//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > ཕྱི་མ་རྒྱུད། > ནང་དོན།

ལེའུ་བཅུ་གསུམ་པ། ལས་ལྔའི་སྔོན་དུ་འགྲོ་བ་སྣུམ་འཆོས།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 16:07:37 ཀློག་གྲངས། 9 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག ལས་ལྔའི་སྔོན་འགྲོ་སྣུམ་འཆོས་རུང་མི་རུང་།། བསྟེན་ཐབས་ལེགས་ཉེས་དེ་ཡི་ལོག་གནོན་ནོ།། སྣུམ་རུང་རྒས་སྦེག་སྟོབས་ཆུང་སེམས་ལས་ཆེ།། ལྟོ་སྐྱ་ཁྲག་ཟགས་ཁོང་རྩུབ་ཁུ་བ་ཟད།། རླུང་ཆེ་མིག་འགྲིབས་སྦྱང་བ་དགོས་ལ་བཏང་།། མི་རུང་མེ་དྲོད་ཆུང་བ་མ་ཞུ་འཁྲུ།། དྲེག་གྲུམ་དབྱིག་དུག་ཡི་ག་འཆུས་པ་དང་།། བད་ཀན་སྐྱུག་ནད་སྐོམ་དད་ཆེ་ལ་སྤང་།། བསྟེན་ཐབས་སྤྱི་དང་བྱེ་བྲག་རྣམ་པ་གཉིས།། དང་པོ་འབྲུ་མར་ཞུན་མར་རྐང་མར་ཚིལ།། ལུས་དང་མགོ་བསྐུ་འཇམ་རྩི་ཁོང་དུ་བཏང་།། རྣ་བ་མིག་དང་མཁུར་བཀང་སྣ་ནས་དགང་།། ནད་དང་ཇི་ལྟར་འཚམ་པ་བཞིན་དུ་སྦྱར།། བཟའ་བའི་ཐུན་ཚད་མེ་དྲོད་འཇུ་སྟོབས་དཔག། ཆུང་འབྲིང་ཆེན་པོ་རིམ་པས་བསྐྱེད་ལ་བཏང་།། རྟག་ཏུ་ལྟོ་སྐྱིད་སྣུམ་ལ་གོམས་པ་ལ།། སྔོན་ལ་རྩུབ་འཆོས་བྱས་ལ་དེ་རྗེས་བསྟེན།། ལྟོ་སྐྱ་ཁོང་རྩུབ་སྣུམ་གཏོང་ལན་ཚྭར་སྡེབ།། སྣུམ་འཆོས་ཀུན་ལ་ཆུ་ཚན་འཇུ་རྩི་ཡིན།། སྔོ་ངད་རུལ་སྐྱུར་རྗེན་ཟས་སྤང་བྱས་ལ།། ཡང་ཞིང་དྲོ་ལ་འཇུ་སླ་ཅུང་ཟད་བསྟེན།། བུད་མེད་དྲག་ཤུལ་མྱ་ངན་མང་དུ་སྨྲ།། རྟ་ཞོན་ཉིན་གཉིད་ཆུ་རླུང་དུད་པ་སྤང་།། ཁྱད་པར་སྨན་མར་ལ་སོགས་ཞི་བྱེད་སྣུམ།། ལྟོ་སྟོང་ཟས་དང་མ་སྦྲགས་རྐྱང་པར་བཏང་།། ཚེ་རིང་མེ་དྲོད་སྐྱེད་ཅིང་དྲན་པ་གསལ།། བློ་འཕེལ་འདོད་ལ་ཞུན་མར་བསྟེན་པར་བྱ།། རླུང་འཕེལ་ལྟོ་སྲ་མཁྲང་འདོད་འབྲུ་མར་ཕན།། དྲོད་ཆེ་བུ་བཙས་རྗེས་དང་རྩོལ་བས་དུབ།། ཟུངས་ཟད་རྩ་སྦུབས་འགགས་ལ་རྐང་ཚིལ་ཕན།། རྨ་དང་མེས་ཚིག་རུས་ཚིགས་ན་བ་དང་།། ལྟོ་མངལ་རྣ་ཀླད་ན་ལ་ཚིལ་མཆོག་ཕན།། ཞུན་མར་དགུན་དུས་འབྲུ་མར་དབྱར་བཏང་བསྔགས།། རྐང་ཚིལ་དཔྱིད་དུས་ཉིན་མོར་བསྔགས་པ་ཡིན།། སྦྱོང་བྱེད་སྣུམ་འཆོས་ཐོ་རངས་ཞུན་མར་བཏང་།། ཁོང་སྣུམ་བར་བསྟེན་དེ་ནས་མི་ཕན་འདྲེད།། བརྟ་བྱ་བྱིས་པ་རྒས་དང་སྐྱིད་པར་འདུག། སྣུམ་འདྲིས་མེ་དྲོད་ཆུང་དང་སྐོམ་དད་ཆེ།། སྟོབས་ཆུང་སོས་དུས་ཤ་ཁུ་ཡོས་ཐུག་འབྲས།། སྦྲང་དང་བུ་རམ་ཞུན་མར་སྦྱར་ཏེ་བཏང་།། འཇུ་སླ་དང་ག་མི་འགག་སྟོབས་སྐྱེད་མཆོག། དེ་དག་ཟོས་རྗེས་ཟས་གོང་ཟས་བར་དུ།། སྣུམ་བསྟེན་ལུས་ཀྱི་སྟོད་སྨད་བར་ལ་ཤིས།། སྣུམ་ལེགས་ཁོང་སྣུམ་གྱུར་ཚད་རླུང་བདེར་རྒྱུ།། བཤང་བ་མི་སྲི་དྲོད་ཆེ་སྣུམ་མི་འདོད།། ཕན་ཡོན་མདོག་སྟོབས་དབང་གསལ་རྒས་ཀ་སྲ།། སྣུམ་དྲགས་གྱེན་ཐུར་སྣུམ་འབྱུང་དང་ག་འགག། དཔྱིད་སོས་འབྲུ་མར་བསྟེན་ན་བད་མཁྲིས་སློང་།། དགུན་དུས་ཚིལ་བསྟེན་ལུས་འཁྱགས་མ་ཞུ་སྐྱེད།། ལོག་གནོན་བཀྲེས་སྐོམ་དུགས་བྱ་སྐྱུག་ཏུ་གཞུག། སྲན་མ་སོ་བ་དར་རྙིང་དངས་ཆང་བསྟེན།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལས་ལྔའི་སྔོན་དུ་འགྲོ་བ་སྣུམ་འཆོས་ཀྱི་ལེའུ་སྟེ་བཅུ་གསུམ་པའོ།། །།

X