//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > ཕྱི་མ་རྒྱུད། > ནང་དོན།

ལེའུ་ཉེར་དྲུག་པ། རྒྱུད་བཞིའི་མཇུག་དོན་བསྡུས་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 16:40:18 ཀློག་གྲངས། 14 

      དེ་ནས་དྲང་སྲོང་ཡིད་ལས་སྐྱེས་ཀྱིས་དྲང་སྲོང་རིག་པའི་ཡེ་ཤེས་ལ་འདི་སྐད་ཅེས་ཞུས་སོ།། ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས།། རྒྱུད་བཞིའི་མཇུག་དོན་བསྡུ་ན་གང་དུ་འདུས།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པ་དང་། སྟོན་པས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཡིད་ལས་སྐྱེས།། མདའ་གཤའ་ཕང་བ་བཀང་ཡང་གཏད་ས་མདེ་རྩེ་གང་།། སོ་ནམ་དུས་བཞིར་བཙལ་ཡང་མདོ་དོན་ལྟོ་རྒྱབ་གཉིས།། རྣམ་གྲངས་དུ་མར་ཕྱེ་ཡང་འབྲས་བུ་གྲུབ་པར་བསྡུ།། དེ་བཞིན་རྒྱུད་དང་ཡན་ལག་གནས་སྐབས་མདོ།། དུ་མར་བརྗོད་ཀྱང་མདོ་དོན་རྣམ་པ་གཉིས།། ནད་དང་ནད་མེད་བྱ་བ་ཧྲིལ་གྱིས་དྲིལ།། ནད་མེད་དོན་དུ་རྒྱུན་སྤྱོད་དུས་སྤྱོད་དང་།། བཅུད་ལེན་རོ་ཙ་བཞི་རུ་ཤེས་པར་གྱིས།། ཟས་དང་སྨན་གཉིས་ཐུན་མོང་སྤྱི་རུ་སྦྱོར།། ནད་པའི་བྱ་བ་གཞི་བརྟག་གསོ་བ་གསུམ།། ནད་ལ་བཞི་བརྒྱ་རྩ་བཞིར་ཕྱེ་ན་ཡང་།། ཚ་གྲང་གཉིས་སུ་མ་འདུས་ནད་གཞན་མེད།། ངོས་བཟུང་བརྟག་ལ་སྟོང་དང་ཉིས་བརྒྱ་ཡང་།། བལྟ་རེག་དྲི་བར་མ་འདུས་བརྟག་ཐབས་མེད།། རེག་པ་རྩ་ལ་འཚོ་འཆི་དཔྱད་པས་རྟོགས།། བལྟ་བ་ཚ་གྲང་ཆུ་ལ་མཐོང་བས་གསལ།། སློང་རྐྱེན་གར་བབས་ན་ལུགས་དྲིས་པས་ཤེས།། གསོ་བྱེད་གཉེན་པོ་སྟོང་དང་རྩ་གཉིས་ཀྱང་།། སྨན་དཔྱད་ཟས་སྤྱོད་བཞི་རུ་མ་འདུས་མེད།། ཞི་སྦྱོང་གཉིས་སུ་མ་འདུས་སྨན་གཞན་མེད།། བསིལ་དྲོད་གཉིས་སུ་མ་འདུས་ཞི་བྱེད་མེད།། དྲག་འཇམ་གཉིས་སུ་མ་འདུས་སྦྱོངས་གཞན་མེད།། འཇམ་རྩུབ་གཉིས་སུ་མ་འདུས་དཔྱད་གཞན་མེད།། ཕན་གནོད་གཉིས་སུ་མ་འདུས་ཟས་གཞན་མེད།། དྲག་དལ་གཉིས་སུ་མ་འདུས་སྤྱོད་ལམ་མེད།། གསོ་ཐབས་ལག་ལེན་སུམ་བརྒྱ་དྲུག་ཅུ་ཡང་།། ངོས་བཟུང་གསོ་ཚུལ་གསོ་ཐབས་གསུམ་དུ་འདུས།། ཀྱེ་དྲང་སྲོང་ཆེན་པོ་དེ་ལྟར་ཤེས་པར་གྱིས།། ནད་ངོས་ཐམས་ཅད་ལྟ་རེག་དྲི་བས་བཟུང་།། ལྟར་སྣང་ལྔ་ཕྲུགས་ཚ་གྲང་འཁྲུལ་སོ་བསལ།། བཅོས་ཚུལ་དགུ་ཡིས་ནད་དང་གཉེན་པོ་སྤྲོད།། ལག་ལེན་བཅོ་བརྒྱད་ནད་ཀྱི་ངོ་བོ་གཞོམ།། ལེའུ་དྲུག་པས་མདོར་བསྟན་རྩ་བ་བཟུང་།། བཤད་པའི་རྒྱུད་ཀྱིས་གསོ་རིག་སྤྱི་ཁོག་ཁྲོལ།། མན་ངག་རྒྱུད་ཀྱིས་གང་བྱུང་ནད་རྣམས་གསོ།། ཕྱི་མ་རྒྱུད་ཀྱིས་ལག་ལེན་མདོ་དོན་དྲིལ།། ཞི་བྱེད་ཐམས་ཅད་སྡེ་ཚན་ལྔ་བཞིན་སྦྱོར།། སྦྱོང་བྱེད་ཐམས་ཅད་ལས་ལྔའི་ནང་བཞིན་སྦྱོངས།། དཔྱད་རྣམས་གང་བྱེད་དཔྱད་ལྔའི་ནང་བཞིན་སྦྱོར།། རླུང་མཁྲིས་བད་ཀན་གསུམ་གྱིས་སྤྱི་ཁོག་ཕུག། རང་རང་ནད་ཀྱི་གསོ་ཐབས་མདེ་ཁར་ཐོགས།། དུག་དང་སྨུག་པོ་ཚ་བ་རྙིངས་པ་གསུམ།། གཅིག་ལ་གཅིག་ཕན་རྟགས་དང་བཅོས་ཐབས་འཕྲུལ།། མ་ཞུ་ལྷེན་དང་མེ་དྲོད་ཉམས་པ་གསུམ།། གཅིག་ལ་གཅིག་ཕན་རྟགས་དང་བཅོས་ཐབས་འཕྲུལ།། འོར་དང་སྐྱ་རྦབ་དམུ་རྫིངས་རྣམ་པ་གསུམ།། གཅིག་ལ་གཅིག་ཕན་རྟགས་དང་བཅོས་ཐབས་འཕྲུལ།། དེ་བཞིན་སྐྲན་དང་ཁོང་འབྲས་བཅོས་ཐབས་འཕྲུལ།། འབྲས་དང་སུར་ཡ་རྨ་རྒན་རྣམ་པ་གསུམ།། གཅིག་ལ་གཅིག་ཕན་རྟགས་དང་བཅོས་ཐབས་འཕྲུལ།། འཁྲུ་ནད་རྒྱུ་གཟེར་ཚད་པས་འཁྲུ་བ་གསུམ།། གཅིག་ལ་གཅིག་ཕན་རྟགས་དང་བཅོས་ཐབས་འཕྲུལ།། དྲེག་དང་གྲུམ་བུ་རྐང་བམ་རྟགས་བཅོས་འཕྲུལ།། རིམས་ལ་མ་སྨིན་སྟོངས་ཚད་གཅེས་པར་ཟུང་བཟུང་།། འགྲམས་དང་འཁྲུགས་ལ་རྒྱས་ཚད་གཅེས་པར་ཟུང་བཟུང་།། དུག་དང་སྨུག་པོ་རྙིངས་ཚད་གཅེས་པར་ཟུང་བཟུང་།། བད་མཁྲིས་ནད་ལ་གབ་ཚད་གཅེས་པར་ཟུང་བཟུང་།། ཚད་པ་ཀུན་ལ་ཞུ་འཁྱགས་གཙོ་བོར་ཟུང་བཟུང་།། ཕོ་མཆེར་མཁལ་ནད་བད་ཀན་གཙོ་བོར་ཟུང་བཟུང་།། གློ་མཆིན་མཁྲིས་པ་ཚད་པ་གཙོ་བོར་ཟུང་བཟུང་།། སྙིང་སྲོག་ལོང་ལ་རླུང་ཉིད་གཙོ་བོར་ཟུང་བཟུང་།། ཁོང་ནད་ཀུན་ལ་ཕོ་བ་གཙོ་བོར་ཟུང་བཟུང་།། ཚད་ནད་བསིལ་གྱིས་མ་ཐུབ་ལོག་གནོན་དྲོད།། གྲང་ནད་དྲོད་ཀྱིས་མ་ཐུབ་ལོག་གནོན་བསིལ།། ཚིག་འདི་དཔེ་ལ་མ་བཞག་དོན་ལ་ལོང་།། དོན་འདི་ཡལ་བར་མ་བཏང་སེམས་ལ་ཆོངས།། མན་ངག་ཁ་ཁྱེར་མ་བྱེད་དོན་ལ་ལོང་།། སྨན་དཔྱད་ཤེས་ལོ་མ་བྱེད་རྟོག་དཔྱོད་གཟོབས།། མི་སྲོག་ཚོད་ལེན་མ་བྱེད་གདེངས་ལྡན་སློབས།། ལག་འཛུད་མ་སྔ་ནད་ཀྱི་སྐད་ལ་དྲིས།། དཔྱད་སྙིང་མ་ཆེ་སྨན་པའི་ལག་དགྲས་འཕུང་།། རི་ཐང་མཚམས་སུ་སྤྱང་སྟེ་ཁྲ་འདྲས་འདྲདགོས།། ནད་ཟོ་ལེན་དུས་གླེན་ཏེ་ལུག་འདྲས་འདྲདགོས།། ནད་གཉའ་གཅོག་དུས་སྡར་ཏེ་ཝ་འདྲས་འདྲདགོས།། དཔྱད་ལོག་བྱེད་དུས་དཔའ་སྟེ་སྟག་འདྲས་འདྲདགོས།། ཞེས་གསུངས་སོ།།དེ་ནས་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས།། རོ་ནུས་ཞུ་རྗེས་སྦྱོར་བ་མི་དགོས་བའི།། གཅིག་གིས་ནད་སེལ་སྨན་མཆོག་ཡོད་དམ་མེད།། སྦྱར་བའི་སྨན་ལ་གང་གང་མཆོག་ཏུ་འགྱུར།། དེ་བཞིན་ཟས་སྤྱོད་ཀུན་གྱི་མཆོག་གང་ལགས།། འཚོ་མཛད་སྨན་པའི་རྒྱལ་པོས་བཤད་དུ་གསོལ།། ཞེས་ཞུས་པས། སྟོན་པ་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཡིད་ལས་སྐྱེས།། ཁྱོད་ཀྱིས་ཞུས་པའི་དོན་ལ་ལན་མེད་ན།། ཉན་ཐོས་འགོག་པའི་གོལ་སར་ཤོར་ར་རེ།། དེ་ཕྱིར་དྲིས་ལན་བཤད་ཀྱིས་གུས་པས་ཉོན།། ནད་རྣམས་ཀུན་ལ་ཨ་རུ་ར་ཉིད་མཆོག། རླུང་ལ་རུས་ཁུ་བུར་རྙིང་སྒོག་སྐྱ་མཆོག། མཁྲིས་པར་ཏིག་ཏ་གསེར་གྱི་མེ་ཏོག་མཆོག།བད་ཀན་ན་ལེ་ཤམ་དང་སྦྲང་རྩི་མཆོག། ཁྲག་ལ་བ་ཤ་ཀ་དང་ཧོང་ལེན་མཆོག། བད་ཀན་སྨུག་པོའི་ནད་ལ་ཅོང་ཞི་མཆོག།མ་ཞུ་བ་ལ་ཁ་རུ་ཚ་ཉིད་མཆོག། སྐྲན་གྱི་ནད་ལ་རྡོ་ཐལ་བསྲེགས་ཁུ་མཆོག། དམུ་རྫིངས་ནད་ལ་དར་ཡ་ཀ་ཉིད་མཆོག། སྐྱ་རྦབ་ནད་ལ་ད་ལིས་ལྕགས་ཕྱེ་མཆོག། འོར་གྱི་ནད་ལ་སྲད་དཀར་བ་ཆུ་མཆོག། གཅོང་ཆེན་ནད་ལ་ཤ་ཆང་འོ་མ་མཆོག། རིམས་ལ་པར་པ་ཏ་དང་གླ་སྒང་མཆོག། འཁྲུགས་ལ་ཙན་དན་དཀར་པོ་ཧོང་ལེན་མཆོག། ཚད་པ་ཀུན་ལ་གི་ཝཾ་མཆོག་ཏུ་བཤད།། དུག་ལ་ཨ་རུ་ར་དང་ཉུང་མ་མཆོག། ཤ་ཡི་དུག་ལ་བྱིའུ་ལ་ཕུག་མཆོག། གཉན་ནད་ཀུན་ལ་གུ་གུལ་གླ་རྩི་མཆོག།མིག་ལ་སྐྱེར་པའི་ཁཎྡྲི་འབྲས་གསུམ་མཆོག། ཁ་ཡི་ནད་ལ་མངར་གྱི་མཁུར་བཀང་མཆོག། སྙིང་གི་ནད་ལ་ཛཱ་ཏི་ཕ་ལ་མཆོག། གློ་བའི་ནད་ལ་ཅུ་གང་མཆོག་ཏུ་བཤད།། མཆིན་པའི་ནད་ལ་གུར་གུམ་བྲག་ཞུན་མཆོག། མཆེར་ནད་ཀ་ཀོ་ལ་དང་དྲོད་སྨན་མཆོག། མཁལ་མའི་ནད་ལ་སུག་སྨེལ་མཆོག་ཏུ་བཤད།། ཕོ་བའི་ནད་ལ་སེ་འབྲུ་མཆོག་ཡིན་ནོ།། གཅིན་སྙི་སྐྱུ་རུ་ར་དང་ཡུང་སྐྱེར་མཆོག། ཆུ་སྲི་རྒྱ་ཚ་གསེར་གྱི་བྱེ་མ་མཆོག། སྐྱུག་ལ་འབྲས་ཡོས་འཁྲུ་ལ་དུག་ཉུང་མཆོག། གློ་ལ་ཨ་ཀྲོང་ཀཎྡྲི་ཀ་རི་མཆོག། གློ་རྡོལ་རྒྱ་སྐྱེགས་སྲན་མའི་མེ་ཏོག་མཆོག། སྐོམ་པའི་ནད་ལ་སོ་ཕག་བསྲེགས་ཁུ་མཆོག། རྩིབ་ལོགས་གཟེར་ལ་པུཥྲྀར་མཱུ་ལ་མཆོག། གཞང་འབྲུམ་དར་བ་སྲིན་ལ་བྱི་ཏང་ག། གླང་ཐབས་ཐང་ཕྲོམ་ཁོང་འབྲས་འབམ་པོ་མཆོག། དྲེག་ལ་སླེ་ཏྲེས་གྲུམ་བུར་བོང་ཁྲག་མཆོག། ཆུ་སེར་དངུལ་ཆུ་མཛེ་ལ་སེང་ལྡེང་མཆོག། སྨྱོ་ལ་མར་རྙིང་བརྒྱལ་ལ་ཆུ་ཕྲུ་མཆོག། གཉིད་མེད་འོ་མ་ལྐོག་ནད་ཉ་ཁུ་མཆོག། མེས་འཚིག་རྨ་ལ་སིནུཾ་ར་ཉིད་མཆོག། རུས་ཆག་སྦལ་རྒྱབ་རུལ་གཅོད་དངུལ་ཐལ་མཆོག། ཁྲག་གཅོད་སྤྲུ་འབྲུ་རྨ་ལ་དོམ་མཁྲིས་མཆོག། སྦྱར་སྨན་རྒྱས་ཚད་ག་པུར་རྒྱལ་བློན་མཆོག། རིམས་ཀྱི་ནད་ལ་དེ་བ་ལྔ་སྦྱོར་མཆོག། འཁྲུགས་ཀྱི་ནད་ལ་ག་པུར་བདུན་པ་མཆོག། རྙིངས་ཚད་ཀུན་ལ་ཉི་ཤུ་རྩ་ལྔ་མཆོག། ཚད་པ་ཀུན་ལ་གཙོ་བོ་བརྒྱད་སྦྱོར་མཆོག། ཚ་གྲང་འདྲེས་ལ་ཅུ་གང་བདེ་བྱེད་མཆོག། ལྡན་ཚད་འབྱེད་ལ་མ་ནུ་བཞི་ཐང་མཆོག། ཁྲག་ངན་འབྱེད་ལ་འབྲས་བུ་གསུམ་ཐང་མཆོག། དུག་ནད་ཀུན་ལ་མང་སྦྱོར་ཆེན་མོ་མཆོག། དང་ག་འབྱེད་ལ་སེ་འབྲུ་བཞི་པ་མཆོག། མེ་དྲོད་སྐྱེད་ལ་རྒོད་མ་ཁ་ཕྱེ་མཆོག། གྲང་ནད་ཀུན་ལ་སེ་འབྲུ་བརྒྱད་པ་མཆོག། སྐྲན་ནད་ཀུན་ལ་འཕྲུལ་གྱི་ཐལ་སྨན་མཆོག། སྨུག་པོའི་ནད་ལ་གཉེན་པོ་བདུན་སྦྱོར་མཆོག། སྙིང་རླུང་ནད་ལ་བཙན་དུག་སྨན་མར་མཆོག། ཆུ་འགགས་ནད་ལ་ཚ་ཚྭསྦྱོར་ཆེན་མོ་མཆོག། མིག་གི་ནད་ལ་གསལ་བྱེད་དགུ་པ་མཆོག། གཉན་སྲིན་ནད་ལ་བྱ་ཁྱུང་ལྔ་པ་མཆོག། ཁྲག་ནད་དཔྱད་མཆོག་ཀུན་ལ་གཏར་ག་མཆོག། མཁྲིས་པའི་ནད་ལ་ཁྲུས་དང་སྦྱང་བ་མཆོག། བད་ཀན་ནད་ལ་སྐྱུགས་དང་མེ་བཙའ་མཆོག། རླུང་གི་ནད་ལ་བསྐུ་མཉེ་འཇམ་རྩི་མཆོག། འབྲས་ཀྱི་ནད་ལ་ལུམས་དང་མེ་བཙའ་མཆོག། ཟས་ཀྱི་མཆོག་ཏུ་ནས་རྙིང་རྩམ་པ་མཆོག། སྐོམ་གྱི་མཆོག་ཏུ་ཤོང་དཀར་རྩེ་མོ་མཆོག། མི་རྔུལ་བཅག་པ་སྤྱོད་ལམ་མཆོག་ཡིན་ནོ།། དེ་ལྟར་ནད་གཞི་རྣམས་ཀྱི་སྨན་གྱི་མཆོག། བཤད་པས་མཐུ་སྟོབས་ནུས་པ་ཕུལ་དུ་ཕྱིན།། ཞེས་གསུངས་སོ།། དེ་ནས་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས།། ད་ལྟ་དུས་བཟང་སྤྱོད་པ་བཙུན་གྱུར་ཀྱང་།། ལྔ་བརྒྱའི་དུས་ན་ནད་ངན་དར་བའི་ཚེ།། དེ་དུས་བདག་གཞན་སྲུང་ཐབས་ཡོད་དམ་མེད།། མེད་ན་གཞན་གསོ་རང་ལ་མི་འབྱུང་ངམ།། ཡོད་ན་འགྲོ་བའི་མགོན་པོས་བཀའ་སྩལ་འཚལ།། ཞེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཡིད་ལས་སྐྱེས།། བདེན་ནོ་ཁྱོད་བདེན་ངས་བཤད་གུས་པས་ཉོན།། ལན་ཅིག་ལྔ་བརྒྱའི་ཐ་མར་བབ་དུས་ན།། འབྱུང་པོ་རྣམས་ཀྱིས་གློ་བུར་ཡེ་འདྲོག་གཏོང་།། མ་མོ་མཁའ་འགྲོས་ནད་ངན་ཡམས་སུ་འབེབས།། མུ་སྟེགས་གདུག་པས་རྫས་ཀྱི་སྦྱོར་བ་བྱེད།། དེ་དུས་བདག་གཞན་སྲུང་བ་ཤིན་ཏུ་གཅེས།། དང་པོ་འབྱུང་པོའི་གདོན་ཚོགས་སྲུང་བ་ནི།། ག་པུར་བཟང་པོ་དྲུག་ལ་སོགས་པ་ཡི།། གླ་རྩི་ཤིང་ཀུན་གུ་གུལ་ཤུ་དག་སོགས།། དྲི་དང་ལྡན་པའི་སྨན་ནི་ཐམས་ཅད་དང་།། བ་བླ་ལྡོང་རོས་མུ་ཟི་བྱ་རྒོད་སྤོས།། ས་རྡོ་སྔོ་སྨན་དྲི་ཅན་ཐམས་ཅད་དང་།། བསེ་དྲི་ཅན་དང་བཤུལ་ཆགས་ཤ་རྣམས་དང་།། བྱ་གཅན་ར་ལུག་ལ་སོགས་སེམས་ཅན་གྱི།། སྤུ་བྲུན་ཆུ་དང་སེན་མོ་མཁྲིས་པ་དང་།། སྦལ་སྦྲུལ་ཉ་དང་ལྗོངས་ལྕོངམོ་ལ་སོགས་ཤ། འབྲུ་སྣ་དུག་སྣ་ཁྲག་སྣ་ཀུན་བསགས་ལ།། ཞིབ་ཏུ་བཏགས་ལ་རིལ་བུ་དྲིལ་བྱས་ཏེ།། དུ་བས་བདུག་དང་ཁུ་བ་བསྐུ་བ་དང་།། ཁོང་དུ་བཏང་བས་འབྱུང་པོ་ཐམས་ཅད་འབྱེར།། སྟེང་གདོན་འོག་གདོན་ཀུན་དང་རིམས་རྣམས་ཐུབ།། ཁྱད་པར་རིམས་སྲུང་སྤྱི་དང་བྱེ་བྲག་གཉིས།། སྤྱི་རུ་སྲུང་ཐབས་སྔགས་དང་རྫས་གཉིས་ཏེ།། དང་པོ་རང་ཉིད་མཐུ་སྟོབས་བདག་པོར་བསྐྱེད།། ཨེཾ་ཧྲི་དེ་བ་ལེ་ཁ་ཕུར། ཨ་ཏི་ཕུར། བི་ཕུར་སོད། བི་ཧུབ་སོད། མུར་ཡ་སོད། ཀུ་མ་ར་ཡ་སོད། ལ་ཙི་སོད། བནྡྷ་བནྡྷ་སོད། བཛྲ་པ་ནེ་པ་ནེ་སོད། ཧྲི་དེ་ཧྲི་དེ་སོད། ཏི་ཀ་ཛྙ་ན་སོད། མ་མ་དུ་རུ་སོད། པུ་ཙ་ཡོ་གི་ནི་སོད། བརྒྱ་རྩ་བརྒྱད་ཀྱིས་རྒྱུན་གྱི་ཡི་དམ་བྱ། ཡུལ་ཕྱོགས་ཡོད་ན་སུམ་བརྒྱ་བཟླ་བར་བྱ།། ནད་པ་གསོ་ན་སུམ་ཡར་མ་ཆག་བཟླ།། ཨེཾ་མུག་ཐུམ་སརྦ་མུག་ཐུམ། ཏེ་ཙ་མུག་ཐུག་ཐེ་ཕུར་སོད། ནི་ཕུར་སོད། བྱ་རྐང་སོད། ནད་སོད། རིམས་སོད། དལ་སོད། ཡམས་སོད་སྲོཾཧྭོ། སུམ་ཡར་བརྒྱ་རྩ་མཆིལ་མ་སྲིན་ལག་གིས།། རྐང་མཐིལ་དྲི་མ་སྣུར་ལ་སྣ་སྒོར་བྱུག། རྫས་སྲུང་བཙན་དུག་ཆོས་སྨན་གླ་རྩི་དང་།། ཤུ་དག་གུ་གུལ་མུ་ཟི་བྱ་རྒོད་སྤོས།། སྒོག་སྐྱ་དྲི་ཆེན་ཆུ་ཡིས་རིལ་བུ་བྱ།། ནང་རེ་སུམ་ཡར་གོང་བཞིན་ཤེས་པར་བྱ།། བཙན་དུག་གླ་རྩི་མུ་ཟི་ཤུ་དག་དང་།། གུ་གུལ་དཀར་ནག་གཉིས་དང་སྒོག་སྐྱ་ཡི།། ཁྲོལ་བུའི་ཐུམ་བུ་སྐེར་བཏགས་སྣ་སྒོར་བདུག། དེ་ཡིས་རིམས་ནད་བསྐལ་པའི་མེ་འབར་ཡང་།། རང་ལུས་རྡོ་རྗེ་འདྲ་སྟེ་ཅིས་མི་ཚུགས།། ལྟོ་སྟོང་སེམས་ཞུམ་དུས་སུ་ནད་དྲི་བསྲུང་།། འགྲངས་ངོམས་སྲུང་བས་དཔའ་སྐྱེད་དེ་དུས་བལྟ།། དུས་ཐུག་བདུད་རྩི་གཉིས་ཀྱིས་སྒོ་དགུ་བསྡམ།། སྲུང་བ་མི་ལྡན་རིམས་ནད་བག་མེད་འཆོས།། དམག་གདོང་གཅེར་བུར་རལ་ཁ་བྱེད་དང་མཚུངས།། ཁྱད་པར་ཚ་རིམས་སྲུང་བ་ནི་རང་ཡི་དམ་དུ་བསྒོམས་ལ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྡོ་རྗེ་བླ་མ་འོད་ཀྱི་རྒྱལ་པོ་ལ་ཕྱག་འཚལ་ལོ།། བདག་ཅག་རིམས་ནད་ཐམས་ཅད་ལས་བསྲུང་དུ་གསོལ། བསྐྱབ་ཏུ་གསོལ། མེད་པར་མཛད་དུ་གསོལ། རྨུགས་པ་སངས་པར་མཛད་དུ་གསོལ། ཏདྱ་ཐཱ། ཨེཾ་བཛྲེ་བཛྲེ་མཧཱ་བཛྲེ། སརྦ་བྱ་ཏི་ཏ་ཧ་ན་ཧ་ན་བཛྲ་ན་སྲོཾཧྭོ། ཐུང་ཟིམ་བུ་ཐུང་ཟིམ་བུ་སོད། ལང་ལང་ལིང་ལིང་སོད། མེ་མེ་སོད། ལམ་ལམ་སོད། དབལ་སོད། ཚ་བ་མེ་ཡི་དབལ་སོད། བརྒྱ་རྩ་བརྒྱད་བཟླས་ལ་སྣར་གདབ། ག་པུར་བཟང་དྲུག་ཙན་དན་བསེ་རུ། ཨ་ག་རུ། ཨུཏྦལ་གླ་རྩི་ག་དུར་ཀ་ར་དྲི་ཆུའི་རིལ་བུ་ནང་མ་རེ་བཏང་ངོ་།། ག་པུར་ཛཱ་ཏི་ཙན་དན་སྣར་བདུག་གོ་དང་འབྲུམ་པ་སྲུང་བ་ནི་ཙན་དན་གླ་རྩི་ཤིང་ཀུན་ཤུ་དག་མུ་ཟི་དྲི་ཆུ་ཁོང་དུ་བཏང་། ཙན་དན་གླ་རྩི་གུར་གུམ་མུ་ཟི་གུ་གུལ་སྒོག་སྐྱ་དྲི་ཆུ་ལུས་ལ་བྱུག  གླ་རྩི་ཤིང་ཀུན་གུ་གུལ་རྡོ་དྲེག་སྐྱེར་པ་སྒོག་སྐྱའི་དུ་བས་བདུག ཧེ་བྷ་ག་ཝན་མཉྫུ་ཤྲཱི་ཀུ་མཱ་ར་སརྦ་ཏ་ཐཱ་ག་ཏ་ཡ་སམྦུད་ཏད་ཏ་སརྦ་ཏ་ཐཱ་ག་ཏ་ན་གེ་ཏི། སརྦ་ས་ཏ་ནན་སྲོཾཧྭོ། ཨེཾ་ཏདྱ་ཐཱ། ཤམ་མེ་ཤམ་མེ་ཤམ་ཤམ་ནེ་ཡ་སྲོཾཧྭོ། སྲན་མ་ལ་བཟླས་སྐེར་གདགས་ནང་རེ་བཟླས་སོ།། གག་ལྷོག་སྲུང་དང་བ་ནི་བྱ་ཁྱུང་དུ་བསྒོམས་ལ། ཨེཾ་ལྷང་ལྷང་ཙེར་ཙེར་ཀྲི་ཏ་ཀྲི་ཏ། ཤག་ཤག ཤེལ་ཤེལ། ཐུམ་ཐུམ། བེ་དུ་བེ་དུ། ལྷོག་པའི་བུ་སྤུན་བདུན་དང་། འབྲས་ཀྱི་བུ་སྤུན་གསུམ་དང་། མཛེ་སོ་ཧ་མཛེ་སོ་ཧ། ད་ཧོ་ད་ཧོ་བྱ་ཀྲི་བྱ་ཀྲི། མུགས་རྒོད་པོ་ཆིག་བདུད་སྲོཾཧྭོ། ནང་རེ་བཟླས། ཕག་སྣ་དང་འཛིམ་པ་ཤུ་དག་གུ་གུལ་གླ་རྩི་མུ་ཟི་ཕུར་པ་གདགས་བྱ་ཁྱུང་རིལ་བུ་ཁོང་དུ་བཏང་ངོ་རྒྱུ་གཟེར་སྲུང་བ་ནི་རང་ཤིའི་ཐོད་པ་ཆོས་སྨན་དྲི་ཆུར་སྦྱངས་ལ་བཏང་། ག་པུར་བཙན་དུག་གླ་རྩི་ཛཱ་ཏི་སྒོག་སྐྱ་སྤང་སྤོས་ཡུངས་ཀར་ཤུ་དག་རྣམས་མགུལ་དུ་བཏགས། ཏདྱ་ཐཱ། ཙ་པ་མ་རུ་རུ་ཨཱོ་ཤུག་མེ་ཨཱོ་ཡུརྫྙཱ་ན་བྲུམ་ནི་སམ་པུཥྚོ་ཀུ་རུས་སིདྔྷ་བདག་ལ་སྲུངས་ཤིག ཅེས་ནང་རེ་ལ་བརྒྱ་རྩ་བཟླས་སོ་ཆམ་པ་བསྲུང་བ་ནི། ཨེཾ་ཨ་ལོ་དཀར་པོ་ཤེ་ས་ཧཱུ་ཕྊྃ། ཅེས་བཟླས་ཤིང་སྣར་འབུད་དོ།། རང་གིས་སྲུང་བའི་དམ་ཚིག་མ་ཐུབ་པར།།རིམས་འགོས་དྲང་སྲོང་བཀའ་ལ་ཡིད་མི་ཆེས།། གཞུང་བཞིན་སྤྱོད་དང་བསླུས་ན་ང་རང་ཤེས།། རྫས་སྦྱོར་དུག་གི་སྲུང་ཐབས་རྣམ་པ་གསུམ།། དུ་བ་སྣ་སྒོ་རེག་པ་ཆུ་སྒོ་བསྲུང་།། རླངས་པ་ཉི་ཟེར་བསྲུང་བ་གཉིས་ཀ་གཅེས།། ཟས་ལ་བསྐུར་བ་ཁོང་སྲུང་འདི་ཉིད་ལ།། ཆར་མའི་ཉུང་མ་ཁ་ཚོས་བྱས་པ་དང་།། ཨ་རུ་གསེར་མདོག་ཡུངས་ཀར་སུམ་ཆ་མཉམ།། སྒོག་གཅིག་ཆུས་སྦྲུ་རིལ་བུས་ཞག་རེ་ཐུབ།། ཆག་ཚད་ངོས་འཛིན་ཞུ་ལོང་མེད་པར་སྐྱུག། ཟས་ལ་བསྐུར་བ་ཁོང་སྲུང་འདི་ཉིད་ལ།། ཆར་མའི་ཉུང་མ་ཁཎྡྲི་བྱས་པའམ།། འདྲེད་བྱེད་མི་དང་ཤ་བའི་ཚིལ་གཉིས་འཁྲེན་བྱེད་ཡུངས་ཀར་རྡོག་པོ་སུམ་ཅུ་དང་བྱ་ར་བ་གླ་རྩི་རིལ་མ་ཙམ།། དོན་སྣོད་སྒོ་སྲུང་ལ་བཟང་དྲུག་དང་ཚ་བ་གསུམ་ཐུན་རེ་མན་ངག་སྨན་གསུམ་ནི་སྦལ་པའི་སྨད་གསེར་མདོག་བྲག་ཞུན་མཐེབ་ཙམ་རེ་སྦྱར།། རིལ་བུ་བཞི་ལྔ་ཚེས་གཅིག་ནང་པར་ནས།། རྩ་ཁ་ཕྱེ་ལ་ཞག་དགུ་རེ་རེ་བསྐྱེད།། སྔ་དྲོའི་ཟས་བསྲུང་ལྟོ་འཇམ་དྲོད་བཅུད་བསྟེན།། རྫོགས་ནས་ནང་མ་གསུམ་དུ་རྩ་ཁ་བསྡམ།། དེ་ཡིས་ལོ་རེའི་བར་དུ་ཉམ་ང་མེད།། སྨན་མཆོག་རྒྱལ་པོ་ཀུན་གྱི་གཉེན་པོ་རྣམ་རྒྱལ་འཇིགས་མེད་གང་རྙེདདང་།། བྱ་ར་བ་དང་འདྲེད་བྱེད་འཁྲེན་བྱེདགླ་རྩི་སྒོག་གཅིག ཉུང་གཞི་ཅོང་ཞི་བདུད་རྩི་གསུམ་གྱི་མར་ཁུ། ཡུངས་ཀར་དང་།། དོན་སྣོད་ཤ་རུས་རྩ་ཡི་སྒོ་སྲུང་བཟང་དྲུག  སེ་འབྲུ་པ་ཏོལ་དུག་ཉུང་པི་ལིང་སྡིག་སྲིན། བ་རུ་ཡུང་བ། སྤྱི་ཞུར། འབྲི་ཏ་ས་འཛིན་ཤིང་མངར་སྐྱུ་རུ་རེ་སྐོན་དང་།། རླུང་མཁྲིས་བད་ཀན་ཁྲག་དང་ཆུ་སེར་སྲིན་རྣམས་ལ་སླེ་ཏྲེས། ཏིག་ཏ། མ་ནུ་འུ་སུ། བ་ཤ་ཀ་ཚ་ལ། སོ་ར་སེང་ལྡེང་། མ་རུ་ཙེ་དང་བྱི་ཏང་ག་སོགས།། འདུ་བ་འཁྲུགས་པའི་ཁ་གནོན་གཉེན་པོ་དང་།། དབྱིག་དུག་སྲུང་དང་འཇོམས་པའི་གཉེན་པོ་གསེར་གཡུ་ཟངས་ལྕགས་མུ་ཏིག་བྱུ་རུ་དངུལ་བདུན་སྲན་ཙམ། ཚ་ལ་མུ་ཟི་བསེ་རུ་བྲག་ཞུན་བཞི་ཐུན་རེ་དང་།། རྡོ་དུག་སྲུང་དང་འཇམ་འཇོམསཔའི་གཉེན་པོ་སྦལ་རྒྱབ་གངས་ཐིགས་མཚལ་ཅོང་ཞི་བཞི་པོ་ཐུན་གྱི་སུམ་ཆ་རེ། ཟེ་ཚ་རྒྱ་ཚ་ཚ་ལ་གསུམ་ཐུན་རེ་དང་།། རྩི་དུག་སྲུང་དང་འཇོམས་པའི་གཉེན་པོ་དུག་སྣ་ཚོགས་ཚད་ནས་ཙམ་རེ། གླ་རྩི་ཆོས་སྨན་ཧ་བོ་བོང་ང་གསུམ་ཐུན་རེ་དང་།། སྔོ་དུག་སྲུང་དང་འཇོམས་པའི་གཉེན་པོཞོ་ཤ་གསུམ་ཐར་ནུ་དུར་བྱིད་ཐང་ཕྲོམ་འོལ་མོ་སེ་བ་མཁལ་གཟེ་མ་རྣམས་རིལ་མ་ཙམ་རེ། ཨུག་ཆོས་ལུག་མིག་སྤྲ་ཐོག་ཁུར་རྩ་ཨ་བི་ཥ་རེ་རལ་རྣམས་ཐུན་རེདང་།། ཤ་དུག་སྲུང་དང་འཇོམས་པའི་གཉེན་པོབུ་མོ་ལོ་བཅོ་ལྔ་ལོན་པའི་མཆིན་པ། སྐྱེས་པ་གྲིར་ཤི་བའི་ཉྭ་ཤ ཁྱི་གུ་མིག་མ་བྱེ་བ་དང་རེའུ་རྒྱ་བོ་ཞོ་འཐུང་གི་ཤ ཕག་གློ་ཁྲའི་མཆིན་པ། བྱ་མཚའ་ལུ་དང་། རྨ་བྱའི་ཤ་རྣམས་མ་རུལ་བ་རིལ་མ་ཙམ་རེ། མི་རྟ་ཁྱིའི་ཕྱ་ཚན་བྱིའུ་ལ་ཕུག་རྦ་བྱེའི་ཤ་མི་ར་ཉ་ཕག་དོམ་མཚའ་ལུ་རྣམས་ཀྱི་མཁྲིས་པ་རྣམས་ཐུན་རེ་དང་།། དུག་ནད་སྤྱི་འཇོམས་འཁོར་གྱི་དམག་མི་ཁྱུང་སྡེར་དཀར་སྨུག་བོང་ང་དཀར་དམར་རྩད་རྒུ་ཐུབ་ཡུག་ཤིང་གང་ཆུང་སྤང་རྩི་སྤང་རྒྱན་སྤང་སྤོས་བྲག་སྤོས་འོམ་བུ་གོ་སྙོད་སྟག་ཤ་སེ་རྒོད་སྐྱེར་ཤུན་ཧ་བོ་རྣམས་ཐུན་རེ་དང་།། ཚ་བ་སྤྱི་བཅོས་སྨན་ག་པུར་ཙན་དན་གི་ཝཾ་གསུམ་ཐུན་རེ། རྒྱས་པར་བྱེད་ན་སྨན་ཀུན་ཚོགས་པར་བསག འབྲིང་དུ་བྱེད་ན་རྡོ་རྩི་སྔོ་གསུམ་སྲུང་བྱེད་བཞག་ལ་གཞན་རྣམས་རྩི་བཞིན་བཏགས།། དར་ལ་བཙགས་ལ་ཉུང་མའི་ཁཎྡྲི་ཡི།། རིལ་བུ་སྲན་སྦོས་ཙམ་དྲིལ་གྲིབ་སྐམས་བྱ།། ཚེས་གཅིག་ནང་མ་གསུམ་ནི་དྲི་ཆུས་འཕུལ།། དེ་ཡིས་ཟླ་བ་རེ་རེའི་བར་དུ་ཐུབ།། གསོ་ཡང་རང་གྲོལ་སྨན་གྱི་རྒྱལ་པོ་ཡིན།། ཆར་ཉུང་འབྲས་བུ་གསུམ་དང་རྩ་བ་ལྔ།། གཙོ་བོ་དྲུག་ལ་སྨན་མར་ཚུལ་བཞིན་སྦྱར།། དེ་ལ་གོང་གི་སྨནརྒྱས་འབྲིང་གང་རུང་ངམ། བསྡུ་ན་རིན་པོ་ཆེ་དྲུག  བཟང་དྲུག་ཕྱ་ཚན་གསུམ་བོང་ང་གསུམ་ཁྱུང་སྡེར་རྩད་ཡུང་བ་བཙན་དུག་རྣམས་ཀྱིཕྱེ་ཁ་ཚར་བཏབ།། མངར་དང་སྦྱར་ལ་སྟོན་ཟླ་ཐ་ཆུང་བཏང་།། ཟད་ཀའི་དྲི་ཆེན་དྲི་ཆུ་བར་པ་གཉིས།། འཁར་གཞོང་ནང་དུ་ཆོས་སྨན་གསུམ་སྦྱར་ལ།། རས་གཙང་སྣོད་བླུག་མཁན་གསེབ་ཞག་བདུན་བསྲུལ།། གྲིབ་ལྷགས་སྐམས་ཕྱེ་ཐུན་བདུན་ཆང་གིས་འཕུལ།། དུག་རིགས་མ་ལུས་མ་ཤིའི་བར་དུ་ཐུབ།། ཀུན་ལ་ཟས་དང་སྤྱོད་ལམ་འཇིག་རྩི་བསྲུང་།། ནད་དང་སྦྱོར་བ་འཇིག་རྩི་བྱུང་ན་བསྐྱར།། དུ་བ་རླངས་པ་རིམས་དྲི་སྣ་ནས་འཇུག། དེ་ཕྱིར་ཀུན་ལས་རྒྱལ་བའི་རྩ་སྒོ་བསྲུང་།། ག་པུར་དྲི་ཆུ་ཅོང་ཞི་ལག་མཐིལ་སྦྱར།། ནང་མ་བདུན་དུ་སྣར་རྔུབ་དེ་རྗེས་ལ།། ཛཱ་ཏི་གུར་གུམ་ནཱ་ག་གེ་སར་དང་།། སྤང་རྒྱན་ཙན་དན་དམར་པོའི་དུ་བས་བདུག། ཁེགས་རྟགས་མགོ་ལུས་ལྕི་འདར་ཕྲུམ་སེར་ཁྱེར།། དུག་གདོན་རིམས་རྣམས་སྲུང་བའི་མཆོག་ཏུ་བཤད།། བ་སྤུའི་སྒོ་སྲུང་ཙན་དན་མར་ཁུ་དང་།། ཟོ་མར་རྩི་མར་ཤིང་མངར་མི་ཚིལ་རྣམས།། བསྡུས་ཁུ་དྲོད་མ་ཡལ་བའི་ནང་དག་ཏུ།། ཛཱ་ཏི་གུར་གུམ་གླ་རྩི་སྤང་སྤོས་དང་།། སྤང་རྒྱན་སྦྱར་ཏེ་ལུས་ཀུན་བཀྲུས་རྗེས་བྱུག། ཡང་ན་གླ་རྩི་ཕག་ཚིལ་སྦྲུལ་ཤ་དང་།། སྡིག་སྲིན་མུ་ཟི་ར་ཁྲག་བསེ་མར་ཁུར།། ཡང་ན་ག་པུར་བསིལ་གསུམ་ཙན་དན་དང་།། གླ་རྩི་ཆོས་སྨན་ཕག་ཚིལ་ར་ཁྲག་བྱུག། བ་སྤུའི་སྒོ་འགེགས་ལུས་སྦྲིད་ལྕི་བ་ཡིན།། རེག་པ་ཉི་ཟེར་རླངས་ཀྱིས་ཉམ་མི་ང་།། ཞེས་གསུངས་སོ།། དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས།། རྒྱུད་འདིར་མ་ཚང་གསོ་དཔྱད་མི་བདོག་གམ།། དེ་སྐད་ཞུས་པའི་དོན་ལ་ལན་གསུངས་པ།། བདེ་གཤེགས་རྣམས་ཀྱིས་སྤྲུལ་པས་འགྲོ་དོན་དུ།། རྒྱ་གར་ཡུལ་དུ་སྨན་གྱི་སྦྱོར་བ་གསུངས།། རྒྱ་ནག་ཡུལ་དུ་མེ་བཙའ་རྩ་སྦྱོངས་གསུངས།། དོལ་བོའི་ཡུལ་དུ་གཏར་ག་གཙོ་བོར་བསྟན།། བོད་ཀྱི་ཡུལ་དུ་རྩ་ཆུའི་བརྟག་པ་བསྟན།། ལྷ་ཡི་འཁོར་ལ་གསོ་དཔྱད་འབུམ་པ་གསུངས།། དྲང་སོང་འཁོར་ལ་ཙ་ར་ཀ་སྡེ་བརྒྱད།། མུ་སྟེགས་འཁོར་ལ་དབང་ཕྱུག་ནག་པོའི་རྒྱུད།། ནང་པའི་འཁོར་ལ་རིགས་གསུམ་མགོན་པོའི་སྐོར།། གསོ་དཔྱད་རྒྱུད་འདིར་ཐམས་ཅད་འདུས་པར་བསྟན།། འདིར་མ་འདུས་པའི་གསོ་དཔྱད་གཞན་མེད་དེ།། འཕགས་པའི་ཐུགས་རྗེ་ཕྱོགས་རིས་མེད་མོད་ཀྱང་།། གང་ཟག་མོས་པའི་མཐོང་སྣང་སོ་སོར་ཤར།། དཔེར་ན་མཁའ་ལ་ཟླ་བ་གཅིག་ཤར་ན།། ཆུ་ཡི་སྐྱོགས་རེར་ཟླ་བ་རེ་རེ་བཞིན།། གཅིག་ཏུ་གསུངས་ཀྱང་སོ་སོས་དུ་མར་གོ། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རྒྱུད་བཞིའི་མཇུག་དོན་བསྡུས་པའི་ལེའུ་སྟེ་ཉི་ཤུ་རྩ་དྲུག་པའོ།། །།

X