//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་དོན་བཞི་པ། མོ་ནད་གཙོ་བོ་སྤྱི་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 9:31:07 ཀློག་གྲངས། 9 

      དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས།། མོ་ནད་གསོ་བའི་སྐབས་ལ་ཇི་ལྟར་བསླབ་པར་བགྱི།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་དང་།། དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། མོ་ནད་གསོ་བའི་སྐབས་ལ་བསླབ་པ་ནི།། དུག་གསུམ་འབྱུང་བ་བཞི་ལས་གྲུབ་པའི་ལུས།། སྔོན་ལས་འདོད་ཆགས་དབང་གིས་ཕོ་མོར་སྣང་།། བསོད་ནམས་དམན་པས་ཟ་མ་མོ་ལུས་ཐོབ།། ནུ་མ་མངལ་དང་ཟླ་མཚན་ཁྱད་པར་ལྷག། ལུས་ཟུངས་ཕྱི་མ་ཁུ་བ་དཀར་དམར་གཉིས།། ཟླ་མཚན་དམར་པོ་བཅུ་གཉིས་ལོན་ནས་འཛག། མངལ་ནང་ཁུ་བ་འཛིན་ཞིང་ཤ་ལུས་སྐྱེད།། དཀར་པོ་ནུ་མ་ལ་རྒྱས་གསོས་སུ་འགྱུར།། དེ་ལ་སྔོན་ལས་ཟས་སྤྱོད་གདོན་རྐྱེན་གྱིས།། མངལ་ནད་ལྔ་དང་རྩ་ནད་བཅུ་དྲུག་དང་།། སྐྲན་ནད་དགུ་དང་སྲིན་བུའི་ནད་རིགས་གཉིས།། མོ་ནད་གཙོ་བོ་སུམ་ཅུ་རྩ་གཉིས་དང་།། ཕལ་པའི་ནད་བརྒྱད་བཞི་བཅུ་ཐམ་པར་འགྱུར།། སྐྱེ་བ་དམན་ཕྱིར་བུད་མེད་ལུས་ལ་ལྷག། དེ་ཡང་སྤྱི་དང་བྱེ་བྲག་ཕལ་པ་གསུམ།། མོ་ནད་སྤྱི་ལ་དབྱེ་བ་དེ་ཡི་རྒྱུ།། རྟགས་དང་བཅོས་ཐབས་རྣམ་པ་བཞི་ཡིས་བསྟན།། དབྱེ་བ་ཁྲག་ཚབས་རླུང་ཚབས་རྣམ་པ་གཉིས།། དེ་རྒྱུ་དང་པོ་ཟླ་མཚན་ལས་བྱུང་ཕྱིར།། གསར་པའི་དུས་ན་ཁྲག་ཚབས་ཞེས་བྱ་སྟེ།། རྙིངས་ནས་རླུང་དང་བསྡོངས་པས་རླུང་ཚབས་སོ།། དེ་རྟགས་ཁྲག་ཚབས་སྤྱི་ཡི་མཚན་ཉིད་ནི།། རྐེད་སོ་མན་ཆད་རུས་པ་འཁོལ་ཞིང་ན།། རྒྱུ་ཞབས་ཚ་འབྲབ་རོ་རྒྱབ་མཆིན་དྲི་གཟེར།། རྩ་རྣམས་ཚ་འཁྱུག་ཤུ་བ་འབྲུམ་ཕྲན་འོང་།། མངལ་ཁྲག་འཛག་གམ་འཁྱིལ་དང་རྣག་ཏུ་འགྱུར།། རླུང་ཚབས་རུས་པ་འཁོལ་ཞིང་སྙིང་མི་བདེ།། མགོ་འཁོར་མགོ་ཡི་རུས་པ་གྲང་སིལ་བྱེད།། ལུས་ཀུན་གྲང་ཞིང་ཤ་མཐང་བར་དུ་ན།། ཤ་རྣམས་གཡོ་ཞིང་སྦོ་ལ་སྦྲིད་པ་དང་།། མིག་འགྲིབ་སྨྱོ་འམ་འབོག་གམ་བརྗེད་པ་ངས།། ཆུ་སོ་རྒྱུ་ཞབས་བསྡམ་ཞིང་ཟ་ཁུར་འབབ།། ཟླ་མཚན་མི་ཆོད་རྒྱུན་དུ་འབྱང་བར་བྱེད།། བཅོས་པའི་ཐབས་ལ་ཁྲུས་གཤེར་བཅུད་གཤེར་གཉིས།། དེ་ལ་ཁྲག་ཚབས་ཁྲུས་གཤེར་དག་གིས་བཅོས།། ཁྲུས་གཤེར་ལ་ཡང་ལྟོ་གཤེར་རྩ་གཤེར་གཉིས།། ལྟོ་གཤེར་ལ་ཡང་ཆེན་པོ་ཆུང་ངུ་གཉིས།། རྩ་གཤེར་ནང་དང་ཕྱི་རུ་ཤེས་པར་བྱ།། དང་པོ་ཁྲུས་གཤེར་ཁྲུས་དང་སྣུམ་འཆོས་བྱ།། དངོས་གཞི་ཧ་རི་ཏ་ཀ་ཞིམ་ཤིང་དང་།། དྭ་ཚ་སོ་སོར་བསྐོལ་ཏེ་གྲངས་ནས་བསྲེ།། སྒེ་གཤེར་ཤིང་ཚ་འོལ་མོ་ཁྲོན་བུ་དང་།། རྒྱམ་ཚ་ཏྲི་བྱི་ཏ་རྣམས་ཁ་ཚར་གདབ།། སློང་དང་སྦྱོང་བྱེད་གཉིས་སུ་བཅད་ལ་བཏང་།། ལྟོ་གཤེར་ཆུང་ངུ་གརྦྷ་ཙཎྡྲི་ལི།། ཏྲི་བྱི་ཏ་དང་ཧ་རི་ཏ་ཀ་དང་།། ཤིང་ཚ་རྒྱམ་ཚ་སྒེ་གཤེར་ཆ་མཉམ་སྟེ།། ཞིབ་བཏགས་ཞིམ་ཤིང་བསྡུས་ཁུར་བཏབ་ལ་བཏང་།། ལྕག་དང་ལོག་གནོན་རྗེས་གཅོད་སྤྱི་དང་མཐུན།། ཟླ་མཚན་འཁྱིལ་དང་མངལ་སྐྲན་བུ་རོ་རྣག། ཁྲག་ཚབས་མ་ལུས་མངལ་སྐྱོན་སྦྱོང་བར་བྱེད།། རྩ་གཤེར་སྔོན་འགྲོ་སྒེ་གཤེར་ཐང་བཏང་ཞིང་།། མེ་ཏོག་གྲོག་ཞིང་འབའ་ཆ་བྱ་བྲ་རྣམས།། གང་རུང་ཆང་བཙོས་ན་ས་རྒྱུ་ཞབས་བདུག། ཁྲུས་དང་བསྐུ་མཉེ་བྱས་རྗེས་བྱང་པ་དང་།། གསེར་གྱི་བྱེ་མ་ཤིང་ཚ་སུག་སྨེལ་དང་།། དཀར་རྩི་མཐིང་ཤུན་ལོ་བརྒྱད་ཆུ་ལ་བསྐྱོན།། བྱ་ཐབས་ལག་ལེན་རྩ་སྦྱོང་སྤྱི་དང་མཐུན།། ཕྱི་ཡི་རྩ་གཤེར་ཆེ་འབྲིང་ཆུང་གསུམ་ལས།། ཆེན་པོ་རྒྱ་ཚ་ཤིང་ཚ་ཁ་རུ་ཚ།། བསེ་རུ་རྒྱ་རུ་བཙོད་རུ་ཤ་བའི་རུ།། དནྡ་དུར་བྱིད་དེ་བ་དཱ་རུ་དང་།། ད་བྱིད་བྱ་མ་བྱི་ཡི་མཇུག་སྒྲོ་ཕབས།། སུག་སྨེལ་རྡོ་དྲེག་དུད་པ་བུལ་ཏོག་རྣམས།། བུར་སྨུག་སྦྱར་བའི་རིལ་བུ་མངལ་དུ་བསྐྱལ།། འབྲིང་པོ་སུག་སྨེལ་རྒྱ་ཚ་ཚ་བ་གསུམ།། དནྡ་དུར་བྱིད་ཡ་བཀྵ་ར་ཕབས།། བ་སྤྲུ་ཤུག་ཚེར་སྦྲང་དང་བུ་རམ་སྦྱར།། ཆུང་བ་གུར་གུམ་རྒྱ་ཚ་སུག་སྨེལ་དང་།། བྱང་པ་དུར་བྱིད་བུལ་ཏོག་བུ་རམ་སྦྱར།། རིལ་བུའམ་ཁུ་བ་མངལ་དུ་གཅེ་འུས་བསྐྱལ།། རྒྱུ་ཞབས་དུགས་ཀྱིས་བསྲོ་ཞིང་ལག་པས་མཉེ།། ཟུག་ལངས་མི་དངང་འགོར་ན་གཅེ་འུས་དྲང་།། མངལ་ཁྲག་འཁྱིམས་དང་མངལ་སྐྲན་བུ་རོ་ལུས།། མངལ་ནད་ཁྲག་ཚབས་མ་ལུས་སྦྱོང་བར་བྱེད།། གཉིས་པ་རླུང་ཚབས་བཅུད་གཤེར་དག་གིས་བཅོས།། དེ་ལ་ཤ་བཅུད་ཆང་བཅུད་སྨན་བཅུད་གསུམ།། ཤ་བཅུད་སྦྱར་ཐབས་ལུག་ཐུག་ཆེན་པོ་ཡི།། གློ་སྙིང་མཆིན་མཆེར་མཁལ་མ་ལྟོ་ཚིལ་གཞང་།། ལྕེ་དང་ཨོལ་བ་རྨེན་བུ་ནམ་ཚོང་བྲང་།། ལྟག་པ་གུང་རྩིབ་མཇུག་ཐུང་རླིག་པ་མིག། འབྲག་དང་རྐང་བཞག་ཉྭ་གཞི་ཞིབ་བརྡུངས་ལ།། འབྲི་མར་རྙིང་པ་ཕུལ་དོ་ལུང་རྡོར་བསྐོལ།། ཁོལ་དུས་ཤ་རྣམས་བཏབ་ལ་སྣར་རྩམ་ཙམབཙོ།། དེ་ནས་གར་ཆང་ཕུལ་དོ་ཚ་བ་གསུམ།། ཤིང་ཀུན་ཆུ་དང་ཆུ་མ་འདྲེས་པའི་ཁྲག། རིམ་པས་གཅིག་ཁོལ་གཅིག་བླུག་དཀྲུག་ཅིང་བཙོ།། དེ་ཉིད་ཤ་སྤྱི་བསྲེས་ཏེ་ཚ་བར་བྱས།། སུམ་ཡར་བསྟེན་ཞིང་སྐོམ་དུ་གར་ཆང་བླུད།། ལུས་གྲངས་བསེར་བུ་མི་བཏང་རླུང་ཚབས་འདོན།། ཆང་བཅུད་སྦྲང་དང་བུ་རམ་གཟེ་མའི་ཆང་།། མར་ཆང་རུས་ཆང་ལྔ་ཡིས་རླུང་ཚབས་སེལ།། སྨན་བཅུད་ལ་ནི་ཁྲག་བཅུད་མར་བཅུད་གཉིས།། ཁྲག་བཅུད་སྦྱོར་བ་གནག་ལུག་ཤ་བ་ཡི།། ཤ་ཚིལ་ཁྲག་དང་རུས་ཁུ་བསྲེས་པ་ལ།། ཤིང་ཚ་བཏབ་བསྐོལ་ཕོག་སྟེ་གྲངས་པ་དང་།། སྨྱུག་ཤུན་ལྕུམ་རྩ་རྒྱམ་ཚ་ཚ་བ་གསུམ།། བཏབ་སྟེ་འཇམ་བསྲོས་ཁྱེའུ་སུས་བསྟེན་པར་བྱ།། ཡང་ན་བོང་ཁྲག་ཆུ་མ་ཕོག་པའི་ནང་།། ཤིང་ཚ་སུག་སྨེལ་སླེ་ཏྲེས་སྲ་འབྲས་སྲིན།། རྒྱམ་ཚ་ལྕུམ་རྩ་བཏབ་དཀྲུགས་ཁོལ་བ་དང་།། རུས་ཁུ་བླུག་བཙོས་ཁྱེའུ་སུས་ཁྱོར་རེ་བསྟེན།། མར་བཅུད་རྩ་བ་ལྔ་ཡི་སྨན་མར་ལ།། སྦྲང་དང་བུ་རམ་ཁ་ཚར་སྨན་མར་སྦྱར།། ཐོ་རངས་ཕྱི་དྲོ་བསྟེན་པས་རླུང་ཚབས་འདོན།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མོ་ནད་གཙོ་བོ་སྤྱི་བཅོས་ཀྱི་ལེའུ་སྟེ་བདུན་ཅུ་རྩ་བཞི་པའོ།། །།

X