང་ཚ་སྒ།། བུར་དཀར་སྦྱར་བཏང་མ་བུ་གཉིས་ཀའི་ཟས།། མར་གསར་ཕྱེ་ཐུག་ཤ་གསར་ཚོ་ཁུ་བསྟེན།། ཤ་མར་རྙིང་པ་ཆང་སོགས་བཅུད་མི་བཏང་།། སློ་དྲོན་སྤོད་བྲན་རུས་ཕྱེ་སྣུམ་ལྡན་ནམ།། མེ་ཏོག་སྣ་ཚོགས་ལུམས་ཀྱིས་བདུག་པར་བྱ།། དུར་བྱིད་ལྕུམ་རྩ་ཨ་རུ་སྔོན་བུ་བསྡུས།། ཐལ་ག་སོ་མ་ར་ཛ་བཏབ་ལ་བཏང་།། གློར་བསྡོངས་སྤོས་དཀར་ཕོ་བར་མ་ནུ་བཏང་།། མཁྲིས་བསྡོངས་སྒ་སྐྱ་སྨན་དང་བུ་རམ་སྤེལ།། ནད་སྟོབས་བྲི་ནས་དགུ་དང་བཅུ་གཉིས་དང་།། ལྟེ་ཟུར་མཆིན་སྣ་རྩིབ་ཐུང་གཉིས་པོ་བསྲེག། ཚ་འཁྲུ་ཟས་སྨན་གཏར་དང་ཆུ་ཡིས་བཅོས།། ཟས་སུ་ཕྱེ་ཐུག་འབྲས་ཐུག་ཙེ་གུར་བཏང་།། རྗེས་ལ་ཤ་གསར་ཚོ་ཁུ་འོ་ཟན་བསྟེན།། སྨན་དུ་རྒྱུ་མ་བསྲུང་དང་ཚད་པ་གཞོམ།། འཁྲུ་བ་བསྐུལ་དང་བཅད་པ་བཞི་ཡིས་བཅོས།། རྒྱུ་སྲུང་ས་སྨྱག་གླ་རྩི་བཏབ་པ་བཏང་།། ནས་རྙིང་ཕྱེ་ཐུག་མར་གསར་རྒྱམ་ཚ་བཏབ།། རྒྱུ་མ་མི་འདྲུལ་སྲ་འཇམ་འདྲེད་པར་བྱེད།། ཚད་གཅོད་ག་པུར་རྒྱལ་བློན་གསུམ་པ་བཏང་།། ཡང་ན་ཙན་དན་དཀར་པོ་ཆུ་ལ་བརྡར།། དེ་ལ་གུར་གུམ་གླ་རྩི་བཏབ་ལ་བཏང་།། ཡང་ན་ཨིནྡྲ་བཞི་ཐང་རྒྱུན་དུ་བསྟེན།། དམར་ན་བྲག་ཞུན་སེར་ན་གི་ཝཾ་བཏང་།། སྨུག་ན་རེ་རལ་ལྗང་གུ་སྐྱེར་ཤུན་བཏང་།། དུད་ཁུ་གླ་རྩི་ཟུངས་ཁྲག་དོམ་མཁྲིས་བཅད།། འགྱིང་ཞིང་འཁྲུའམ་ཟུག་ཅན་ཙེ་གུར་འཁྲུ།། བུ་གསུམ་ཨ་རུ་བསྡུས་ཁུས་འཁྲུ་བ་བསྐུལ།། ཐ་མར་ཚ་བ་ཆོགས་ནས་བཅད་པ་ནི།། འཁྲུ་གཅོད་སྨན་རྣམས་འབྲས་ཐུག་བཏབ་ལ་བཏང་།། ཡང་ན་ཞོ་བཙོས་བཏབ་བཏང་གྲོ་ཕྱེ་བྱིན།། རུ་ཐུང་སྣོད་ཀ་ལོང་རྩ་གཏར་བ་དང་།། ཆུ་ཡི་ལྕག་གིས་ཉ་གཞི་བསྒྲང་བར་བྱ།། གྲང་བས་འཁྲུ་ལ་བཟང་པོ་བཞི་པོ་སྦྱར།། ཛཱ་ཏི་སུག་སྨེལ་ད་ཏྲིག་སྲ་འབྲས་བཏང་།། ཡང་ན་རྒོད་ཁྲག་གཙོད་ཁྲག་བཙོས་ལ་བཏང་།། སྤྱིན་ཆུ་ད་ཏྲིག་བཏབ་ནས་བཏང་བས་ཆད།། ཆད་དཀའ་བཅུ་གཉིས་པ་དང་ལྟེ་བ་བསྲེག། ཚ་བས་སྐྱུག་པ་ཁྲག་ཏུ་འབྱུང་བ་ལ།། འདམ་བུ་ཀ་ར་ཛཱ་ཏི་ཙན་དན་དམར།། པུཥྲྀར་གླ་སྒང་མཚལ་དང་སྦྲང་སྦྱར་བཏང་།། མཁྲིས་པར་སྐྱུག་ན་ལྕགས་ཀྱི་ཁུ་བ་བཏང་།། གྲང་བས་སྐྱུག་ན་ཛཱ་ཏི་སུག་སྨེལ་དང་།། ད་ཏྲིག་སྲ་འབྲས་བུ་རམ་སྦྱར་བས་ཆད།། ཤ་གསར་ཚོ་ཁུར་ལ་ལ་ཕུད་བཏབ་བཏང་།། ཆད་པ་དཀའ་ན་ལྷེན་སྣ་སྤྱི་གཙུག་བསྲེག། ཟས་སུ་ཆང་འཇམ་ཤ་གསར་བྲིད་ལ་བཏང་།། ཞོ་སྐྱུག་ཀཎྡྲི་ཀ་རི་ཚ་བ་ལྔ།། སྦྲང་དང་ཞུན་མར་སྦྱར་བ་བྱིན་པར་བྱ།། ཁ་ཟས་མི་འཇུ་མིག་སེར་གསུས་པ་ཆེ།། སེ་འབྲུ་ལྔ་དང་རྒྱམ་ཚ་བུར་དཀར་སྦྱར།། ཆུར་སྐྱུག་འབྲས་ཐུག་ལ་ལ་ཕུད་བཏབ་བཏང་།། རྩམ་པར་སྐྱུག་ན་སྨྱུང་བ་བྱས་པས་འཚོ།། རིམས་ལ་འབྲས་གསུམ་སླེ་ཏྲེས་བསྡུས་འཇམ་བཏང་།། ཏིག་ཏ་ག་དུར་བསྡུས་གྲངས་མ་ལ་བྱིན།། རྔུལ་དབྱུང་སྤྱི་ཞུར་ཀ་ར་ཆུར་སྦངས་བཏང་།། གུར་གུམ་ཅུ་གང་གི་ཝཾ་གླ་རྩི་བཞི།། ཀ་ར་སྦྱར་བཏང་སྟོབས་ཆེ་ག་པུར་བསྣན།། གློ་མང་རྒུན་འབྲུམ་ཅུ་གང་ཆུ་བསིངས་བཏང་།། ཚ་རྙིངས་བུ་གསུམ་ཁུ་བ་ཀ་རས་སྦྱང་།། དེ་རྗེས་ཅུ་གང་བདེ་བྱེད་ཆེན་མོ་སྦྱར།། ཁ་ཟས་བསིལ་བསྟེན་དྲོད་བཅུད་དུག་འདྲ་སྤང་།། རི་ཐང་མཚམས་སུ་ཁྲེ་འུར་སད་ཅིང་བཏང་།། ལྟེ་མཁྲང་ནད་ལ་གླ་རྩི་བྱི་ཏང་ག། མ་རུ་ཙེ་དང་སྨྱུག་རྩི་པི་པི་ལིང་།། ཕུར་ཐལ་སྡིག་སྲིན་དྲི་ཆུས་སྦྱངས་ལ་བཏང་།། ཟི་ལྡི་སྦུར་ཐལ་ཕ་མའི་སྐྲ་གཞོབ་བཞི།། བྱིས་པའི་ཆུར་སྦྱངས་བཏང་བས་སེལ་བར་འགྱུར།། ལྟེ་འཁོར་མཁན་སྦང་སྤྲུ་མ་ལྕ་འབྲས་དང་།། གོ་སྙོད་གཡེར་མ་དྲོན་མོར་བསྲོས་པས་བདུག། ཀླད་རུལ་མཁན་ཕབས་ཆང་སྦྱར་སྐྱོ་མ་བྱུག། རྣག་ཏུ་ཕུགས་ཁུགསན་ཕུག་པས་འཚོ་བར་ངེས།། ལྟེ་མཁྲེགས་མ་ཡི་རྒྱབ་རྩ་དྲུག་འདུས་གཏར།། ཁྲག་ལ་ཕག་རིལ་སྤྱང་བྲུན་གླ་རྩི་དང་།། ཤིང་ཀུན་སྒོག་སྐྱ་སྦྱར་བྱུགས་བྱ་སྤུས་མནན།། ལྟེ་རྣག་དང་པོ་ལྟེ་སྐམ་ཕྱེ་མ་གདབ།། མ་ཐུབ་བྲག་སྤོས་ཆུ་རྩ་མཁྲིས་སྣ་དང་།། གུར་གུམ་སྦྱར་བ་རྨ་ལ་གདབ་པར་བྱ།། རྡེ་ནད་གསར་དུས་རྒྱ་ཚ་སུག་སྨེལ་དང་།། སྡིག་སྲིན་ལྕམ་པ་ཆང་དང་སྦྱར་ཏེ་བཏང་།། རྡེའུ་རྒྱས་ན་ཚྭ་སྦྱོར་ཆེན་མོས་བཤིག། ལམ་རྡེ་འགགས་ན་སྲུབས་མིན་དྲལ་ལ་དབྱུང་།། མགོ་བོ་སྐྲངས་ན་རྩ་འཕྲང་མེ་ཡིས་བསྡམ།། རྒྱ་ཆིངས་བྱས་ལ་ཁོང་དུ་བསིལ་སྨན་བཏང་།། དབུག་ཏུ་མི་རུང་འཇམ་པོས་བཅོས་པས་ཐུབ།། གྲེ་བའི་ནད་ལ་གླ་རྩི་རུ་རྟ་དང་།། གི་ཝཾ་ཀ་ར་སྦྱར་བ་ཁོང་དུ་བཏང་།། ཨ་རུ་དུར་བྱིད་གླ་རྩིའི་བཤལ་གྱིས་སྦྱང་།། མཆེར་ནད་གཡོན་གྱི་རྩིབ་མའི་སྟེང་དུ་བསྲེག། ཀ་ཀོ་ལ་དང་ཨ་རུ་ར་ཡི་ཐང་།། མཁྲིས་ནད་རྒྱམ་ཚ་གསུམ་པ་ཀ་ར་སྦྱར།། ཚ་བ་ཆེ་ན་ཏིག་ཏ་ཀར་བཏབ་བཏང་། ཨན་སྟོང་བཅུ་གཅིག་བསྲེག་ཅིང་མཁྲིས་རྩ་གཏར།། ཕོ་བའི་ནད་ལ་སེ་འབྲུ་བཞི་པ་སྦྱར།། གྱོང་དང་བསིལ་སྤང་མདུན་རྒྱབ་ཕོ་གསང་བསྲེག། ལོང་ནད་སེ་འབྲུ་དྲུག་སྦྱར་ལོང་གསང་བསྲེག། ས་ཟོས་པ་ལ་གླ་སྒང་སེར་པོ་གཉིས།། པ་ཏྲ་ལྕ་བ་བ་སྤྲུ་བྱི་ཏང་ག། བིལ་བ་ཚ་བ་གསུམ་གྱི་སྨན་མར་བཏང་།། ཞོ་རས་རླུང་གྱུར་འབྲས་བུའི་སྨན་མར་བྱིན།། ཙི་ཏྲ་ཀ་དང་རུ་རྟའི་བསྡུས་ཐང་བཏང་།། མཁྲིས་གྱུར་འབྲས་བུ་གསུམ་དང་གླ་སྒང་དང་།། རྩ་མཁྲིས་ཧོང་ལེན་བསྐོལ་བའི་ཁུ་བ་བླུད།། བད་ཀན་རྒྱམ་ཚ་ཤིང་མངར་པི་པི་ལིང་།། མར་དང་སྦྱར་བྱིན་བོང་ང་དཀར་པོ་དང་།། གླ་སྒང་ཤུ་དག་རྩ་བ་ལྔ་བསྐོལ་བླུད།། ཞོ་རས་གདོན་ཞུགས་དེ་ཡི་གསོ་བ་སྦྱར།། མིག་གི་ནད་ལ་གསལ་བྱེད་སྨན་མར་བཏང་།། སྐྱེར་ཁཌྷྜྷཱ་ནུ་ཞོ་སྦྱར་བ་མིག་ཏུ་བླུག། རྣ་བ་རྣག་འཛག་མ་བུ་བཅུད་ཀྱིས་གསོ།། འབྲས་བུའི་སྨན་མར་བཅུ་གསུམ་མེ་ཡིས་བསྲེག། རྣ་བ་འགྲམས་ན་ནག་མཚུར་རུ་རྟ་དང་།། གླ་རྩི་ཆུ་ལ་སྦྱངས་ལ་རྣ་བར་བླུག། རྒྱ་སྐྱེགས་རུ་རྟའི་ཁུ་བ་ཁོང་དུ་བཏང་།། བཙའ་ཐོར་ཤ་ཚིལ་གསུར་བདུག་གླ་རྩི་བཏང་།། སྤྱི་བོའི་གཙུག་ཏུ་བཙོད་ཀྱི་མེ་བཙའ་གདབ།། བསེན་ཐོར་ལ་ཡང་གླ་རྩི་ཁོང་དུ་བཏང་།། ཤུ་དག་རུ་རྟ་ཨ་རུ་སྦྲང་སྦྱར་བྱིན།། ས་མཚུར་ཆུ་ཡི་ཁ་འཁྲུ་བསེན་མོ་བཅོས།། རྨེན་བུ་ལྷེན་སྣའི་གཡས་བསྲེག་དོམ་མཁྲིས་བཏང་།། སྲོག་རྩའི་ཆུ་སེར་ཨན་སྟོང་དགུ་བདུན་བསྲེག། སྲིན་ལ་གླ་རྩི་ཤིང་ཀུན་བྱི་ཏང་ག། སྒོག་སྐྱའི་ཕྱེ་མ་འོ་མར་བཏབ་ལ་བཏང་།། དུར་བྱིད་སྒ་སྐྱ་བྱི་ཏང་ག་ཡིས་སྦྱང་།། མ་ཕན་སྲིན་རྟ་ཁྲག་ཡིན་གཏར་ག་བྱ།། ཤ་ནད་ཤ་དང་ཁྲག་གི་ཚོད་མ་བྱིན།། ཕོལ་ལ་ཙན་དན་སྐྱེར་ཁཌྷྜྷཱ་སྦྲང་སྦྱར་བྱུག། ཙན་དན་ཀ་ར་ཆུར་སྦྱར་ཁོང་དུ་བཏང་།། མ་ཞིག་བྱུག་པས་རྣག་ཏུ་བཀུག་ལ་དབུག། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་བྱིས་པའི་ནད་གསོ་བའི་ལེའུ་སྟེ་བདུན་ཅུ་རྩ་གཉིས་པའོ།། །།

X