//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > ཕྱི་མ་རྒྱུད། > ནང་དོན།

ལེའུ་བཅུ་དྲུག་པ། ལས་ལྔ་སྣ་སྨན་གྱི་སྐོར།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 16:10:27 ཀློག་གྲངས། 11 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག ལས་ལྔའི་སྣ་སྨན་ཞི་དང་སྦྱང་བ་གཉིས།། ཞི་བྱེད་མི་རུང་ཕན་ཡོན་བཏང་ཐབས་གསུམ།། སྣ་སྨན་མི་རུང་རིམས་གསར་འཕྲལ་དུ་རྨས།། ར་རོ་སྣུམ་འཐུངས་རྣམས་ལ་སྤང་བར་བྱ།། ཕན་ཡོན་སྣ་ཉིད་ཀླད་པའི་སྒོ་ཡིན་ཕྱིར།། མགོ་དང་ནམ་ཚོང་ཡན་ཆད་ནད་ལ་མཆོག། ཁྱད་པར་གུར་གུམ་ཞུན་མར་ཀ་ར་སྦྱར།། མགོ་རླུང་ཁྲག་འཐབ་གཟེར་ནད་འཁྱུག་པ་འཇོམས།། ཤིང་མངར་སྐྱུ་རུ་ཀ་ར་ཞུན་མར་སྦྱར།། རྣ་བ་མིག་དང་ཟ་འགྲམ་ཀླད་ནད་སེལ།། ལ་ཕུག་ཁུ་བས་རྣ་བ་མགོ་ནད་སེལ།། རྟ་སྦངས་སྣ་ཁྲག་ཀླད་ཁྲག་སོ་སྲིན་སེལ།། ཞུན་མར་ནམ་ཚོང་ཡན་ཆད་རླུང་ནད་འཇོམས།། བཏང་ཐབས་སྔ་དྲོ་དགོངས་དུས་གན་རྐྱལ་ཉལ།། སྔས་སྨད་མགོ་དཔྱངས་ཐིགས་པ་ལྔ་བདུན་བླུག། དར་ཅིག་ཉལ་རྗེས་དུད་པ་བསེར་བུ་སྤང་།། སྣ་སྦྱོངས་སྤང་དང་ཕན་ཡོན་སྦྱོར་བ་དང་།། བཏང་བའི་ཚུལ་དང་ལོག་གནོན་ལྔ་ཡིས་བསྟན།། མི་རུང་རླུང་གིས་མགོ་འཁོར་རབ་རིབ་དང་།། རྫི་འཁོར་སོ་ནད་རྣག་ཁྲག་འཛག་ལ་སྤང་།། ཕན་ཡོན་ཆམ་རྒན་མཚུལ་པར་ཞེན་པ་དང་།། ཚད་པ་གག་ལྷོག་རྫོང་ལ་བྲོས་པ་དང་།། མིག་དམར་མཛེ་ནད་ཆུ་སེར་གདོང་ལ་ལུད།། མགོ་ཆག་རྩ་བྱེར་ཆུ་སེར་ལྷུང་བ་སེལ།། སྦྱོར་བ་འགྲོན་བུ་བོང་ང་དཀར་པོ་དང་།། སུག་པ་སྒ་སྐྱ་བཞི་པོ་བསྲེགས་ཐལ་དང་།། བྱང་པ་རྒྱ་ཚ་དྲི་ཆུར་སྦྱར་བར་བྱ།། ཡང་ན་འབྲི་ཏ་ས་འཛིན་རྒྱ་ཚ་དང་།། ཤུ་དག་རུ་རྟ་ཤིང་མངར་བ་ཆུ་སྦྱར།། བཏང་ཐབས་སྔ་དྲོ་སྣབས་སྦྱངས་གན་རྐྱལ་ཉལ།། འཕུལ་བྱེད་སྔས་ལ་མགོ་དཔྱངས་ཐིགས་དགུ་བླུག། རྐན་ནས་བྱུང་ན་འགག་ཅེས་བྱས་ལ་བཟློག། བྱ་རྫོགས་སྐད་ཅིག་གྲངས་བརྒྱའི་བར་དུ་ཉལ།། ཐེབས་དཀའ་དུ་བ་སུག་ཕྱེ་སྣ་ནང་བུད།། ཚ་གཡའ་སྣབས་མང་བྱུང་ན་ལངས་ལ་ཕྱི།། དེ་རྗེས་ཆུ་སེར་རྣག་སོགས་གང་ཡོད་དབྱུང་།། གྲེ་བ་མཚུལ་པ་དག་ཕྱིར་ཆུ་སྐོལ་བཏུང་།། སྤོས་དཀར་མར་གསར་བསྲེགས་པའི་དུ་བས་བདུག། ལོག་གནོན་ཁྲག་ཤོར་མགོ་སྟོད་ཆུ་ཡིས་བྲན།། སྨན་དང་མེ་བཙའ་གཏར་སོགས་རིགས་པས་དཔྱད།། མ་ཐེབས་མིག་དམར་མགོ་དང་དཔྲལ་བ་གཟེར།། སྣ་རྩ་དཔྲལ་རྩ་གཏར་རྗེས་ཆུ་ལྕག་བྱ།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལས་ལྔ་སྣ་སྨན་གྱི་ལེའུ་སྟེ་བཅུ་དྲུག་པའོ།། །།

X