//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > ཕྱི་མ་རྒྱུད། > ནང་དོན།

ལེའུ་བཅུ་གཅིག་པ། རིན་པོ་ཆེའི་སྦྱོར་བའི་སྡེ་ཚན་བསྟན་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 16:06:12 ཀློག་གྲངས། 9 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགཞི་བྱེད་རྒྱལ་པོ་རིན་ཆེན་སྦྱོར་སྡེ་བཤད།། ཐང་ཕྱེ་རིལ་བུ་ལྡེ་གུ་སྨན་མར་སོགས།། ཡང་ཡང་བསྟེན་པས་སྨན་འདྲེད་ནད་མ་ཐོན།། ཞི་བྱེད་ཀུན་གྱི་ལོག་གནོན་རིན་པོ་ཆེ།། ཁྲག་མཁྲིས་བད་རླུང་བཞི་བརྒྱ་རྩ་བཞིའི་ནད།། མགོ་དང་བྱང་ཁོག་ཡན་ལག་རྨ་རྣམས་དང་།། དམུ་འོར་མཛེ་འབྲས་གག་ལྷོག་གཉན་ནད་དང་།། ཀླུ་གཉན་རྒྱལ་པོ་ལ་སོགས་འབྱུང་པོའི་གདོན།། རིན་པོ་ཆེ་ཡིས་མི་སེལ་འགའ་ཡང་མེད།། ནད་གཞི་མེད་པའི་མི་ལ་བཅུད་ལེན་འགྱུར།། སྦྱོར་བ་ཚ་སྦྱོར་གྲང་སྦྱོར་རྣམ་པ་གཉིས།། རིན་ཅེན་ཚ་སྦྱོར་གསེར་དངུལ་ཟངས་ལྕགས་བཞི།། སྦྲང་གཤོག་ཙམ་དུ་བརྡུངས་ལ་དུམ་བུར་གཏུབས།། ཞིག་དཀའི་ཀོང་བུར་བླུག་སྟེང་དངུལ་ཆུ་བླུག། དེ་སྟེང་ཚ་ལ་མུ་ཟི་བླུག་པར་བྱ།། དེ་ཡི་ཁ་རུ་ལྕི་ཐལ་དམ་པར་བསྡིག། དེ་སྟེང་འདག་པས་ཁ་བཅད་སོལ་མེས་བསྲེག། ཐལ་བ་མུ་ཟི་གུ་གུལ་སོ་མ་ར།། ཤུ་དག་ཙི་ཏྲ་ཀ་དང་ཚ་བ་གསུམ།། རེ་སྐོན་སེང་ལྡེང་འགྲོན་ཐལ་ཞིབ་པར་བཏགས།། དངུལ་ཆུ་ཞོ་ཕྱེད་སྟར་བུ་གཅིག་གིས་བཤིག། ཨ་རུ་ཆང་སྦངས་ཁུ་བ་བ་ཆུ་གཉིས།། ཁཎྡྲིར་བཙོས་ལ་གོང་མ་རྣམས་དང་སྦྱར།། རིལ་བུ་སྲན་མ་ཙམ་དྲིལ་ཐོ་རངས་དུས།། ལྔ་བདུན་དགུ་བསྐྱེད་ཆང་གིས་འཕུལ་ལ་བཏང་།། དྲེག་དང་གྲུམ་བུ་འབྲས་དང་སུར་ཡ་མཛེ།། རྩ་ནད་ཚ་སྐྲན་དམུ་འོར་གྲང་རྣག་སྐེམ།། རིན་ཅེན་གྲང་སྦྱོར་བསྟེན་ཐབས་སྦྱོར་བ་དང་།། ལོག་གནོན་གསུམ་ལས་བསྟེན་ཐབས་རྣམ་པ་དགུ།། གཡའ་ཕྱི་དུག་འདོན་འཇམ་བཙལ་སྣ་ཁྲིད་དང་།། བཤིག་དང་རྩ་ཁ་དབྱེ་དང་སྣོད་བཏང་དང་།། ཕྱི་བསྲུང་བ་དང་ནུས་པ་སྐྱེད་པའོ།། དང་པོ་ཚ་བ་གསུམ་དང་དངུལ་ཆུ་གཉིས།། གླ་ཧེལ་ནང་དུ་གཡའ་མ་ཐོན་པར་མཉེ།། དེ་རྗེས་བ་ཆུར་བཏགས་ལ་གཡའ་ཁུ་འདོན།། དུག་འདོན་ཅོང་ཞི་དྲི་ཆུར་སྐམས་སྐམས་བཙོ།། འཇམ་བཙལ་པི་པི་ལིང་དང་ཕོ་བ་རིས།། ཅོང་ཞི་ནག་མཚུར་བུལ་ཏོག་རྣམ་པ་ལྔ།། ནད་གཞིར་བསྟུན་ཏེ་ཚད་ལྡན་སྦྱར་བར་བྱ།། སྣ་ཁྲིད་ལ་ཆ་དབྱི་མོང་ནད་དང་སྤྲོད།། ཚ་གྲང་གཉེན་པོར་གང་ཤིས་ཁ་ལོ་བསྒྱུར།། བཤིག་པ་དངུལ་ཆུ་སྟར་བུ་ལོག་པོར་བཏང་།། མཆིལ་མ་བ་ཆུས་འབྲུམ་པ་མེད་པར་མཉེ།། རྩ་ཁ་འབྱེད་པ་ཚྭ་སྡོར་གཡེར་མས་བྱ།། སྣོད་བཏང་བ་ནི་ཟངས་ཀྱི་ཐལ་བ་སྡེབ།། ཟངས་ཐལ་མེད་ན་ལུས་ལ་རྔུལ་མི་འཆགས།། རིལ་བུའི་སྔོན་དུ་ཞུན་མར་ཞག་འགའ་བསྟེན།། ཕྱི་བསྲུང་ཚ་གྲང་སྦྱར་བའི་མར་གྱིས་བྱུག། ནུས་པ་སྐྱེད་པ་རིལ་བུ་ཆང་གིས་དབུལ།། ཤ་ཆང་ལྟོར་བསྟེན་སྐབས་སུ་བ་སྤུར་དབྱུང་།། བསྟེན་ཐབས་མ་ཤེས་སྦྱོར་བ་དུག་ཏུ་འགྱུར།། སྣོད་ངན་སེང་གེའི་འོ་མ་བཞོས་དང་མཚུངས།། སྦྱོར་བ་ཆིག་ཐུབ་དང་ནི་ཀུན་རྒྱུག་གཉིས།། དང་པོ་མུ་ཟི་འགྲོན་ཐལ་ཨ་རུ་ར།། སུག་སྨེལ་གསེར་གྱི་བྱེ་མ་བྱང་སེམས་གཉིས།། ཀུན་དང་སྟར་བུ་མཉམས་ཏེ་སྦྲང་དང་སྦྱར།། རྣག་དང་ཆུ་སེར་དམུ་ཆུ་སྐེམ་པར་བྱེད།། ཀླད་པ་འཛག་གཅོད་རྩ་ནད་བྱེར་འགྲམས་སེལ།། བཟང་དྲུག་ཙན་དན་དཀར་དམར་འབྲས་བུ་གསུམ།། སྤོས་དཀར་ཐལ་ཀ་རྡོ་རྗེ་སོ་མ་ར།། དོམ་མཁྲིས་རུ་རྟ་སྦྱར་བའི་རིལ་བུ་ཡིས།། ཚ་རྙོགས་འབྲས་དང་སུར་ཡ་རྩ་ནད་སེལ།། བཙན་དུག་ཨ་རུ་མུ་ཟི་གླ་རྩི་དང་།། ཤུ་དག་རུ་རྟ་གུ་གུལ་བཟང་པོ་དྲུག། སྤོས་དཀར་ཐལ་ཀ་རྡོ་རྗེ་སོ་མ་ར།། སྦྲང་སྦྱར་རིལ་བུས་མཛེ་འབྲས་གག་ལྷོག་དང་།། དམུ་འོར་སྐྱ་རྦབ་སྐྲངས་པ་མ་ལུས་འཇོམས།། བཟང་དྲུག་གླ་རྩི་ཙན་དན་དཀར་པོ་དང་།། བསེ་རུ་གི་ཝཾ་ཆོས་སྨན་ཨ་རུ་ར།། བྲག་ཞུན་བོང་ང་དཀར་དམར་ཕྱ་ཚན་གསུམ།། ཁྱུང་སྡེར་དཔའ་བོ་སེར་པོ་དོམ་མཁྲིས་དང་།། ཏིག་ཏ་མ་ནུ་རུ་རྟ་སྐྱེར་བར་ཤུན།། ཀ་ར་སྦྱར་བའི་རིལ་བུས་དུག་ཚད་འཇོམས།། བསིལ་གསུམ་གི་ཝཾ་གླ་རྩི་བོང་ང་དཀར།། རུ་རྟ་བྲག་ཞུན་གསེར་གྱི་མེ་ཏོག་དང་།། བྱེའུ་ལ་ཕུག་ཉུང་མའི་ཁཎྡྲི་ལ།། རིལ་བུ་དྲིལ་བས་ཤ་དུག་སེལ་བར་བྱེད།། བསིལ་གསུམ་ཙན་དན་དཀར་དམར་བ་ཤ་ཀ། ཧོང་ལེན་སྐྱུ་རུའི་རིལ་བུས་འཁྲུགས་ཚད་འཇོམས།། གི་ཝཾ་བོང་ང་དཀར་པོ་ཨ་རུ་ར།། གསེར་གྱི་མེ་ཏོག་བསིལ་གསུམ་ཏིག་ཏ་སྦྱར།། རིལ་བུས་རིམས་ཀྱི་ཚད་པ་སེལ་བར་བྱེད།། སྦལ་རྒྱབ་མདུང་རྩེ་གངས་ཐིགས་ཅོང་ཞི་དང་།། ཚ་ལ་གླ་རྩིའི་རིལ་བུས་འབྲུམ་ནག་སེལ།། བཙན་དུག་གླ་རྩི་གུ་གུལ་ཨ་རུ་ར།། སྦལ་པ་ནག་པོ་ཤུ་དག་རིལ་བུ་ཡིས།། ལྷོག་པའི་ནད་རིགས་མ་ལུས་འཇོམས་པར་བྱེད།། བཙན་དུག་རྒྱ་ཚ་ཐར་ནུ་ཨ་རུ་ར།། རུ་རྟ་ཁྱི་ཡི་མཆེ་བས་གག་པ་སེལ།། སྤང་རྩི་རེ་སྐོན་ཧ་བོ་གང་ག་ཆུང་།། དུག་ཉུང་དོམ་མཁྲིས་བྲག་ཞུན་རྒྱུ་གཟེར་སེལ།། དེ་ལ་སོགས་ཏེ་ནད་གང་གཉེན་པོ་དང་།། དངུལ་ཆུ་སྦྱར་བས་གསོ་དཀའི་ནད་རྣམས་སེལ།། གསེར་དང་རྒྱ་རུ་རྒྱ་སྐྱེགས་རྒྱ་ཚ་དང་།། སྣག་ཚ་སྦྲུལ་དང་སྟག་ཤ་བུལ་ཏོག་དང་།། མཛོ་དྲེའི་རྒྱུངས་པ་སྦྱར་བས་སྐྱེ་རྒྱུན་གཅོད།། ཀུན་རྒྱུག་དངུལ་ཆུ་མུ་ཟི་སྟར་བུ་དང་།། བརྒྱ་བྱིན་སྦྲང་ལ་སྦྱར་བའི་ལྡེ་གུ་ལ།། ར་མཉེ་ཉེ་ཤིང་སྦྱར་བས་བཅུད་ལེན་འགྱུར།། བསེ་རུ་གྭ་དོར་འགྲོན་ཐལ་རེ་སྐོན་དང་།། ཟངས་ཐལ་མར་གསར་བྱང་ཁོག་རྣག་ཁྲག་སྐེམ།། ཡ་བཀྵ་ར་འགྲོན་ཐལ་ཚ་བ་གསུམ།། དགོ་རུ་ཐལ་ཚ་ཤིང་ཚས་དམུ་ཆུ་སྐེམ།། བཙན་དུག་གུ་གུལ་རྨ་བྱའི་མཁྲིས་པ་སྦྱར།། བྱུག་དང་ལྟོར་བཏང་མཛེ་ནད་འཇོམས་པར་བྱེད།། ཐལ་ཀ་རྡོ་རྗེ་སེང་ལྡེང་སོ་མ་ར།། སྤོས་དཀར་སྦྱར་བས་ཆུ་སེར་ནད་ཀུན་སྐེམ།། འགྲོན་ཐལ་བྲག་ཞུན་སླེ་ཏྲེས་དྲེག་ནད་སེལ།། དོམ་མཁྲིས་གུ་གུལ་སོ་མ་ར་ཛ་སྦྱར།། ཁོང་དུ་བཏང་དང་རྨར་བྱུགས་འབྲས་ནད་སེལ།། བསེ་འབྲས་དངུལ་ཐལ་དར་མཚུར་ཤ་རོ་གཅོད།། ལོག་གནོན་བྱིང་འཐིབས་བཟང་དྲུག་ཀ་ར་སྦྱར།། འཁྲུ་ན་བཟང་དྲུག་ཟངས་ཐལ་སྦྱར་བས་གཅོད།། ཁ་ལ་རྨ་བྱུང་རྒྱུ་མ་གཟེར་བ་དང་།། ཕོ་བར་མི་འཇུ་སྐྲན་དུ་འདྲིལ་བ་ན།། གཉེན་པོའི་སྨན་དྲུག་བསྐོལ་ཐང་ཚན་མོ་བཏང་།། ཡང་ན་ཕྱེ་མ་ཆུ་སྐོལ་ཚ་མོས་དབུལ།། ཟངས་སྐྱུགས་དོན་ལ་སྟར་བུ་བ་ཆུ་བཏུང་།། མགོ་འཁོར་ཁ་གདོང་གཡོ་ཞིང་སོ་རྙིལ་ན།། ཤ་ཆང་ཞུན་མར་སྒོག་སྐྱ་བསྟེན་པར་བྱ།། རུས་ཚིགས་འབྲལ་སྙམ་བྱེད་ན་པི་པི་ལིང་།། རྒྱ་ཚ་རྒྱམ་ཚ་སྟར་བུའི་གྲང་ཐང་བཏང་།། བསྟེན་ཐབས་དགུ་ལྡན་ལོག་པ་འབྱུང་མི་སྲིད།། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རིན་པོ་ཆེ་སྦྱོར་བའི་སྡེ་ཚན་བསྟན་པའི་ལེའུ་སྟེ་བཅུ་གཅིག་པའོ།། །།

X