//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > ཕྱི་མ་རྒྱུད། > ནང་དོན།

ལེའུ་བརྒྱད་པ། ཐལ་སྨན་གྱི་སྡེ་ཚན་བསྟན་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 16:02:20 ཀློག་གྲངས། 7 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགསྡེ་ཚན་ལྔ་ཡི་ནང་དུ་མ་བསྟན་པའི།། ཐལ་སྦྱོར་ཁཎྡྲི་སྨན་ཆང་སྦྱོར་བ་གསུམ།། གྲང་བའི་ནད་ལ་ཐལ་སྨན་མཆོག་ཡིན་ཏེ།། ཚ་བའི་ནད་རྣམས་ཁཎྡྲིས་སེལ་བར་བྱེད།། སྨན་ཆང་རླུང་ནད་བད་མཁྲིས་ལྡན་པ་སེལ།། སྦྱོར་བ་འདི་གསུམ་གསང་ཕྱིར་གུད་དུ་སྦས།། དང་པོ་ཐལ་སྨན་སྦྱོར་བ་བསྟན་པ་ནི།། སྤྱི་རུ་རྣོ་འཇམ་བར་མའི་སྦྱོར་པ་དང་།། བྱེ་བྲག་ཁ་འཐོར་མི་འདྲ་དུ་མ་བསྟན།། དང་པོ་རླུང་མཁྲིས་བད་ཀན་ནད་གཞི་སྦྱར།། རླུང་དང་ལྡན་ལ་འཇམ་པོའི་སྦྱོར་བ་ནི།། སྒྲོན་ཤིང་དུར་བྱིད་དནྡ་འབྲས་བུ་གསུམ།། པ་ཏྲ་སརྫི་ཀ་དང་ཡ་བཀྵ།། རྒྱ་ཚ་ཁ་རུ་ཚ་དང་ཙབས་རུ་ཚ།། ཤིང་ཚ་ཐལ་ཚ་པི་པི་ལིང་མཱུ་ལ།། ཙི་ཏྲ་ཀ་དང་ཚ་བ་རྣམ་པ་གསུམ།། འོ་མ་ཞོ་མར་ཞག་རྐང་ཚིལ་གྱིས་སྦྲུ།། མཁྲིས་པར་ལྡན་ལ་བར་མའི་སྦྱོར་བ་ནི།། ཧོང་ལེན་བཙོད་དང་ཞུ་མཁན་ཀྱི་ལྕེ་བཞི།། འཇམ་པོའི་སྟེང་བསྣན་བ་རའི་ཞོ་ཡིས་སྦྲུ།། གྲོགས་མེད་བད་ཀན་རྐྱང་ལ་རྣོན་པོ་སྦྱར།། རྒོད་གཡག་རྭ་ཕྱེ་སྔོ་ཡི་ཚ་བ་གསུམ།། ཤུ་དག་ཤིང་ཀུན་འཇམ་པོའི་སྟེང་དུ་བསྣན།། གཅན་གཟན་ཤ་རུས་ཁུ་བ་ཆང་གིས་སྦྲུ།། ཀུན་ཀྱང་གར་སླ་གཟུགས་བཏུབ་འཕང་ལོ་བྱ།། མ་སྤྱད་རྫར་བླུགས་ཁ་བཅད་མཚམས་མནན་ལ།། འདག་པ་བྱུགས་ལ་བྱེ་མས་བར་མཚམས་བཅད།། བོང་མེས་འཚོས་པར་བསྲེགས་པའི་ཐལ་བ་དེ།། གྲངས་ནས་ཞིབ་བཏགས་ཕྱེ་མ་རིལ་བུ་རུང་།། བུ་རམ་ཀ་ར་སྦྲང་གི་རྟ་ལ་བསྐྱོན།། མ་ཞུ་འཇུ་ཞིང་ཕོ་བའི་མེ་དྲོད་སྐྱེད།། ལྷེན་དང་སྐྲན་བཤིག་བད་ཀན་ལྕགས་དྲེག་འགོགས།། སྐྱ་རྦབ་འཇིལ་ཞིང་འོར་དང་དམུ་ཆུ་སྐེམ།། མན་ངག་གྲོགས་ཀྱིས་བསྒྱུར་བས་ནད་ཀུན་འཇོམས།། བྱེ་བྲག་ཅོང་ཞི་འཕྲུལ་གྱི་ཐལ་སྦྱོར་ལ།། ཆུང་ངུ་བར་མ་ཆེན་པོ་རྣམ་པ་གསུམ།། ཨ་རུ་ཚ་ལ་རྒྱམ་ཚ་པི་པི་ལིང་།། བོང་ང་དཀར་པོ་ཆ་མཉམ་ཉིས་འགྱུར་གྱི།། ཅོང་ཞི་མུ་ཟི་རིལ་མ་ཙམ་ཞིག་སྦྱར།། ཞིག་དཀའི་ཀོང་བུར་བླུག་ལ་འདམ་གྱིས་སྦྱར།། སོལ་བའི་མེ་དབུས་བཅུག་ལ་འཚོས་པར་བསྲེག། མུ་ཟིའི་དྲི་སངས་འཚོས་པའི་ཚད་ཡིན་འདོན།། ཐལ་བ་ཞིབ་བཏགས་ཀ་ར་སྦྱར་བ་ནི།། མ་ཞུ་བད་ཀན་ལྷེན་དང་ལྕགས་དྲེག་དང་།། རྡོ་དུག་དབྱིག་དུག་བད་མཁྲིས་སྨུག་པོའི་སྐྲན།། ཕོ་བའི་ནད་ཀུན་ཚ་གྲང་མེད་པར་འཇོམས།། དེ་སྟེང་བཟང་དྲུག་རྒྱ་ཚ་པྲི་ཡང་ཀུ།། བསྣན་པ་ཅོང་ཞིའི་ཐལ་སྨན་འབྲིང་པོ་སྟེ།། མ་ཞུ་ལ་སོགས་སྟོབས་རྒྱས་ལྡན་ཚད་འཇོམས།། ཆེན་པོ་ཚ་བ་ལྔ་དང་ཨ་རུ་ར།། རྒྱ་ཚ་རྒྱམ་ཚ་ཐལ་ཚ་ཁ་རུ་ཚ།། མཛེ་ཚ་ཟེ་ཚ་ལན་ཚྭ་འགྲོན་བུ་དང་།། བྱ་རྒོད་གྲེ་བ་སྲམ་དང་ཆུ་བྱ་དང་།། ཉ་རུས་ཀུན་གྱི་ཉིས་འགྱུར་ཅོང་ཞི་སྦྱར།། གོང་བཞིན་བསྲེགས་ཐལ་གྲང་སྐྲན་ཐལ་བར་རློག། ཚྭ་བསྲེགས་སྦྱོར་བ་བ་ཚ་མེད་པའི་ཚྭ།། སྔོ་ཞིང་རོ་མངར་ལྡན་པ་ཁྱོར་བ་དོ།། བ་ཞོ་བྲེ་གང་རྒོད་ཤ་མཐེབ་ཙམ་སྦྱར།། བཙོས་དཀྲུགས་ཆུ་ཆོད་ཕྲུལ་པོར་སོང་བ་དང་།། རྫར་བླུག་དུ་བ་མི་འཆོར་ཁ་བཅད་ལ།། བོང་མེས་འཚོས་པར་བསྲེགས་པའི་ཐལ་བ་དེ།། སྟར་བུ་པི་པི་ལིང་དང་བུ་རམ་སྦྱར།། མ་ཞུ་ལྷེན་དང་ལྕགས་དྲེག་ཁྲག་སྐྲན་བཤིག། ག་པུར་ནག་པོའི་ཐལ་སྦྱོར་ཕག་རིལ་དང་།། སྲད་དཀར་ཧོང་ལེན་དེ་བ་ཤིང་སྔོན་བཞི།། གཙོ་གྲོགས་དུ་བ་མ་ཤོར་སོ་སོར་བསྲེག། ཐལ་བ་དམར་ཟལ་བ་ཆུས་འདམ་ཐགས་བྱ།། ཀ་ར་སྦྱར་བས་མ་ཞུ་བ་ཡི་རིམས།། གཟེར་ཐུང་གཉན་རིམས་མིག་སེར་སེལ་བར་བྱེད།། ཁྱད་པར་ཕོ་བར་རིམས་བབས་བདུད་རྩི་ཡིན།། བིག་པན་སྲད་དཀར་སྙ་ལོ་ཀྱི་ལྕེ་བཞི།། དུ་བ་མ་ཤོར་བསྲེགས་ཐལ་རླུང་རིམས་སེལ།། ཆང་སྦྱར་རི་ཐང་མཚམས་ཀྱི་བདུད་རྩི་ཡིན།། རིན་པོ་ཆེ་ཡི་ཐལ་སྨན་སྦྱོར་བ་ནི།། གསེར་ཐལ་དང་པོ་སྦྲང་གཤོག་ཙམ་དུ་བརྡུངས།། དེ་ནས་བྲུད་ལ་ལབ་ལེབ་མེད་པར་བཏགས།། ཚ་ལ་མུ་ཟི་ཏིལ་དང་ཟར་མ་སྦྱར།། རིལ་བུར་དྲིལ་ལ་ཀོང་བུར་སོལ་མེས་བསྲེག། ཟངས་ཐལ་ཟངས་བསྲེགས་ཡང་ཡང་བལྟབ་ཀྱིན་བརྡུངས།། སྦྲང་གཤོག་ཙམ་གྱུར་སེན་མོས་དུམ་བུར་གཏུབས།། སིངས་པོས་གཡའ་འདོན་ཚ་ལ་མུ་ཟི་སྦྱར།། ཀོང་བུར་བླུག་ལ་ཁ་བཅད་འཚོས་པར་བསྲེག། དངུལ་ཐལ་དངུལ་ཆུ་སྟར་བུས་བཤིག་པ་དང་།། ཚ་ལ་མུ་ཟི་སྦྱར་བ་གོང་བཞིན་བསྲེག། ལྕགས་ཐལ་གསེག་བརྡར་བརྡར་ཕྱེ་ཞིབ་ཏུ་བཏགས།། ཚ་ལ་ཨ་རུ་མུ་ཟི་འདག་པ་བྱ།། ཀོང་བུར་བསྲེགས་པས་ཐལ་བར་འགྱུར་བ་ཡིན།། ཀུན་ལ་གཉེན་པོ་ཆུངས་ན་མི་ཚོས་བསྐྱེད།། མཛེ་ནད་དུག་འཇོམས་བྱང་ཁོག་རྣག་ཁྲག་སྐེམ།། མཚལ་ཐལ་རྫ་ཡི་གའུ་ཁ་སྦྱར་ལ།། མཚལ་དེ་ཞིབ་བཏགས་གའུའི་ནང་དུ་བླུག། སྙོམས་པར་བརྡལ་ལ་བར་མཚམས་འདག་པས་བྱུག།བྱེ་མས་བར་བཙངས་རླངས་པ་ཤོར་མི་རུང་།། སྟེང་དུ་ཆུ་བྱུགས་འོག་ནས་མེ་ཡིས་བསྲེག། ཚོས་ཚད་འོག་མའི་གཤམ་དེ་སྐྱ་བོར་འགྲོ།། མེ་བཅད་གྲངས་ནས་ཁ་དབྱེ་དངུལ་ཆུ་དྲིལ།། ཐལ་བས་ཤ་རོ་མ་ལུས་གཅོད་པའི་མཆོག། ཤ་རུ་དུང་དང་འགྲོན་བུ་ཐོད་པ་རྣམས།།སོལ་མེས་དཀར་པོར་མ་སོང་བར་དུ་བསྲེག། ཚ་བ་གསུམ་དང་ཟྭ་འོག་ཕུར་མོ་དང་།། སྒོག་སྐྱ་བཙན་དུག་ཕག་རིལ་སྒྲོ་ལ་སོགས།། སླ་ངར་རྫ་སྦུབ་དུ་བ་མ་ཤོར་བསྲེག། ཐལ་བ་དེ་རྣམས་ཕལ་ཆེར་རྣག་ཆུ་སྐེམ།། ཅོང་ཞི་རྒོད་འཏུལ་སོལ་མེས་འཚོས་པར་བསྲེག། དཀར་པོར་སོང་ནས་ཆང་ངམ་དར་བའི་ནང་།། སོར་ཐོན་ཙམ་གྱིས་ངད་བསད་ཕྱེ་མར་འགྲོ།། གག་པ་ཤ་རོ་ལྷེན་སྐྲན་ལྕགས་དྲེག་གཅོད།། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཐལ་སྨན་གྱི་སྡེ་ཚན་བསྟན་པའི་ལེའུ་སྟེ་བརྒྱད་པའོ།། །།

X