//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་གྱ་གསུམ་པ། མགོ་བོའི་རྨ་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 9:48:58 ཀློག་གྲངས། 23 

དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས།། ཡན་ལག་དང་པོ་མགོ་ལ་མཚོན་ཕོག་ན།། དེ་ལ་རྟགས་དང་བཅོས་ཐབས་ཇི་ལྟར་བགྱི།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་དང་། དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། ཡན་ལག་ལྔ་ལ་གཅེས་པ་མགོ་བོ་ཡིན།། དེ་ལ་གནས་ལུགས་ཕོག་ས་བརྟག་པའི་ཐབས།། བཅོས་པའི་ཐབས་དང་ལོག་གནོན་ལྔ་ཡིས་བསྟན།། དང་པོ་མི་རིགས་མགོ་དབྱིབས་བསྟན་པ་དང་།། ཤ་རུས་ཀླད་པ་རྩ་ཡི་གནས་ལུགས་བསྟན།། མི་རིགས་རླུང་མཁྲིས་བད་ཀན་ལྡན་འདུས་བདུན།། མགོ་དབྱིབས་སྤྱི་རིང་ལྟག་འབུར་སོགས་ཀ་དང་།། གྲུ་བཞི་ཟླུམ་པོ་འཕྲེད་ཉལ་སྤྱི་ལེབ་བོ།། དེ་དག་ཀླད་པ་རུས་པ་རིམ་བཞིན་ངན།། དེ་བཞིན་རྣམ་པ་གཟེར་རྩ་མང་བར་བཤད།། ཀླད་པ་རྒྱ་མཚོའི་གནས་ལུགས་བསྟན་པ་ནི།། ཤ་ཀླད་མར་ཀླད་བུང་ཚང་ཀླད་པ་དང་།། ཕྲུམ་ཀླད་ཞོ་ཀླད་འོ་ཀླད་ཆུ་ཀླད་བདུན།། མི་རིགས་མགོ་ཡི་དབྱིབས་དང་ཀླད་པ་སྦྱར།། དེ་དག་རིམ་པས་གོང་མ་བཟང་བར་འདོད།། རྒྱ་དར་སྨུག་ལ་དངས་པ་གླ་ཧེལ་ཙམ།། རྩ་ཡི་དྲ་བར་གཏུམས་ནས་གནས་པ་ཡིན།། འོན་ཀྱང་མགོ་རིལ་མིག་ནག་མཚུལ་པ་ཉེག། སྣབས་ལུད་ཉུང་ཞིང་གཡང་ཆུ་རྨ་ལ་བཟང་།། མཚོན་ཕོག་དུས་ན་འགྱེལ་བུབ་ཟ་ཟི་མེད།། མི་སྐྱུག་མི་ལྐུག་འཆལ་མེད་བཟང་རྟགས་ཡིན།། དེ་ལྡོག་ཞོ་དང་འོ་མ་ཆུ་ཀླད་འབྱུང་།། ཀླད་ཁྱིམ་རུས་པའི་གནས་ལུགས་བསྟན་པ་ནི།། ཕོ་རུས་མོ་རུས་མ་ནིང་རུས་པ་གསུམ།། དེ་ལ་སྒང་དང་རྩིབས་དང་མཐའ་རུ་འགྱུར།། ཕོ་རུས་གདུང་མཐུག་ལྷ་བ་ཆུང་ལ་མཁྲེགས།། མོ་རུས་ལྷ་གདུང་སྙོམས་ཤིང་སྲབ་ལ་མཉེན།། མ་ནིང་རུས་པ་ལྷ་བ་ཆེ་ལ་གསོབ།། ལྟག་པ་སྨིན་དཀྱིལ་སོར་བཞི་ཞུར་པོ་སྒང་།། རུས་པ་མཐུག་མཁྲེགས་སྐྲོན་ལ་ལྷ་བ་ཆེ།། དེ་ཡི་གཡས་གཡོན་སོར་བཞི་རུས་པའི་རྩིབས།། གོང་བས་སྲབ་ལ་ལྷ་གདུང་སྙོམས་པ་ཡིན།། དེ་ཡི་མཐའ་མ་རྣ་ལྟག་ལྷག་མ་རྣམས།། ལྷ་བ་ཆུང་ཞིང་སྲབ་ལ་སྐྲོན་པར་བཤད།། གཡོགས་པ་ཤ་ཡི་གནས་ལུགས་བསྟན་པ་ནི།། སྤྱི་གཙུག་ཤ་ནི་བཞག་སྒོར་འཁྱིལ་འདྲ་གཉན།། ལྟག་པའི་ཤ་ནི་ཉ་ལྡོང་ལྡངགཞིབས་འདྲ་གཉན།། མཚོགས་མའི་ཤ་ནི་གཞུ་ཤུལ་བཏང་འདྲ་གཉན།། མུར་གོང་ཤ་ནི་ལུག་མཁལ་བརྩེགས་འདྲ་གཉན།། དེ་ལས་གཞན་པ་མི་གཉན་འདག་གཡོགས་འདྲ།། འབྲེལ་བ་རྩ་ཡི་གནས་ལུགས་བསྟན་པ་ནི།། ཀླད་པའི་རྩ་དང་རུས་རྩ་ཤ་རྩ་གསུམ།། ཀླད་པའི་རྩ་ལ་འཚོ་བྱེད་དར་རྩ་དང་།། ཕྱི་ནང་གཞན་འབྲེལ་ཆུ་རྩ་གཉིས་སུ་བཤད།། དང་པོ་གཉན་གྱི་རེ་ཐག་རྣམ་པ་བཞི།། ཕྱི་ནང་རྒྱུག་པ་ཚངས་པའི་སྐུད་པ་འོ།། རེ་ཐག་བཞི་ནི་རྣ་བའི་ཕྱི་ནང་ན།། རྩེ་ནག་གཉིད་ལོག་གཉིས་ལས་གྱེས་པ་ཡི།། དར་སྟེང་ཤིང་ལོའི་འདབ་ལྟར་འབྲེལ་པར་གནས།། ཕྱི་ནང་རྒྱུག་པ་ལྟག་རུས་འབུར་པོ་ནས།། མཁུར་ཚོས་བྱུང་སྟེ་སླར་ལོག་ཀླད་པ་བླངས།། འདུས་སོ་གསུམ་འབྲེལ་སྲུབ་ལ་ཕྱི་ནང་བཙེམས།། ཚངས་པའི་སྐུད་པ་ཤ་རུས་ཀླད་པ་ཡི།། རྩ་གསུམ་འདུས་ཏེ་སྤྱི་བོའི་གཙུག་ན་གནས།། གཞན་དང་འབྲེལ་བའི་ཆུ་རྩ་ཕྱི་ནང་གཉིས།། ནང་རྩ་དར་གྱི་དཔྱང་ཐག་བཅུ་གསུམ་སྟེ།། རྗེ་ཞབས་ལས་བྱུང་སྐེ་ཡི་ནང་ནས་རྒྱུ།། དོན་ལྔ་སྣོད་དྲུག་བསམ་སེར་འབྲེལ་བ་ཡིན།། ཕྱི་རྩ་ལྟག་པའི་ཆུ་རྩ་སྦུ་གུ་ཅན།། ལྟག་ཟུར་སྤུ་འཁྱིལ་ཆུ་རྩ་འཇའ་བྱེད་གཉིས།། རྣ་ཤལ་འོག་གཤོང་རཏྣ་གཉིས་ཏེ་དྲུག། རྐང་ལག་རུས་ཚིགས་ཆུ་རྒྱུས་འབྲེལ་བ་ཡིན།། ཟ་འགྲམ་སྟེང་ན་སོ་རྩ་ལྡད་བྱེད་གཉིས།། རྐན་གྱི་དཀྱིལ་ན་འདོམ་རྩ་སུམ་མདོ་རིས།། ཉི་ཤུ་རྩ་གཉིས་ཆུ་རྩའི་གནད་དུ་བསྟན།། རུས་རྩ་མདུང་ཚུགས་འཕྲེད་ཉལ་འཁྱམ་པོ་གསུམ།། མདུང་ཚུགས་གཟེར་རྩ་གཙུག་དང་མཚོགས་མའི་སྒོ།། ལྟག་པའི་སྡུད་སྒོ་གཡས་གཡོན་གཉིས་ཏེ་གསུམ།། སྨིན་དཀྱིལ་གཉིས་དང་མཁུར་ཚོས་སྒོ་ལྔར་འབྱུང་།། དེ་ལས་གཞན་པ་མ་ངེས་གར་ཡང་སྲིད།། རུས་པ་ངན་ཞིང་གླིང་དང་རྩ་ཕུར་མང་།། འཕྲེད་ཉལ་རྣ་ལྟག་སྟེང་ནས་སོར་བཞི་ན།། བོན་པོའི་ཐོད་ཅེས་བྱ་བའི་ལྷ་རྩ་ཡོད།། འཁྱམ་པོ་བཞའ་ཁུག་ཁྱི་ཉལ་བྱི་སྡེར་གསུམ།། འདིར་གནས་ངེས་མེད་ལྷ་བའི་གསེབ་ན་གནས།། རུས་པ་བརྡར་ཚེ་བྱ་རས་སོད་པ་གཅེས།། ཤ་ཡི་རྩ་ལ་ངེས་དང་མ་ངེས་གཉིས།། ངེས་པ་ལྟག་ཟུར་ལྟག་རྩ་ནག་པོ་གཉིས།། རྣ་བའི་ཕྱི་རྒྱབ་མཚོན་གང་ཕྱི་ལྗོན་གཉིས།། རྣ་བའི་ནང་ངོས་ནང་ལྗོན་རྣམ་པ་གཉིས།། མུར་གོང་ཟུར་ན་ལྟག་རལ་འཁྱུག་རྩ་གཉིས།། དཔྲལ་བའི་དཀྱིལ་ན་གསེར་མདུང་དངུལ་མདུང་གཉིས།། མཚུལ་པའི་འགྲམ་ན་མཚུལ་རྩ་ནག་པོ་གཉིས།། མུར་གོང་གཤོང་ན་མཐོང་བྱེད་མིག་རྩ་གཉིས།། མུར་འགྲམ་སྟེང་ན་སོ་རྩ་འཕར་བ་གཉིས།། གཙུག་གི་ཕྱོགས་བཞིར་རེ་ཐག་རྣམ་པ་བཞི།། དེ་ལྟར་ཉི་ཤུ་ངེས་པར་བཤད་པ་ཡིན།། དོན་ལྔ་སྣོད་དྲུག་དབང་པོ་སྒོ་བཞིའི་རྩ།། གནས་ལ་ངེས་མེད་བརྟགས་ལ་ངོས་བཟུང་གཅེས།། གཉིས་པ་ཕོག་ས་བཟང་ངན་འབྲིང་པོ་གསུམ།། ངན་པ་སྡུད་སྒོ་བཞིར་ཕོག་འཆི་བའི་གནས།། ཆག་ཚབས་ཆེ་རུང་ཆུང་རུང་ངན་པ་ཡིན།། འཕྲེད་ཉལ་སྲུབས་སྟེང་མིག་ཕོར་མཁུར་ཚོས་དང་།། ཟ་འགྲམ་སྟེང་རྣམས་ཕོག་ས་འབྲིང་དུ་བཤད།། ཤ་རྩའི་སྟེང་དུ་ཆག་ཚབས་ཆུང་ན་ངན།། ཤ་དང་རུས་པ་ཀླད་པ་རྩ་ཡི་རིགས།། ཕྱི་བས་ནང་མ་ནང་མ་གཉན་པ་ཡིན།། ཕོག་ས་བཟང་བ་དཔྲལ་བ་རྭ་ལྡེབས་གཉིས།། ཆག་ཚབས་ཆེ་ཆུང་མེད་པར་བཟང་བ་ཡིན།། འདིར་མ་སྨོས་རྣམས་ཕོག་ས་འབྲིང་དུ་བཤད།། བརྟག་པའི་ཐབས་ལ་མཚོན་རྨ་ཕྱི་ཡུལ་གསུམ།། ཟུག་རྔུའི་མཚོན་ལ་མདའ་རྡོ་གྲི་དང་གསུམ།། མདའ་ལ་ཝ་ལུང་བཤོལ་བརྐོས་གཏམ་ཟུག་གསུམ།། གྲི་ལ་བཞོགས་དང་རྫོགས་དང་བཅད་པ་འོ།། རྡོ་ལ་གས་པ་ཆག་པ་འཐེམས་པ་གསུམ།། གས་ལ་སྦོམ་ཕྲ་རིང་ཐུང་རྣམ་པ་བཞི།། ཆག་པ་སྟེང་ཆག་འོག་ཆག་བཅས་ནས་ཆག། བཅས་པར་ཆག་ལ་ཞོམ་གྲུམ་རྡིབ་རྡོལ་བཞི།། འཐེམས་ལ་ཆེན་པོ་ཆུང་ངུ་འབྲིང་པོ་གསུམ།། དེ་དག་ལ་ཡང་རྣོ་ཕོག་རྟུལ་ཕོག་དང་།། ཉེ་ཕོག་རིང་ཕོག་ཤུགས་ཅན་ཤུགས་མེད་དང་།། ཕར་ཕོག་ཚུར་ཕོག་ལྗིད་ཅན་ལྗིད་མེད་བརྟག། ཚུར་ཕོག་ཉེ་དང་ཤུགས་ཆེ་ལྗིད་ཅན་དང་།། རྟུལ་ཕོག་རུས་དང་ཕྲད་པར་མ་གྱུར་ཀྱང་།། དེ་ལ་ཕལ་ཆེར་ཉེས་སྐྱོན་འབྱུང་བ་མང་།། རེག་མྱང་རྨ་ལ་བརྟག་པ་ཡོད་མེད་གཉིས།། རྨ་མེད་པ་ལ་འགྲམས་དང་ཆག་པ་

X