//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་དོན་བདུན་པ། འབྱུང་པོའི་གདོན་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 9:33:06 ཀློག་གྲངས། 24 

གདོན་གསོའི་སྐབས་ལ་ཇི་ལྟར་བསླབ་པར་བགྱི།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་དང་།། སྟོན་པ་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། གདོན་ལ་འབྱུང་པོའི་གདོན་དང་སྨྱོ་བྱེད་དང་།། བརྗེད་བྱེད་གཟའ་དང་ཀླུ་གདོན་རྣམ་ལྔར་བཤད།།འབྱུང་པོའི་གདོན་ལ་རྒྱུ་རྐྱེན་མཚན་ཉིད་དང་།། དབྱེ་བ་རྟགས་དང་བཅོས་ཐབས་ལྔ་ཡིས་བསྟན།། རྒྱུ་རྐྱེན་སྡིག་པ་མི་དགེའི་ལས་མང་སྤྱད།། གྲོགས་མེད་ཡ་ང་གཅིག་པུར་བསྡད་པ་དང་།། ཡ་ག་ཅན་ལ་འབགས་གཙེས་བརྙས་པ་དང་།། མཆོད་འོས་ཆག་དང་མྱ་ངན་གདུངས་ལ་སོགས།། མི་འཚམས་ལུས་ངག་འགལ་ལས་འཇུག་པར་འགྱུར།། མཚན་ཉིད་འབྱུང་པོ་མི་མ་ཡིན་ལ་སོགས།། ལུས་ངག་ཡིད་ལ་ཞུགས་ནས་སྤྱོད་པ་སྒྱུར།། དབྱེ་བ་ལྷ་དང་ལྷ་མིན་དྲི་ཟ་ཀླུ།། གནོད་སྦྱིན་ཚངས་བ་སྲིན་པོ་ཤ་ཟ་དང་།། ཡི་དྭགས་གྲུལ་བུམ་བྱད་སྟེམས་གཡེང་བྱེད་དང་།། རོ་ལངས་མཚུན་ལྷ་བླ་མ་དྲང་སྲོང་རྒན།། གྲུབ་པ་ཞེས་བྱའི་གདོན་ཆེན་བཅོ་བརྒྱད་དོ།། དེ་རྟགས་སྔར་བས་དད་དང་ཤེས་པ་དང་།། ལུས་ངག་ཡིད་སྤྱོད་འགྱུར་ཞིང་དེ་སྤྱོད་བྱེད།། བློ་སེམས་མི་བདེ་སྤྲོ་ཐུང་ཤེས་པ་འཕྱོ།། ཁྱད་པར་ལྷ་གདོན་ཤྩྪ་སྐཱ་ཏ་སྐད་སྨྲ།། ཚིག་སྙན་གཉིད་ཆུང་བཞིན་ལེགས་གཙང་སྦྲ་ཆེ།། ལྷ་མིན་ཤ་ཆང་ལ་དད་མིག་ཟུར་བལྟ།། ཁྲོ་གཏུམ་ང་རྒྱལ་ཆེ་ཞིང་བབ་ཆོལ་མང་།། དྲི་ཟ་སྒེག་ཅིང་དྲི་ཞིམ་རང་ལ་མགུ།། གླུ་གར་རྩེད་འཇོ་ལ་དགའ་རྒྱན་དམར་འདོད།། ཀླུ་གདོན་མདངས་ལྡན་མིག་དམར་འབུར་ཚུགས་བལྟ།། དཀར་དང་དམར་འདོད་ལྕེ་མྱུལ་ཁ་བུབ་ཉལ།། གནོད་སྦྱིན་གཏེར་ལ་དགའ་ཞིང་གསང་གཏམ་སྨྲ།། སྨན་པ་བྲམ་ཟེ་ལ་སྡང་ཉ་ལ་སྲེད།། ཚངས་པ་ཀྱེ་ཞེས་འབོད་ཅིང་བསྟན་བཅོས་འདོན།། རང་བརྡེག་གཞན་ལ་གཤེ་ཞིང་དགོད་ལ་དགའ།། སྲིན་པོ་སྟོབས་ལྡན་ཚིགས་རྩུབ་དམར་ལ་རྩི།། ཤ་ཟ་ངོ་གནོང་སྐད་དམའ་སྐབས་སུ་འབོག། དོན་མེད་ངུ་ཞིང་ས་འབྲད་འབྲེལ་མེད་སྨྲ།། ཡི་དྭགས་ཡི་དྭགས་སྤྱོད་ཚུལ་བྱེད་པ་སྟེ།། མི་འམ་ཅི་འདར་འཇིགས་ཤིང་ཟས་མི་འདོད།། གྲུལ་བུམ་ངོ་ནག་དལ་འགྲོ་རླིག་པ་སྐྲངས།། བྱད་སྟེམས་ཤིང་འཛིན་གཅེར་རྒྱུག་གནས་སྟོང་འདུག། གཡེང་བྱེད་ཆུ་འདོད་དངང་ཚིག་ཟས་མི་འདོད།། རོ་ལངས་བདེན་སྨྲ་གཉིད་ཆེ་རྒྱན་དགའ་འདར།། མཚུན་ལྷ་ཁ་སྐམ་མིག་འཛུམ་གཡོན་གོས་གོན།། བླ་མ་དྲང་སྲོང་རྒན་པོ་གྲུབ་པ་བཞི།། རང་རང་སྤྱོད་ལམ་ཁ་ཟས་དེ་དང་མཐུན།། གང་ཡང་བྱིས་པ་དང་འགྲོགས་གཅེར་བུར་འབུད།། སྐྲ་བརྫེས་བློ་སེམས་མི་བདེ་ཡུན་རིང་སྤང་།། བཅོས་ཐབས་སྔགས་བཟླས་གཏོར་མ་སྦྱིན་སྲེག་དང་།། ཀློག་འདོན་མཉམ་འཇོག་བསྙེན་བསྒྲུབ་ཚོགས་བསགས་པས།། འབྱུང་པོའི་གདོན་ཉིད་ཞི་བར་བྱེད་པ་ཡིན།། བྱ་ཀྲྀ་སྤང་སྤོས་ཤུ་དག་རྨ་བྱའི་སྒྲོ།། ཤིང་ཀུན་སྦྲུལ་ལྤགས་སྲན་ཕུབ་བྱི་ལའི་བྲུན།། ཆ་མཉམ་དུ་བས་བདུགས་པས་འབྱུང་པོ་འབྱེར།། ཙན་དན་གུར་གུམ་སུག་སྨེལ་འབྲས་བུ་གསུམ།། བྱ་ཀྲྀ་སྐྱེར་པ་སྒྲོན་ཤིང་ཚ་བ་གསུམ།། གནྡྷ་པ་ཏྲ་དུག་ཉུང་པུ་ཤེལ་རྩེ།། ཡུངས་ཀར་རྒྱ་སྤོས་ཤུག་པ་པྲི་ཡངྐུ།། དབྱི་མོང་རུ་རྟ་ཧོང་ལེན་བོང་ང་དཀར།། སྤང་མ་ལྡོང་རོས་གཅིན་དྲུག་མར་རྙིང་ལ།། སྦྱར་བ་ཁུས་འདེབས་སྨན་མར་ཞེས་བྱ་སྟེ།། བཟའ་བྱུག་སྣར་བླུགས་གདོན་ལས་མྱུར་དུ་གྲོལ།། རིག་སྔགས་གྲ་ལྔ་མཆོད་ཕུལ་བསྒྲགས་ན་ཕན།། གཏོར་མ་རིན་ཆེན་དྲི་སྣ་འབྲུ་སྣ་དང་།། མེ་ཏོག་འབྲས་ཆན་ཁུ་བ་དཀར་མངར་རྣམས།། ལྷ་དང་བླ་མ་དྲང་སྲོང་གྲུབ་པ་དང་།། རྒན་པོ་ལྔ་ལ་ལྷ་ཡི་ཁང་པར་བཏང་།། ལྷ་ལ་བྱང་ཕྱོགས་ལྷ་མིན་ནུབ་ཏུ་བྱིན།། དྲི་ཟའི་གདོན་ལ་བ་ལང་ལམ་མདོ་དང་།། ཀླུ་དང་མཚུན་ལྷ་འབབ་ཆུའི་འགྲམ་དུ་བྱིན།། གནོད་སྦྱིན་ཆུ་གཉིས་འདུས་པའི་གནས་སུ་བཏང་།། སྲིན་པོ་ལམ་མདོ་ཚངས་པ་ཤར་དུ་མཆོད།། ཤ་ཟ་ལ་ནི་ནུབ་ཀྱི་ཁང་སྟོང་བཏང་།། གཏོར་མ་སྦྱིན་སྲེག་སྨན་དུད་ལ་སོགས་པ།། ཁྱད་པར་རང་རང་འཛིན་པའི་དུས་སུ་བསྟེན།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་འབྱུང་པོའི་གདོན་གསོ་བའི་ལེའུ་སྟེ་བདུན་ཅུ་རྩ་བདུན་པའོ།། །།

X