//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་གོ་གཅིག་པ། རོ་ཙ་བར་བྱ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 15:43:19 ཀློག་གྲངས། 9 

དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས།། དམར་ཁྲིད་ལག་ལེན་མན་ངག་རྒྱུད་འདི་ཡི།། རོ་ཙའི་སྐབས་ལ་ཅི་ལྟར་བསླབ་པར་བགྱི།། རོ་ཙ་ཞེས་པའི་དོན་དེ་གང་ལ་བྱ།། རོ་ཙའི་ནད་དེ་དོན་སྣོད་གང་ལ་གནས།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་ལས། སྟོན་པས་བཀའ་སྩལ་པ། ཀྱེ་དྲང་སྲོང་ཆེན་པོ་ཡིད་ལས་སྐྱེས།། རོ་ཙ་ཞེས་པ་འདོད་པ་སྤྱོད་ནུས་ཤིང་།། རིགས་བརྒྱུད་བུ་ཚ་སྤེལ་བར་བྱེད་པ་སྟེ།། དེ་ལ་གཙོ་དང་ཡན་ལག་རྣམ་པ་གཉིས།། དེ་ཡང་ལས་དང་ཉོན་མོངས་ཕོ་མོར་སྣང་།། སྐྱེས་པ་ཕོ་ནི་རོ་ཙའི་གཙོ་བོ་སྟེ།། སྐྱེས་པས་འདོད་པ་སྤྱོད་པར་མ་ནུས་ན།། བུད་མེད་བརྒྱ་ཡིས་བསྐོར་ཡང་དོན་མི་འགྲུབ།། སྐྱེས་པའི་ཁུ་བ་སྐྱོན་མེད་འཕེལ་གྱུར་ན། བུད་མེད་བུ་ཚ་འཕེལ་བ་བཙལ་དུ་རུང་།། དེ་ཕྱིར་རོ་ཙའི་གཙོ་བོ་སྐྱེས་པ་ཡིན།། དེ་ཡི་ཡན་ལག་ཟ་མ་བུད་མེད་དེ།། ས་བོན་འཛིན་ཞིང་སྤེལ་བའི་གཞིར་འགྱུར་གྱི།། ཕ་ཡི་རབས་བརྒྱུད་བུ་མོས་མི་ཟིན་པས།། གཙོ་བོར་མི་འགྱུར་ཀུན་ལ་སྤྱད་བཏུབ་ཀྱང་།། ལས་དབང་བསོད་ནམས་དམན་ལ་བུ་མི་འབྱུང་།། དེ་ལ་བུ་མེད་བཙལ་ཐབས་ཡན་ལག་གཅེས།། དཔེར་ན་ས་བོན་མེད་པའི་ཞིང་ས་དང་།། ཞིང་ས་ངན་ལ་ས་བོན་བཏབ་དང་མཚུངས།། དོན་སྣོད་སྤྱི་དེ་བསམ་སེའི་ནད་དུ་བཤད།། བཅུད་ཀྱི་དངས་མ་ས་བོན་དཀར་དམར་རྟེན།། དེ་ཕྱིར་ཕོ་མོ་གཉིས་ཀའི་ཐུན་མོང་ནད།། དེ་ལ་གཙོ་བོ་སྐྱེས་པའི་རོ་ཙ་ལ།། སྦྱོར་བ་དངོས་གཞི་དགོས་ཆེད་རྣམ་པ་གསུམ།། སྦྱོར་བ་གང་ཟག་གནས་གྲོགས་སྔོན་འགྲོའོ།། གང་ཟག་སྐྱེས་བུ་རྟག་ཏུ་ཡུལ་བསྟན་པས།། བུད་མེད་ཡལ་ག་མེད་པའི་ཤིང་དང་མཚུངས།། རེག་མཐོང་སོགས་ལ་བུ་འདྲ་གང་ཡང་མེད།། དེ་ཕྱིར་དེ་ཡིས་དེ་འདོད་དེ་ལ་འབད།། དེ་ཡི་གནས་ཁང་ཉེ་འཁོར་རྫིང་བུ་དང་།། པདྨ་ནགས་ཚལ་བསིལ་གྲིབ་སྙན་པའི་སྒྲ།། རླན་བསིལ་ཡིད་བདེར་གྱུར་པས་རོ་ཙ་ནུས།། གྲོགས་ནི་དར་བབ་མཛེས་སྒེག་རྒྱན་དང་ལྡན།། ངག་སྙན་ཚིག་འཇམ་ཡིད་འོང་སྤྱོད་ཚུལ་ཤིས།། སྔོན་འགྲོ་སྣུམ་འཆོས་ཁྲུས་ཀྱིས་སྦྱངས་བྱས་ལ།། ནི་རུ་ཧ་དང་འཇམ་རྩིར་བཅས་ལ་བཏང་།། དངོས་གཞི་སྐམས་པ་གསོ་དང་རླུགས་པ་བཅད།། གསོ་ལ་ཟས་དང་སྤྱོད་ལམ་སྨན་དཔྱད་བཞི།། ཟས་ནི་ཀ་ར་བུ་རམ་སྦྲང་རྩི་དང་།། ཤ་ཁུ་འོ་མ་ཞུན་མར་འོ་སྤྲིས་སོགས།། རོ་མངར་མདོག་དཀར་ཡིད་དུ་འོང་བ་ལ།། སྟོབས་འཕེལ་ཉམས་བརྟས་བྱེད་པ་གང་ཡིན་བསྟེན།། སྤྱོད་ལམ་མིག་ལྟས་འོ་བྱེད་འཁྱུད་པ་དང་།། ཡིད་འོང་གཏམ་དང་འཛུམ་གྱིས་འགྲོགས་པར་བྱ།། སྨན་ནི་ཤ་ཡི་རྒྱལ་པོ་ད་བྱིད་དེ།། ལུས་ཀྱི་སྟོབས་སྐྱེད་ཁུ་བ་འཕེལ་མཆོག་ཡིན།། དེ་ལ་སྦྱར་ཐབས་སྐྱིན་གོར་ཅོག་ཀྲོང་དང་།། དགུ་སྦྱོར་བཅུ་གསུམ་པ་དང་ལྔ་པའོ།། སྐྱིན་གོར་རྩ་བ་ལྔ་དང་འབྲས་བུ་གསུམ།། ད་བྱིད་སྨུག་པོ་བྲེ་ག་ལུག་ཐུག་འབྲས།། ཆུ་དང་འོ་མ་མར་བསྡུས་ཁུ་བ་ལ།། རྒྱ་ཚ་སུག་སྨེལ་བཅའ་སྒ་པི་པི་ལིང་།། བུ་རམ་སྦྱར་བ་ནས་གསེབ་ནུས་པ་བསྐྱེད།། ཅོག་ཀྲོང་རྩ་བ་ལྔ་ཡི་སྨན་མར་ལ།། ད་བྱིད་སྨུག་པོ་ཛཱ་ཏི་ཏིལ་དཀར་ནག། ཐང་ཕྲོམ་པ་རྣམས་ཁ་ཚར་བཏབ་ལ་བཏང་།། ཡང་ན་ད་བྱིད་སྨུག་པོ་ཏིལ་དཀར་ནག། རྩངས་པའི་ཤ་རྣམས་མཆིལ་པའི་ཁོག་པར་གཞུག། ཁ་བཙེམས་མར་དུ་བཙོས་ལ་སྐམས་བཏགས་ཕྱེ།། གོང་གི་མར་ཁུ་བཏབ་ལ་བུ་རམ་སྦྱར།། དགུ་སྦྱོར་ད་བྱིད་སྨུག་པོ་ཛཱ་ཏི་དང་།། མི་དང་བྱི་ལ་སྲམ་གྱི་མཇུག་ཏོ་དང་།། ཅོང་ཞི་མུ་ཟི་བྲག་ཞུན་ཐང་ཕྲོམ་པ།། ཁྲལ་ཁྲོལ་བརྡུངས་ཏེ་མཆིལ་པའི་ཁོག་པར་བླུག། དར་སྐུད་ཀྱིས་བཙེམ་མར་གྱི་ནང་དུ་བཙོ།། མར་དེ་བུ་རམ་སྦྱར་ལ་ཤ་སྐམས་བཏབ།། ཁྱེའུ་སུས་དུས་ན་ཁྱེམ་བུ་རེ་རེ་བསྟེན།། དེ་རྣམས་ཀུན་གྱིས་ལུས་སྟོབས་སྐྱེད་བྱེད་ཅིང་།། མཁལ་མའི་དྲོད་སྐྱེད་ས་བོན་ཟད་པ་གསོ།། བཅུ་གསུམ་པ་ནི་ད་བྱིད་སྨུག་སེར་གཉིས།། སྲམ་གྱི་ཤ་དང་བྲག་གི་རྩངས་པ་དང་།། ཁྱིམ་བྱ་ཕུག་རོན་མཆིལ་པ་ནས་ཟན་མགོ གཙང་ཉ་ཐང་ཕྲོམ་དབང་པོ་ལག་པ་དང་།། ཉེ་ཤིང་པ་དང་ཅོང་ཞི་བུ་རམ་སྦྱར།། ཁུ་བ་ཟད་པ་འཕྲལ་དུ་སྐྱེད་བྱེད་དེ།། ནུབ་རེ་ལ་ཡང་བུད་མེད་བརྒྱ་སྤྱོད་ནུས།། ལྔ་པའི་སྦྱོར་བ་ཅོང་ཞི་དམར་པོ་དེ།། བ་ཡི་འོ་མས་འདམ་བཏགས་བྱས་ཕྱེ་དང་།། དབང་པོ་ལག་པ་མཆིལ་པའི་མགོ་བོ་དང་།། ཐང་ཕྲོམ་པ་དང་ད་བྱིད་སྨུག་སེར་གཉིས།། བུ་རམ་སྦྱོར་བ་ཁྱེའུ་སུས་ཆང་གིས་དབུལ།། གཞན་ཡང་ར་ཐུག་འབྲས་བུ་འོ་མར་བཙོས།། ཀ་ར་ཏིལ་བསྲེས་ཟོས་ན་དེ་དང་འདྲ།། པི་པི་ལིང་དང་སྐྱུ་རུ་ར་ཁུར་སྦྱངས།། ཀ་ར་སྦྲང་མར་སྦྱར་ཟོས་འོ་མ་བཏུང་།། བརྒྱད་ཅུ་ལོན་པའང་ཀུན་ལ་སྤྱོད་པར་ནུས།། ཞོ་སྤྲིས་ཟོས་རྟིང་ཀ་ར་འབྲས་བཅས་ཟོས།། རྒན་པོ་ཡིན་ཡང་གཞོན་ནུ་ལྟ་བུར་སྤྱོད།། དཔྱད་དུ་ཁྲུས་ལ་འབད་ཅིང་བསྐུ་མཉེ་བྱ།། ཁུ་བ་བླུགས་ན་འཕེལ་དང་ནད་དུག་གདོན།། ལུས་རྒྱས་ཁུ་འཕེལ་བུད་མེད་རབ་ཏུ་གདུང་།། དེ་ལ་ཆགས་པ་སྤྱད་པས་ཞི་བར་ནུས།། ནད་ཀྱི་གྲང་རླུང་མཁལ་མའི་དྲོད་ཉམས་པས།། རྩ་ཁ་མ་ཐུབ་ཆུ་དང་བསྡོངས་ནས་འཛག། བཅུ་གསུམ་བཅུ་དགུ་ནང་ལོང་གདོང་ངོས་བསྲེག། བོང་ཤ་སྲམ་ཤ་ད་བྱིད་སྨན་མར་སྦྱར།། ཚ་བ་ཚྭ་སྣའི་རིལ་བུ་ཆང་གིས་དབུལ།། དུག་བྱུང་ཕྱི་ནང་གསང་རྟགས་ངོས་བཟུང་ལ།། དེ་ཡི་གཉེན་པོས་བསད་ཅིང་ལུས་ཟུངས་བསྲུང་།། གདོན་ཡིན་རྨི་ལམ་བུད་མེད་འདྲེན་པར་འགྱུར།། མོ་ཕྭ་རིམ་གྲོ་རྟེན་འབྲེལ་བ་རའི་འོ་མ་སྦྱར་བ་རྐང་མཐིལ་བྱུགསྔགས་ཀྱིས་གསོ།།བ་ནི་ལུག་ཐོང་གི་བལ་མི་ལག་མ་འགྲིམས་པ་ཁྱེའུ་གཙང་མའི་བཀལ་བའི་སྲད་བུ་ལ་རྡོ་རྗེའི་མདུད་པ་བདུན་བྱས་ཏེ་སྔགས་ཨོཾ་ཧར་ཧར་བྷ་ན་ངྷ་ན་ཤུ་དྲ་ངྷ་རི་ནི་ཐར་ཏེ་བཱ་ཧཱ་སྟོང་བཏབ་ལ་བཅིང་དགོས་པ་ནད་མེད་ལང་ཚོར་ལྡན་པ་ཡིས།། དུས་ཚིགས་རྣམས་སུ་ཉལ་པོ་དགག་པ་མིན།། འཕྲལ་དུ་སེམས་དགའ་བུ་ཚའི་རྒྱུད་སྐྱེད་ཅིང་།། སྟོབས་ལྡན་བུད་མེད་ཀུན་ལ་ཐོགས་མེད་འགྲོ།། འདོད་ཡོན་ཀུན་ལས་ཆགས་པ་མཆོག་ཏུ་གྲགས།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རོ་ཙ་བར་བྱ་བའི་ལེའུ་སྟེ་དགུ་བཅུ་རྩ་གཅིག་པའོ།། །།

X