//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > ཕྱི་མ་རྒྱུད། > ནང་དོན།

ལེའུ་ཉེར་གསུམ་པ། དཔྱད་ལྔ་ལུམས།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 16:28:17 ཀློག་གྲངས། 12 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགདཔྱད་ལྔ་ལུམས་ལ་རུང་དང་མི་རུང་དང་།། བྱ་བའི་ཐབས་དང་ཕན་ཡོན་རྣམ་པ་བཞི།། རུང་བ་ཡན་ལག་རིངས་རེངསའཁུམས་ཞ་བ་དང་།། འབྲས་དང་ལྷོག་པ་རྨ་རྙིང་རྨ་གསར་སྐྲངས།། ཚབས་དང་སྒུར་པོ་ཤ་རུས་ཆུ་སེར་གཡོས།། རླུང་ནད་མ་ལུས་ཀུན་ལ་བསྔགས་པ་ཡིན།། མི་རུང་རིམས་འཁྲུགས་ཚ་རྒྱས་སྐྱ་རྦབ་དང་།། ཉམ་ཆུང་དང་ག་འགགས་ལ་སྤང་བར་བཤད།། མིག་དང་མཁུར་ཚོས་དྲེག་བཞི་རླིག་པ་དང་།། ལྟོ་བ་སྙིང་གའི་གནས་སུ་ལུམས་མི་རུང་།། བྱ་བའི་ཐབས་ལ་ཆུ་ལུམས་བཅིང་ལུམས་གཉིས།། ཆུ་ལུམས་སྤྱི་མཐུན་ལས་གྲུབ་ཆུ་ཚན་ཞུགས།། འགྲམས་དུག་ཚད་རྙིང་བྱེར་ཞིང་ཞེན་པ་དང་།། འབྲས་དང་རྨ་རྒན་སུར་ཡ་རྩ་ནད་དང་།། རེངས་འཁུམས་སྒུར་པོ་ཤ་སྐམས་འདོན་པར་བྱེད།། དེ་མ་གྲུབ་ན་བདུད་རྩི་རྣམ་པ་ལྔ།། རླངས་ལུམས་ཆུ་ཚན་སྤྱིང་བས་གོང་བཞིན་འགྲུབ།། མི་རུས་བཙའ་མ་རླངས་ལུམས་ཆུ་ཚན་གྱིས།། ཚ་རེངས་རླུང་ལྡན་འགྲམས་པའི་ཟུག་གཟེར་འཇོམས།། མཁན་པ་བུལ་ཏོག་ཕབས་སྦྱར་ཆུ་ལུམས་ཀྱིས།། རྨ་རྒན་སྐྲངས་དང་ཞ་རེངས་སེལ་བར་བྱེད།། བཅིང་ལུམས་ཚ་སེལ་གྲང་སེལ་རྣམ་པ་གཉིས།། ཚ་སེལ་མགོ་ཆག་རྩ་བྱེར་འབྲུ་སྣའི་ལུམས།། ཀྱི་ལྕེ་མཛོ་ལྕི་ཞོ་སྦྱར་ཚ་སྐྲངས་འཇོམས།། རྩ་བྱེར་མེ་ཏོག་སྣ་ཚོགས་ལུམས་ཀྱིས་གདུལ།། རྩ་དཀར་གཟའ་ཕོག་མཁལ་རྩ་འགྲམས་བྱེར་ལ།། བདུད་རྩི་ལྔའམ་གླ་རིལ་ཆང་བཙོས་ལུམས།། རྩ་འགྲམས་སྐྲངས་རེངས་མཁན་པ་སྤྲུ་མ་མཚེ།། སྤང་སྤོས་དྲི་ཆུར་བཙོས་པའི་ལུམས་ཀྱིས་གདུལ།། ཚད་རྙོགས་བྱེར་བ་མཚན་དང་སྲོ་ལོའི་ལུམས།། མཛེ་དུག་ར་རིལ་གླ་རྩི་དྲི་ཆུའི་ལུམས།། དབྱིག་གི་དུག་ལ་མཆོད་རྟེན་ན་བཟའ་དང་།། ཁྲུ་གང་འོག་ས་དྲི་ཆུར་བཙོས་ལུམས་བྱ།། གྲང་སེལ་ཡན་ལག་སྐྲངས་པ་རྣག་འགུགས་ན།། སྦང་སྐམ་བྱི་བྲུན་ཆང་བཙོས་ལུམས་སུ་གཞུག། མདེ་འབྱིན་ར་རིལ་བྱི་བྲུན་དྲི་ཆུའི་ལུམས།། ར་དུག་སྤྱང་ཚེར་རི་ཤོ་སྤྱང་བྲུན་དང་།། སྦང་གར་བཙོས་པས་ཆུ་ལྷོག་གྲང་སྐྲངས་འདུལ།། ཡན་ལག་ཆུ་སེར་སྐྱ་རྦབ་སྦོས་པ་ལ།། རྟ་རྐྱང་བོང་བུའི་སློ་དྲོན་ལུམས་སུ་གཞུག། རྨེན་འབྲས་ཕུག་རོན་རིལ་མ་ཆང་བཙོས་ལུམས།། འབྲས་འདུལ་མི་ཡི་རྐང་མགོ་ཉྭ་ཡི་ཤ། སྤྲུ་རྩ་རེ་ལྕག་ཆང་བཙོས་ལུམས་སུ་གཞུག། རྡོ་སྐྲན་འདུལ་ལ་སྤྱང་ཚེར་ལྕེ་ཚ་དང་།། མཁན་པ་ལྕ་འབྲུམ་བྱི་བྲུན་སྦང་གར་དང་།། སྒ་སྤོད་སྦྱར་ཏེ་བཙོས་པའི་ལུམས་སུ་གཞུག། རུས་ཏྲེམ་ཚབས་ནད་མི་རུས་བ་སྤྲུའི་ལུམས།། རླུང་འཕྱོས་སྨྱོ་འབོག་ཚབས་རླུང་སྙིང་སྣའི་ལུམས།། རིམས་འཇུག་མཇུགརྐང་དང་རུས་པ་ན་བ་ལ།། ཁྲུ་གང་འོག་ས་དྲི་ཆུར་བཙོས་པའི་ལུམས།། རུས་ཚིགས་གཟེར་ན་རུས་སྣ་ཆང་བཙོས་ལུམས།། རླུང་སྐྲངས་འབའ་ཆ་ཆང་དུ་བཙོས་པའི་ལུམས།། ལུམས་ཀྱིས་ཚ་རླངས་ཆུ་སེར་བ་སྤུར་འདོན།། རླུང་འདུལ་སྐྲངས་འཇོམས་སྐེམ་པོ་ཤ་རྒྱས་བྱེད།། ཅེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དཔྱད་ལྔ་ལུམས་ཀྱི་ལེའུ་སྟེ་ཉི་ཤུ་རྩ་གསུམ་པའོ།། །།

X