//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > ཕྱི་མ་རྒྱུད། > ནང་དོན།

ལེའུ་བཅུ་པ། སྨན་ཆང་གི་སྡེ་ཚན་བསྟན་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 16:05:30 ཀློག་གྲངས། 11 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགསྨན་ཆང་སྡེ་ཚན་སྦྱར་བའི་ཐབས་བསྟན་པ།། སྦྲང་གི་ཆང་ལ་རྐྱང་ཁུག་ཡོངས་རྫོགས་གསུམ།། སྦྲང་ཆང་རྐྱང་པ་སྦྲང་རྩི་བྲེ་གང་དང་།། ཆུ་བྲེ་དྲུག་བསྲེས་བཙོས་ལ་རྔ་མས་བཙགས།། བྲེ་དོར་དུ་ནས་ཆུ་བྲེ་གང་བླུག་ལ།། ངད་བསད་གཟར་བུས་ཕྱར་ཏེ་འོ་དྲོད་ཙམ།། ཕབས་རྡོག་སྙིམ་གང་གྲིས་དྲད་རྔ་མར་ཕུར།། ཅོང་ཞིའི་གཏིང་རྡོ་ལྡིང་ཐག་ཤིང་ལ་གཏོད།། སུག་སྨེལ་ཐུན་གཅིག་བཏགས་ལ་བཏབ་སྟེ་མནན།། ཞག་དུས་བསྲོས་ཀྱིན་ཞག་གསུམ་བར་དུ་བཞག། ལངས་ན་སྐྱུར་མནམ་ལྦུ་བ་ཕྱིར་ཆིརགྱིས་འོང་།། དེ་ལ་ཚ་བ་གསུམ་པོ་ཁ་ཚར་བཏབ།། དགོངས་དང་ཐོ་རངས་ཇ་སུན་ཙམ་རེ་བསྟེན།། རླུང་ཚབས་ཆུ་སེར་བསྡོངས་ནས་ཚིགས་བྱེར་སེལ།། རུས་ཚད་མཁལ་ཚད་རླུང་ལྡན་ཆུ་སེར་འདོན།། ཁུག་པ་ཆུ་སེར་རླུང་ལྡན་བུ་རམ་བསྣན།། ཡོངས་རྫོགས་ཆུ་སེར་ཚ་བ་སེང་ལྡེང་བསྣན།། མེ་ཏོག་ཀུན་དང་ཁྱད་པར་གཡར་མོ་ཐང་།། བཏུས་སྐམས་བུམ་པར་བསྡིགས་ལ་ཆུ་ཡིས་བསིང་།། ཁུ་བ་བཞུར་ཏེ་སྦྲང་རྩི་ཕུལ་གང་སྦྱར།། འོ་དྲོད་ཙམ་བསྲོས་ཞག་གསུམ་མནན་ལ་བཞག། པུཥྞཱིའི་སྦྲང་ཆང་ཞེས་བྱ་སྦྲང་དང་མཉམ།། བུར་ཆང་ནས་དང་གཟེ་མ་གྲོ་དང་གསུམ།། བཙོས་ཏེ་ལངས་པའི་གླུམ་ལ་བུར་ཆུས་བསིང་།། རླུང་ནད་མ་ལུས་སེལ་བར་བྱེད་པ་སྟེ།། ཁྱད་པར་གློ་སྙིང་མཁལ་རུས་རླུང་ཚབས་འདོན།། ཡང་ན་ནས་ཆང་བུ་རམ་སྦྱར་བ་ཡང་།། བུ་རམ་བུར་ཆང་ཞེས་བྱ་རླུང་ཀུན་འཇོམས།། མར་ཆང་སྦྱོར་བ་ཆང་ནང་བུ་རམ་སྦྲང་།། མར་དང་གོ་སྙོད་པི་པི་ལིང་དུ་སྦྱར།། རྩེ་འཇམ་ཞག་གསུམ་མནན་པས་གྲང་རླུང་སེལ།། རླུང་ཚབས་མགོ་དང་མིག་ལ་བྲོས་པ་འདོན།། གཟེ་ཆང་གཟེ་མ་ནས་བསྲེས་གླུམ་ནང་དུ།། གཟེ་མ་ཆུར་བསྡུས་ཁུ་བས་བསིངས་པ་ནི།། རུས་ཚིགས་མཁལ་མའི་རླུང་དང་ཆུ་སེར་འཇོམས།། ཁྱད་པར་རླུང་ཚབས་མཁལ་མར་བབས་པ་འདོན།། རུས་ཆང་སྦྱོར་བ་གཞུག་ཆུང་རུས་པ་འམ།། ཐང་ཐོངཚེར་རུས་པ་བུབས་གཅིག་ཞིབ་བརྡུངས་ལ།། ཆན་བསྲེས་གླུམ་ལ་བུ་རམ་ཆུས་བསིངས་པ།། རླུང་ནད་ཀུན་སེལ་རུས་པའི་རླུང་ཚབས་འདོན།། སྲོ་ལོའི་ཆང་སྦྱོར་སྲོ་ལོ་ཆུར་སྦངས་པས།། གྲོ་ཆང་བསིངས་པ་གློ་ཚད་རླུང་ལྡན་སེལ།། ཏིག་ཏའི་ཆང་སྦྱོར་ནས་དཀར་སེར་ཙམ་བརྔོས།། དེ་ཡི་གླུམ་ལ་ཏིག་ཏ་ཨ་རུ་རའི།། ཁུ་བས་ཆང་བསིངས་ཚད་རྙིང་རླུང་ལྡན་སེལ།། ཀྱི་ལྕེས་བསིངས་ན་ཚ་བ་ཆང་འཐུང་ཡིན།། དེ་བཞིན་སྙིང་ལ་ཛཱ་ཏི་རུས་ཆང་སྦྱར།། གློ་ཡི་ནད་ལ་རྒུན་འབྲུམ་བུར་ཆང་སྦྱར།། བད་ཀན་ན་ལེ་ཤམ་གྱི་འབྲུ་ཆང་སྦྱར།། ལྒང་པའི་གྲང་བ་རྒྱ་ཚའི་ཚ་ཚྭཆང་སྦྱར།། ཆུ་སེར་ནད་ལ་སེང་ལྡེང་དྲུངས་ཆང་སྦྱར།། དུག་ནད་ཟུངས་ཟད་གཙོ་བོ་དྲུག་ཆང་སྦྱར།། གཞན་ཡང་ནད་དང་གང་འཕྲོད་སྨན་ཆུས་བསིངས།། ཡང་ན་སྨན་ཕྱེ་ཆང་སྦྱར་མནན་པ་ཡིས།། ཕོ་བའི་དྲོད་སྐྱེད་རླུང་གནོན་ནད་སེལ་འགྱུར།། ཟན་ཆང་སྦྱོར་བ་ར་མཉེ་ལྕ་བ་དང་།། གཟེ་མ་ལྕམ་པ་ཡོས་བསྲེས་ཕྱེར་བཏགས་ལ།། ཟན་དྲོན་ཕབས་བྲན་ལངས་ནས་ཆང་དུ་བསིང་།། རྙིངས་ནས་མཉེས་ལ་བུ་རམ་སྒ་དང་མར།། བཏབ་བཙོས་ལྟོར་བསྟེན་གྲང་རླུང་མ་ལུས་འཇོམས།། ཁྱད་པར་མཁལ་རྐེད་གཟེར་དང་རྐང་ལག་བཤལ།། ཚིགས་གཞི་སྐྲངས་དང་ད་རྒན་རྣ་བ་འོན།། གྲང་བས་ཆུ་འགགས་སྨད་ཀྱི་དྲོད་ཤོར་སེལ།། རྐེད་པ་མན་ཆད་གྲང་རྣག་འབྱམས་པ་གཅོད།། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྨན་ཆང་གི་སྡེ་ཚན་བསྟན་པའི་ལེའུ་སྟེ་བཅུ་པའོ།། །།

X