//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > ཕྱི་མ་རྒྱུད། > ནང་དོན།

ལེའུ་བཅོ་ལྔ་པ། ལས་ལྔ་སྐྱུགས་ཀྱི་སྐོར།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 16:09:21 ཀློག་གྲངས། 11 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགལས་ལྔ་སྐྱུགས་ལ་སྔོན་འགྲོ་དངོས་གཞི་དང་།། ཕྱི་རྗེས་བཅད་དང་ཕན་ཡོན་བསྟན་པའོ།། སྔོན་འགྲོ་ནད་གཞི་རུང་དང་མི་རུང་བརྟག། སྦྱོར་བའི་སྔོན་འགྲོ་ཉེ་རིང་རྣམ་གཉིས་བྱ།། མི་རུང་ཟུངས་ཟད་རླུང་ཆེ་ཆུ་རྒྱུ་འགགས།། མིག་འགྲིབ་སྲིན་ནད་གཞང་འབྲུམ་ཤ་དུག་རྒྱས།། རྒས་ཆེས་གཞོན་ཆེས་གདོན་ཅན་རྣམས་ལ་སྤང་།། རུང་བ་མ་ཞུ་ལྷེན་སྐྲན་ལྕགས་དྲེག་ཆགས།། དུག་དང་གླང་ཐབས་ཁྲག་མཁྲིས་ཕོ་བར་ལྷུང་།། མགོ་ནད་དང་ག་འགགས་དང་སྲིན་བུ་ལྡོག། ཁྱད་པར་བད་ཀན་ནད་ཀུན་སྐྱུགས་ཀྱིས་སྦྱང་།། སྦྱོར་བའི་སྔོན་འགྲོ་ཉེ་རིང་བཤལ་དང་མཐུན།། འཕྲལ་དུ་མ་ཞུ་མི་འཕྲོད་ཟོས་པ་དང་།། བད་མཁྲིས་རྒྱས་དང་མ་ཞུའི་གནས་སུ་འདུས།། རྒྱུན་དུ་ལྟོ་སྣུམ་སྔོན་འགྲོ་བྱ་མི་དགོས།། དངོས་གཞི་སྨན་སྦྱོར་བཏང་ཐབས་ལྕག་དང་ཚད།། ལོག་པ་མནན་དང་རྣམ་པ་ལྔ་རུ་བཤད།། དང་པོ་སྨན་སྦྱོར་གཙོ་བོ་ཁ་འཛིན་གཉིས།། གཙོ་བོ་རི་ཤོ་སྤྱང་ཚེར་དུར་བྱིད་གསུམ།། བྱེ་མ་ལ་སྐྱེས་ཁ་འབུས་སོས་དུས་བརྐོས།། ཤུ་དག་རྒྱམ་ཚ་པི་པི་ལིང་དང་སྦྱར།། འཇམ་པོ་ཁུ་བ་དྲག་པོ་རིལ་བུ་དྲིལ།། ཁ་འཛིན་མ་ཞུ་བ་ལ་བཅའ་སྒ་སྡེབ།། རླུང་ལྡན་སོ་ཆ་མཁྲིས་ལྡན་གསེར་ཕུད་བུ།། སྐྲན་ལ་དབྱི་མོང་དུག་ལ་བོང་ང་དཀར།། འབྲི་ཏ་ས་འཛིན་བྱང་ཁོག་རྣག་ཁྲག་འདྲེན།། གློ་ཡི་ནད་ལ་ཤིང་མངར་སྡེབ་པར་བྱ།། བཏང་ཚུལ་ནམ་ལངས་དུས་བཏང་ཁ་བཤལ་ལ།། མི་སྨྲ་མི་གྲངས་ཙོག་པུར་འདུག་པར་བྱ།། སྐྱུག་ན་ལན་འགའ་ཟློག་པས་ནད་ལ་བརྐོ།། བརྐོས་དྲགས་ཐུར་དུ་འཕྱུག་པས་སློང་དུས་སྐྱུག། དེ་ནས་མགོ་དཔྱངས་པུས་མོ་ཕོ་གསང་ལྟེམ།། སླ་ངར་བཟེད་ལ་ནད་ཀྱི་ཁ་དོག་བལྟ།། ལྕག་ཏུ་སྤྱང་ཚེར་རི་ཤོ་དུར་བྱིད་བསྡུས།། རྒྱམ་ཚ་ཤུ་དག་པི་པི་ལིང་དང་སྦྱར།། ཆུ་སྐོལ་ངད་ཡལ་ཙམ་དང་སྤེལ་གྱིན་བཏང་།། སྒྲོའམ་སོར་མོས་གྲེ་བ་མ་སྣད་དྲངས།། སྐྱུག་པ་དྲག་ཞན་ལྕག་ལ་རག་ལུས་པས།། ལུས་ཟུངས་ནད་སྟོབས་སྦྱར་ལ་ཐོན་ཚད་གདོན།། གདོན་ཚད་སྐྱུག་པའི་ནད་ལ་བཞི་དྲུག་བརྒྱད།། བུངས་ཚད་བྲེ་ཕྱེད་གང་དང་དོ་ཡིན་ཏེ།། ཁ་དོག་བད་ཀན་མཁྲིས་པ་ཆུ་དང་གསུམ།། རིམ་པས་ཐ་མ་འབྲིང་རབ་ཚད་དུ་བཤད།། ལོག་གནོན་ཐོར་བུའི་རླུང་དང་མཁྲིས་ཁ་ཤོར།། སྨུག་པོའི་མཚོ་དང་གློ་ཡི་རྩ་ཁ་རྡོལ།། སྨན་གྱི་དངས་མ་མིག་ལ་བྲོས་པའོ།། མགོ་ན་སྟོང་སྐྱུགས་བྱེད་ཅིང་ཤེས་པ་ཉོག། བསྐུ་མཉེ་གསུར་དུད་སྲེ་ལོང་ཐང་གིས་བཟློག། མཁྲིས་པ་ཁ་ཤོར་ཐང་བཏང་གཤའ་རིངས་གཏར།། མཚོ་བརྡོལ་བ་ལ་དུགས་དང་ཕྱེ་མས་བཅད།། གློ་རྩ་འགྲམས་ན་སྨན་གྱིས་རྩ་ཁ་བསྡམ།། མགོ་ན་མིག་དམར་གཏར་དང་ཆུ་ལྕག་བྱ།། བཅད་རན་རྗེས་ཀྱི་ཆོ་ག་བཤལ་དང་མཐུན།། ཟས་དང་སྤྱོད་ལམ་དེ་བས་ལྷོད་པས་ཆོག། གུ་གུལ་གླ་སྒང་མར་གསར་དུ་བས་བདུག། སྨན་རོ་སྦྱོང་ཕྱིར་རྒྱམ་ཚའི་ཆུ་སྐོལ་བཏུང་།།སྐྱུགས་ལེགས་དབང་གསལ་ལུས་ཡང་དང་ག་བདེ།། ཁ་དྲི་ཞིམ་ཞིང་མཆིལ་སྣབས་ལུད་པ་དག། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལས་ལྔ་སྐྱུགས་ཀྱི་ལེའུ་སྟེ་བཅོ་ལྔ་པའོ།། །།

X