//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > ཕྱི་མ་རྒྱུད། > ནང་དོན།

ལེའུ་ཉི་ཤུ་པ། དཔྱད་ལྔ་གཏར་ག

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 16:25:13 ཀློག་གྲངས། 29 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགདཔྱད་ལྔའི་མཆོག་གྱུར་གཏར་གའི་བརྡེག་ཐབས་ལ།། ཆ་བྱད་བརྟག་པ་ཐབས་དང་སྐྱོན་ཡོན་ལྔ།། དང་པོ་ཆ་བྱད་རྣོ་མཉེན་ལྡན་པའི་ལྕགས།། མགར་བ་མཁས་པས་སྦུ་གུའི་སྒྲོ་འདྲའི་དབྱིབས།། རྩེ་སྒུར་ཚེས་གཉིས་ཟླ་བ་ལྟ་བུའམ།། ལྟག་ཉལ་སོ་དྲང་བྲང་བ་ཅན་དང་ནི།། སྟ་རེའི་ཁ་འདྲ་ཀུན་ཀྱང་སྲིད་སོར་དྲུག། ཐར་འབྱོངས་ངར་ལྡན་བརྡུངས་འཐེམས་བརྡར་ལེགས་པ།། རྣོ་ཚད་གྱེན་དུ་སྤུ་གཤོག་ནུས་པ་སྟེ།། གཟེ་དང་མི་གཟེ་དེ་ལ་རག་ལས་པས།། གཙགས་ལེགས་རྟག་ཏུ་ལུས་ལ་བཅང་བར་བྱ།། བརྟག་པ་རུང་དང་མི་རུང་ནད་གཞི་བརྟག། རན་དང་མི་རན་དུས་ཚོད་བརྟག་པའོ།། གཏར་དུ་རུང་བའི་ནད་གཞི་འགྲམས་འཁྲུགས་རིམས།། སྐྲངས་པ་རྨ་དང་དྲེག་ནད་སུར་ཡ་དང་།། མེ་དབལ་ཆུ་སེར་མཛེ་ནད་ལ་སོགས་པའི།། ཚ་བ་ཁྲག་མཁྲིས་ལས་གྱུར་གཏར་བའི་ནད།། མི་རུང་གདོན་ཅན་ཟུངས་ཟད་སྦྲུམ་མ་དང་།། བཙས་རྗེས་སྐྱ་རྦབ་གཅོང་ཆེན་མེ་དྲོད་ཉམས།། མདོར་ན་བད་རླུང་ལས་གྱུར་ནད་ལ་སྤང་།། འོན་ཀྱང་ཁྲག་མ་ཕྱེད་དང་རིམས་མ་སྨིན།། སྟོངས་ཚད་དུག་མ་གསོད་དང་གཉེན་གཉནཚད་དང་།། ཟུངས་ཟད་ཚ་བ་ཡིན་ཡང་གཏར་མི་རུང་།། བད་རླུང་ནད་ཀྱང་ཁྲག་མཁྲིས་བསྡོངས་ན་གཏར།། དོག་དང་རྩ་མདུད་བླ་གནས་སར་མི་གཏར།། དུས་ཚོད་ཐོག་མ་བར་དང་ཐ་མ་གསུམ།། བྱང་ཁོག་ཁྲག་བབས་དོན་ལ་ཟིན་པ་དང་།། ཁྲག་མ་ཆོད་དང་རྒྱས་འཁྲུགས་སྨིན་ལོང་མེད།། དུས་ལ་མི་བསྡད་བརྩོན་པས་ཐོག་མར་གཏར།། བར་དུ་གཏར་དུས་གཟེར་དུས་གྲང་ཤུམ་ཆད།། རྩ་རྒྱུད་ལྕི་སྦྲིད་རྒྱས་པའི་དུས་ན་གཏར།། ཁྲག་ཕྱེད་རི་མོ་མེད་ན་དུས་ལ་ཕེབས།། དེ་ལྟར་མིན་ན་ཐང་གིས་ཕྱེ་ལ་གཏར།། ཁྲག་མཁྲིས་ངན་ཁྲག་རྩ་མིག་བྱེར་བ་དང་།། ཟས་ཀྱིས་ཚ་རོ་བསྐྱེད་ལ་ཐ་མར་གཏར།། གཏར་བ་སྔས་ན་རླུང་སྐྱེ་ཚ་བ་འབྱེར།། ཕྱིས་ན་ངན་ཁྲག་རྩར་འགྲམས་རོ་མི་ཐོན།། ཚ་སྟོབས་ཆེ་ན་རྩ་དོན་རྣག་ཏུ་འདྲུལ།། གཏར་ཐབས་སྔོན་འགྲོ་དངོས་གཞི་ཕྱི་རྗེས་གསུམ།། གཏར་བའི་སྔོན་འགྲོ་རིང་དང་ཉེ་བ་གཉིས།། རིང་བ་མ་སྨིན་སྨིན་པར་བྱ་བ་དང་།། ནད་ཁྲག་ཟུངས་ཁྲག་ཐང་གིས་དབྱེ་བར་བྱ།། ཐང་མ་བཏང་བར་གཏར་ན་ཟུངས་ཁྲག་འཆོར།། ནད་ཁྲག་མི་ཐོན་རླུང་སྐྱེ་ཚད་རོ་ལྡས།། ཉེ་བའི་སྔོན་འགྲོ་མེ་ཉིས་དྲོས་པར་བསྲོ།། འགྲུལ་བསྲུང་བསྙལ་སོགས་ཡབ་ཆ་སྟ་གོན་བྱ།། དངོས་གཞི་བསྙལ་ཐབས་གདབ་ཐབས་གདབ་དམིགས་དང་།། ཁྲག་སྤྲ་དབྱུང་ཚད་ལོག་གནོན་བསྟན་པའོ།། བསྙལ་ཐབས་དཔྲལ་རྩ་ལྟག་རྩ་མཚོགས་གསང་རྣམས།། སྨིན་སྟེང་ཐི་གུས་བསྐོར་ལ་ཤིང་བུས་གཅུ།། རྩེ་ཆུང་གཉིས་ལ་མཆན་ཁུང་ག་ཤར་བསྡམས།། ཐོང་རྩ་ཐི་གུས་སྐེ་བསྐོར་རྒྱབ་ནས་འཐེན།། ལྕེ་རྩ་སྨྱུག་སྐམ་དར་དྲིལ་བར་དུ་ལྟེམ།། དཔུང་རྩ་ལུག་གཞུག་འོག་ཏུ་ཐི་གུས་བསྡམ།། ཨ་སོ་དྲུག་འགོ་སྒང་རྩ་རུ་ཐུང་དང་།། གཤའ་རིངས་ལ་སོགས་གྲེ་ཁུང་སོར་གསུམ་གོང་།། སྐྱོར་གོང་ཕྲན་བུ་རྒྱབ་རྩ་དྲུག་འདུས་སོགས།། པྲན་རྩའི་བར་རྩ་མཁྲིག་མའི་གོང་དུ་བསྡམ།། རྩ་བོ་ཆེ་ལ་པུས་ནང་མཛུབ་གང་སར།། སྒབ་རྩ་རྟ་མཐུར་བྱིན་གཞུག་ལྷམ་སྒྲོག་སྟེང་།། ལོང་རྩ་གདོང་རྩ་ཡོབ་གོང་བྱིན་ཀྱོག་དང་།། རྒྱུ་རྩ་ལ་སོགས་ལོང་བུའི་སྟེང་དུ་བསྡམ།། སྦུབས་ཀྱི་རྩ་རྣམས་རྩ་རྒྱུད་ཤིང་བུས་གཅུ།། གང་ཡང་བསྙལ་སྟན་སྟེང་དུ་བསྙལ་ཐག་གིས།། པགས་པ་མ་འཆུས་རྩལ་མཉམ་འཐེན་ལ་བསྡམ།། སྦྲིད་ཆིལ་རྩ་རྒྱུད་ལྟང་གིས་བྱུང་ན་སྡོམས།། མ་སྡོམས་མི་ཐེབས་འཆུས་ན་ཁྲག་མི་ཐོན།། བསྙལ་རྗེས་རྩ་རྣམས་ལག་པས་མཉེ་ཞིང་བསྲུབ།། ཤ་སྦྲིད་རྩ་རྣམས་རྒྱས་པས་ཐེབས་པ་སླ།། བསྙལ་མ་ཐོག་ཏུ་མི་གཏར་ཐེབས་པ་དཀའ།། གདབ་ཐབས་རྩ་མ་འཆུས་པར་མཐེ་བོས་མནན།། ཅུང་ཟད་ཐུར་དུ་འཐེན་པས་རྩ་མི་འགྱུར།། ཕལ་ཆེར་བསྙལ་འོག་སོར་གསུམ་འོག་ཏུ་གཏར།། གློ་ཕུག་སྒང་གཤགས་དོལ་ཆོད་ཉིས་ལེན་དང་།། སྨྱུག་ཁ་ལ་སོགས་གང་བདེ་གང་གོམས་གདབ།། དེ་ཡང་རྩ་ཆེན་རྣམས་ལ་སྒང་གཤགས་བྱ།། རྩ་ཕྲན་སྨྱུག་ཁ་ཤིན་ཏུ་ཕྲ་བ་བཅད།། གནད་སྟེང་རྩ་ལ་ཉིས་ལེན་བསྔགས་པ་ཡིན།། ཁྲག་པས་རླངས་ཕན་རྨ་ཁ་ཆེ་བར་བྱ།། རྨ་ཆུངས་སྐྲངས་དང་ཁྲག་གི་རླངས་མི་ཐོན།། རྩ་ཁ་ལྤགས་ཁ་མཉམ་ན་ལེགས་པ་ཡིན།། རུས་སྟེང་རྩ་ལ་སྟ་རེ་སོ་ཡིས་གཏར།། རྩ་སྟེང་མི་འགྱུར་འཕྲེད་བཙུགས་བེམ་ཏོལ་བརྡེག། ལྟག་རྩ་སྡུད་སྒོའི་གཡས་གཡོན་གྱེན་སོར་གསུམ།། རྩ་སྟེང་ཐིག་གདབ་གཏར་རྗེས་མེ་ཡིས་བསྲུང་།། མཚོགས་གསང་སྐྲ་མཚམས་སོར་བཞི་གྱེན་དུ་གཤག། མུར་གོང་འཕར་རྩ་སྐྲ་ཡི་གསེབ་ཏུ་གཏར།། རྩེ་ཆུང་མས་ཀྱི་སོར་བཞི་བཅལ་བར་གཏར།། རུ་ཐུང་གཞུ་མཆོག་སྣ་ནས་སོར་བཞིར་གཏར།། བྱིན་གཞུག་རྟིང་པའི་གྱེན་མཛུབ་གང་དུ་གཏར།། གཏར་མ་ཐོག་ཏུ་མི་གློད་ཁྲག་མི་ཐོན།། མགོ་སྐེ་ལོང་རྩ་གསུམ་ལ་གློད་མི་བྱ།། གཞན་དག་ཁྲག་ཆད་དུས་ན་ཆ་ཡིས་གློད།། གདབ་དམིགས་གཉའ་རེངས་འགྱུར་དཀའ་ལྟག་རྩ་གཏར།། བད་མཁྲིས་མགོ་ནད་ཆང་འཐུང་དྲོས་ཚེ་ན།། དཔྲལ་གཟེར་མཚོགས་ཁ་ལྕི་ཞིང་མིག་མི་ཐེག། མཚོགས་གསང་དབྱེ་ཞིང་གསེར་མདུང་དངུལ་མདུང་གཏར།། མིག་དམར་ལིང་ཐོག་མོད་ན་མིག་རྩ་གཏར།། སྣ་ནད་སྣ་རྩེ་རྣ་བ་རྣ་རྩ་གཏར།། སྙིང་ཚད་སྐོམ་དད་སྨྲ་དཀའ་ལྕེ་རྩ་གཏར།། སོ་མིག་སྣ་འགྲམས་ནད་ལ་ལྟག་རལ་གཏར།། སོ་ནད་སོ་རྩ་རྩེ་ཆུང་དཔུང་རྩ་གཏར།། གློ་ལུ་སྙིང་ཚད་མྱོས་ཤིང་དབུགས་མི་བདེ།། སྐད་འགགས་ཨོལ་གོང་བར་གྱི་ཐོང་རྩ་གཏར།། ཀླད་སྲིན་བྱང་ཁོག་ཁྲག་བབས་དོན་ལ་ཟིན།། རྒྱས་འཁྲུགས་གློ་འགྲམས་སོ་ལ་ཁྲག་ཚད་རྒྱས།། སྐྲངས་ལོང་འབྲས་ནད་ཀུན་ལ་རྩེ་ཆུང་གཏར།། སྟོད་གཟེར་གློ་ཚད་མགོ་ན་དཔུང་རྩ་གཏར།། གློ་ཚད་སྟོད་ལྕི་དབུགས་ཐུང་གཟེར་ཆེ་ལ།། དྲུག་འགོ་སྒང་རྩ་གཉིས་ལ་གཏར་བར་བྱ།། གློ་སྙིང་མཆིན་དྲི་བྲང་རྒྱབ་སྦྲགས་ཤིང་ན།། དོན་སྣོད་ཐུན་མོང་ནད་ལ་སྣོད་ཀ་གཏར།། གློ་སྙིང་ཁྲག་རྒྱས་གློ་སྙིང་འདོམ་རྩ་གཏར།། མིག་སེར་ལུས་ལྕི་དང་ག་འགགས་པ་ལ།། མཁྲིས་རྩ་གཤའ་རིངས་ཕྲན་བུ་གཉིས་ལ་གཏར།། མཆིན་མཆེར་མཆིན་དྲི་འགྲམས་འཁྲུགས་གཟེར་བ་དང་།། སྨུག་པོ་ཚ་བའི་སྐྲན་ལ་རུ་ཐུང་གཏར།། སྐད་འགགས་གཅོང་ཐབས་ལུ་ལ་སྒང་རྩ་གཏར།། རོ་སྟོད་ཕོ་མཆིན་མཆིན་དྲི་འཁོར་ཞིང་ན།། མཆན་འོག་གཟེར་ལ་གློ་མཆིན་འདོམ་རྩ་གཏར།། ཁྲག་མཁྲིས་ནད་ལ་མཆིན་མཁྲིས་འདོམ་རྩ་གཏར།། ཕོ་མཆིན་ཁྲག་ནད་རྒྱབ་རྩ་དྲུག་འདུས་གཏར།། རྒྱུ་ལོང་མཚོན་ཕོག་འགྲམས་དང་རླིག་པ་སྐྲངས།། སྨད་ལྕི་གཞང་འབྲུམ་མངལ་ནད་རྩ་ཆེན་གཏར།། གཞུང་རེངས་ལྟག་དགྱེ་དཔྱི་རྐེད་འཁོར་བ་དང་།། མངལ་ཁྲག་འཛག་ལ་སྒྱིད་ཁུང་སྒབ་རྩ་གཏར།། མཆེར་པ་སྣད་འགྲམས་ཤུ་བ་ཟ་ཀོང་དང་།། མཁྲིས་ནད་ཆུ་སེར་འོར་ལ་རྟ་མཐུར་གཏར།། མཁལ་འགྲམས་མཚོན་ཕོག་རྐེད་པ་སྨད་མི་ཐེག། རྐང་བཤལ་བྱིན་པ་འགས་སྙམ་དཔྱི་མིག་གཟེར།། སུར་ཡ་མངལ་ཁྲག་འབྱམས་ལ་བྱིན་གཞུག་གཏར།། སྨད་དུ་མཚོན་ཕོག་གླང་ཐབས་མངལ་ཁྲག་འཛག། དྲི་ཆུ་འགག་ལ་ལོང་རྩ་གཏར་བར་བྱ།། རྒྱུ་མར་ཁྲག་རྒྱས་མགོ་སྐྱོན་སྙིང་ལ་བབས།། སྙིང་ནད་ཅིས་ཀྱང་མ་ཕན་རྒྱུ་རྩ་གཏར།། རྐང་པའི་མཐིལ་དང་བོལ་སྐྲངས་ཚ་འབྲབ་བྱེད།། ཆུ་སེར་ནད་ལ་གདོང་རྩ་ཡོབ་གོང་གཏར།། མདོར་ན་སྟོད་ནད་རྩེ་ཆུང་སྒང་རྩ་གཏར།། སྨད་ཀྱི་ནད་ལ་ལོང་རྩ་བྱིན་གཞུག་གཏར།། བར་གྱི་ནད་ལ་སྣོད་ཀ་རུ་ཐུང་གཏར།། རོ་སྟོད་ནད་ལ་སྒང་རྩ་དྲུག་འགོ་གཏར།། ནུ་མཆིན་བྲང་ནད་སྣོད་ཀ་རུ་ཐུང་གཏར།། སྙིང་ཚད་སྣོད་ཀ་ལྕེ་རྩ་ཐོང་རྩ་གཏར།། གློ་ཚད་དྲུག་འགོ་སྒང་རྩ་ཀྱོར་སྐྱོརགོང་གཏར།། གློ་སྙིང་གཉིས་འདོམས་རྩེ་ཆུང་འདོམས་རྩ་གཏར།། མཆིན་པའི་ཚ་བ་རུ་ཐུང་སྒང་རྩ་གཏར།། མཆེར་ཚད་རྟ་མཐུར་སྲིན་ལག་རྒྱབ་རྩ་གཏར།། ཕོ་ཚད་ཕོ་བའི་རྭ་དང་དྲུག་འདུས་གཏར།། མཁྲིས་ཚད་གཤའ་རིངས་ཕྲན་བུ་གསེར་མདུང་གཏར།། མཁལ་ཚད་བྱིན་གཞུག་ཕོ་མཚན་འགྲམ་རྩ་གཏར།། རྒྱུ་ལོང་ལོང་རྩ་དཀུ་འགྲམས་བྱིན་ཀྱོག་གཏར།། ཤ་ཡི་ཚད་པ་གློ་མཆིན་རྩ་ལ་གཏར།། རུས་པའི་ཚ་བ་མཁལ་མའི་རྩ་ལ་གཏར།། ལྤགས་ཚད་ཆུ་སེར་མཆིན་མཁྲིས་རྩ་ལ་གཏར།། ཟུག་ཆེ་གློ་རྩ་བྱིང་འཐིབས་རུ་ཐུང་གཏར།། དང་ག་འགགས་ན་བད་མཁྲིས་རྩ་ལ་གཏར།། འོན་ཀྱང་གང་ཉེ་གང་རྒྱས་གཏར་བ་ཤིས།། ཚ་བ་སྟོབས་ལྡན་རྩེ་ཆུང་ཡས་བབས་གཏར།། སྟོབས་ཆུང་ནད་ལ་རྩ་ཕྲན་མས་འཛག་གཏར།། ཚབས་ཆེའི་ནད་ལ་རྩ་ཕྲན་མང་གཏར་བས།། རྩེ་ཆུང་ལ་སོགས་རྩ་ཆེན་གཏར་བ་བསྔགས།། དེ་ལྟར་མ་ཡིན་གཏར་དམིགས་མ་ཤེས་པས།། སྨད་ཁྲག་སྟོད་དུ་དྲངས་པས་ལུས་ཟུངས་འཆོར།། སྟོད་ཁྲག་སྨད་དུ་དྲངས་ན་མེ་དྲོད་འཆི།། ཁྲག་པྲ་ཤུགས་དྲག་སླ་ལ་སེར་དུགས་སྦོ།། བྱ་ཝང་རྒྱབ་འདྲ་ལྦུ་བ་དཀར་བ་དང་།། བེ་སྣབས་རྣག་མཁྲིས་ཆགས་ན་ནད་ཁྲག་སྟེ།། ཟུག་ཆོགས་སྐྱེད་ཆེ་ནད་འབྱང་སླ་བ་ཡིན།། དམར་ནག་རི་མོ་བྱུང་ན་ཐང་རྗེས་གཏར།། རྣག་མཁྲིས་ཆགས་ན་ལུས་ཟུངས་གསོ་ཞིང་གཏར།། དམར་ལ་སྐ་ན་ཕན་མེད་གཏར་སྐྱེད་སྦྱར།། རླུང་ཁྲག་ནག་ཅིང་རྩུབ་ལ་ལྦུ་བ་དམར།། མཁྲིས་པའི་ཁྲག་ནི་སེར་སླ་རྣག་དྲི་མནམ།། བད་ཀན་ཁྲག་ནི་དམར་སྐྱ་སྐ་ལ་འཇམ།། མཚལ་ཁུ་ཚོས་ཁུ་འདྲ་བ་ཟུངས་ཁྲག་ཡིན།། དེ་རྣམས་ཅུང་ཟད་ཙམ་ཡང་གཏར་མི་རུང་།། དབྱུང་ཚད་ནད་ཐོན་ཟུངས་ཁྲག་བྱུང་ན་བཅད།། ཟུངས་ངན་ཁྲག་ཞབས་མེད་ཀྱང་རན་ཚོད་བཟུང་།། དོན་གཟེར་ཟུག་གཅོག་ཁྲག་གཟེར་དབྱུང་བ་དང་།། འོལ་ཀ་བསྒྱུར་གསུམ་ཟུངས་ཁྲག་ཡིན་ཡང་གདོན།། ཟུངས་ཟད་རླུང་ལྡན་ངན་ཁྲག་ཡིན་ཡང་བཞག། རྒྱས་འཁྲུགས་གཟེར་དང་བྱང་ཁོག་ཁྲག་རྒྱས་དང་།། ཡན་ལག་སྐྲངས་ཤོར་བུངས་སྐྱེད་ཁྲག་ཤེད་སྨད།། དེ་མ་ཡིན་ལ་མང་གཏར་ཉུང་དུ་དབྱུང་།། ལྦུ་བ་ཁྲག་དམར་སྤྲིས་གཡོགས་གཏར་འཕྲོ་བཅད།། ཟུངས་ངན་གཏར་ཚད་རྣག་ཏུ་འོང་བའམ།། གཏར་ཁྲག་ཆུ་དང་འདྲ་ན་གཏར་ཚོད་བཟུང་།། རྣག་ལ་བལྟས་ནས་མང་དུ་གཏར་བ་ཡིས།། ཟུངས་འཛད་གསོ་དཀའ་དམུ་ཆུར་འགྱུར་བ་ཡོད།། ལོག་གནོན་ཁྲག་མ་ཐོན་དང་ངན་ཁྲག་མེད།། ཁྲག་མ་ཆོད་དང་སྐྲངས་འབོག་རླུང་སྐྱེས་དྲུག། དང་པོ་ལུས་གྲང་མཚོན་རྟུལ་འགྲངས་དྲགས་བྲེད།། གདོན་དང་འགྲུལ་སྣ་ཁ་ཆུངས་པགས་པ་འཆུས།། བསྙལ་མ་ཐོག་གཏར་གཏར་མ་ཐོག་ཏུ་གློད།། དེ་དག་ཁྲག་མི་འབྱུང་བའི་རྒྱུ་ཡིན་པས།། རྒྱུ་བཅུ་སྤངས་ན་གཏར་ག་བརྡུགས་དོགས་མེད།། རྩ་ཆེན་གཏར་ཡང་ངན་ཁྲག་མེད་པ་ན།། རྗེས་དེ་བོར་ལ་རྩ་གཞན་གཡར་བྱས་ཏེ།། ནང་པར་གཏར་བས་ནད་ཁྲག་འབྱུང་བ་ཡིན།། ཚ་བ་ལམ་ཆད་རྩ་སྟོངས་ཁྲག་མེད་ན།། ཁོང་ཁྲག་ཕྱིར་ལ་འཕུལ་བའི་མན་ངག་གཅེས།། ཁྲག་མ་ཆོད་ན་རྩ་རྒྱུད་ཆུ་ཡིས་བསྒྲང་།། ཕྱིང་པ་ཆུར་བཅུག་གླན་ལ་དཀྲིས་མས་བསྡམ།། སྐྲངས་ན་ཚྭ་མར་ཁྱི་གཞོབ་བྱུགས་ལ་མཉེ།། དེས་མ་ཐུབ་ན་ཨ་ས་བ་ཡིས་བདུག། ཁྲག་གིས་བོག་ན་གསུར་བདུག་ཁ་ཕྲུ་གདབ།། ཚབས་ཆེ་བ་ལ་གསོན་ཁྲག་སོབས་སུ་བླུད།། གཏར་རྗེས་རླུང་སྐྱེས་བསྐུ་མཉེ་བུ་རམ་མུར།། བུར་ཆང་རུས་ཐང་འཚོ་ཁུས་རླུང་སྣ་གླན།། ཕྱི་རྗེས་བསྙལ་བཀྲོལ་རྨ་ཁ་མཐེབ་མོས་མཉེ།། རྡོ་གྲང་གླན་ཞིང་བལ་དཀྲི་འགྲོ་འགུལ་གཟབ།། ཁྲག་ངན་སྐྱེ་བས་ཆང་བསིངས་མི་བཏང་བསྲུང་།། གཏར་སྐྱོན་དམན་ལྷག་ལོག་དང་ཉེས་པ་བཞི།། གཏར་ཞན་ཁྲག་རོ་མི་ཐོན་ནད་གཞུག་ལུས།། མཆིན་སྐྲན་སྨུག་པོ་མཛེ་འབྲས་སུར་ཡ་སྐྱེད།། བྱང་ཁོག་ཡན་ལག་ཆུ་སེར་རྣག་ཏུ་འགྱུར།། གཏར་དྲགས་ཟུངས་འཛད་རླུང་སྐྱེ་མེ་དྲོད་འཆི།། གྲང་སྐྲན་སྐྱ་རྦབ་དམུ་ཆུར་འགྱུར་བ་མང་།། ལོག་པ་མི་རུང་ནད་ལ་གཏར་བའམ།། ཉེས་པས་ཤ་གདན་སྣད་དམ་ཆུ་རྒྱུས་བཅད།། གནད་ལ་སོང་ངམ་འཕར་རྩ་བཅད་པ་ཡིས།། སྨན་པའི་ལག་དགྲས་བྱ་ཉེས་བསད་པ་ཡོད།། དེ་ཕྱིར་སྐྱོན་ལ་མཁས་པས་གཟབ་པར་རིགས།། གཏར་ལེགས་ཡོན་ཏན་རྩ་ནད་ངན་ཁྲག་སྦྱོང་།། གཟེར་བ་ཟུག་གཅོག་སྐྲངས་པ་རྒྱུ་ནས་འཇོམས།། འདྲུལ་བ་བརྟས་བྱེད་རྣག་ཆུ་རྩད་ནས་གཅོད།། རྨ་ཡི་མདོག་འབྱིན་ཁོལ་བུའི་ནད་རླངས་འདོན།། སྦོམ་པོ་འབྲི་ལ་སྐེམ་པོ་ཤ་རྒྱས་བྱེད།། ནད་དངོས་ཕྱིར་འབྱིན་དཔྱད་མཆོག་གཏར་གར་བཤད།། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དཔྱད་ལྔ་གཏར་གའི་ལེའུ་སྟེ་ཉི་ཤུ་པའོ།། །།

X