//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་དོན་ལྔ་པ། མོ་ནད་བྱེ་བྲག་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 9:31:49 ཀློག་གྲངས། 10 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། མོ་ནད་བྱེ་བྲག་དབྱེ་བ་དེ་ཡི་རྒྱུ།། རྟགས་དང་བཅོས་ཐབས་རྣམ་པ་བཞི་ཡིས་བསྟན།། དབྱེ་བ་མངལ་ནད་རླུང་མཁྲིས་བད་ཀན་ཁྲག། འདུས་པ་རྣམ་ལྔ་གསང་བའི་སྐབས་སུ་བཤད།། ཁྲག་ཚབས་གློ་སྙིང་མཆིན་མཆེར་མཁྲིས་པ་མཁལ།། རྒྱུ་མ་འོ་མ་ནུ་མ་གོར་པ་བཅུ།། རླུང་ཚབས་མགོ་དང་རུས་པ་སྙིང་མཁལ་མ།། ཕོ་བ་རྒྱུ་མའི་ཚབས་དང་དྲུག་ཏུ་བཤད།། ཟླ་མཚན་ཆུ་སེར་རླུང་གིས་བྱེར་བ་ལས།། རྩ་ནད་ཅེས་བྱ་ཚབས་ནད་བཅུ་དྲུག་འགྱུར།། ཚབས་སྐྲན་ཆུ་བུར་ཅན་དང་ཧྲེམ་པོ་དང་།། བེམ་པོ་རྨེན་སྐྲན་ཕོ་སྐྲན་ནག་པོ་དང་།། རྩ་སྐྲན་ས་བོན་སྐྲན་དང་ཟ་ཁུ་དགུ།། ཟླ་མཚན་ཆུ་སེར་རླུང་གིས་སྒྲིལ་བ་ལ།། ཚབས་སྐྲན་ཞེས་བྱ་དབྱེ་བ་དགུ་རུ་འགྱུར།། མ་ར་ཙེ་དང་ཨ་སོ་རྣམ་པ་གཉིས།། མངལ་གྱི་སྲིན་བུ་ལངས་ཁྲོས་ནད་གཉིས་སྐྱེད།། དེ་རྟགས་སྙིང་གི་ཁྲག་ཚབས་རོ་སྟོད་གཟེར།། རྒྱུ་ཞབས་ཚ་ཞིང་གཏུབས་པ་སྙམ་དུ་བྱེད།། གློ་ཡི་ཁྲག་ཚབས་གློ་མང་རོ་སྟོད་གཟེར།། རྩེའུ་འགྲེང་ཡན་ལག་སྦྲིད་ཅིང་ཁ་གདོང་སྐྲངས།། མཆིན་པའི་ཁྲག་ཚབས་མིག་སྤྲིན་དམར་རམ་སེར།། མཆིན་པའི་སྟེང་དང་མགོ་བོ་ན་བ་འོ།། མཆེར་པའི་ཁྲག་ཚབས་རྒྱུ་ཞབས་ན་ཞིང་གཟེར།། ཕོ་བ་འཁྲོག་ཅིང་མཆེར་པའི་སྟེང་དུ་ན།། མཁྲིས་པའི་ཁྲག་ཚབས་ཉམ་ཆུང་སྐོམ་དད་ཆེ།། གློ་ལུ་ཤ་ལྤགས་སེར་པོར་འགྲོ་བ་ཡིན།། མཁལ་མའི་ཁྲག་ཚབས་འདོམས་གཡའ་མོ་མཚན་ཚ།། རྐེད་སོ་མན་ཆད་རུས་པ་ཁོལ་ཞིང་ཚ།། རྒྱུ་མའི་ཁྲག་ཚབས་ཚ་ཞིང་གཏུབས་སྙམ་བྱེད།། འོ་ཚབས་ཟླ་མཚན་འོ་ཁ་ཆུ་འདྲ་འཛག། སྙིང་འཕྱོ་ཆུ་སོ་ན་ཞིང་སྐྱུག་སྙམ་བྱེད།། ནུ་ཚབས་ནུ་མ་སྐྲངས་ཤིང་ཟུག་གཟེར་ཆེ།། ཁྲག་ཚབས་གོར་པ་ལུས་ལྕི་འགྲོ་མི་ཤེས།། རྒྱུ་སྨད་ཁེངས་ཤིང་ལྡང་དུབ་ན་བར་བྱེད།། མགོ་ཡི་རླུང་ཚབས་མགོ་འཁོར་ལིང་ཐོག་མོད།། རྣ་བ་འོན་ཞིང་རྣག་འཛག་སོ་འགྲམ་ན།། རུས་པའི་རླུང་ཚབས་རུས་པ་འཁོལ་ཞིང་གྲང་།། ཚིགས་རྐང་མཚང་ར་བེམ་པོ་བཟོད་པ་ཆེ།། སྙིང་གི་རླུང་ཚབས་དྲན་པ་མི་གསལ་ཞིང་།། མགོ་འཁོར་རྣ་བ་འུར་ཞིང་སྨྱོ་འབོག་བྱེད།། མཁལ་མའི་རླུང་ཚབས་རྐེད་ཚིགས་འཁོལ་ཞིང་ན།། གྲངས་ན་ན་ཞིང་རྐེད་པ་མན་ཆད་བཤལ།། ཕོ་བའི་རླུང་ཚབས་སྦོ་འདྲིལ་ལྡང་དུབ་བྱེད།། ཁ་ཟས་འཇུ་དཀའ་བསིལ་ཟས་ཤིན་ཏུ་གནོད།། རྒྱུ་མའི་རླུང་ཚབས་བསྡམས་ཤིང་ཟླ་མཚན་འབྱང་།། མངལ་སྐྲན་ཆུ་བུར་ཅན་ནི་རྒྱུ་སྨད་སྦོ།། ཟླ་མཚན་ཆུ་སེར་དག་ཏུ་འབྱང་བར་བྱེད།། ཁྲག་སྐྲན་ཧྲེམ་པོ་རྒྱུ་ཞབས་ལྡང་དུབ་ན།། ཤ་སྐྲན་བེམ་པོ་མཁལ་རྐེད་འཆད་སྙམ་བྱེད།། ཕོ་བ་རྫིངས་ཤིང་ཟས་སྐོམ་འཇུར་མི་འདོད།། མཚང་ར་མི་ཐེག་རྒྱུ་ཆུ་སྡོམ་པར་བྱེད།། རྨེན་སྐྲན་ཁྲག་ནག་འཛག་ཅིང་ཤ་མི་སྐྱེ།། ཆུ་སྲི་ལྡང་དུབ་ན་ཞིང་སྨད་མི་ཐེག། ཕོ་སྐྲན་རེམས་པ་ལུས་ཤ་སྐྱེར་མི་འདོད།། སྨད་བཤལ་གཞོགས་ལྕི་དབུགས་རྒོད་སྙིང་མི་བདེ།། སྐྲན་རོ་ནག་པོ་མདོག་འགྱུར་ཚིགས་གཞི་སྐྲངས།། ལུས་ཤ་བེམ་པོར་བྱེད་ཅིང་མཛེ་རུ་འགྲོ།། རྩ་སྐྲན་ལིང་པ་ཤ་རུས་ཁོལ་ཞིང་ན།། ས་བོན་སྐྲན་ནི་ཤ་རུས་འཇིག་སྙམ་བྱེད།། ཁྲག་སྐྲན་ཟ་ཁུ་ཁོང་པ་སྦོ་ཞིང་འཁྲོག། ཀུན་ཀྱང་བྱིས་པ་ཆགས་ལྟར་སྲ་ཞིང་འདྲིལ།། སྐབས་སུ་སྦོ་ཞིང་ན་གཟེར་ཆུ་སེར་འཛག། མངལ་གྱི་སྲིན་བུ་ལངས་པས་ཚ་བའི་ནད།། མཚང་ར་མཚན་མ་གཡའ་འཁོལ་ནུ་མ་རྒྱས།། སེམས་འཕྱོ་གཉིད་མེད་འགྲོ་འདོད་སྐྱེས་པ་འདོད།། ཤ་སྐམ་མོ་མཚན་དྲི་མ་ཤིན་ཏུ་མནམ།། ཁྲོས་པ་དེ་དུས་སྐྱེས་པ་མ་ཕྲད་པས།། མཛུབ་མོ་ཤིང་བུས་ཕྲུགས་པས་སྲིན་ཁྲོས་ཏེ།། མངལ་ཁ་སྐྲངས་ཤིང་ཆུ་སེར་འཛག་པ་དང་།། ཤིན་ཏུ་སྲ་ཞིང་ན་ལ་མཚན་མ་སྦོ།། བཅོས་ཐབས་རྩ་ནད་སྐྲན་དང་སྲིན་བུ་གསུམ།། དང་པོ་རྩ་ནད་བཅུ་དྲུག་བཅོས་པ་ནི།། རླུང་ཚབས་དྲུག་པོ་དྲོད་དང་བཅུད་ཀྱིས་བཅོས།། ཁྲག་ཚབས་བཅུ་པོ་བསིལ་དྲོད་ཁྲེ་འུར་བཅོས།། སྙིང་གི་ཁྲག་ཚབས་ཨ་རུ་རྒྱམ་ཚ་དང་།། ཤིང་ཚའི་ཐང་གཤེར་སྦྱངས་རྗེས་སྙིང་རྩ་གཏར།། དེ་འོག་འབྲས་བུའི་མར་སྦྱར་དྲུག་པ་བསྲེག། གློ་ཚབས་ལྟོ་གཤེར་ཆུང་བས་སྦྱང་བྱ་སྟེ།། དྲུག་མགོ་གཏར་ལ་བདེ་བྱེད་འབྲིང་པོ་སྦྱར།། རྗེས་ལ་དམར་གསུམ་མར་སྦྱར་བཞི་ལྔ་བསྲེག། མཆིན་ཚབས་གུར་གུམ་ཤིང་ཚ་པི་པི་ལིང་།། ཨ་རུ་ཆང་སྦྱར་སྦྱངས་ལ་རུ་ཐུང་གཏར།། གུར་གུམ་བདུན་སྦྱར་རྗེས་ལ་བརྒྱད་པ་བསྲེག། མཆེར་ཚབས་རྒྱ་ཚ་ཤིང་ཚ་དུར་བྱིད་སྦྱང་།། སེ་འབྲུ་བརྒྱད་སྦྱར་བཅུ་གཅིག་མཆེར་སྟེང་བསྲེག། མཁྲིས་ཚབས་ཨ་རུ་ཁྲོན་བུ་གསེར་མེ་ཏོག། ཐང་ཁྲུས་རྗེས་ལ་ཏིག་ཏ་བརྒྱད་པ་སྦྱར།། མཁྲིས་རྩ་གཏར་ཞིང་ཚིགས་པ་བཅུ་པ་བསྲེག། མཁལ་མའི་ཚབས་ལ་ཤིང་ཚ་ཆང་ལ་བསྐོལ།། རྒྱ་ཚ་རྒྱ་རུ་བ་སྤྲུ་ཙཎྡྲི་ལི།། ཁ་ཚར་བཏབ་བཏང་བྱིན་གཞུག་རྩ་ལ་གཏར།། རྗེས་ལ་རྩ་བ་ལྔ་སྦྱར་བཅུ་བཞི་བསྲེག། རྒྱུ་ཚབས་ལྕུམ་རྩ་ཨ་རུའི་ཐང་གཤེར་སྦྱང་།། འོམ་བུ་བདུད་རྩིའི་དུགས་བདུག་བཅུ་བདུན་བསྲེག། གཉན་མོའི་གློ་བ་སྒ་དང་མར་རྙིང་བཏང་།། འོ་ཚབས་འབྲུ་སྣའི་དུགས་བྱ་ཚ་མར་བྱུག། ཤིང་ཚ་གཟེ་མ་ར་སྣ་མཱུ་ལ་སྒ།། སྤང་རྒྱན་དཀར་པོ་བུ་རམ་སྦྱར་ལ་བཏང་།། ནུ་མའི་ཁྲག་ཚབས་མཚལ་གྱི་ཉ་དགུས་མནན།། བ་ཤ་ཀ་དང་ཀྱི་ལྕེ་དཀར་པོ་དང་།། ཨ་རུའི་ཐང་བཏང་འབྲུ་སྣའི་སྨན་མར་སྦྱར།། རྒྱབ་རྩ་གཏར་ཞིང་གསུམ་པ་བདུན་པ་བསྲེག། ཁྲག་ཚབས་གོར་པ་འབྲུ་འམ་ཚ་དུགས་བྱ།། ཤ་རུ་འོལ་མོ་རྒྱ་ཚ་ཆང་སྦྱར་བཏང་།། ལོང་རྩ་ཡོབ་གོང་རྩ་གཏར་ཟས་དྲོད་བསྟེན།། མགོ་ཡི་རླུང་ཚབས་མགོ་ཡི་རུས་ཁུ་དང་།། མགོ་ཤ་ཀླད་པ་གྲོད་པར་བྲུབས་བཙོས་བདུག། མཚོགས་གསང་ཕྱེ་ལ་སྡུད་སྒོ་གསུམ་སྟེང་བསྲེག། མགོ་བཅུད་མར་ཆང་འབྲས་བུའི་སྨན་མར་བསྟེན།། རུས་ཚབས་ཐོང་ཚེར་མཚང་ར་རུས་ཁུ་བསྡུས།། ཁུ་བར་མཚང་རའི་ཤ་བཏབ་ཚ་བ་གསུམ།། ཤིང་ཚ་སྨྱུག་ཤུན་བཙོང་བཏབ་འཚོས་པར་བཙོ།། ནང་པར་ཁྱེའུ་སུས་ཁྱོར་རེ་བསྲོས་ཀྱིན་བཏང་།། རུས་ཆང་སྦྲང་ཆང་བུར་ཆང་བསྔགས་པ་ཡིན།། སྙིང་ཚབས་སྤྲེ་དོམ་འཕྱི་བའི་སྙིང་གཙོ་བྱས།། སྙིང་སྣ་ཚོགས་ཚད་བརྡུངས་ཏེ་གྲོད་པར་བླུག། ཛཱ་ཏི་སུག་སྨེལ་ཤིང་ཚ་སྙིང་ཞོ་ཤ། རྭ་ཚ་དྭ་ཚ་ཨ་རུ་ཁ་རུ་ཚ།། ཁ་ཚར་བཏབ་སྟེ་ཆུ་ལ་འཚོས་པར་བཙོས།། དེ་དང་ལུག་ཤ་བསྲེས་ཏེ་ཁྱེའུ་སུས་བསྟེན།། འབྲས་བུའི་མར་སྦྱར་ཚིགས་པ་དྲུག་པ་བསྲེག། མཁལ་ཚབས་ར་ལུག་ཐུག་པོའི་མཁལ་མ་དང་།། རྟ་དང་གླང་གི་མཁལ་མས་གཙོ་བྱས་ལ།། མཁལ་སྣ་ཚིལ་བཅས་གཏུབས་སྟེ་ཏེགྲོད་པར་བླུག།ཤིང་ཚ་དྭ་ཚ་སུག་སྨེལ་ཨ་རུ་ར།། རྭ་ཚ་སྤོད་སྣ་བ་སྤྲུ་མཁལ་ཞོ་ཤ། གཟེ་མ་འབྲས་སྣ་གསུམ་བཏབ་བཙོས་བྱས་ལ།། ལུག་ཤ་བསྲེས་ཏེ་ཚ་བ་ཁྱེའུ་སུས་བསྟེན།། ཡང་ན་ལུག་ཐོང་མཁལ་མ་ཚིལ་དང་བཅས།། ཤིང་ཚ་སྨྱུག་ཤུན་བཏབ་བཙོས་གྲངས་པ་དང་།། བཙོང་དང་ཤིང་ཚ་ཚ་བ་གསུམ་བཏབ་བཏང་།། ཕོ་བའི་རླུང་ཚབས་བྱ་བྲའམ་བོང་བསྲེགས་བདུག། སེ་འབྲུའི་ཅུར་ནིས་འཕྱི་བ་གོང་མོ་བཏང་།། མདུན་རྒྱབ་མེས་མནན་སྒོག་སྐྱའི་སྨན་མར་སྦྱར།། རྒྱུ་མའི་རླུང་ཚབས་ཐོང་ཚེར་ཁྲག་ནང་དུ།། རྭ་ཚ་དྭ་ཚ་ཤིང་ཚ་སུག་སྨེལ་དང་།། ཨ་རུ་སླེ་ཏྲེས་སྤོད་སྣ་འབྲས་ཕྱེ་སྦྱར།། རྒྱུ་མ་རྒྱངས་བཙོས་ཁྱེའུ་སུས་བསྟེན་པར་བྱ།། ཡང་ན་བཞག་ཤ་ཚིལ་གཏུབས་ཁྲག་དང་བསྲེས།། སྨྱུག་ཤུན་བཙོང་དང་ཤིང་ཚ་རྒྱམ་ཚ་བཏབ།། རྒྱུ་མ་རྒྱངས་བཙོས་ཁྱེའུ་སུས་བསྟེན་པར་བྱ།། གཉིས་པ་སྐྲན་ནད་དགུ་ཡི་བཅོས་ཐབས་ནི།། མེ་ཏོག་སྣ་ཚོགས་ཆང་དུ་མནན་པ་འམ།། བྱ་བྲ་སྣུམ་དང་བསྲེས་ནས་འབྲུ་སྣའི་ལུམས།། ལུས་ཀུན་དྲིལ་ཞིང་མཚང་ར་རྒྱུ་ཞབས་བདུག། སྒ་དང་ཚ་མར་སྦྱར་བའི་བསྐུ་མཉེ་བྱ།། བྱི་ས་བྱ་བྲ་གྲོག་ཞིང་དྲོད་དུགས་བྱ།། སེ་འབྲུའི་ཅུར་ནིས་ཚ་བའི་རིལ་བུས་བཤིག། ལོང་རྩ་གཏར་ཞིང་ཁྲུས་གཤེར་སྐྲན་རོ་སྦྱང་།། རྗེས་ལ་པཉྪ་ཕ་ལའི་སྨན་མར་རམ།། རྩ་བ་ལྔ་སྦྱར་ཚིགས་པ་བཅོ་ལྔ་བསྲེག། བོང་བུ་འཕྱི་བ་ལ་སོགས་བཤུལ་ཤ་བསྟེན།། གསུམ་པ་སྲིན་བུའི་ནད་གཉིས་བཅོས་པ་ནི།། སྲིན་ལངས་ཚ་བའི་ནད་ལ་སྐྱེས་པ་བསྟེན།། དྲིལ་ཕྱིས་ས་བོན་དངས་མ་ཐང་དུ་བཏང་།། སྲིན་ཁྲོས་འབྲུ་འམ་མེ་ཏོག་བྱི་རུག་བདུག། བྱི་རུག་བརྒྱད་པའི་ཁུ་བ་མངལ་དུ་བཏང་།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མོ་ནད་བྱེ་བྲག་བཅོས་པའི་ལེའུ་སྟེ་བདུན་ཅུ་རྩ་ལྔ་པའོ།། །།

X