//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་དོན་དྲུག་པ། མོ་ནད་ཕལ་བ་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 9:32:27 ཀློག་གྲངས། 13 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། མོ་ནད་ཕལ་པ་མཚན་མའི་ནད་དང་ནི།། བུ་མ་ཕྱིན་དང་མགོ་མཇུག་ལོག་པ་དང་།། རོག་མ་ཕྱིན་དང་སྣོད་ལུག་ཁྲག་མ་ཆོད།། ནད་གཞུག་ལས་དང་དུག་ཐབས་གྱུར་པ་བརྒྱད།། དང་པོ་མངལ་ཆགས་ཟླ་བ་ལོན་པ་དང་།། ཕོ་མོ་གཉིས་ཀྱི་མཚན་མ་དོད་པའི་དུས།། ཕ་དང་མ་ལ་ཆགས་དང་ཞེ་སྡང་སྐྱེ།། དེ་དུས་མཚན་མའི་ནང་དུ་ཉིང་ལོ་འབྱུང་།། སྒྱིད་སྐྱུར་ཚིག་པ་ཟ་ལ་མཆི་མ་མང་།། དང་ག་མི་བདེ་ཟས་སྐོམ་སྣ་ཚོགས་འདོད།། སྟོང་སྐྱུགས་བྱེད་ཅིང་ནད་གཞི་གར་ཡོད་ལྡང་།། འདི་ལ་ཉིན་གཉིད་མི་ལོག་གྲངས་མི་བྱ།། གང་འདོད་ཟས་བྱིན་རྟ་བོང་བྱ་ཤ་སྤང་།། དྲག་དལ་མི་བྱ་སྐམ་སར་རན་ཙམ་བཅག། ནད་གཞི་གང་ལངས་དེ་ཡི་གཉེན་པོ་བསྟེན།། བུ་མ་ཕྱིན་ལ་གསོན་པོ་གཤིན་པོ་གཉིས།། གསོན་པོ་ནལ་བུ་དབྱུང་དང་བཙར་མ་འདོད།། ནལ་བུ་གདོན་ཐབས་སྨན་གཉིས་གསུམ་དང་ལྔ།། ལྟོ་དགུག་རྩ་ཁ་ཕྱེ་ལ་ཆང་སྦྱར་བཏང་།། ཐུན་དང་ཡུན་དང་སྦྱར་ལ་བུ་རྩ་གཏར།། ཟླ་བདུན་མན་ཆད་ཐོན་པར་ངེས་པ་ཡིན།། བཙར་མ་འདོད་ལ་ཕྱི་ནང་བར་དང་གསུམ།། དང་པོ་ནང་གི་སྣོད་ནས་མ་འགྱུར་ན།། ཕོ་ཡི་རྨོངས་དང་མོ་ཡི་སྤྱི་སྐྲ་གཉིས།། བསྲེགས་ཐལ་རྒྱ་རུ་གཙོད་རུ་བསེ་རུ་གསུམ།། ཞིབ་བཏགས་ཆང་སྦྱར་བཏང་ལ་དུགས་ཀྱིས་བདུག། ཡང་ན་མདེ་འབྱིན་རྒྱ་རུ་མདའ་རྒྱུས་གསུམ།། ཆང་སྦྱར་བཏང་ལ་བྱི་སའི་དུགས་ཀྱིས་བདུག། ཡང་ན་སྦྲང་མར་རྒྱ་རུ་སྦྱར་ལ་བཏང་།། ཡང་ན་ལྷ་དང་ཡི་དྭགས་གཏོར་མས་མཆོད།། སྨྲ་བཅད་སྔགས་སྟོང་ཞུན་མར་བཏབ་བཏང་བྱིན།། ཨེཾ་གྲེང་གྲེང་མ་ཧྭོ་གྲེང་བཛྲ་རྗེ་སེ་སརྦ་བྱི་དེ་སྲོཾ་ཧྭོ།། བར་གྱི་རུས་པའི་མིག་ནས་མ་ཐོན་ན།། མཚོགས་མ་བརྟོལ་ལ་མཛུབ་མོས་དྲག་ཏུ་འཐེན།། ཐོན་དཀའ་སེན་མོ་བྲེགས་ལ་ཆང་གིས་བཀྲུ།། ཆ་བྱད་ཟླ་གམ་རྒྱབ་འདྲས་གསིལ་དེ་དབྱུང་།། ཕྱི་ཡི་ཤ་ལྤགས་མིག་ནས་མ་ཐོན་ན།། རྐེད་བཅིངས་སྒ་སྟེང་བཞག་ལ་ཕྲག་པ་མནན།། ཤི་རོ་མ་ཐོན་མདའ་རྒྱུས་རྒྱ་ཚ་དང་།། རྒྱ་རུ་གཙོད་རུ་ཆང་སྦྱར་དུགས་ཀྱིས་བདུག། ཡང་ན་དུར་བྱིད་མདེ་འབྱིན་བྱ་མ་བྱི།། རྒྱ་རུ་བུར་ཆང་སྦྱར་ལ་བཏང་བར་བྱ།། ཡང་ན་རྒྱ་ཚ་དུར་བྱིད་ཤ་རུའི་ཐལ།། བ་སྤྲུ་ཆང་སྦྱར་སྦང་སྐམ་དུགས་ཀྱིས་བདུག། ཡང་ན་རྒྱ་ཚ་ཁྱི་རླིག་ཚ་བ་བཏང་།། དུར་བྱིད་རྒྱ་རུ་རྒྱ་ཚ་མར་དང་སྦྱར།། མངལ་དུ་བཏང་སྟེ་ཕྱིང་པའི་སྣུམ་དུགས་བྱ།། མགོ་མཇུག་ལོག་གམ་རྐེད་པ་མཇིང་པ་ལྟེབས།། འཕོངས་ནས་འོང་ན་རྐང་པ་བཏེག་ལ་སྤྲུག། མཛུབ་མོས་འཕུལ་ཏེ་ཕུ་དུང་ཕོངས་སུ་བརྡེག། སྔགས་ལ་འབྲུ་ལོག་བྱས་ཏེ་ཁོང་དུ་བཏང་།། རོག་མ་ཕྱིན་ན་རི་བོང་རིལ་མ་དང་།། རྒྱ་ཚ་རྒྱ་རུ་རྨོང་གཞོབ་ཆང་སྦྱར་བཏང་།། སྔགས་སམ་ཁྱི་རླིག་སྦྱོར་བས་ངེས་པར་ཐོན།། བུ་སྣོད་ལུག་ན་ཆུ་འཇམ་འོ་མས་བཀྲུ།། ཕྱི་ནང་སློག་ལ་མཛུབ་མོས་སླེབ་ཚད་བསྡིགས།། གཡེར་མས་ཨིག་ཏུ་བཅུག་པས་ཚུད་པར་ངེས།། མ་ཚུད་ཕྱིང་པའི་ཡོག་ཐོད་ཕྲུ་མས་དྲིལ།། དེ་ལ་རྒྱ་ཚ་གླན་ཏེ་ཕུགས་སུ་བསྐྱལ།། རྐང་པ་བཏེག་ལ་བསིག་ཅིང་མཚན་ཁར་བདུག། འཕོངས་བསྟོད་ཉལ་ཏེ་འགྲོ་འདུག་ལངས་པ་སྤང་།། ཁྲག་ཤོར་བུར་ཆང་ཀ་ར་ཆང་སྦྱར་བླུད།། མ་ཆོད་རྩ་ཁུ་བྱུག་དང་ཆང་སྦྱར་བཏང་།། ཡང་ན་ནས་ཚིག་ཁུ་བར་སྦྲང་རྩི་དང་།། དོམ་མཁྲིས་སྐྲ་གཞོབ་བཏབ་ནས་བཏང་བས་ཆོད།། ཡང་ན་དོམ་མཁྲིས་ཤིང་ཚ་བཏབ་ལ་བཏང་།། ཡང་ན་གོང་མོའི་སྒྲོ་གཞོབ་སྦྲང་རྩི་དང་།། ཀ་ར་སྐོགས་པའི་ཐལ་བ་སྦྱངས་ལ་བཏང་།། ཉྭ་གཞི་རོ་སྨད་ཆུས་བསྒྲང་བཅུ་དྲུག་བསྲེག། བསྐུ་མཉེ་གསུར་བདུག་བུར་ཆང་རུས་ཁུ་བསྟེན།། བཙས་རྗེས་ནད་ལྷག་འདྲིལ་ནས་ཟུག་སྐྱེས་ན།། བྱི་སའི་དུགས་བྱ་གཡེར་མ་ཆང་སྦྱར་བཏང་།། སྦྲང་དང་ཆང་སྦྱར་བུར་ཆང་མང་དུ་བཏང་།། དེས་མ་ཞི་ན་སྦང་མ་ཚྭ་བསྲོས་བདུག། དེ་རྗེས་ལོང་རྩ་གཏར་ལ་མངལ་བཤལ་བྱ།། འགྱིངས་རྗེས་ཤེ་རུལ་ཁྲག་རྣག་བྱུང་བ་ན།། འཇིགས་པ་མི་དགོས་མངལ་བཤལ་བྱས་པས་ཐོན།། མོ་ནད་དུག་ཐབས་བཙས་རྗེས་ཤ་མར་རྙིང་།། ཉིན་གཉིད་དྲག་ཤུལ་རྐྱེན་གྱིས་མཁྲིས་ཚད་སྐྱེད།། རྩ་རྒྱུད་ཕྲ་མགྱོགས་ཤེད་མེད་སྐོམ་དད་ཆེ།། རོ་སྟོད་གཟེར་ཕྲན་འཕོ་ཞིང་ལུད་པ་དམར།། དེ་ལ་ཁ་ཟས་བསིལ་དྲོད་སྤེལ་ལ་བཏང་།། རུ་ཐུང་སྣོད་ཀ་མཁྲིས་རྩ་ལོང་རྩ་གཏར།། ཨ་རུ་ལྕུམ་རྩ་དུར་བྱིད་ཐང་གིས་སྦྱང་།། སྟབ་སིང་སེངཏིག་ཏའི་ཐང་བཏང་ག་པུར་རམ།། གུར་གུམ་བདུན་སྟེང་དོམ་མཁྲིས་བསྣན་ལ་བཏང་།། སྨན་དང་ཟས་གཉིས་བསིལ་དྲོད་བསྣོལ་བྱས་ཏེ།། ཚ་གྲང་སྤེལ་བཅོས་བཅུད་ལ་སྔ་བར་དབབ།། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མོ་ནད་ཕལ་པ་གསོ་བའི་ལེའུ་སྟེ་བདུན་ཅུ་རྩ་དྲུག་པའོ།། །།

X