//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > ཕྱི་མ་རྒྱུད། > ནང་དོན།

ལེའུ་གཉིས་པ། མཐོང་བ་མེ་ལོང་ཆུ་ལ་ངོས་བཟུང་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 15:50:52 ཀློག་གྲངས། 10 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཡིད་ལས་སྐྱེས།། མཐོང་བ་མེ་ལོང་ཆུ་ལ་ངོས་བཟུང་བ།། སྔོན་འགྲོ་བལྟ་དུས་སྣོད་དང་གྱུར་ཚུལ་དང་།། ཐ་མལ་ནད་ཆུ་འཆི་ཆུ་གདོན་ཆུ་སྟེ།། ས་བཅད་རྣམ་བརྒྱད་ཆུ་བརྟག་མདོར་བསྟན་ཡིན།། དང་པོ་སྔོན་འགྲོ་བལྟ་བའི་ནུབ་མོ་ནས།། ཇ་དང་དར་བ་ཆང་དང་སིངས་པོ་སོགས།། ཆུ་མདོག་འགྱུར་ཕྱིར་ཧ་ཅང་མང་བ་སྤང་།། སྐོམ་པར་མི་སྡོད་ཉལ་པོ་གཉིད་ཆག་དང་།། འགྲོ་འདུག་སེམས་ལས་ཆུ་འཁྲུགས་སྤང་བར་བྱ།། ནམ་ཕྱེད་ཕན་ཆད་ཟས་ཀྱི་ཆུ་ཕོ་ལ།། ནམ་སྨད་ནད་ཆུ་བསགས་ཏེ་བལྟ་བར་བྱ།། བལྟ་དུས་མདོག་རླངས་ཀུ་ཡ་བརྟག་པའི་ཕྱིར།། ཞོགས་པ་སྣོད་ལ་ཉི་མདངས་བྱུང་དུས་བརྟག། སྣོད་ཀྱི་ཁྱད་པར་ཆུ་མདོག་མི་འགྱུར་བའི།། དཀར་ཡོལ་འཁར་གཞོང་ལྕགས་དཀར་སྣོད་དུ་བརྟག། རྫ་ཟངས་ར་གན་དམར་ཡོལ་མདོག་འགྱུར་སྤང་།། འོན་ཀྱང་འཇག་སོག་དཀར་པོས་བརྟག་ཏུ་རུང་།། གྱུར་ཚུལ་ཟས་སྐོམ་ཕོ་བར་དངས་སྙིགས་ཕྱེ།། སྙིགས་མ་རྒྱུ་མའི་ནང་ཚུད་སྐ་སླ་བྱེ།། སླ་བ་རྒྱུ་གྲོག་རྩ་ནས་ལྒང་པར་འདྲིལ།། དངས་མ་མཆིན་པའི་གནས་བརྒྱུད་ཁྲག་ཏུ་འགྱུར།། ཁྲག་གི་སྙིགས་མ་མཁྲིས་པའི་གནས་སུ་གསོག། མཁྲིས་པའི་དངས་མ་ལུས་ཀྱི་ཆུ་སེར་འགྱུར།། མཁྲིས་པའི་སྙིགས་མ་ཆུ་ཡི་ཀུ་ཡར་འགྱུར།། རྩ་མིག་འགྲིམས་ནས་ལྒང་པའི་ནང་དུ་གསོག། དེ་ཕྱིར་ཆུ་ཡི་ཁ་དོག་ཟས་ཀྱིས་སྒྱུར།། ཀུ་ཡ་ཁྲག་མཁྲིས་གནས་ནས་འབྱུང་བའི་ཕྱིར།། ལུས་ལ་ཚ་གྲང་གང་ཡོད་ཆུ་ལ་གསལ།། དཔེར་ན་ཚོང་པས་ཚོང་དུས་གཏམ་བརྗོད་བཞིན།། ཐ་མལ་ནད་མེད་གནས་པའི་ཆུ་བསྟན་པ།། ཁ་དོག་འབྲི་མར་བཞུས་འདྲ་སྦྲེ་དྲི་མནམ།། རླངས་པ་ཆེ་ཆུང་ཡུན་རན་མེ་ཏོག་སྙོམས།། ཀུ་ཡ་སྙོམས་ཁྱབ་སྤྲིས་མ་ཀོ་ཆུ་ཙམ།། རླངས་ཡལ་དུས་ན་མཐའ་ནས་སྒོར་མོར་ལྡོག། ལོག་རྗེས་དཀར་སེར་དངས་པ་ནད་མེད་ཡིན།། དེ་བཟློག་ནད་ཆུ་སྤྱི་དང་བྱེ་བྲག་གཉིས།། སྤྱི་ལ་བརྟག་པའི་དུས་གསུམ་བརྟག་ཚུལ་དགུ།། དུས་གསུམ་ཚན་དེ་ངད་ཡལ་གྲང་བ་གསུམ།། ཚན་དེའི་དུས་སུ་མདོག་རླངས་དྲི་མེ་ཏོག། ངད་ཡལ་དུས་སུ་ཀུ་ཡ་སྤྲིས་མ་བརྟག། གྲངས་ནས་ལྡོག་དུས་ལྡོག་ཚུལ་ལོག་རྗེས་བརྟག། དང་པོ་ཚ་བ་དུས་ཀྱི་ཁ་དོག་ནི།། ལུ་མའི་ཆུ་ལྟར་སྔོ་ལ་སླ་བ་རླུང་།། སེར་ན་མཁྲིས་པ་དཀར་ན་བད་ཀན་ནད།། དམར་ན་ཁྲག་ནད་རྒྱ་ཤལ་ཆུ་སེར་ཡིན།། སྨུག་ལ་དུགས་ན་བད་ཀན་སྨུག་པོར་བརྟག། ཆུ་མདོག་འདྲེས་ན་ལྡན་དང་འདུས་པའི་ནད།། མར་ནག་འདྲ་ན་རིམས་དང་མཁྲིས་པ་རྒྱས།། དམར་སེར་སྐ་དུགས་འགྲམས་སམ་འཁྲུགས་ཆུ་ཡིན།། ཆུ་མདོག་ནག་གམ་འཇའ་ཚོན་འདྲ་བ་དུག། རླངས་པ་ཆེ་ན་ཚ་བ་རྒྱས་པའི་ཆུ།། ཆུང་ལ་ཡུན་རིང་ཚ་བ་གབ་བམ་རྙིངས།། རླངས་ཆུང་ཡུན་ཐུང་བད་རླུང་གྲང་ཆུ་ཡིན།། རེས་ཆེ་རེས་ཆུང་ཚ་གྲང་འདྲེས་པར་བརྟག། དྲི་མ་དུགས་ལ་དཀུ་ན་ཚ་བ་ཆེ།། དྲི་མ་མེད་དམ་ཆུང་ན་གྲང་བ་ཡིན།། ཟས་ཀྱི་དྲི་མནམ་གང་མནམ་དེ་མ་ཞུ།། ལྦུ་བ་སྔོ་ལ་ཆེ་བ་རླུང་ཡིན་ཏེ།། ཕྲ་སེར་སངས་པ་སྐྱེན་ན་མཁྲིས་པ་ཡིན།། ལྦུ་བ་མཆིལ་མ་འདྲ་ན་བད་ཀན་ནད།། དམར་ན་ཁྲག་ནད་འཇའ་ཚོན་འདྲ་ན་དུག། ཕུག་རོན་ཁྲ་ཡིས་གཏོར་འདྲ་བྱེར་བའི་ནད།། ཀུ་ཡ་སྤུ་དང་འདྲ་ན་རླུང་གི་ནད།། བལ་འདབ་ཆུ་སྐྱུར་འདྲ་བ་ཁྲག་མཁྲིས་ཡིན།། སྤུ་རྩེ་འདྲ་བ་བད་ཀན་གྲང་བའི་ནད།། སྤྲིན་འདྲ་གློ་ནད་རྣག་འདྲ་དེ་ཉིད་ཡོད།། བྱེ་མ་འདྲ་ན་མཁལ་ནད་ཡོད་པ་ཡིན།། སྟེང་འོག་བར་གནས་ནད་ཀྱང་དེ་བཞིན་བརྟག། ཀུ་ཡ་ཞོ་ཤི་འདྲ་བས་ཆུ་སྟེང་ཁྱབ།། རླུང་གིས་ལུས་ཟུངས་ཚ་གྲང་དཀྲུགས་པ་ཡིན།། མཐུག་དང་སྲབ་ལས་ཚ་གྲང་ཤེས་པར་བྱ།། ཁ་དོག་ཆུ་མདོག་གང་བྱུང་དེ་ལྟར་རོ།། སྤྲིས་མ་སྲབ་ན་གྲང་བ་མཐུག་ན་ཚ།། བླངས་བཞག་བཏུབ་ན་ཞག་རྒོད་ཅེས་བྱ་སྟེ།། མེར་བསྲེགས་གསུར་དྲི་བྱུང་ན་བཅོས་མི་དགོས།། སྤྲིས་མ་དུམ་བུར་ཆད་ན་སྐྲན་ནད་ཡིན།། སྤྲིས་མའི་གཟུགས་ལས་གདོན་ངོས་བཟུང་བར་བྱ།། ལྡོག་དུས་རླངས་མ་ཡལ་བར་ལྡོག་པ་ཚ།། ཡལ་རྗེས་གྲངས་ནས་ལྡོག་པ་གྲང་བ་ཡིན།། རླངས་ཡལ་ལྡོག་པ་དུས་མཚུངས་ཚ་གྲང་སྙོམས།། ལྡོག་ཚུལ་ཆུ་ལ་སྲབ་མཐུག་མེད་པ་ལ།། གང་སྲབ་མཐའ་ནས་ལྡོག་པ་གྲང་བ་ཡིན།། གཏིང་ནས་ལོངས་པོར་ལྡོག་པ་ཚ་བ་གསར།། མཐའ་ནས་ཤར་ཤར་ལྡོག་པ་རྙིངས་ཚད་ཡིན།། སྣ་ལ་ཀུ་ཡ་ལྡོག་ན་ཚ་གྲང་འཐབ།། ཚ་བ་བྱེར་དང་གྲང་བ་འབྱམས་པ་དང་།། གདོན་ཤས་ཆེ་བའི་ཆུ་གསུམ་ལྡོག་མི་འགྱུར།། ལོག་རྗེས་ཁ་དོག་ནད་གཞིའི་ཆུ་མདོག་བལྟ།། སྐ་ན་ཚ་བ་སླ་ན་གྲང་བ་ཡིན།། བྱེ་བྲག་མདོར་བསྡུས་ཚ་ཆུ་གྲང་ཆུ་གཉིས།། ཚ་བའི་ཆུ་ནི་ཁ་དོག་དམར་རམ་སེར།། སྐ་ལ་དྲི་དུགས་རླངས་པ་ཆེ་ཡུན་རིང་།། ལྦུ་བ་ཕྲ་སེར་སངས་སྐྱེན་སྤྲིས་མ་མཐུག། ཀུ་ཡ་ཆུ་ཡི་དཀྱིལ་དུ་ལིང་གིས་འདྲིལ།། དྲོད་རླངས་མ་ཡལ་བ་ལ་ཚ་ལོག་བྱེད།། ལོག་རྗེས་སྨུག་ལ་གར་བ་ཚ་ཆུ་ཡིན།། གྲང་ཆུ་ཁ་དོག་དཀར་རམ་སྔོ་ལ་སླ།། རླངས་དང་དྲི་མ་ཆུང་ལ་ལྦུ་བ་ཆེ།། སྤྲིས་དང་ཀུ་ཡ་སྲབ་ཅིང་གྲངས་རྗེས་ལྡོག། ལོག་རྗེས་སྔོ་ལ་སླ་བ་གྲང་ཆུ་ཡིན།། ཁ་དོག་དཀར་སྔོ་ཀུ་ཡ་མཐུག་པའི་ཆུ།། ལྟར་སྣང་གྲང་ཡང་གཏིང་ན་ཚད་པ་ཡོད།། དམར་སེར་དྲི་ཆུ་ཀུ་ཡ་མེད་པ་ནི།། ལྟར་སྣང་ཚ་ཡང་ངོ་བོ་གྲང་བ་ཡིན།། ཚ་ཆུ་ལྡོག་བུལ་གྲང་ཆུ་ལྡོག་པ་སྐྱེན།། ཚ་བ་གབ་པའི་ནད་དུ་ཤེས་པར་བྱ།། ཚ་ཆུ་མེ་ཏོག་མེད་ན་ཁོང་ཤོར་བྱིང་།། གྲང་ཆུ་མེ་ཏོག་མེད་ན་གྲང་བ་འབྱམས།། ཚ་ཆུ་སྤྲིས་མ་མཐུག་ན་ལུས་ཟུང་ཟུངསཞུ།། དེ་བཞིན་གྲང་ཆུ་མར་མ་ཞུ་བར་ངེས།། ལར་ན་སྟོངས་ཚད་ཁྲག་ཚད་དམར་པོར་འཁྲུལ།། བད་ཀན་སྨུག་པོ་ཆུ་སེར་སྨུག་པོར་འཁྲུལ།། མཁལ་མ་མཆིན་པ་མཆེར་གསུམ་དམར་པོར་འཁྲུལ།། གབ་ཚད་བད་རླུང་གྲང་བ་སྔོན་པོར་འཁྲུལ།། དེ་དག་མ་འཁྲུལ་ནད་ངོས་སོ་སོར་བཟུང་།། འཆི་བའི་ཆུ་ནི་ཁྲག་འདྲ་ཀོ་རུལ་མནམ།། བཅོས་ཀྱང་སྐྱེད་མེད་ཚ་བའི་འཆི་ཆུ་ཡིན།། དེ་བཞིན་ཀུ་ཡ་སངས་ནས་མི་ལྡོག་འཆི།། སྔོ་ཞིང་དྲི་རླངས་བྲོ་བ་མེད་པ་ལ།། བཅོས་ཀྱང་མི་འགྱུར་གྲང་བའི་འཆི་ཆུ་ཡིན།། ཚོགས་པ་ཆད་འདྲ་རླུང་གི་ནད་ཀྱིས་འཆི།། ཆུ་རྩ་ཆད་འདྲ་མཁྲིས་པའི་ནད་ཀྱིས་འཆི།། མཚལ་ཆད་འདྲ་ན་ཁྲག་གི་ནད་ཀྱིས་འཆི།། འོ་མ་ཤི་འདྲ་བད་ཀན་ནད་ཀྱིས་འཆི།། སྣག་ཚ་ཆད་པ་འདྲ་ན་དུག་གིས་འཆི།། མཁལ་ནད་མེད་པར་ཁོང་ནས་ཆུ་ལོག་ན།། འདུ་བ་ཁོང་རུལ་ཞེས་བྱ་འཆི་བ་ཡིན།། གདོན་ཆུ་གང་བཏང་ངོས་དེ་ཤར་དུ་རྩི།། ཆུ་དེ་སྲིད་པའི་རུས་སྦལ་གན་རྐྱལ་གནས།། མགོ་བོ་ལྷོར་བསྟན་ཐིག་བཞིས་ས་དགུར་བཅད།། གཡས་གསུམ་ལྷ་ས་མི་ས་གདོན་གྱི་ས།། གཡོན་གསུམ་དུར་ས་ཁང་ས་ཞིང་གི་ས།། དབུས་གསུམ་ཕ་མེས་རང་དང་བུ་ཚའི་ས།། ལིང་ཚེ་དགུ་པོའི་ས་དེ་གཟུགས་བརྙན་ནམ།། ལྡོག་སྐྱེན་ལྡོག་སྣ་རིང་དང་མི་ལྡོག་དང་།། ཉ་མིག་སྲུབས་འདྲ་ལྦུ་བ་གང་བྱུང་བ།། ལྷ་སར་བྱུང་ན་བསྟེན་པའི་ལྷ་བསྲུངས་བཅོས།། མི་སར་བྱུང་ན་གྲེ་ཕོ་གྲེ་མོ་གནོད།། གདོན་སར་བྱུང་ན་སྲིད་པའི་སྤྱི་འདྲེ་གནོད།། ཕ་མེས་སར་བྱུང་ཆགས་འདྲེ་རྦད་འདྲེ་གནོད།། རང་སར་བྱུང་ན་གྲོགས་ཀྱི་གོས་འདྲེ་གནོད།། བུ་ཚའི་སར་བྱུང་ཞང་ཉེ་མ་སྲུའི་འདྲེ།། ཁང་དུར་ཞིང་སར་བྱུང་ན་དེ་ནས་གནོད།། གཞན་ཡང་ཤར་དུ་བྱུང་ན་རྒྱལ་པོ་གཉེནགཉན།། ལྷོ་རུ་བྱུང་ན་བཙན་དང་མ་མོ་གནོད།། ནུབ་ཏུ་བྱུང་ན་ཀླུ་བདུད་ཀླུ་བཙན་ཏེ།། བྱང་དུ་བྱུང་ན་མཚོ་སྨན་ཀླུ་སྲིན་གནོད།། ཤར་ལྷོར་བྱུང་ན་རྒྱལ་པོ་བཙན་གྲེ་མོ།། ལྷོ་ནུབ་མཚམས་སུ་བཙན་བདུད་ནག་སྨུག་གནོད།། ནུབ་བྱང་མཚམས་སུ་ཀླུ་བདུད་ཀླུ་སྲིན་གནོད།། བྱང་ཤར་ས་བདག་རིག་འཛིན་བཅོས་པར་བྱ།། འོན་ཀྱང་ལོག་རྗེས་ཉི་མའི་མདངས་ཤར་ཚེ།། འདྲ་བའི་གཟུགས་ལ་གདོན་གྱི་ངོས་བཟུང་བ།། རྨ་བྱའི་མདོངས་འདྲ་ནག་སྨུག་གནོད།། བ་དན་འཕྱར་འདྲ་མགོན་པོ་གནོད།། ལྕགས་སྒྲོག་འདྲ་ན་ལྷ་མོ་གནོད།། མདུང་རྩེ་འདྲ་ན་ཕོ་ལྷ་གནོད།། ར་སྐྱེས་འདྲ་ན་དགྲ་ལྷ་གནོད།། ཤུག་པ་འདྲ་ན་ཡུལ་ལྷ་གནོད།། པདྨ་འདྲ་ན་མ་ལྷ་གནོད།། འོད་ཀོར་འདྲ་ན་རྒྱལ་པོ་གནོད།། ཙིག་ཁུང་ཉི་ཤར་འདྲ་ན་བཙན།། དར་ལྕེ་འདྲ་ན་ཀླུ་བཙན་གནོད།། སྡིག་པ་འདྲ་ན་ཀླུ་བདུད་གནོད།། ཤ་རུ་འདྲ་ན་ཡམ་ཤུད་གནོད།། གལ་ཏེ་འདྲ་ན་ཐེ་བྲང་གནོད།། མེ་ལོང་འདྲ་ན་མཚོ་སྨན་གནོད།། ཏམྦུ་ར་འདྲ་བདུད་མོ་གནོད།། ཉ་དང་དུང་འདྲ་ས་བདག་གནོད།། ཆུ་སྲིན་སྦྲུལ་འདྲ་ཀླུ་གདོན་གནོད།། ན་བུན་སྤྲིན་འདྲ་མི་གཙང་ལངས།། མདའ་འཕང་འདྲ་ན་གྲེ་ཕོ་མོ།། མིག་མངས་འདྲ་ན་ཞིང་འདྲེ་གནོད།། ཕུར་པ་ཡུངས་ཀར་ཕུར་ཁ་གནོད།། ཐོད་པ་འདྲ་ན་ཀླུ་གཏད་གནོད།། མ་ཧེ་འདྲ་ན་དམ་སྲི་གནོད།། དེ་རྣམས་གནོད་པ་ས་དགུའི་ཕྱོགས་ལས་དཔག། ལྷ་སར་འདྲེ་ངོ་བྱུང་ན་འདྲེ་ལྷར་རྫུ།། འདྲེ་སར་ལྷ་ངོ་ལྷ་ཁྲོས་འདྲེ་རུ་གནོད།། ལྡོག་ཏུ་མི་འདོད་བསྐོར་ཕྭ་བཏབ་སྟེ་བལྟ།། དེས་མ་གསལ་ན་གདོན་ངོ་ཡིབ་ཅེས་བྱ།། སྤྱིར་ན་དོན་ནད་རྩ་གསལ་སྣོད་ནད་ཆུ།། འཚོ་འཆིའི་ལ་ཤན་རྩ་ཡིས་འབྱེད་ན་ཡང་།། ཚ་གྲང་ལ་ཤན་ཆུ་ལ་མཐོང་བས་གསལ།། དེ་ཕྱིར་མཁས་པས་ཆུ་ལ་བརྟག་པར་བྱའོ།། གལ་འགག་བཞི་ཡིས་འཁྲུལ་སོ་བསལ་བ་ནི།། མན་ངག་རྒྱུད་ཀྱི་ཚ་གྲང་གལ་མདོར་ལྟོས།། ཞེས་གསུངས་སོ།། དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།།ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས།། ནད་དང་གཉེན་པོ་སྤྲོད་ཕྱིར་གསོ་ཚུལ་དགུ།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། དེ་སྐད་ཞུས་པའི་དོན་ལ་ལན་གསུངས་པ།། ཀྱེ་དྲང་སྲོང་ཆེན་པོ་ཡིད་ལས་སྐྱེས།། ནད་དང་གཉེན་པོར་སྤྲོད་ཕྱིར་གསོ་ཚུལ་གཅེས།། གཅེས་པའི་དོན་ལ་ཞུས་པ་ལགས་ལེགསན་ཡང་།། བཤད་པའི་རྒྱུད་དུ་ལེགས་པར་བསྟན་ནས་ཡོད།། དྲང་སྲོང་ཆེན་པོ་ལྟ་རྟོག་འཐེམས་པར་གྱིས།། དེ་མ་ཡིན་ན་མུན་ཁུང་རྫས་སྟོར་འདྲ།། དཔེ་ལ་ལས་པས་དགོས་དུས་སླེབ་མི་འགྱུར།། རྒྱུད་བཞིའི་ལྟ་རྟོག་འཐེམས་ནས་དོན་ལོངས་ན།། མུན་ཁུང་མཛོད་དུ་ཉི་ཤར་ཇི་བཞིན་གསལ།། གསེར་གཡུའི་སྒྲོམ་བུར་ལག་པ་བཅུག་པ་བཞིན།། རང་ལ་ནམ་དགོས་དུས་ན་སྤྱད་པས་ཆོག། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་མཐོང་བ་མེ་ལོང་ཆུ་ལ་ངོས་བཟུང་བའི་ལེའུ་སྟེ་གཉིས་པའོ།། །།

X