//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > ཕྱི་མ་རྒྱུད། > ནང་དོན།

ལེའུ་ཉེར་བཞི་པ། དཔྱད་ལྔ་བྱུག་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 16:29:08 ཀློག་གྲངས། 9 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིགདཔྱད་ལྔ་བྱུག་པ་རུང་དང་མི་རུང་དང་།། བྱ་བའི་ཐབས་དང་ཕན་ཡོན་རྣམ་པ་བཞི།། རུང་བ་ལུས་རྩུབ་ཁྲག་དང་ཁུ་བ་ཟད།། སྟོབས་ཆུང་རྒས་དང་མྱ་ངན་སེམས་ལས་ཆེ།། མིག་འགྲིབ་གཉིད་མེད་རྩོལ་བས་དུབ་པ་དང་།། རླུང་ནད་ཀུན་ལ་སྣུམ་བྱུག་བསྟན་བསྟེནཔར་བྱ།། ལྤགས་ནད་འབྲུམ་ཐོར་སྐྲངས་ལ་ལྡེ་གུ་བྱུག། མ་ཞུ་བརླ་རེངས་དབྱིག་དུག་ཡི་ག་འཆུས།། དམུ་རྫིང་བད་ཀན་ནད་ལ་སྣུམ་བྱུག་སྤང་།། བྱ་ཐབས་སྡུད་སྒོ་དྲུག་བདུན་མཐིལ་བཞི་ལ།། མི་ཞུན་བྱུགས་མཉེ་སྐམས་ནས་ཕྱེ་ཡིས་ཕྱི།། སྙིང་རླུང་འདྲེ་ཆགས་འབྲས་ནད་འཇོམས་པར་བྱེད།། བསྐུ་མཉེ་ཀུན་ལ་དེ་ལྟར་ཤེས་པར་གྱིས།། འབྲུ་མར་དེ་བཞིན་གཉིད་མེད་རླུང་རྣམས་འཇོམས།། བློ་རྣོ་དྲན་གསལ་འདོད་ལ་ཞུན་མར་བྱུག། སྨྱོ་འབོག་བརྒྱལ་བའི་ནད་ལ་ལོ་མར་བྱུག། ཆུ་སེར་ཟ་འཕྲུག་རྟ་རྐྱང་བོང་ཚིལ་བྱུག། མཁལ་མ་ཉམ་ཆུང་ས་བོན་འཛག་པ་ལ།། སྲམ་མམ་ད་བྱིད་ཚིལ་བུས་རྐེད་ཚིགས་བྱུག། ཤིག་སྲོ་མང་ལ་ཤ་བའི་ཚིལ་བུ་བྱུག། ཁྱི་རྨ་རེང་རེདལ་ཁྱི་ཡི་ཚིལ་བུ་བྱུག། གླང་ཤུ་ཕག་ཚིལ་མུ་ཟི་ནག་པོ་བྱུག། གདོང་པའི་འབྲུམ་ཤུལ་ར་ཚིལ་འབྲི་མོག་བྱུག། ཤུ་བ་རྨ་རྒན་ཙན་དན་མར་ཁུ་བྱུག། མིག་འགྲིབ་བྱ་རྒོད་ཕག་པའི་ཚིལ་བུའམ།། འབྲི་མར་གོ་སྙོད་སྦྱར་བས་རྐང་མཐིལ་བྱུག། རླུང་ནད་རུས་ཞུགས་གཏིང་ནས་ལྷང་ལྷང་ན།། བཅའ་སྒ་འབྲུ་མར་སྦྱར་བའི་བྱུག་པ་བྱ།། གཉིད་མེད་གླ་རྩི་མར་དཀར་མགོ་ལུས་བྱུག། ལྡེ་གུ་མུ་ཟི་ར་དུག་མི་ཁྱིའི་བྲུན།། ཤུ་དག་རྭ་གཞོབ་དྲི་ཆུས་ལྷོག་པ་འཇོམས།། མུ་ཟི་ཚྭ་ཕབས་དུ་བ་མར་རྙིང་སྦྱར།། ལྡེ་གུ་བྱུགས་བསྲེགས་ཤུ་བ་སེལ་བར་བྱེད།། བྱི་བྲུན་གསེར་རྡོ་ནུ་ཞོས་རྣག་སྣ་འདྲེན།། རྣག་མེད་སྐྲངས་དང་ཟུག་གཟེར་གཅོག་པར་བྱེད།། སྲད་དཀར་ཐལ་བ་རྟ་བོང་འོ་མ་སྦྱར།། རྨ་རྒན་རྣག་འཛག་འབྲས་ཐབས་སོང་བ་སེལ།། ཏིལ་ཕྱེ་ཆུར་ཁུར་བཏབ་བསྐོལ་དྲེག་ནད་སེལ།། ཤུ་དག་སོ་མ་ར་ཛ་འབྲས་བུ་གསུམ།། སླེ་ཏྲེས་བ་ལྕི་ས་སྨྱག་ཚ་སྐྲངས་སེལ།། དུད་པ་ཡུང་སྐྱེར་རུ་རྟ་དུག་མོ་ཉུང་།། དར་བས་ཤུ་ཐོར་ཁྱེ་མ་ལྤགས་ནད་སེལ།།ཡུངས་ཀར་ཤུ་དག་རྒྱམ་ཚ་སེང་ཕྲོམ་གྱིས།། གདོང་བྱུག་ངོ་ཁབས་ཁེ་མ་འབྲུམ་ཐོར་སེལ།། འོམ་བུ་ཨ་རུ་ར་དང་དྲི་ཆུ་སྦྱར།། དུག་ནད་ཡན་ལག་སྐྲངས་པ་སེལ་བར་བྱེད།། ཙན་དན་ཀྱི་ལྕེ་ཧོང་ལེན་གངས་ཆུ་སྦྱར།། ཁྲག་གཟེར་ལྤགས་ནད་ཚ་བ་མེ་དབལ་སེལ།། སྐྱུ་རུ་ཨུཏྦལ་མར་གསར་ལུས་ཀུན་བྱུག། རྔུལ་འབྱམས་རིམས་ནད་ཚ་བ་ཕྱི་ཤོར་སེལ།། དུད་པ་རུ་རྟ་ཆུ་རྩ་རེ་ལྕག་ཐལ།། ཚྭ་ཕབས་ཟོ་མར་སྐོགས་ཤུ་ཟ་འཕྲུག་སེལ།། སྦྲུལ་ནག་པགས་པ་དུ་བ་མ་ཤོར་བསྲེགས།། ཕག་ཚིལ་སྦྱར་བྱུགས་ཤ་བཀྲ་བས་ལྡགས་སེལ།། སྔོན་བུ་སྲུབ་ཀ་ཞོ་སྦྱར་ཟ་འཕྲུག་སེལ།།བྱུག་པའི་ཕན་ཡོན་ཚེ་རིང་དབང་པོ་གསལ།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་དཔྱད་ལྔ་བྱུག་པའི་ལེའུ་སྟེ་ཉི་ཤུ་རྩ་བཞི་པའོ།། །།

X