//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > ཕྱི་མ་རྒྱུད། > ནང་དོན།

ལེའུ་ཉེར་གཅིག་པ། དཔྱད་ལྔ་མེ་བཙའ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 16:26:21 ཀློག་གྲངས། 28 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགདཔྱད་ལྔའི་མེ་བཙའ་སྤྲ་བ་རུང་མི་རུང་།། མེ་དམིགས་གདབ་ཐབས་ཕྱི་རྗེས་ཕན་ཡོན་བདུན།། སྤྲ་བ་སྟོན་ཟླ་གསུམ་གྱི་དུས་བཟང་བཏུ།། མ་ཆད་ཤིག་མེད་བརྡུངས་ལ་མཁྲེགས་པར་དྲིལ།། རྩ་བ་བརྟན་ཟླུམ་རྩེ་རྣོ་མེ་ལེན་མྱུར།། ཚིགས་པའི་མཁར་ལ་མཛུབ་མོའི་རྩེ་མོ་ཙམ།། མགོ་དང་ཡན་ལག་མདུན་ལ་མཐེབ་ཆུང་ཙམ།། རྩ་སྒོ་འགེགས་ལ་ལེབ་མོ་རིལ་མ་ཙམ།། འབྲས་དང་སྐྲན་ལ་ཨ་རུ་ར་ཙམ་བྱ།། བྱིས་པའི་ལྷེན་སྣར་སྲན་མ་འཕོས་པ་ཙམ།། མེ་བཙའ་གདབ་ཏུ་རུང་བའི་ནད་གཞི་ནི།། མ་ཞུ་མེ་ཉམས་སྐྱ་རྦབ་དམུ་ཆུ་སྐྲན།། གྲང་མཁྲིས་མགོ་དང་ཡན་ལག་ཆུ་སེར་དང་།། འབྲས་དང་ལྷོག་པ་སྟོངས་པའི་ཚ་བ་དང་།། སྨྱོ་བྱེད་རྗེད་བྱེད་རྩ་ནད་ཐམས་ཅད་དང་།། ཚ་རྗེས་ཕལ་ཆེར་མེ་ཡིས་བཅད་པ་སྟེ།། མདོར་ན་བད་རླུང་ལས་གྱུར་གྲང་བ་ཀུན།། རྩ་ནད་ཆུ་སེར་མེ་ཡིས་བསྲེག་པ་བསྔགས།། མི་རུང་མཁྲིས་ཚད་ཁྲག་ནད་ཐམས་ཅད་དང་།། དབང་པོའི་སྒོ་དང་ཕོ་མོའི་སྲིད་རྩར་སྤང་།། མེ་དམིགས་ནད་ཀྱིས་བསྟན་དང་སྨན་པས་བཙལ།། ནད་ཀྱིས་བསྟན་པ་ན་བའི་དམིགས་ཡོད་ལ།། མནན་ན་ཕན་སྙམ་བྱེད་ལ་མཐེབ་རྗེས་འོང་།། རྩ་འཁྱུག་རྩ་ནད་གར་ལངས་དམིགས་སུ་གདབ།། སྨན་པས་བཙལ་བ་དོན་སྣོད་གསང་རྣམས་ཏེ།། ཨན་སྟོང་ཚིགས་པ་དང་པོ་རླུང་གི་གསང་།། སྨྱོ་འདར་འཕྱོ་ལྐུགས་ནད་ལ་གདབ་པར་བྱ།། གཉིས་པ་མཁྲིས་གསང་གྲང་མཁྲིས་ནད་ལ་གདབ།། གསུམ་པ་བད་ཀན་གསང་སྟེ་གྲང་རླུང་དང་།། གློ་སྙིང་མགོ་སྟོད་བད་མཁྲིས་རྒྱས་ལ་གདབ།། བཞི་པ་གློ་མ་ལྔ་པ་གློ་བུའི་གསང་།། གློ་ལ་རླུང་དང་བད་ཀན་ཞུགས་ལ་གདབ།། དྲུག་པ་སྲོག་རྩ་བདུན་པ་སྙིང་གི་གསང་།། འཕྱོ་འདར་སྨྱོ་འབོག་བད་རླུང་ནད་ལ་གདབ།། བརྒྱད་པ་མཆིན་དྲི་དགུ་པ་མཆིན་པའི་གསང་།། སྒྲེག་སྐྱུག་མཆིན་དྲི་འཁོར་དང་གྲངས་ཚེ་ན།། མཆིན་སྐྲན་མཆིན་པར་བད་རླུང་ཞུགས་ལ་གདབ།། བཅུ་པ་མཁྲིས་གསང་མ་ཞུ་མིག་སེར་དང་།། མཁྲིས་པའི་སྐྲན་དང་མེ་དྲོད་ཉམས་ལ་གདབ།། བཅུ་གཅིག་མཆེར་གསང་སྦོ་འཁྲོག་འུར་ལ་གདབ།། བཅུ་གཉིས་ཕོ་བའི་གསང་སྟེ་མེ་དྲོད་ཉམས།། ལྷན་ལྷེནདང་ལྕགས་དྲེག་སྐྲན་གྱི་ནད་ལ་གདབ།། བཅུ་གསུམ་བསམ་སེའི་གསང་སྟེ་ཁུ་ཁྲག་རླུགས།། མངལ་སྐྲན་སེམས་འཕྱོ་གྲང་རླུང་རྒྱས་ལ་གདབ།། བཅུ་བཞི་མཁལ་གསང་མཁལ་མའི་གྲང་ནད་སེལ།། བཅོ་ལྔ་དོན་སྣོད་སྤྱི་གསང་གྲང་རླུང་སེལ།། བཅུ་དྲུག་ལོང་གསང་འུར་འཁྲོག་སྐྲན་ལ་གདབ།། བཅུ་བདུན་རྒྱུ་མའི་གསང་སྟེ་རྒྱུ་སྐྲན་དང་།། གྲང་རླུང་ལྦུ་བ་བེ་སྣབས་འཁྲུ་ལ་གདབ།། བཅོ་བརྒྱད་ལྒང་པའི་གསང་སྟེ་རྡེའུ་ནད་དང་།། གྲང་བས་ཆུ་ཁ་སྲ་སྙིའི་ནད་ལ་གདབ།། བཅུ་དགུ་ཁུ་བའི་གསང་སྟེ་འབྱམས་རླུགས་སེལ།། ཉི་ཤུ་ཐུར་སེལ་རླུང་སྒོའི་གསང་ཡིན་ཏེ།། ཕྱེན་མི་ཐུབ་དང་འགགས་པའི་ནད་ལ་གདབ།། མདུན་གྱི་མེ་དམིགས་སྐེ་སྟོང་ཅ་ར་ཁུང་།། སྲོག་རྩ་སྙིང་དང་འདོམ་པའི་གསང་ཡིན་ཏེ།། སྙིང་འཆུས་སྐྱིགས་དང་གྲེ་བ་འགགས་ལ་གདབ།། ནུ་མའི་དཀྱིལ་ཐད་བྲང་གཞུང་དཀར་ནག་མཚམས།། འཕྱོ་འདར་སྙིང་མི་དགའ་ལ་གདབ་པར་བྱ།། ལྷེན་སྣའི་རྩེ་ནས་མཚོན་གང་ལྷེན་གྱི་གསང་།། དེ་འོག་མཚོན་གང་ཁ་གསུམ་སྐྲན་གྱི་གསང་།། དེ་འོག་མཚོན་གང་ཁ་གསུམ་མེ་མཉམ་གསང་།། ལྷེན་སྐྲན་མེ་ཉམས་གྲང་རླུང་རྒྱས་ལ་གདབ།། ལྟེ་བའི་གཡས་གཡོན་མཚོན་རེ་ལོང་གི་ཐེར།། དེ་ནས་གཡས་གཡོན་མཚོན་རེ་ལོང་ཕུགས་གསང་།། ལོང་སྐྲན་སྦོ་འཁྲོག་འཁྲུ་བ་འབྱམས་ལ་གདབ།། ལྟེ་འོག་མཚོན་གང་ཁ་གསུམ་རྒྱུ་སྟོད་གསང་།། དེ་འོག་མཚོན་གང་ཁ་གསུམ་རྒྱུ་སྨད་གསང་།། རྒྱུ་མར་གྲང་རླུང་ཞུགས་དང་འཁྲུ་ལ་གདབ།། དེ་འོག་མཚོན་གང་ཁ་གསུམ་ལྒང་པའི་གསང་།། གྲང་བས་ཆུ་ཁ་སྲ་སྙི་སེལ་བར་བྱེད།། མགོ་དང་ཡན་ལག་མཛུབ་ཚུགས་གསང་དམིགས་ནི།། སྡུད་སྒོ་སྤྱི་གཙུག་མཚོགས་མའི་འདུས་སོ་གསུམ།། རླུང་གིས་མགོ་འཁོར་འགྱེལ་བུག་བུབནད་ལ་གདབ།། སྨྱོ་ལབ་འབོག་ན་ལྟག་པའི་སྤུ་འཁྱིལ་བསྲེག། རླུང་རིམས་སྨྲ་མི་ཤེས་ལ་མ་མཆུའི་འོག། ལྐོག་ནད་སྨྲ་མི་ཤེས་ལ་ཕྱི་ལོང་སྟེང་།། གྱེན་སོར་བཞི་ཡི་ཆུ་བའི་བར་དུ་གདབ།། རིམས་ནད་ངུ་ལབ་འདྲེ་མཐོང་ལག་པ་ཡི།། མཁྲིག་མའི་སོར་བཞི་ཆུ་བའི་བར་དུ་གདབ།། ཕོ་མཚན་མི་ལྡང་ས་བོན་ལུག་པ་ལ།། ནང་ལོང་ཐད་དྲང་གདོང་གི་ཆུ་བར་བསྲེག། རྐང་བཤལ་འགྲོ་བ་དཀའ་ན་ལག་པ་ཡི།། གུང་མོས་གར་སླེབ་བརླ་ཡི་ཕྱི་སུལ་བསྲེག། བུད་མེད་བུ་བཙས་སྐྲངས་ལ་ཨོལ་འཛུམ་བསྲེག། ལྟག་པ་རེངས་སམ་རླིག་པ་སྐྲངས་པ་དང་།། སྨྱོ་ལྐུགས་རྐང་པའི་མཐེ་བོང་སྤུ་སྐྱེས་བསྲེག། མིག་ཚག་འབོག་ལ་རྟིང་པའི་དྲེག་མཚམས་བསྲེག། རྒྱུ་ལོང་ཕོ་གླང་ནང་ལོང་འཕར་རྩ་བསྲེག། དངངས་དང་སྐྱིགས་བུ་སྐྱུག་ལ་སྐེ་སྟོང་བསྲེག། མཆུ་ནད་སྲིན་ལག་གཡས་གཡོན་ཚིགས་མགོ་བསྲེག། སོ་ནད་རྣ་དྲུང་སྲིན་ལག་རྩེ་མོ་བསྲེག། སྣ་ཁྲག་མ་ཆོད་དབུགས་ཀྱིས་གར་སླེབ་པའི།། དཔུང་པ་གཡས་གཡོན་མགོ་ལ་མེ་བཙའ་གདབ།། གདབ་ཐབས་བཙོ་བསྲེག་བསྲོ་དང་སྡིག་པ་བཞི།། འབྲས་དང་སྐྲན་ལ་ཉི་ཤུ་ཡན་ཆད་བཙོ།། བད་ཀན་ཆུ་སེར་སྙིང་རླུང་བཅོ་ལྔས་བསྲེག། རླུང་སྲིན་རྩ་ཆུ་སྤྲ་བ་ལྔ་བདུན་བསྲོ།། བྱིས་པའི་མེ་བཙའ་སྤྲ་ཚུགས་རེ་ཡིས་བསྡིག། བུ་བཙས་བཤལ་རྗེས་རྩ་ཆད་འཐུད་པ་གསུམ།། ཧ་ཅང་བསྲེགས་པ་དྲགས་ན་ཉེས་པ་ཆེ།། སྤྲ་བ་བཞག་ལ་མེ་སྦར་སྐྱབས་འགྲོ་བྱ།། མེ་ཕེབས་ཐལ་བ་མི་འགུལ་ཐུད་ཀྱིས་གདབ།། དུ་བ་ཆད་ནས་སྤྲ་ལྷག་ཁབ་མགོས་གསེང་།། སུམ་གཉིས་མཆེད་ནས་སྤྲ་བ་གཅིག་ལ་སྦར།། ཚ་བ་རྒྱུན་མ་ཆད་ན་ཚོས་པ་སྐྱེན།། བསྲེག་ལེགས་ཁོད་སྙོམས་ཡ་ཡོ་མེད་པ་དང་།། ཆུ་བུར་ཕྲ་མོས་མཐའ་བསྐོར་ན་ཚ་མེད།། ཚོས་ཚད་མདུན་བཏབ་རྒྱབ་ཏུ་ཀར་རྩེ་ན།། རྒྱབ་བཏབ་མདུན་དུ་ན་ཞིང་སྐྱུག་སྙམ་བྱེད།། ཚོས་པ་ཡིན་པས་སྤྲ་བ་བསྲེག་འཕྲོ་བཅད།། ཏོག་ཐོན་སྤྲ་བ་ཡར་ན་ཕན་ཆེར་འདོད།། ཕྱི་རྗེས་མེ་ཤི་སྤྲ་གྲངས་མཐེབ་རྒྱས་གདབ།། གོམ་པ་འགའ་བཅགས་དེ་ནུབ་ཆུ་མི་བཏུང་།། བཅགས་པས་ལུས་བརྟས་ཆུ་འཐུངས་མེ་དབལ་གསོད།། སྣོད་ལ་ཟས་ཟོས་རྗེས་ལ་མེ་མི་གདབ།།ཕན་ཡོན་རྩ་ཡི་འབྲོས་འཕྲང་འགེགས་པར་བྱེད།། ཨ་ནའི་ཟུག་གཅོག་རླུང་ནད་ཁ་ཡན་གནོན།། མ་ཞུ་འཇུ་ཞིང་ལྷེན་སྐྲན་བཤིག་པར་བྱེད།། འབྲས་དང་རྨ་རྒན་ཤ་རོ་ངན་པ་གཅོད།། སྐྲངས་པའི་མགོ་གནོན་ཆུ་སེར་འདྲེན་སྐེམ་སྡོམ།། དོན་སྣོད་སྒོ་བསྲུང་དྲོད་སྐྱེད་དྲན་པ་གསལ།། གསོ་དཔྱད་གཞན་བརྡུགས་ཕལ་ཆེར་མེ་ཡིས་གསོ།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དཔྱད་ལྔ་མེ་བཙའི་ལེའུ་སྟེ་ཉི་ཤུ་རྩ་གཅིག་པའོ།། །།

X