//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་དོན་བརྒྱད་པ། སྨྱོ་བྱེད་ཀྱི་གདོན་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 9:33:50 ཀློག་གྲངས། 11 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། རྣམ་ཤེས་སྨྱོ་བྱེད་ནད་ལ་རྒྱུ་རྐྱེན་དང་།། དབྱེ་བ་རྟགས་དང་བཅོས་ཐབས་བཞི་ཡིས་བསྟན།། རྒྱུ་རྐྱེན་སྙིང་སྟོབས་ཞན་ལ་མྱ་ངན་དང་།། ཡིད་མི་བདེ་དང་སེམས་ལས་ཆེས་པ་དང་།། ཟས་སྤྱོད་མི་འཕྲོད་གདོན་གྱིས་རྐྱེན་བྱས་ཏེ།། ཉེས་པ་འཁྲུགས་པས་རྣམ་ཤེས་རྒྱུ་གནས་ཞུགས།། ཡིད་ཀྱི་ལམ་ལོག་དྲན་ཉམས་སྨྱོ་བར་འགྱུར།། དབྱེ་བ་རླུང་མཁྲིས་བད་ཀན་འདུས་པ་དང་།། ཡིད་གདུང་དུག་གདོན་ལས་གྱུར་བདུན་དུ་བཤད།། དེ་རྟགས་རླུང་གྱུར་ཤ་སྐམས་ལྦུ་བར་སྐྱུག། མང་དུ་སྨྲ་ཞིང་ངུ་འབྲོས་བྱེད་པ་དང་།། མིག་སྤྲིན་དམར་ལ་ཁ་ཟས་ཞུ་ནས་ལྡང་།། མཁྲིས་གྱུར་ཁྲོ་བརྡེག་བསིལ་འདོད་མིག་ཆུ་སེར།། མེ་དང་སྐར་མ་མིག་སྔར་མཐོང་བར་བྱེད།། བད་ཀན་རློན་ཞིང་སྨྲ་ཉུང་ཡི་ག་འཆུ།། གཉིད་ཆེ་སྣབས་དང་ཁ་ཆུ་མང་དུ་འཛག། འདུས་པ་ལས་ནི་ཀུན་རྟགས་སྟོན་པར་བྱེད།། ཡིད་གདུང་དྲན་སྐྱེན་དུས་ལྡང་སེམས་མི་བདེ།། དུག་གིས་མདངས་ཉམས་སྟོབས་ཆུང་སེམས་འཁྲུལ་བྱེད།། གདོན་གྱུར་གང་གནོད་སྤྱོད་པར་འགྱུར་བ་འོ།། བཅོས་པའི་ཐབས་ལ་སྤྱི་དང་བྱེ་བྲག་གཉིས།། དང་པོ་ཡིད་འཇུག་བུ་གའི་ལམ་བསལ་ཕྱིར།། བསྐུ་མཉེ་ལུམས་བྱ་སྐྱུགས་ཁྲུས་གཏར་བས་སྦྱང་།། འབྲས་བུ་གསུམ་དང་ཧ་རེ་ཎུཾ་ཀ་དང་།། སྒྲོན་ཤིང་ཐལ་ཏྲེས་ཡུང་སྐྱེར་པརྞ་གཉིས།།རྒྱ་སྤོས་རུ་རྟ་སྟག་ཚེར་པྲི་ཡངྐུ་།། ནཱ་ག་གེ་སར་ད་ལིས་དོང་ག་བཙོད།། སེ་འབྲུ་བྱི་ཏང་ག་དང་ཀ་ཀོ་ལ།། དབྱི་མོང་ཨུཏྦལ་ཙན་དན་ཤུག་པ་རྣམས།། མར་རྙིང་དགེ་བའི་སྨན་མར་ཞེས་བྱ་སྟེ།། རོ་ཙ་བུ་བསྐྱེད་ལུས་རྒྱས་སྨྱོ་བྱེད་འཇོམས།། ཁྱད་པར་རླུང་ལས་གྱུར་ལ་འཇམ་རྩི་བྱ།། བོང་ང་ཞོ་གཅིག་ཆང་དུ་སྦངས་ལ་བཏགས།། ཨ་རུ་དྲུག་འགྱུར་ཕྱེ་མ་ཆུ་ལ་བསྡུས།། མར་བསྐོལ་བཟང་དྲུག་བུ་རམ་བཏབ་སྟེ་བསྟེན།། ཐབས་དང་མི་ལྡན་ཚེ་ཡི་བར་ཆོད་འགྱུར།། ཡང་ན་བྱ་ཁྱུང་ལྔ་པ་ཛཱ་ཏི་མཉམ།། རིལ་བུ་བྱས་ཏེ་གཅིག་གཉིས་གསུམ་བསྐྱེད་བསྟེན།། ཛཱ་ཏིའི་མར་དང་རུས་ཆེན་སྨན་མར་དང་།། ལོ་ཤ་ལོ་མར་ཤ་ཆེན་གར་ཆང་བསྟེན།། ཨ་རུ་ཚ་བ་གསུམ་དང་ཙི་ཏྲ་ཀ། འུ་སུ་ལ་ལ་ཕུད་དང་ཁ་རུ་ཚ།། རྒྱམ་ཚ་བུ་རམ་སྦྱར་བའི་ཕྱེ་མ་བསྟེན།། རླུང་གསང་རྣམས་སུ་མེ་དང་ཐུར་མ་བྱ།། མཁྲིས་གྱུར་དནྡ་དུར་བྱིད་གསེར་མེ་ཏོག། ཨ་རུ་ར་དང་པི་པི་ལིང་གིས་སྦྱང་།། ཏིག་ཏ་མ་ནུ་རུ་རྟ་བ་ཤ་ཀ། ཧོང་ལེན་གུར་གུམ་སྐྱུ་རུའི་ཕྱེ་མ་བཏང་།། སྙིང་རྩ་གཏར་ཞིང་ཏིག་ཏའི་སྨན་མར་སྦྱར།། ཟས་སུ་ལུག་ཤ་རྔ་བྲན་ཤ་གསར་བསྟེན།། བད་གྱུར་སྤྱང་ཚེར་སྒེ་གཤེར་པོ་སོ་ཆ།། བ་ཡི་འོ་མར་སྦྱར་ལ་སྐྱུག་ཏུ་གཞུག། རྩུབ་པའི་ཟས་སྨན་མེ་ཐུར་བསྟེན་པ་དང་།། འདུས་པ་ལ་ནི་ཀུན་གྱི་གསོ་སྦྱར་བྱ།། ཡིད་གདུངས་ཆོས་ནོར་གཏམ་སྙན་གྲོགས་ཀྱིས་གསོ།། དུག་ལ་དཔའ་སེར་བོང་ང་དཀར་དམར་རྩད།། རེ་རལ་ཡུང་བ་དྲི་ཆུའི་རིལ་བུ་བསྟེན།། གདོན་གྱུར་བྱི་ལ་ར་ཐུག་འུག་པ་ཝ།། གཅིན་རྟུག་མཁྲིས་སེན་སྤུ་ལྤགས་སྤོས་སྦྱར་བདུག། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྨྱོ་བྱེད་ཀྱི་གདོན་གསོ་བའི་ལེའུ་སྟེ་བདུན་ཅུ་རྩ་བརྒྱད་པའོ།། །།

X