//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > ཕྱི་མ་རྒྱུད། > ནང་དོན།

ལེའུ་བཅོ་བརྒྱད་པ། ལས་ལྔ་ནི་རུ་ཧའི་སྐོར།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 16:12:05 ཀློག་གྲངས། 6 

དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགལས་ལྔ་ནི་རུ་ཧ་ལ་སྤང་ཡུལ་དང་།། ཕན་ཡོན་སྦྱོར་བ་ཇི་ལྟར་བཏང་ཚུལ་ལོ།། སྤང་ཡུལ་གཞང་ལུག་འཁྲུ་བ་འབྱམས་པ་དང་།། ཚད་གསར་མེ་ཉམས་ས་བོན་འཛག་ལ་སྤང་།། ཕན་ཡོན་སྤྱི་དང་བྱེ་བྲག་རྣམ་པ་གཉིས།། དང་པོ་སྨད་དུ་མཚོན་ཕོག་རྟུག་སྐམས་དང་།། གླང་ཐབས་སྨད་ཚད་དྲི་ཆུ་བསྡམ་པ་དང་།། ལྟོ་སྦོས་སྲིན་ནད་སྐྲན་གསར་རིམས་རྙིང་དང་།། ཁྱད་པར་ནད་སྟོབས་ཆེ་ལ་རྣོན་པོ་བསྔགས།། གཅིན་སྙི་ཚད་པས་འཁྲུ་དང་གསོ་དཀའི་རིམས།། དྲེག་འོར་ཁུ་བ་ཟད་པ་འཇམ་པོས་སེལ།། སྦྱོར་བ་བར་མ་རྣོ་འཇམ་རྣམ་པ་གསུམ།། བར་མ་དུར་བྱིད་སུག་པ་བུལ་ཏོག་ཕབས།། བྱང་པ་དུད་པ་བ་ཆུ་བསིངས་སྙིགས་སྦྱར།། མཚོན་ཕོག་མཁྲིས་པ་གླང་ཐབས་དབྱི་མོང་དཀར།། སྨད་ཚད་ལྕུམ་རྩ་ལྟོ་སྦོས་ཨུག་ཆོས་སྡེབ།། སྲིན་ལ་སྒོག་སྐྱ་གྲང་ལ་པི་པི་ལིང་།། ནད་སྟེང་ཁ་བསྒྱུར་རྣོན་པོ་རེ་ལྕག་བསྣན།། འཇམ་པོ་ཨ་རུ་ར་དང་སེང་ཕྲོམ་བཙོད།། ཀྱི་ལྕེ་དུར་བྱིད་ལྕུམ་རྩ་བ་འོ་ཆུ།། བཏང་ཐབས་བྲེ་ཕྱེད་ཕུལ་བཞི་ཕུལ་ལུ་དོ།། འོ་དྲོད་ཙམ་བསྲོས་འབྲུ་མར་ཅོར་ཅིག་བླུག། གྲོད་པ་བཀང་ལ་གཅེའུ་ཚད་ལྡན་གཞུག། སྔས་སྨད་སྒུར་ལ་གསང་བུག་སྣུམ་བྱུགས་ཏེ།། དབུགས་བཏོན་མ་སྣད་དལ་བུས་སོར་བཞི་གཞུག། ཅུང་ཟད་ཕྱིར་བསྣུར་གྲོད་པ་བཙིར་ལ་བཏང་།། འགྲོར་མ་འདོད་ན་གཡས་གཡོན་སྟེང་འོག་གཅུ།། ལྷག་མ་ཅུང་ཟད་རླུང་ཡོད་མི་བཏང་བཞག། གཅེའུ་བཏོན་ལ་ཕོངས་སུ་རས་ལྟོ་བརྡིག། གཞོགས་གཡོན་འོག་བཅུག་ལན་གཉིས་ལན་གསུམ་བཟློག། མ་བཟློགས་མི་ཐེབས་དྲགས་ན་ལ་རྒལ་འགྱུར།། མི་ཐུབ་ཙོག་པུར་འདུག་ལ་སྣོད་དུ་བཏང་།། སྐྱོ་འདུར་གོང་བུ་ཅོལ་ལེ་བྱུང་ན་ཐེབས།། མ་ཐེབས་ཆུ་རུ་ལོག་ན་བསྐྱར་ལ་བཏང་།། སྨན་རོ་བདའ་ཕྱིར་རྒྱམ་ཚའི་ཆུ་སྐོལ་བཏུང་།། ཞག་གཅིག་ལྟོ་སྐྱུང་སྨད་ནད་ཀུན་འདྲེན་མཆོག། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ལས་ལྔ་ནི་རུ་ཧའི་ལེའུ་སྟེ་བཅོ་བརྒྱད་པའོ།། །།

X