//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་གྱ་བརྒྱད་པ། གྱུར་པའི་དུག་བཅོས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 15:40:02 ཀློག་གྲངས། 4 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག།གྱུར་པའི་དུག་ལ་རྣམ་པ་གཉིས་ཡོད་དེ།། མི་འཕྲོད་པ་ཡི་དུག་དང་ཤ་དུག་གོ། དང་པོ་རྒྱུ་དང་རྟགས་དང་གསོ་ཐབས་གསུམ།། རྒྱུ་ནི་གཉིས་ཏེ་ངོ་བོས་མི་འཕྲོད་དང་།། དངས་མ་མ་ཞུ་ཟུངས་སུ་མ་སྨིན་པའོ།། ངོ་བོ་མི་འཕྲོད་ཆང་གསར་ཞོ་མ་ལངས།། སེར་ཤ་ཡུངས་ཀར་མར་ལ་བརྔོས་པ་དང་།། ཁྱིམ་བྱའི་ཤའམ་ཞོ་དང་འོ་རློན་དང་།། ལ་ཕུག་སྒོག་སྐྱ་ཡུངས་ཀར་ལོ་མའམ།། ཉ་དང་སྒོ་ང་འབྲུ་མར་སོ་མ་འམ།། ལ་ཕུག་རྣམས་ཏེ་མི་འཕྲོད་དེ་དག་རྣམས།། སྔ་མ་མ་ཞུ་ཕྱི་མ་ཟོས་པ་འམ།། བསྲེས་ཏེ་ཟོས་སམ་ལྷན་ཅིག་ཟོས་པ་ཡིས།། མི་འཕྲོད་ནུས་པ་འཐབས་ནས་ཉེས་པ་འཁྲུགས།། ཡང་ན་མི་འཕྲོད་ཁ་ཟས་མ་ཡིན་ཀྱང་།། མ་གོམས་དུས་མིན་ངོ་བོས་འཇུ་དཀའ་བས།། མ་ཞུ་དངས་སྙིགས་འདྲེས་ཏེ་རྩ་མིག་བྱེར།། ལུས་ཟུངས་བདུན་པོ་རིམ་གྱིས་འགྲིབ་པར་བྱེད།། དེ་རྟགས་རྩ་ནི་ཕྲ་ལ་གཏིང་ན་གྲིམས།། ཆུ་མདོག་དམར་རམ་སྨུག་ལ་ཀུ་ཡ་ཆད།། ཤ་མདོག་སྔོ་སྐམ་མིག་འགྲིབ་མགོ་བོ་ན།། སྐབས་སུ་ལུས་བརྩེ་བྲང་རྒྱབ་རྩིབ་ལོགས་གཟེར།། སྒྲེག་ཅིང་ཁོང་སྦོ་འཇུ་དཀའ་ཟོས་རྗེས་ན།། ཚིགས་གཞི་ན་ལ་རྐང་བོལ་གསུས་ཤ་སྦོས།། མི་འཕྲོད་ཟས་ཟོས་འཁྲུའམ་སྐྱུག་ཚུལ་སྟོན།། མདོར་ན་ཕོ་བ་གྲང་ལ་མཆིན་པ་ཚ།། རླུང་ལྡན་སྦོ་སྒྲེག་མགོ་འཁོར་མཁྲིས་པར་ལྡན།། ཁོང་ཚ་འཁྲུ་དང་ཁྲག་གིས་གཟེར་འཁྱུག་བྱེད།། བད་ཀན་ལུས་ལྕི་མགོ་ན་འཇུ་དཀའ་འཁྲེན།། ཆུ་སེར་ལྡན་པས་གཡོ་སྐྲངས་ཚིགས་གཞི་ན།། སྣ་ཚོགས་ནད་རྟགས་འབྱུང་བས་བརྟག་པར་དཀའ།། མ་རྟོགས་ལོག་རྟོགས་ཕྱོགས་རྟོགས་མ་ཡིན་པར།། ཕྲ་ཞིབ་སྒོ་ནས་ངོ་བོ་ཉིད་རྟོགས་ཀྱི།། བཅོས་ཐབས་གཞི་བཟུང་བསྡུ་བསད་སྦྱང་བས་བཅོས།། དང་པོ་སེ་འབྲུ་བཞིའམ་ད་ལིས་བཞི།། ཀ་ར་སྦྱར་བ་ནང་ནུབ་ཆུ་ཚན་དབུལ།། དྲོད་སྐྱེད་བེ་སྣབས་སྦྱོང་ཞིང་བུ་ག་གསོ།། གསོ་བའི་སྨན་ཟས་སྨིན་པར་བྱེད་པ་ཡིན།། བསྡུ་བ་འོ་མ་ལན་ཚྭ་སྦྱར་བ་དང་།། སྤོས་དཀར་ཕག་ཁྲག་སྟར་བུ་ཀ་ར་སྦྱར།། སྲོད་དང་ཐོ་རངས་ལྟག་སྤྲད་བྱེར་བ་སྡུད།། འདུས་རྟགས་ཁོང་སྙོམ་ལུས་ལྕི་མཆིལ་སྣབས་མང་།། ཁ་ཟས་མི་ལེན་སྟོབས་ཆུང་དེ་དུས་སྦྱང་།། ནད་སྟོབས་ཆེ་ན་འདུས་ནས་གཉེན་པོས་བསད།། གི་ཝཾ་ཨུཏྦལ་བསིལ་གསུམ་དུག་མོ་ཉུང་།། ཚ་ལ་ཧོང་ལེན་སྤོས་དཀར་སོ་མ་ར།། ཨ་རུ་དོམ་མཁྲིས་བྲག་ཞུན་བོང་ང་སེར།། ཤུ་དག་དཀར་པོ་ཀ་ར་སྦྱར་བྱས་ལ།། ཚ་བའི་དུས་སུ་བསྐོལ་གྲངས་ཆུ་ཡིས་དབུལ།། གཞི་འཛིན་གང་རུང་ཐོ་རངས་ཆུ་སྐོལ་དབུལ།། ཡང་ན་གཉེན་པོ་བོང་ང་དཀར་པོ་དོམ་མཁྲིས་ཕྱ་ཚན་གསུམཚད་གཅོག་ཙན་དན་ཏིག་ཏ་བྲག་ཞུན་གསུམཁ་འཛིན་ཅུ་གང་གུར་གུམ་པི་ལིང་གསུམ།། ཀ་ར་སྦྱར་བ་གཞི་འཛིན་ལྟག་པ་སྤྲད།། དེ་རྗེས་གང་དང་ཉེ་བའི་གནས་ནས་སྦྱང་།། ནད་སྟོབས་ཞི་བའི་རྟགས་ལྡན་ཁ་ཟས་གློད།། ཞི་དཀའ་སྡུད་བྱེད་བསྐྱར་ལ་འདུས་ནས་སྦྱང་།། མ་འབྱོངས་ནད་ལྷག་གཉེན་པོས་བསད་པར་བྱ།། ཉེས་པ་གང་ཆེ་ཟས་སྨན་གཉེན་པོ་སྦྱར།། རྩ་ལ་འགྲམས་ཆེ་ལྟོ་སྦྱོངས་རྩ་དང་སྦྲེལ།། མི་འཕྲོད་དངས་མ་གནས་སུ་མ་སྨིན་དང་།། སྨུག་པོ་བྱེར་དང་འགྲམས་འཁྲུགས་རིམས་རྙིངས་རྣམས།། སྦྱར་དུག་ཆ་མཐུན་གསོ་ཐབས་འཕྲུལ་ཞིང་བཅོས།། ཤ་ཡི་དུག་ལ་རྒྱུ་རྐྱེན་རིགས་དང་རྟགས།། བཅོས་པའི་ཐབས་དང་རྣམ་པ་ལྔ་ཡིས་བསྟན།། དེ་རྒྱུ་ཤ་རློན་བེམ་དང་ཡུལ་ཕྱོགས་ཀྱི།། ས་ལ་དུག་ཡོད་རླངས་པ་ཕོག་པ་ཡིན།། དེ་རྐྱེན་ས་རླན་སྟེང་དུ་བཞག་པ་དང་།། བཙོས་པའི་དྲོན་མོ་རླངས་པ་བསུབས་པ་དང་།། དཀར་སྐྱུར་དབྲེ་དང་ཉི་ཞུར་ཕོག་པ་དང་།། འབྲུ་དང་རྩམ་པ་སྔོ་གསེབ་ལས་པ་དང་།། བེ་ལོག་ཤན་པའི་ཁྲག་གིས་ཕོག་པའི་རྐྱེན།། ཞག་བདུན་འདས་ནས་དུག་ཏུ་འགྱུར་བ་ཡིན།། དེ་རིགས་ཤ་དུག་ཤ་ནད་གཉིས་སུ་འདོད།།རྟགས་ལ་སྤྱི་དང་བྱེ་བྲག་རྣམ་པ་གཉིས།། སྤྱི་རྟགས་མིག་མི་གསལ་ལ་འབྲས་བུ་ལྡལ།། ཕོ་བ་སྦོ་འགྱུང་གླང་ཐབས་ན་བ་དང་།། མིད་པ་ལྟེབ་ལ་སྐད་འཛེར་ཤེས་པ་ཟི།། མགོ་བོ་འཁོར་ལ་རྐང་པ་གཏད་མི་ཚུགས།། བྱེ་བྲག་ཤ་ནད་མགོ་དང་ཚིགས་གཞི་ན།། གཙོ་ཆེར་འཁྲུ་སྐྱུག་སྲོག་ལ་ཉེས་པ་ཆུང་།། ཤ་དུག་གྲེ་བ་འགགས་ལ་སྐད་མི་ཐོན།། ཟས་སྐོམ་མི་ཐར་ཤེད་བྲལ་མིག་མི་མཐོང་།། དེ་ནི་མོད་དུ་སྲོག་འཕྲོག་གསོ་བ་སྒྲིམ།། ཟུག་མེད་སྐྱུག་ཅིང་རྩ་ལ་ནད་མ་བབས།། འཆི་བདག་ཁར་ཚུད་ཅེས་ཀྱང་ལྷོགས་མི་འགྱུར།།བཅོས་པའི་ཐབས་ལ་དང་པོ་མ་ཞུའི་དུས།། བར་དུ་དུག་རྒྱས་ཐ་མར་བླ་གཉན་བསལ།། མ་ཞུའི་དུས་སུ་བསྡུས་ལ་སྦྱངས་རྗེས་བསད།། མ་བསྡུས་ཞུ་ནས་རྩ་དོན་ལ་འབྲོས་ཕྱིར།། སེ་སྐྱེར་བར་ཤུན་ལུག་རུ་ཡུངས་ཀར་དང་།། གསོན་ཁྲག་སྦྱར་བཏང་རྩ་རུ་མི་འབྲོས་འཛིན།། དེ་རྗེས་མགྱོགས་པོའི་རྟ་དུར་བྱིད་དུས་སུ་བརྐོས་པ་ལ་དཔའ་བོ་ཚོས་དང་ཧོང་ལེན་བསྐྱོན།། རྣོན་པོ་རྒྱ་ཚབསྐུར་བ་སྣ་ཁྲིད་འགྲོན་བུ་གླ་རྩི་བཅས་པས་སྦྱང་།། དེ་ལྟར་མ་ཡིན་མི་ཕིགས་གྱེན་དུ་ལྡོག། འོག་ནས་བསུ་ཞིང་སྐེ་ལ་རྡོ་གྲང་བདུག། སྦྱངས་རྗེས་ནད་ལྷག་འོག་གི་ཕྱེ་མས་བསད།། བར་དུ་དུག་རྒྱས་འཕྲང་བསལ་དུག་རླངས་བསད།། དང་པོ་གྲེ་བ་འགགས་པའི་འཕྲང་བསལ་བ།། ཉུང་གཞི་རྩ་བ་ཆུར་སྦངས་ཁ་རུ་གཏིག། ཡང་ན་བཙོད་ཁུར་ཅུ་གང་ཚ་ལ་དུལ།། ཤིང་མངར་ཞིབ་བཏགས་བཏབ་ལ་གྲེ་བར་བཏིག། ཡང་ན་མཚེ་སྐྱོང་ཁྲུ་གང་འོག་གི་ས།། ཆུ་བསིངས་ཁུ་བར་ཅུ་གང་སྤང་རྒྱན་དཀར།། སྟར་བུ་ཤིང་མངར་བཏབ་ལ་གྲེ་བར་གཏིག། ཡང་ན་ཅུ་གང་སྤང་རྒྱན་བོང་ང་དཀར།། ཚ་ལ་དུལ་མ་ཨ་རུ་ཆུ་སྦྱར་བཏིག། གྲེ་བ་མ་སྐམས་ཡང་ཡང་བསྟེན་པར་བྱ།། སྐེ་ལ་ཆུ་བདུག་སྐེ་རྩ་སྐྱོར་གོང་གཏར།། གསོད་སྨན་གི་ཝཾ་དོམ་མཁྲིས་ཨ་རུ་ར།། ཡུང་སྐྱེར་བོང་ང་སེར་པོ་བྲག་ཞུན་དང་།། བྱེའུ་ལ་ཕུག་ཞིབ་བཏགས་ཆུར་སྦངས་པ།། དུག་རླངས་ཚ་བ་འཇོམས་པའི་མཆོག་ཏུ་བཤད།། བེ་སྐྱེས་ཁཎྡྲི་སོ་མ་ར་ཛ་དང་།། གི་ཝཾ་བོང་ང་དཀར་པོ་བཏབ་ལ་བཏང་།། ཡང་ན་བ་ལྕི་ས་ལ་མ་ལྷུང་བ།། བ་ཆུས་སྦྱངས་ཁུ་རེ་རལ་བོང་ང་དཀར།། ལྕགས་ཕྱེ་བྱེའུ་ལ་ཕུག་ཆ་མཉམ་གདབ།། ཉིས་འགྱུར་ཆུས་སྦངས་དང་པོའི་ཚད་དུ་བསྡུ།། གླ་རྩི་ཁ་ཚར་བཏབ་ལ་བཏང་བར་བྱ།། ཡང་ན་རྦ་བྱེའི་ཤ་དང་ཕྱ་ཚན་གསུམ།། རེ་རལ་གླ་རྩི་འོམ་བུ་བོང་ང་རྩད།། གི་ཝཾ་བཟང་དྲུག་བྲག་ཞུན་ཨ་རུ་ར།། ཞིབ་བཏགས་ཆུར་སྦང་ཡང་ཡང་བསྟེན་པར་བྱ།། ཡང་ན་ཉུང་མ་ཨ་རུའི་ཁཎྡྲི་ལ།། རྒྱ་ཚ་གླ་རྩི་བོང་ང་ཁ་ཚར་བཏབ།། རིལ་བུ་ལོ་བརྒྱུད་དྲི་ཆུར་སྦྱངས་ལ་བཏང་།། བཙོད་དང་རྟ་སྦངས་སིངས་པོས་བྲན་པའི་ཁུར།། མེ་སྤྲིན་བཟང་པོ་སྦྱར་བ་གཉེན་པོ་ཡིན།། ཀུན་ལ་ཚ་བ་ཆེ་ན་ག་པུར་དང་།། ཙན་དན་གི་ཝཾ་སྦྱར་བཏང་གང་བབས་གཏར།། གྲང་བ་རྒྱས་ན་རྒྱ་ཚ་ད་ལིས་དང་།། སྟག་ཤ་བསྣན་ཏེ་སྦོ་འཁྲོག་དུགས་ཀྱིས་བསྲོ།། བརྒྱ་སྟོང་སྔགས་ཀྱིས་ངར་གདགས་སྨན་ནུས་སྐྱེད།། འཐུང་བ་མ་ཤེས་ཁྱེམ་བུས་ཡང་ཡང་གཏིག། ཅིས་ཀྱང་གྲེ་བར་མ་ཐར་སྦུབས་ཐུར་གྱིས།། ཕོ་སྟོད་ཕུག་ནས་ལྒང་ཕུག་བླུག་སྟེ་བཏང་།། འདི་དུས་བཀྲུ་སྨན་མི་བཏང་དུག་དང་མཚུངས།། ཐ་མར་བླ་གཉན་ཐོར་བུ་བསལ་བ་ནི།། རྒྱུན་འགགས་ཨུག་ཆོས་སོ་མ་ར་ཛ་བཏང་།། འདྲེན་བྱ་ཆུ་འགགས་བོང་རྨིག་ཆུ་སྦུར་ཉི་དགའ་སོ་བྱའི་སྒྲོ་ཐལ་སིངས་པོ་དྲོ་ཙམ་ལ་སྦྱར་བའི་སྦྱོར་བ་བྱ།། མིག་ཚ་འགྲིབ་ན་ག་པུར་སྐྱེར་པ་བྱུག། ཆུ་དུགས་གཏར་ག་ལྕགས་ཁུ་འཇམ་བཤལ་ཤིས།། ཤ་ལྤགས་སྦྲིད་ན་སྤང་རྒྱན་དཀར་པོ་དང་།། ཅུ་གང་གུར་གུམ་བཏང་བས་སེལ་བར་བྱེད།། ཕོ་བ་སྒངས་ན་ད་ལིས་རྒྱ་ཚ་སྟག་ཤགསུམ་པ་བཏང་།། གློ་མང་འགོག་དཀའ་རུ་རྟ་སྤང་རྒྱན་དཀར།། སྟར་བུ་ཚ་ལ་ལོ་བརྒྱད་ཆུར་སྦྱངས་བཏང་།། ཁ་ཟས་ཕྱེ་ཐུག་འབྲས་དང་ཡོས་ཐུག་དང་།། བསྐོལ་གྲངས་བ་ཚ་མེད་པའི་ཆུ་བསིལ་བསྟེན།། དཀར་དང་མངར་བག་ཤ་དང་རུལ་སྐྱུར་སྤང་།། གྲང་ཤས་ཆེ་ན་གསར་འཇམ་སྒོག་ཆབ་བཏང་།། སྤྱོད་ལམ་དྲག་ཤུལ་དུ་བ་ས་རླན་དང་།། སྐད་ཆེན་སྨྲ་དང་མྱ་ངན་སེམས་ལས་སྤང་།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་གྱུར་པའི་དུག་བཅོས་པའི་ལེའུ་སྟེ་བརྒྱད་ཅུ་རྩ་བརྒྱད་པའོ།།།

X