//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་གོ་གཉིས་པ། བུ་མེད་པ་བཙལ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 15:44:50 ཀློག་གྲངས། 14 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། རོ་ཙའི་ཡན་ལག་བུད་མེད་བཙལ་བའི་ཐབས།། དེ་རྒྱུ་གདོན་དང་འདུ་བ་རོ་ལུས་དང་།། བུ་རྩི་བཏང་དང་མོ་གཤམ་རྣམ་པ་ལྔ།། དང་པོ་མོ་རྩིས་ཕྭ་ལས་བརྟག་པར་བྱ།། ཞི་དང་དྲག་པོ་སྔགས་ཀྱིས་གདོན་དེ་བཅོས།། འདུ་བ་རླུང་མཁྲིས་བད་ཀན་རྣམ་པ་གསུམ།། རླུང་གིས་ཟླ་མཚན་སེར་ལ་དུས་མིན་འཛག། ཧར་པོར་ཡོང་སེམ་སྐབས་སུ་སྡོམ་ཞིང་སྦོ།། མཁྲིས་པས་ཚ་འབྲབ་དུད་ཁུ་རྣག་ཏུ་འབྱུང་།། བད་ཀན་བསིལ་ཞིང་ཞོ་ཁ་ཆུ་འདྲ་འཛག། རླུང་ལ་ནང་ནུབ་སྒེ་གཤེར་ཐང་བཏང་ཞིང་།། འབའ་ཆ་འབྲུ་ཡི་དུགས་ཀྱིས་རྒྱུ་ཞབས་བདུག། དེ་རྗེས་ཕྱི་ཡི་རྩ་གཤེར་རེང་བུས་བསལ།། དེ་འོག་རྒྱུ་བཅུད་གཟེ་མའི་ཐང་བཏང་ལ།། མར་བཅུད་སྦྱོར་བས་ཕྱི་རྗེས་བཅད་པར་བྱ།། མཁྲིས་པ་བད་ཀན་མེ་ཏོག་དུགས་ཀྱིས་བདུག། དེ་ནས་ཁྲུས་གཤེར་ཆེན་མོས་ཁོང་སྦྱངས་ལ།། དེ་རྗེས་ཕྱི་ཡི་རྩ་གཤེར་མངལ་སྐྱོན་བསལ།། དེ་རྟིང་རྒྱུ་བཅུད་སྦྱོར་བས་ཕྱི་རྗེས་བཅད།། མངལ་དུ་བུ་ལུས་བུ་རོ་ནད་རོ་ལུས།། ནད་ལུས་བུ་བཙས་རྗེས་ལ་ཁྲག་རོ་ལུས།། མངལ་ཁ་འཆུས་པས་མངལ་ནང་ཁྲག་སྐྲན་ཆགས།། གང་ཡིན་གྱུར་ཀྱང་བུ་ཆགས་བཞིན་དུ་འདྲིལ།། སྐབས་སུ་རྒྱུ་ཞབས་མཁལ་མ་ཚིགས་པ་ན།། མངལ་ཁྲག་དམར་རྩའམ་རེས་འགའ་ནག་པོར་འཛག། དེ་ལ་ནང་ནུབ་སྒ་སྐྱའི་ཐང་བཏང་ལ།། བྱ་བྲ་གྲོག་ཞིང་དག་གིས་རྒྱུ་ཞབས་བདུག། དེ་ནས་ཨ་རུ་དྭ་ཚ་རྩབས་ཤིང་གསུམ།། སོ་སོར་བསྡུས་ནས་བསྲེས་པའི་ཁུ་བ་ལ།། དུར་བྱིད་ཁྲོན་བུ་འོལ་མོ་རྒྱ་ཚ་དང་།། ཤིང་ཚ་བཏབ་ལ་ཁྱེའུ་སུས་དུས་ན་བཏང་།། མ་ཐེབས་རྒྱ་ཚ་ཕྲུ་དྲེག་འོལ་མོ་དང་།། ཤ་རུའི་ཐལ་བ་རིམ་སྐྱེད་ཆང་སྦྱར་བཏང་།། ཡང་ན་ཚ་བ་གསུམ་དང་ཨ་རུ་ར།། རྒྱམ་ཚ་དྭ་ཚ་ལྕུམ་རྩ་སོ་སོར་བསྡུ།། ཁུ་བ་བསྲེས་པ་དུར་བྱིད་འོལ་མོ་དང་།། རྒྱ་ཚ་ཤིང་ཚ་བཏབ་ལ་ཐོ་རངས་བཏང་།། ཟུག་གཟེར་སྐྱེད་ན་རྡོ་དང་འབྲུ་དུགས་བྱ།། མ་ཕིགས་སྲིད་ན་རྒྱ་ཚ་ཆང་སྦྱར་བཏང་།། བུ་རོ་མངལ་སྐྲན་རྣག་འཐུངས་ཁྲག་ཚབས་དང་།། མངལ་ཁ་འཆུས་ཏེ་བུ་མེད་བུ་སྐྱེད་དོ།། དེ་རྟིང་ཕྱི་ཡི་རྩ་གཤེར་ཆེན་མོས་སྦྱང་།། དེ་འོག་རྒྱུ་བཅུད་གཟེ་ཆང་ཕྱི་རྗེས་བཅད།། ལོ་གཅིག་བར་དུ་དྲོད་བསྟེན་ཟས་སྤྱོད་གཟབ།། བུ་རྩི་བཏང་བས་ཆང་དམ་རྟག་ཏུ་འབྱང་།། ནང་དང་ཕྱི་ཡི་རྩ་གཤེར་རིམ་པས་སྦྱར།། དེ་རྗེས་གཟེ་མའི་ཆང་དང་ཁྲག་བཅུད་སྦྱར།། མོ་གཤམ་མངལ་ཁྲག་མང་ལ་མདོག་མི་འགྱུར།། ཟླ་བ་རེ་བཞིན་དུས་ཐོག་འབྱུང་བ་སྟེ།། དེ་ལ་ཐབས་ཀྱིས་བཙལ་བར་ནུས་མ་ཡིན།། དེས་ན་མཚན་ལྡན་གྲོགས་སུ་བཙལ་བར་བྱའོ།། ཞེས་གསུངས་ནས་དྲང་སྲོང་རིག་པའི་ཡེ་ཤེས་དེ་སྨན་པའི་རྒྱལ་པོའི་སྐུའི་ལྟེ་བར་ཐིམ་པར་གྱུར་ཏོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་བུ་མེད་པ་བཙལ་བའི་ལེའུ་སྟེ་དགུ་བཅུ་རྩ་གཉིས་པའོ།། །། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལག་ལེན་དམར་ཁྲིད་མན་ངག་གི་རྒྱུད་ཅེས་བྱ་བ་རྫོགས་སོ།། །།

X