//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > ཕྱི་མ་རྒྱུད། > ནང་དོན།

ལེའུ་བཅུ་གཉིས་པ། སྔོ་སྦྱོར་གྱི་སྡེ་ཚན་བསྟན་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 16:06:56 ཀློག་གྲངས། 4 

      དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས།། ཞི་བྱེད་སྡེ་བརྒྱད་རིན་ཆེན་སྦྱོར་བ་རྣམས།། གསོ་བྱའི་ནད་ལ་མི་སེལ་འགའ་མེད་ཀྱང་།། ནམ་ཞིག་ལྔ་བརྒྱའི་དུས་སུ་སླེབ་ཙམ་ན།། དབུལ་པོའི་ནད་པ་རྣམས་ཀྱིས་བསླུར་མི་ཐེག། མཐའ་འཁོབ་ཡུལ་དུ་བཙལ་བས་རྙེད་པ་དཀའ།། ཐག་རིང་ཡུལ་དུ་བཙལ་བས་ནད་པ་འཆོར།། དེ་ཕྱིར་ས་ལ་སྐྱེས་པའི་སྔོ་རྣམས་ཀུན།། སྐྱེས་ཚད་མཐོང་ཚད་སྨན་དུ་སྦྱར་ཐབས་ཞུ།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་ལས། སྟོན་པས་གསུངས་པ། ཀྱེ་མ་ལེགས་སོ་དྲང་སྲོང་ཡིད་ལས་སྐྱེས།། ཁྱོད་ཀྱིས་ཞུས་པའི་གཏམ་ལ་དེ་ག་བདེན།། ལྔ་བརྒྱ་དུས་ཀྱི་མཐའ་མར་སླེབ་པའི་ཚེ།། སྐྱེས་ཚད་མཐོང་ཚད་སྨན་དུ་མ་འཁོལ་ན།། ནུས་ལྡན་དཀོན་པས་བཙལ་དུ་ག་ལ་རྙེད།། དཔེར་ན་ལྷ་དང་ཀླུ་ཡི་ནོར་བུ་འདྲ།། རྙེད་ཀྱང་དབུལ་པོའི་ནད་པས་ཅི་ལ་ཐེག། དཔེར་ན་ཟོང་མེད་ཚོང་དུས་འཁྱམ་པ་འདྲ།། དེ་བས་མཐའ་འཁོབ་དབུལ་པོའི་ནད་བསལ་ཕྱིར།། བྱམས་པའི་སེམས་ཀྱིས་སྔོ་ཡི་སྦྱོར་བ་བསྟན།། འོན་ཀྱང་ནུས་པ་རྩི་བས་སྔོ་རང་ཆེ།། ག་པུར་ཉིད་ཀྱང་ཟིལ་གྱིས་གནོན་པར་ནུས།། སྔོ་མི་སྐྱེ་བའི་ཡུལ་ནི་གཅིག་ཀྱང་མེད།། དེ་ལ་གཅེས་པའི་ཡན་ལག་བདུན་ལྡན་དགོས།། སྐྱེ་སར་སྐྱེས་དང་དུས་སུ་བཏུས་པ་དང་།། སྐམ་གསེད་ལེགས་དང་སོ་མ་རྙིངས་པ་དང་།། དུག་འདོན་འཇམ་བཙལ་འཕྲོད་པར་སྦྱར་བ་འོ།། སྐྱེ་ས་ས་གཙང་ཉམས་དགའ་བུདྡྷས་བཅགས།། བཀྲ་ཤིས་ཡོན་ཏན་ལྡན་ཞིང་ས་གཞི་གཤིན།། གངས་ཅན་འབིགས་བྱེད་བསིལ་དྲོད་རང་གནས་སྐྱེས།། ཉི་ཟླའི་སྟོབས་ལྡན་སྐྱེ་སར་སྐྱེས་ཞེས་བྱ།། བཏུ་དུས་རྩ་བ་ཡལ་ག་སྡོང་པོ་གསུམ།། སྡོང་པོའི་རིགས་ཡིན་རུས་རྩ་ཤ་ནད་སེལ།། སྟོན་ག་རྩི་སྐམ་དུས་སུ་བཏུ་བར་བསྔགས།། ལོ་མ་ཞོ་དང་མྱུ་གུ་རྣམ་པ་གསུམ།། ལོ་མའི་རིགས་ཡིན་སྣོད་རྐང་ལྷ་ནད་སེལ།། འདབ་རྒྱས་ཆར་གྱི་དུས་སུ་བཏུ་བར་བསྔགས།། མེ་ཏོག་འབྲས་བུ་རྩེ་མོ་རྣམ་པ་གསུམ།། འབྲས་བུའི་རིགས་ཡིན་མིག་དོན་མགོ་ནད་སེལ།། སྟོན་སེར་སྨིན་པའི་དུས་སུ་བཏུ་བར་བསྔགས།། སྐོགས་པ་བར་ཤུན་ཚི་བ་རྣམ་པ་གསུམ།། ཤུན་པའི་རིགས་ཡིན་ལྤགས་རྒྱུས་ཡན་ལག་སེལ།། ཁ་འབུས་དཔྱིད་ཀྱི་དུས་སུ་བཏུ་བར་བསྔགས།། བཤལ་སྨན་རྩི་སྐམས་ནུས་པ་གཏིང་འགྲོའི་དུས།། སྐྱུགས་སྨན་ཁ་འབུས་གྱེན་འདྲེན་དུས་སུ་བཏུ།། ཁྱད་པར་ཟླ་བ་ཡར་ངོའི་དུས་བཟང་ལ།། གཙང་མའི་བྱིས་པ་ཁྲུས་བྱས་མཛེས་པར་བརྒྱན།། གཟུངས་སྔགས་རྟེན་འབྲེལ་སྙིང་པོ་བཟླ་ཞིང་བཏུ།། དུག་དང་ཕྲལ་བ་རྩ་སྡོང་ལྤགས་རྐང་དུག། ཡལ་གའི་ཚིགས་དུག་ངར་པ་ལོ་མའི་དུག། མེ་ཏོག་གོས་དུག་རུས་པ་འབྲས་བུའི་དུག། ཞོ་རྐང་ཚི་བ་གསུམ་ལ་དུག་མེད་དེ།། དྲེག་པ་ལྤགས་དུག་ཤ་གདན་བར་ཤུན་དུག། དུག་ཕྲལ་སྨན་ནི་འཇམ་ཞིང་འཇུ་བ་སླ།། སྐམ་གསེད་གང་ཡང་བཏུ་དུས་རྨ་ཕབ་ལ།། བསིལ་སྨན་གྲིབ་ལྷགས་དྲོད་སྨན་མེ་ཉིས་སྐེམ།། བསེར་གྱིས་མ་ཞིག་མེ་ཉིས་མ་གདུངས་པ།། དུ་བ་མ་ཕོག་གཞན་གྱི་དྲི་མ་གོས།། རང་གི་ནུས་ལྡན་ཡོན་ཏན་དཔག་ཏུ་མེད།། སོ་མ་རྙིངས་པ་ལོ་དུས་མ་ལོན་པ།། དུས་འདས་ནུས་པ་འཆོར་ཕྱིར་ལོ་དུས་སྤོ།། འཇམ་བཙལ་གསུམ་སྟེ་སྦྱོར་བས་འཇམ་པ་དང་།། ཁ་འཛིན་འཇམ་དང་གཉེན་པོས་འཇམ་པའོ།། སྦྱོར་བས་འཇམ་པ་རིགས་མཐུན་མང་སྣ་སྤྲད།། ཁ་འཛིན་འཇམ་པ་ཕོ་བ་དོན་སྣོད་རྣམས།། གང་ལ་བབས་པའི་ཁ་འཛིན་བཅས་ཏེ་བསྟེན།། གཉེན་པོས་འཇམ་བཙལ་སྔོ་རྣམས་ཐམས་ཅད་ཀུན།། རླུང་འབུད་ཕོ་བའི་མེ་གསོད་ལུས་ཟུངས་སྐེམ།། དེ་ཕྱིར་རླུང་གནོན་ཤ་ཆེན་བུར་རྙིང་སྟེ།། ཕོ་བའི་མེ་གསོ་སེ་འབྲུ་པི་པི་ལིང་།། ལུས་ཟུངས་རྒྱས་པར་བྱེད་ལ་ཨ་རུ་ར།། དེ་རྣམས་མ་འཛོམ་ཁཎྡྲི་ཤིས་པ་ཡིས།། འཕྲོད་པར་སྦྱར་བ་གནད་གསུམ་ཤེས་པ་ཡིས།། བསིལ་དྲོད་མ་འདྲེས་མཐུན་བསྡེབས་སྦྱར་བྱས་ཏེ།། ཚ་སེལ་གྲང་སེལ་གཉིས་སུ་ཤེས་པར་བྱ།། ཚ་སེལ་ཐུན་མོང་བ་དང་ཁ་སྒྱུར་གཉིས།། ཐུན་མོང་སྔོ་སྦྱོར་རྒྱལ་པོ་བཙུན་མོ་སྲས།། བློན་འབངས་དམག་དཔོན་དམག་མི་ཆིབས་པར་བཅས།། རྒྱལ་པོ་ཟླ་བ་བསིལ་བའི་བདུད་རྩི་སྟེ།། བཙུན་མོ་རེ་སྐོན་སྲོ་ལོ་འཇིབ་རྩི་སྲས།། བློན་པོ་སྒོང་ཐོག་པ་དང་པར་པ་ཏ།། ཏིག་ཏ་སྤང་རྩི་ཧོང་ལེན་ཤ་ལང་འབངས།། བློན་འབངས་དྲུག་པོ་ནད་རིགས་ཁ་བསྒྱུར་ཏེ།། ཐུན་ལོག་སྦྱར་བ་ནད་འཇོམས་དམག་དཔོན་ཡིན།། དམག་མི་བསིལ་བའི་སྔོ་སྣ་གང་ཚོགས་སྦྱར།། འདི་རྣམས་ཆིབས་པ་གངས་ཀྱི་ཆུ་ལ་བསྐྱོན།། མ་སྨིན་གབ་ཚད་སུམ་གཉིས་བསྡུས་འཇམ་བཏང་།། ཚ་བ་རྒྱས་པའི་དུས་ན་ཆུ་བསིལ་ཤིས།། རྙིངས་ཚད་བསྡུས་གྲངས་སྟོངས་ཚད་ངད་ཡལ་བསྟེན།། ཁ་བསྒྱུར་སྔོ་སྦྱོར་བདུན་པ་སྦྱར་ཐབས་ནི།། ཧོང་ལེན་སྤང་རྩི་རེ་སྐོན་ཀྱི་ལྕེ་བཞི།། གཙོ་བོ་རྒྱལ་པོ་སྡེ་བཞིས་གཞི་བཟུང་ལ།། བློན་པོ་སྤུན་མང་ནད་སྟེང་ཁ་བསྒྱུར་བ།། དེ་བ་སྔོ་སྤྲིན་སྐྲ་བཟང་རིམས་ཚད་སེལ།། སྟབ་སེང་རྟ་ལྤགས་རི་ཚོས་འགྲམས་ཚད་སེལ།། སྲོ་ལོ་སྒོང་ཐོག་བོང་ངས་འཁྲུགས་ཚད་འཇོམས།། བོང་ང་ཧ་བོ་རེ་རལ་སྦྱར་དུག་འཇོམས།། འོམ་བུ་སྒོང་ཐོག་བྱེའུས་ཤ་དུག་འཇོམས།། གང་ག་ཆུང་བཙོད་བོང་ངས་ཚད་འཁྲུ་འཇོམས།། སྲན་མ་གཡེར་ཤིང་བཙོད་ཀྱིས་འབྲུམ་ནག་སེལ།། ཆིག་ཐུབ་སྟག་ཤ་མིང་ཅན་གག་ལྷོག་འཇོམས།། ཨ་བྱག་དུག་པུས་སྤྲུ་རྩས་གཉན་གཟེར་འཇོམས།། མ་ནུ་ལུག་ཆུང་ཁུར་རྩས་སྨུག་པོ་སེལ།། སྟབ་སེང་ཨ་བྱག་སྲོལ་གོང་མགོ་ཆག་གསོ།། རྣམ་པར་ཁྲག་རྐང་འབམ་པོས་ཡན་ལག་གི ཆུ་འཐུད་ཚད་པ་གཅོག་པར་བྱེད་པ་ཡིན།། རྒུ་དྲུས་སྤང་ཚན་སྦུ་རུ་དར་ཡ་ཀན།། བྱང་ཁོག་དོན་འབྱོར་ཁྲག་སྐེམ་རྩ་ཆད་འཐུད།། ཕུར་ཐལ་སྟག་ཤ་འགྲོན་བུའི་ཐལ་བ་ཡིས།། བྱང་ཁོག་རྣག་ཁྲག་ཆུ་སེར་སྐེམ་པར་བྱེད།། བཙོད་དང་འབྲི་མོག་ལུག་ཆུང་ཁྲག་ཚད་སེལ།། རྩ་མཁྲིས་བོང་ང་སྐྱེར་པས་མཁྲིས་ཚད་སེལ།། སེ་རྒོད་སྐྱེར་པ་སྤ་འབྲུམ་ཆུ་སེར་སེལ།། མཚན་དཀར་སྙི་བ་རྒོད་སྤོས་རྙིངས་ཚད་སེལ།། སྲོ་ལོ་སུག་འདྲ་སྤང་རྒྱན་གློ་ཚད་སེལ།། རྩིའུ་སུམ་ཅུ་ཏིག་མཚེ་མཆིན་ཚད་སེལ།། རྒོད་སྤོས་བྱི་ཚེར་ཁྲག་རྐང་མཆེར་ཚད་སེལ།། ཤུག་ཚེར་བྱི་ཚེར་ཉི་དགས་མཁལ་ཚད་སེལ།། ཁུར་རྩ་སྙ་ལོ་འཇིབ་རྩིས་ཕོ་ཚད་སེལ།། སྙ་ལོ་བོང་ང་བཙོད་ཀྱིས་རྒྱུ་ཚད་སེལ།། དེ་བ་ཡུང་བ་སྐྱེར་ཤུན་ཤ་ཚད་སེལ།། ལུག་རུ་བྲག་སྤོས་སྙི་བས་རྩ་ཚད་སེལ།། སྟབ་སེང་སེ་རྒོད་གང་ཆུང་རུས་ཚད་སེལ།། ཐང་ཕྱེ་ཕོ་བའི་མེ་དྲོད་ཚ་སྟོབས་སྦྱར།། ཕྱེ་མ་ཀ་རས་ཁ་བླང་གཅེས་པ་ཡིན།། གྲང་སེལ་དབྱི་མོང་ད་ལིས་སྟར་བུ་དང་།། ཅོང་ཞི་རྒོད་བཏུལ་བཞི་ཡིས་གཞི་བཟུང་ལ།། དེ་ལ་ལ་ཕུག་འཛིམ་དང་པི་པི་ལིང་།། ཁ་བསྒྱུར་ཕོ་བའི་མེ་དྲོད་སྐྱེད་པར་བྱེད།། སྲན་མ་ཕབས་དང་བུལ་ཏོག་རྩམ་པ་འཇུ།། ལྕེ་ཚ་ཟ་འབྲུ་འཛིམ་སྦྱར་སྔོ་ངད་འཇུ།། ཟེ་ཚ་བྱ་ཐལ་སྲུབ་ཀས་སྐྲན་འདྲིལ་བཤིག། བྱི་བཟུང་ཟེ་ཚ་བ་སྤྲུས་རྡོ་སྐྲན་བཤིག། མཛེ་ཚ་བ་སྤྲུ་པ་ཡག་མངལ་སྐྲན་བཤིག། ལྕེ་ཚ་སྲུབ་ཀ་འགྲོན་ཐལ་དམུ་རྫིངས་སྐེམ།། ལྕ་བ་བ་སྤྲུ་ར་མཉེས་སྐྱ་རྦབ་འཇོམས།། བྲེ་ག་རྒོད་ཀྲོང་རྩིའུས་གློ་ནད་སེལ།། སེ་རྒོད་འཇིབ་རྩི་དྲོད་སྨན་མཆིན་ནད་སེལ།། ལྕ་བ་བ་སྤྲུ་གཟེ་མས་མཁལ་ནད་སེལ།། བྲེ་ག་སྤ་འབྲུ་ར་མཉེས་ཆུ་སེར་སེལ།། ར་མཉེ་ཉེ་ཤིང་ཤ་རུས་གྲང་རྣག་གཅོད།། ཀུན་ལ་བུར་དཀར་རྟ་སྦྱར་ཆུ་སྐོལ་དབུལ།། གཞན་ཡང་རྩ་བ་དྲུག་དང་ལོ་མ་ལྔ།། མེ་ཏོག་གཅིག་དང་འབྲས་བུ་རྣམ་པ་བཞི།། ཚ་ཚྭགསུམ་ཐལ་བ་གཉིས་དང་བུ་རམ་སྦྱར།། ཆུ་ཚན་འཕུལ་བས་གྲང་ནད་མ་ལུས་སེལ།། མཐའ་འཁོབ་ཡུལ་གྱི་སྔོ་སྦྱོར་མན་ངག་འདི།། སེམས་ལ་ལོང་ལོངསལ་བྱམས་པས་འགྲོ་དོན་གྱིས།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་སྔོ་སྦྱོར་གྱི་སྡེ་ཚན་བསྟན་པའི་ལེའུ་སྟེ་བཅུ་གཉིས་པའོ།། །།

X