//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་གྱ་དགུ་པ། རྒྱུ་བ་དང་མི་རྒྱུ་བའི་དུག་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 15:40:56 ཀློག་གྲངས། 6 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག།རང་བཞིན་དུག་ལ་རྒྱུ་དང་མི་རྒྱུ་གཉིས།། སྔོན་གྱི་དུས་སུ་ལྷ་དང་ལྷ་མིན་གྱིས།། བདུད་རྩི་འདོད་ནས་རྒྱ་མཚོ་བསྲུབས་པ་ལས།། སྐྱེས་བུ་སྐྲ་སེར་མིག་ནས་མེ་འབར་བ།། འཇིགས་པའི་གཟུགས་ཅན་དོན་ཏེ་ཚངས་པ་ཡིས།། ཧཱུ་བརྗོད་པྲ་ཡས་རྒྱུ་མི་རྒྱུ་ལ་ཐིམ།། མི་རྒྱུ་བོང་ང་བཙན་དུག་སྤྱང་དུག་དང་།། ར་དུག་སེ་ཤིང་ཐང་ཕྲོམ་རྟ་སྤུ་སོགས།། རྒྱུ་བ་ཁྱི་སྨྱོན་སྦྲུལ་དང་སྡིག་པ་དང་།། སྲིན་བུ་བ་ཡི་དུག་ལ་སོགས་པ་ཡིན།། དེ་ལ་དང་པོ་མི་རྒྱུ་བོང་ངའི་རིགས།། རྐྱང་པར་སོང་རྟགས་ལྕེ་མཆུ་བེར་ལ་ཚ།། སེར་ག་འགས་དང་མདོག་ནག་ཁ་དབུགས་གྲང་།། འགུལ་ན་མུན་སྲོ་དྲན་པ་ཉམས་ཤིང་འགྱེལ།། རྐང་ལག་ན་ཞིང་རེངས་ཏེ་གྱེན་ལ་ལྡོག། ཕོ་བ་སྦོ་ཞིང་ཁོང་པ་གཏུབ་སྙམ་བྱེད།། དང་པོར་གསོན་ཁྲག་དྲོན་མོ་ཁྱོར་གང་བཏུང་།། ཆུ་ནང་སྤྱིང་ངམ་སྟེང་ནས་རྒྱུན་དུ་བླུག། དེ་ཡིས་རྩ་རུ་མི་འབྲོས་ཕོ་བར་འཛིན།། དེ་རྗེས་བུལ་ཏོག་ཡུང་བ་ཨ་རུ་ར།། ཆུར་སྦྱངས་བླུད་ན་འཕྲལ་དུ་དེ་སྲོག་སྟེར།། ཡང་ན་ཨ་རུ་ར་དང་བོང་ང་དཀར།། ཧ་བོ་དྲི་ཆུས་སྦྱངས་བཏང་ཞི་བར་བྱེད།། ཡང་ན་ཨ་རུ་བུལ་ཏོག་བོང་ང་དཀར།། ཕྱ་ཚན་ཞིབ་བཏགས་ཆུར་སྦྱངས་བཏང་བར་བྱ།། སྦྱོར་བ་ཀུན་ལ་སྔགས་ཀྱིས་ངར་བཏགས་པས།། སྨན་ཀྱི་ནུས་སྐྱེད་དུག་དབལ་གསོད་པར་ནུས།། མི་མཁས་རྨོངས་པས་བོང་ང་རྐྱང་འདེད་བྱེད།། སྨན་གྱིས་དུག་དེད་སྲོག་རྩར་ཤོར་ཏེ་གསོད།། མན་ངག་འདི་ལྡན་ལས་དབང་མིན་པ་འཚོ།། ཐང་ཕྲོམ་དཀར་ནག་ནད་མེད་ལུས་སྟོབས་འཁྱོལ།། དབང་པོ་འཁྲུལ་ནས་མིག་སྔར་སྣ་ཚོགས་མཐོང་།། སྨྲ་བ་འཆལ་ཞིང་གཏད་མེད་བུད་མེད་འདོད།། དེ་ལ་སླེ་ཏྲེས་རེ་རལ་བ་ཤ་ཀ། ཞིབ་བཏགས་ཞུན་མར་ལ་སྦྱར་བཏང་བས་འཇོམས།། སེ་ཤིང་རྟ་སྤུ་ཕྱི་ནང་གང་རེག་སྐྲངས།། གྲེ་བ་མིད་པ་ཕོ་བ་གང་སྐྲངས་ཀྱང་།། རྨ་ཡོད་སྙམ་སེམས་ཟུག་ཆེ་ཧྲིལ་ཧྲིལ་ན།། ར་ཤ་ར་ཁྲག་དྲི་ཆུས་སེ་ཤིང་འཇོམས།། འབྲུ་མར་ཚིལ་མར་ཕག་ཚིལ་རྟ་སྤུ་འཇོམས།། དེ་ནས་རྒྱུ་བའི་དུག་གི་གསོ་ཐབས་ལ།། དང་པོ་ཁྱི་དུག་མཚན་ཉིད་རྟགས་དང་ནི།། གསོ་བའི་ཐབས་དང་རྣམ་པ་གསུམ་ཡིན་ཏེ།། མཚན་ཉིད་ཁྱི་དེ་འོན་ལོང་ཁ་ཆུ་འཛག། ཁ་གདངས་མགོ་བོ་སྨད་ཅིང་མཇུག་མ་ཕབ།། འཁྱོམ་ཞིང་ཕྱོགས་མེད་ཀུན་ཏུ་རྒྱུ་བ་ཡིན།། དེ་ཡི་སོས་ཟིན་རྟགས་ལ་གསར་རྙིང་གཉིས།། གསར་དུས་རྨ་ནས་ཁྲག་ནག་འཛག་པ་དང་།། རྨ་མདོག་སྨུག་ནག་མི་སྡུག་ར་རི་འོང་།། སྐྲངས་ཤིང་རྨ་ཡི་ནང་དུ་རྨེན་བུ་ཆགས།། རྙིངས་ནས་མགོ་བོ་ན་ལ་གྲང་ཤུམ་བྱེད།། འཕྱོ་འདར་སྙིང་ག་ན་ལ་སྐབས་སུ་འབོག། མེ་ལོང་ཆུ་མཐོང་དངངས་ལ་ཁྱི་སྤྱོད་བྱེད།། དུག་ལངས་རྒྱས་པའི་རྟགས་སུ་བཤད་པ་ཡིན།། བཅོས་པའི་ཐབས་ཀྱང་གསར་རྙིང་དུས་ཀྱིས་སྦྱར།། སོས་ཟིན་མོད་ལ་ཁ་དང་རྔབས་རྭས་དྲང་།། སོར་བཞིའི་གོང་དུ་རས་འཇག་བསྡམ་པར་བྱ།། ཞག་ལོན་པ་ལ་རྨ་དེ་ལྕགས་ཀྱིས་བསྲེག། དེ་འོག་ཞུན་མང་བསྐོལ་བ་རྨ་ནང་དུ།། རྒྱ་ཚ་སྐྱེར་ཤུན་དུད་པ་བཙོད་ཀྱིས་བྱུག། ཡུང་སྐྱེར་བོང་ང་གླ་རྩི་མར་གྱིས་བྱུག། དེ་སྟེང་རྟ་སྦངས་ཞོ་སྦྱར་རྨ་འཇིབས་བྱ།། དེ་རྗེས་ལྡང་ངམ་མི་ལྡང་ཆུ་ལ་བརྟགལྕེ་དང་མཚུལ་པ་ཁྱི་འདྲ་བ་དང་ཆུ་གསེབ་དུ་བྱི་བ་བྱུང་སྙམ་པ་བྱེད་པ་དང་དངངས་ན་ལྡང་བ་ཡིན་ནོ།། མི་ལྡང་བ་ལ་འོག་གི་གཉེན་པོ་བསྟེན།། ལྡང་བར་གྱུར་ན་མཆེ་བ་བྲང་ཀྲད་དང་།། དུད་པ་དྲི་ཆུ་སྦྱར་བཏང་དུག་ཞེན་བསླང་།། ལངས་ནས་ལུས་སྦྲིད་ཁོལ་བུར་ན་བ་དང་།། ཁྱི་མཐོང་ཚིག་པ་ཟ་ལ་བཤུལ་ཤ་ན།། དེ་ལ་གི་ཝཾ་ཛཱ་ཏི་ཕ་ཝང་ལོང་།། བུར་དཀར་བཞི་འགྱུར་ཆུ་གྲང་འཕུལ་ལ་བཏང་།། ཡང་ན་གི་ཝཾ་བཟང་དྲུག་ཐང་ཕྲོམ་པ།། བ་སྤྲུ་གླ་རྩི་ཀ་རས་ཁ་སླངས་བཏང་།། རྒྱ་སྤོས་སེང་ཕྲོམ་ཤུ་དག་ཧོང་ལེན་དང་།། པ་ཋ་སུག་སྨེལ་གུར་གུམ་ཞུན་མར་སྦྱར།། བཟའ་བྱུག་མི་སྐྲ་ཡུངས་ཀར་བུར་རྙིང་གི། དུ་བས་བདུགས་པས་རྨ་དང་སྐྲངས་པ་འཇོམས།། ཟླ་དྲུག་ཚུན་ཆད་ཞག་བཅུའི་སྨན་རེ་བསྟེན།། ཞག་བཅུ་ཕར་འདས་ཟླ་ལོ་ལོན་པ་འམ།། དུག་ལང་རྟགས་ལྡན་དྲུག་བདུན་མེ་ཡིས་བསྡམ།། དུར་བྱིད་ཧོང་ལེན་ངྷ་དུ་ར་ཡིས་སྦྱང་།། གུ་གུལ་དུད་པ་ཨ་ཤོ་གནྡྷ་དང་།། རྒྱ་སྣེ་བ་ཆུའི་རིལ་བུ་དྲི་ཆུས་དབུལ།། ཡང་ན་ཕ་ཝང་ལོང་བུ་རྣམ་པ་གསུམ།། བཟང་དྲུག་གི་ཝཾ་ཙན་དན་ཨ་རུ་ར།། བུ་རམ་དཀར་པོ་བཞི་འགྱུར་སྦྱར་ལ་བཏང་།། ནད་མགོ་ཆོམས་ནས་རྒྱ་སྤོས་ན་ལེ་ཤམ།། སུག་སྨེལ་རུ་རྟ་ཤིང་མངར་སྦྲང་རྩི་དང་།། ཞུན་མར་སྦྱར་བའི་ལྡེ་གུས་ནད་རྗེས་གཅོད།། རྨེན་པ་སྐྲངས་ན་རུས་རྙིང་འབའ་ཆ་དང་།། ཉ་ལྕིབས་སྦྱར་བའི་ལུམས་ཀྱིས་མནན་པ་དང་།། ཁོལ་བུ་ན་སར་ཧོར་གྱི་མེ་བཙའ་བྱ།། མེ་ལོང་ཁྱི་སྐད་ཆུ་རྒལ་ཞེ་སྡང་སྤང་།། དེ་ཡིས་ཁྱི་དུག་གིས་ཟིན་འཚོ་བར་ངེས།། སྦྲུལ་དུག་མཚན་ཉིད་རྟགས་དང་བཅོས་ཐབས་གསུམ།། མཚན་ཉིད་གདེངས་ཀ་ཅན་དང་ལུས་འཁྱིལ་དང་།། ཁྲ་བོ་གོ་ངྷའི་བུ་བཞིས་འདུ་བ་འཁྲུགས།། རྟགས་ལ་ཟིན་ཚུལ་རིགས་དང་དུག་ཤུགས་གསུམ།། དང་པོ་བལྡགས་དང་སོས་ཟིན་བཅད་དང་བཙིར།། དེ་རིགས་རྟོག་པའི་དུག་དང་སྐྲག་པའི་དུག། མཆེ་བའི་དུག་དང་རྣམ་པ་གསུམ་ཡིན་ཏེ།། སྦྲུལ་དུག་ཁྲག་ལ་བརྟེན་ཏེ་ཏིལ་མཆེད་འདྲ།། གདེངས་ཀ་ཅན་ཤུགས་ཁྲག་རྣག་འཛག་པ་དང་།། ལུས་ལ་སྲིན་བུ་འགྲོ་སེམས་རྨེན་བུ་སྐྱེ།། མགོ་ལྕི་རྨ་སྣབས་ཚིལ་མང་མིག་འབྱེད་དཀའ།། ཚིགས་བྱེར་སྙམ་སེམས་ལུས་ཚ་སྐྱིགས་བུ་འབྱུང་།། འཁྲུ་ལྕི་སྙིང་ག་རྒྱབ་དང་སྒལ་ཚིགས་ན།། ལུས་འཁྱིལ་ཁྲག་དང་ལུས་སེམས་ཚ་བ་སྐྱེ།། སྐྲངས་བརྣགས་རིམས་འདེབས་ལུས་ཀུན་ཁྱབ་པར་ཚ།། ཁྲ་བོ་ཁྲག་དང་མདོག་སྐྱ་གྲང་རིམས་འདེབས།། གོ་ངྷའི་བུ་ཡི་ཤུགས་ལ་ཀུན་རྟགས་འབྱུང་།། ཟིན་དུས་དབུགས་ཐུང་སྐྱུག་ཅིང་སྙིང་གཟེར་སྤང་།།གསོ་ཐབས་རྨ་ཡི་གང་གོངདུ་རས་ཀྱིས་བཅིང་།། ལུས་འཁྱིལ་མ་ཡིན་གསུམ་པོའི་རྨ་བསྲེག་བྱ།། རྔབས་རྭ་ཀུ་བས་རྨ་ནས་ཁྲག་གཞིབ་དང་།། ཁྱི་དུག་ལྟར་དུ་བྱུག་བདུག་རྨ་ཆས་བྱ།། ཁྲག་ལ་གནས་ཕྱིར་རྨ་དང་གང་ཉེ་གཏར།། གུ་གུལ་བཞི་དང་རྒྱ་སྤོས་ལྔ་པས་ནི།། ཁྱི་སྦྲུལ་སྲིན་བུ་བ་ཡི་དུག་རྣམས་འཇོམས།། བྱེ་རུག་རྒྱ་སྤོས་ཐང་ཤིང་ཀ་རཉྫ།། ཡུང་སྐྱེར་འབྲས་བུ་གསུམ་དང་ཚ་བ་གསུམ།། བ་གཅིན་བཏགས་ཏེ་བཏུང་དང་རྨ་སྨན་བྱ།། བ་སྦྲུལ་སྲིན་བུ་སྡིག་པའི་དུག་ཀུན་སེལ།། གླ་བ་འཁར་སིལ་གདུགས་ཐོགས་སྦྲུལ་སོགས་འབྱེར།། སྡིག་པའི་དུག་རེག་ཚ་ཞིང་ན་ལ་མཆེད།། དེ་ནི་སྦྲུལ་ཟིན་གསོ་བ་ཇི་བཞིན་ནོ།། སྲིན་བུའི་དུག་ལ་ནད་རིགས་གསོ་བ་གཉིས།། དང་པོ་སྦྲུལ་ལས་གྱུར་དང་མཆུ་སྦོམ་གཉིས།། སྦྲུལ་གྱི་ཤ་དང་ལྕི་བ་ཁ་ཆུ་ལས།། སྐྱེས་པའི་དུག་ཅན་སྲིན་བུ་རྐྱང་འདུས་བཞི།། ཟོས་རྗེས་ཚ་གཡའ་སྐྲངས་ཤིང་ཤུ་བ་འབྱུང་།། རླུང་སྲིན་ཟུག་ཆེ་མཁྲིས་སྲིན་ཚ་ལ་མཆེད།། བད་སྲིན་གྲང་འབྱམས་འདུས་པ་སྦྲུལ་ཤུགས་འདྲ།། གསོ་ཐབས་བདུག་བྱུག་ཁོང་སྨན་སྦྲུལ་ལྟར་གསོ།། རླུང་མཁྲིས་བད་ཀན་སྦྱར་བའི་རྨ་ཆས་བྱ།། དེ་བཞིན་བ་དུག་དབྱེ་བ་བཅུ་དྲུག་ཀྱང་།། ངེས་མེད་དུག་ཅན་བ་ནི་གཅིག་ཏུ་འདོད།། སོས་ཟིན་ཚ་ལ་སྐྲངས་ཤིང་ཤུ་བ་རྣག། མཁྲིས་གྱུར་ཆུ་བུར་ཚ་ལ་རིམས་ཀྱིས་འདེབས།། བད་ཀན་གྲང་སྐྱ་གཡའ་ལ་གྲང་རིམས་འདེབས།། རླུང་གྱུར་རྩུབ་ནག་རུས་ཚིགས་ན་བར་བྱེད།། བཅོས་ཐབས་མཁྲིས་གྱུར་སྣོད་སྟེང་གཏར་ཁྲག་དབྱུང་།། གཉིས་པོ་རྨ་གཏོང་བསྲེགས་རྗེས་དུག་སྨན་བྱུག། སྦྲུལ་གྱི་གསོ་བ་འདིར་སྦྱར་བ་དུག་འཇོམས།། བིལ་བ་རྒྱ་སྤོས་ཙན་དན་ཨུཏྦ་ལ།། བཅའ་སྒ་ནིམ་པ་རུ་རྟ་པི་པི་ལིང་།། ལྕང་མ་ཆུ་སྲིན་སྡེར་མོ་པོ་སོ་ཆ།། ག་བྲ་ཤིང་ཚ་སྦྱར་བྱུགས་བ་དུག་འཇོམས།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རྒྱུ་བ་དང་མི་རྒྱུ་བའི་དུག་གསོ་བའི་ལེའུ་སྟེ་བརྒྱད་ཅུ་རྩ་དགུ་པའོ།། །།

X