//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་གྱ་དྲུག་པ། ཡན་ལག་གི་རྨ་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 11:20:44 ཀློག་གྲངས། 22 

དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས།། ལུས་ཀྱི་ཡན་ལག་བཞི་ལ་མཚོན་ཕོག་ན།། དེ་ལ་རྟགས་དང་བཅོས་ཐབས་ཅི་ལྟར་བགྱི།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་དང་། སྟོན་པ་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག།ཡན་ལག་རྨ་ལ་གནད་དང་སྤྱི་རྟགས་དང་།། བཅོས་པའི་ཐབས་དང་ལོག་གནོན་རྣམ་བཞིས་བསྟན།། གནད་ནི་ཉྭ་རྨེན་རྩ་རུས་ཆུ་རྒྱུས་ལྔ།། དེ་ལ་དང་པོ་ཉྭ་ཡི་གནད་བསྟན་པ།། ཕྲག་པའི་སྟེང་ན་གཉའ་ཤ་ནག་པོའི་གནད།། མེ་ལོང་སྟེང་ན་འབྲོས་ཤ་ཁྲོ་བོའི་གནད།། སོགས་པའི་ཁ་འཁོར་འདར་ཤ་ཁུག་པའི་གནད།། དཔུང་པའི་ཉྭ་ལ་སུལ་སྒོ་བདུན་ཡོད་དེ།། དཔུང་ཚིགས་མཚམས་ནས་སོར་བཞི་ལུག་གཞུག་གནད།། ལག་ངར་ཉྭ་མོ་སྡང་ལ་བརྒྱུས་པ་འདྲ།། ཉྭ་སུལ་དགུ་དང་ཉྭ་ཆེན་རྣམ་གཉིས་ཡོད།། མཁྲིག་མའི་ཚིགས་དང་གྲུ་མོ་གཞུ་མཆོག་ནས།། མཁྱིད་གང་སོར་དྲུག་བཅལ་བ་ཉྭ་སྙིང་གནད།། ལག་མགོའི་མཐེབ་མཛུབ་བར་ན་གར་ཤའི་གནད།། དཔྱི་ཡི་ཤ་ནི་རྒྱ་གྲམ་དག་ཏུ་གནས།། ཆང་བཟུང་སྟེང་གི་ཤ་རྒོད་གཉན་པའི་གནད།། བརླ་ལ་སུལ་སྒོ་བཅུ་གསུམ་དར་སྦམས་འདྲ།། བརླ་སྒང་སོར་གཉིས་སྒང་ཤ་དཀར་མོའི་གནད།། གཉན་གོང་སོར་བཞི་སྦལ་པ་ནག་པོའི་གནད།། བྱིན་ཉྭ་སུལ་མེད་སྨྱུག་མ་སྦམས་པ་འདྲ།། བྱིན་པའི་དཀྱིལ་ན་ཉྭ་མང་རྣམ་པ་གསུམ།། སྲེ་ལོང་སྟེང་ནས་མཁྱིད་གང་ཉྭ་མགོའི་གནད།། དེ་ནས་སོར་དྲུག་བཅལ་བ་བྱིན་སྙིང་གནད།། །དེ་ལྟར་ཉི་ཤུ་རྩ་གཉིས་སྐྲངས་པའི་གནད།། རྨེན་བུའི་གནད་ནི་སྐྱོགས་རའི་ཚིགས་མཚམས་ནས།། ཕྲག་གོང་སོར་བཞི་རྨེན་བུ་མགོ་སྔོན་གནད།། ཀྱི་ཁྱིཁྲོས་སྣ་ནས་གྱེན་དུ་སོར་ལྔ་ན།། དཔུང་པའི་རྨེན་བུ་སྨུག་པོ་གནས་པ་ཡིན།། པུས་མོའི་ཕྱི་ཟུར་ཚིགས་ཀྱི་མཚམས་ན་ཡར།། མཐོ་གང་བཅལ་བ་རྨེན་བུ་དཀར་པོའི་གནད།། དེ་ནས་སོར་གསུམ་སྦྲུལ་མགོ་གདེངས་པའི་གནད།། དེ་བརྒྱད་ལྷོག་ཐབས་སྐྲངས་དང་སྲོག་འཕྲོག་གནད།། རྩ་གནད་རླུང་རྩ་ཁྲག་རྩ་གཉིས་འདོམ་རྩ།། དེ་ལ་རླུང་རྒྱུ་བ་ཡི་རྩ་དཀར་ནི།། དཔུང་པའི་ལུག་གཞུག་ཕྱི་མཆན་ཆུ་རྩའི་གནད།། གྲུ་མོའི་བར་ན་རླུང་རྩ་རཏྣའི་གནད།། པུས་མོའི་གཉན་གོང་རུས་རྩ་སྒྱེད་བུའི་གནད།། སྲེ་ལོང་ཕྱི་ལོང་བར་ན་རྒྱུངས་རྩའི་གནད།། མཐེ་བོང་སྤུ་སྐྱེས་རྒྱུས་པ་པིར་མགོའི་གནད།། དེ་བཅུ་རླུང་འཕྱོ་བྱ་བ་ཉམས་པའི་གནད།། ཁྲག་རྩ་མེ་ལོང་འོག་གི་སྔོན་བུ་དང་།། ཨུ་ཟུར་ཁུག་པ་དཔུང་ནང་དུང་འབུད་དྲུག། གློ་བའི་རྩ་ཡིན་ནང་དུ་ཐིགས་གསོག་གནད།། སྐྱོགས་རའི་ཚིགས་མཚམས་གསེར་གྱི་ཀ་བའི་གནད།། སྣག་ཆེན་གཉེར་རིང་མཁྲིས་རྩ་སྐྱ་རིང་གནད།། མཁྲིས་རྩ་དེ་བཞི་མཁྲིས་ཚད་སྐྱེ་བའི་གནད།། སྣོད་ཀ་རུ་ཐུང་བརླ་ནང་རྩ་བོ་ཆེ།། མཆིན་རྩ་སྨད་གཉིས་དེ་བརྒྱད་ཁྲག་འཆོར་གནད།། དཔྱི་ཡི་ཁ་བཟར་མཁལ་རྩ་ན་གུ་དང་།། བརླ་སྒང་སྟེང་གི་མཁལ་རྩ་རུས་ཞེན་དང་།། བརླ་ཡི་ཕྱི་ཟུར་མཁལ་རྩ་རྐང་འདེགས་དྲུག། བརླ་ཡི་ཕྱི་ཟུར་མཚེར་པའི་རྩ་ནག་གཉིས།། དེ་བརྒྱད་བད་ཀན་གྲང་བ་སྐྱེད་པའི་གནད།། དེ་ལྟར་ཉི་ཤུ་རྩ་དྲུག་ཁྲག་རྩའི་གནད།། རླུང་ཁྲག་གཉིས་འདོམ་འཕར་བའི་སྙིང་རྩ་ནི།། རྐང་པའི་མཐིལ་ན་བཞག་འདྲ་མཐིལ་འཕྲོག་གནད།། བོལ་གོང་སྟེང་ན་མགུལ་རྩ་ནག་པོའི་གནད།། ནང་ལོང་ནང་ཁུད་ལྕགས་ཀྱི་སྲན་མའི་གནད།། ངར་གདོང་ཐུར་བར་གསེར་རྩ་ཀ་གདུང་གནད།། སྒབ་ཁུང་ནང་ན་སྒབ་རྩ་ནག་པོའི་གནད།། སྣེ་རྩ་ཁུད་ན་སྙིང་རྩ་མིག་དམར་གནད།། ལག་མཐིལ་སྲིན་ལག་འོག་ན་མྱུར་བའི་གནད།། མཛུབ་མོ་ཆུང་གི་འོག་ན་འགུལ་རྩའི་གནད།། རུས་པ་འབོར་པོའི་སྟེང་ན་བལྟ་རྩའི་གནད།། མར་ཟུར་ཆུ་བའི་བར་ན་བླ་རྩའི་གནད།། གྲུ་མོ་ནང་ཁུད་ཨ་སོ་ལི་ཀའི་གནད།། མཆན་ཁུང་ནང་ན་སྙིང་རྩ་རྔུལ་འདུའི་གནད།། དེ་ལྟར་རྩ་བཞི་ཁུག་པར་རྒྱུས་པ་ལ།། ཕྱི་རུ་འབུར་བས་གནད་དུ་བསྟན་པ་སྟེ།། སྟོད་དུ་ཚ་བ་འཆོར་ཞིང་འཆི་བའི་གནད།། རུས་པའི་གནད་ལ་ཚིགས་དང་རུས་ཕྲན་གཉིས།། ཚིགས་ཆེན་བཅུ་གཉིས་དཔྱི་དང་དཔུང་པ་དང་།། པུས་མོ་གྲུ་མོ་མཁྲིག་མ་ལོང་ཚིགས་རྣམས།། ཡར་མར་སོར་བཞི་ལྷ་བར་བཅས་པ་ནི།། ཚིགས་ཀྱི་ཁོངས་སུ་འདུས་ཏེ་གཉན་པ་ཡིན།། རུས་ལྷག་དཔྱི་སོགས་ལྷ་ང་ལོང་བུ་དང་།། སྲེ་ལོང་པྲན་རྩེ་སྤུན་མངས་ལ་སོགས་པ།། ཉི་ཤུ་རྩ་དྲུག་ན་ཞིང་སྦྱོང་བའི་གནད།། ཆུ་རྒྱུས་གནད་ནི་སྒྱིད་ཁུང་གྲུ་མོ་དང་།། མཁྲིག་མ་རྟིང་ཆུ་ཆུ་བ་སྦལ་མགོ་བཅུ།། ཆུ་བ་རྒྱབ་ལ་རྒྱུས་པ་མདུན་ན་གནས།། ཞ་དང་རེངས་པར་བྱེད་པའི་གནད་ཅེས་བྱ།། དེ་ཡང་རྩ་དང་རྨེན་བུ་རབ་གཉན་ཏེ།། ཉྭ་ཚིགས་འབྲིང་ཡིན་ཆུ་རྒྱུས་ཐ་མར་བཤད།། རྩ་ལས་སྙིང་རྩ་རབ་ཏུ་གཉན་པ་སྟེ།། མཁྲིས་རྩ་རླུང་རྩ་འབྲིང་ཡིན་གཞན་རྣམས་ཐ།། ཉྭ་ལས་བྱིན་སྙིང་སྦལ་ནག་རབ་ཏུ་གཉན།། བརླ་ཤ་འབྲིང་ཡིན་ཉྭ་ཤ་ཐ་མར་བཤད།། ཚིགས་ལ་པུས་མོ་དཔུང་པ་རབ་ཏུ་གཉན།། དཔྱི་དང་གྲུ་མོ་འབྲིང་ཡིན་ཚིགས་གཞན་ཐ།། རུས་ལྷག་ལོང་བུ་སྲེ་ལོང་རབ་ཏུ་གཉན།། དཔྱི་སོགས་འབྲིང་ཡིན་གཞན་དག་ཐ་མ་འོ།། ཆུ་རྒྱུས་སྒྱིད་ཆུ་རབ་ཏུ་གཉན་པ་སྟེ།། གྲུ་མོ་འབྲིང་ཡིན་གཞན་དག་ཐ་མ་འོ།། ཚིགས་དང་ཆུ་རྒྱུས་ཆུ་རྩ་རླུང་གི་གནད།། གློ་སྙིང་མཁྲིས་རྩ་མཁྲིས་པའི་གནད་དུ་བཤད།། རྩ་བོ་ཆེ་དང་མཆིན་རྩ་ཁྲག་གི་གནད།། མཆེར་མཁལ་རྩ་དང་ཉྭ་རྨེན་བད་ཀན་གནད།། དེ་ལྟར་གནད་ཀྱི་གནས་ལུགས་ཤེས་པ་ཡིས།། འཆི་སྦྱོང་གསོ་སླ་ཞ་རེངས་ཁ་དམར་ཐོགས།།གཉིས་པ་གནད་ཀྱི་སྤྱི་རྟགས་བསྟན་པ་ནི།། སྤྱི་རུ་མོད་ལ་ལྷོག་ཐབས་སྐྲངས་པ་འམ།། ཟུག་གཟེར་ཆེ་འམ་རྡོས་བུ་བཅུག་པ་འདྲ།། མེ་ལྟར་འབར་རམ་ཆུ་ལྟར་བསིལ་བ་སྟེ།། མདོར་ན་ལུས་ནི་གནད་ལ་ཕེབས་པར་བྱེད།། དེ་དག་གསོ་དཀའ་འཆི་ཡང་སྲིད་པ་ཡིན།། ཁྱད་པར་ཉྭ་གནད་རྣམས་ལ་མཚོན་ཕོག་ན།། མོད་ལ་སྐྲངས་ཤིང་རྨ་ཆས་ཚན་མོ་ཕན།། སྨུག་ནག་སྔོ་ཁྲ་དམར་ཁྲ་མེ་ལྕེ་རིས།། ཟུག་ཆེ་རྡོ་ལྟར་སྲ་ལ་རེག་མི་བཟོད།། རྣག་མདོག་དམར་ལ་རྩིགས་ཅན་སྐད་གདངས་ཞན།། རྨེན་བུ་རྣམ་བརྒྱད་ཞར་ན་བཅོས་སུ་མེད།། བཙན་བརྡུངས་མོད་དུ་ལྷོག་ཐབས་སྐྲངས་པ་དང་།། ཟུག་ཆེ་ཚ་བ་སྐྱེ་ལ་སྨྲ་ངག་ཐུང་།། ཉྭ་སྒང་ཆུ་སེར་འཛག་ཅིང་དྲི་མི་ཞིམ།། རླུང་རྩ་རྣམས་ལ་མཚོན་ཕོག་འཕྱོ་འདར་བྱེད།། མིག་རྩ་རྒོད་ཅིང་གཡལ་དང་སྐྱིགས་བུ་འབྱུང་།། གཉིད་ཆུང་ཁ་མིག་ཡོ་ལ་བྱ་ལོག་སྐྲངས།། ཁྱད་པར་ལུག་གཞུག་ཆུ་རྩ་ཆོད་གྱུར་ན།། ལག་པ་བཤལ་སྦྲིད་བྱ་བ་ཉམས་པར་འགྱུར།། རླུང་རྩ་རཏྣ་དགོངས་དང་ཐོ་རངས་ན།། དངངས་ཤིང་གཡལ་དང་སྐྱིགས་བུ་བསྟུད་ནས་འོང་།། རུས་རྩ་སྒྱིད་བུ་དངངས་ཤིང་ལྷོག་ཐབས་སྐྲངས།། རྐྱལ་པ་བུས་འདྲ་མགོ་ན་བླ་འཆོལ་སྨྲ།། བརྒྱུད་རྩ་ལྟག་དགྱེ་སོ་འཐམ་དྲི་ཆུ་སྡོམ།། པིར་མགོ་དངངས་འདར་ཟུག་ཆེ་གཡང་ཆུ་རྨི།། གློ་རྩ་སྔོན་བུ་ངམ་ནག་སྐྱིགས་བུས་འདེབས།། འདར་ཞིང་དངང་ལ་གློ་ལུ་ཚ་བ་སྐྱེ།། གློ་རྩ་ཁུག་པ་སོགས་ཕྲག་གཟེར་བ་དང་།། མགོ་ན་དཔུང་པ་བཤལ་ལ་མཇིང་པ་རེངས།། དུང་འབུད་གསོག་ཅིང་གཟེར་ལ་བུས་ལྟར་སྐྲངས།། རྐང་ལག་མཁྲིས་རྩ་བཞི་པོ་གང་ཉེན་ཡང་།། མགོ་ན་མིག་ཆུ་རྨ་ཁ་བཞིན་རྣམས་སེར།། ཁ་ཁ་དང་ག་མི་བདེ་སྐོམ་དད་ཆེ།། ལུས་ལྕི་རྨ་ཆས་ཚན་མོ་ཉེ་ཐབས་མེད།། བརླ་ནང་རྩ་ཆེན་ཆོད་ན་ཁྲག་མི་ཐུབ།། ཆུ་དད་ཆེ་ལ་སྨད་འཕྱེས་ཁོང་པ་འཁྲོག། མཆིན་རྩ་མོད་ལ་ཁྲག་མི་ཐུབ་པ་ལ།། སྨད་ལྕི་སྒྲེག་སྐྱུགས་ཁྲག་རུལ་དྲི་ཅན་འཛག། སྣོད་ཀ་རུ་ཐུང་ཁྲག་ཆོད་དཀའ་བར་འགྱུར།། མཁལ་རྩ་རྨ་ཆས་གྲང་མོ་ཉེ་ཐབས་མེད།། སྨད་འཕྱེས་རྐང་པ་བཤལ་སྦྲིད་དཔྱི་མིག་ཟུག། ཆུ་སྲི་རྣ་བ་འོན་ལ་ཕྲུམ་སེར་ཁྱེར།། མཆེར་རྩ་སྦོ་སྒྲེག་རླན་ཅན་ཉེ་ཐབས་མེད།། ཁྲག་རུལ་འཛག་ཅིང་སྨད་འཕྱེས་རྒྱུ་ལོང་འཁྲོག། མགོ་ན་ལུས་ལྕི་ངམ་ནག་ཚ་བ་སྐྱེ།། སྙིང་གི་འཕར་རྩ་གང་ཆོད་ཁྲག་མི་ཐུབ།། གདོང་པ་སེར་ལ་གཡལ་མང་འབོག་ཚུལ་སྟོན།། བཙན་བརྡུངས་

X