//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > ཕྱི་མ་རྒྱུད། > ནང་དོན།

ལེའུ་ཉེར་བདུན་པ། རྒྱུད་ཡོངས་སུ་གཏད་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-27 16:47:58 ཀློག་གྲངས། 30 

      དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས།། དང་པོ་ནད་ཤུགས་མ་རྫོགས་མངོན་ཚུལ་དུས།། གསོ་བ་བྱས་ཀྱང་ལམ་ནས་མི་ཟློག་ཅིང་།། བར་དུ་ནད་རྒྱས་གཉེན་པོས་འཕྲལ་མི་ཆོམས།། ཐ་མར་ཡན་ལག་བཅུ་གཉིས་ལྡན་གྱུར་ཀྱང་།། ནད་ལས་མི་གྲོལ་སྲོག་ནི་ཟད་པར་སྣང་།། གཞན་དག་དེ་ལས་གོ་ལྡོག་འགྱུར་བའི་ཕྱིར།། གསོ་རིག་སྨན་གྱི་དགོས་པ་ཅི་ཞིག་བྱ།། འཚོ་མཛད་སྨན་པའི་རྒྱལ་པོས་ཐེ་ཚོམ་སོལ།། ཞེས་ཞུས་པ་ལས། སྟོན་པ་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། དྲང་སྲོང་ཆེན་པོ་དེ་ལ་རྟོག་མི་འཚལ།། ནད་ལ་བཞི་བརྒྱ་རྩ་བཞིར་གྲགས་པ་ལ།། བརྒྱ་དང་རྩ་གཅིག་ལྟར་སྣང་འཕྲལ་གྱི་ནད།། མ་བཅོས་རང་གར་བཞག་པས་འཚོ་བ་ཡོད།། འོན་ཀྱང་བཅོས་ན་མྱུར་དུ་བདེ་བ་སྟེར།། དཔེར་ན་འགྱེལ་བུབ་ལག་ནས་འཐེན་པ་འདྲ།། དང་པོ་མངོན་ཚུལ་ཆེ་བར་བྱུང་གྱུར་ཀྱང་།། མ་བཅོས་རང་གར་ལམ་ནས་བཟློག་པ་ཡོད།། དཔེར་ན་མཁའ་ལ་སྤྲིན་འཐིབས་ཆར་འབབ་པ།། གློ་བུར་སངས་ནས་ཐན་པར་འགྱུར་བ་འདྲ།། བརྒྱ་དང་རྩ་གཅིག་ཀུན་བརྟགས་གདོན་ཡིན་པས།། དེ་མ་བཅོས་པར་སྨན་དཔྱད་ལེན་མི་འདོད།། གདོན་བཅོས་སྨན་མེད་གྱུར་ཀྱང་འཚོ་བ་ཡོད།། དཔེར་ན་དཔུང་པ་གཡར་བའི་བཙོན་བུ་འདྲ།། བརྒྱ་དང་རྩ་གཅིག་ཡོངས་གྲུབ་ཚེ་ཡི་ནད།། མ་བཅོས་འཆི་ལ་བཅོས་ན་འཚོ་བ་ཡོད།། དེ་ཡང་དང་པོ་བར་དང་ཐ་མ་གསུམ།། ཚ་བའི་མངོན་ཚུལ་ལམ་ནས་མི་ཟློག་པ།། གཉེན་པོ་གྲོགས་ཀྱིས་ལེན་དུ་མི་སྟེར་ཕྱིར།། སྟོབས་ཆུང་གྲོགས་མེད་གསར་དུས་མི་ཟློག་མེད།། བར་དུ་ནད་རྒྱས་གཉེན་པོས་ཆོམས་པ་དཀའ།། དཔེར་ན་ཤྭ་ཡི་གདོང་དུ་རགས་བརྩིགས་པ།། ཞར་ལ་ཁྱེར་ཡང་ཞར་ལ་བསྣན་པ་ཡིས།། ཆུ་ཤུགས་ཟད་ནས་རགས་ཀྱིས་ཐུབ་པར་སྣང་།། དེ་བཞིན་ནད་རྒྱས་གཉེན་པོ་འཐབས་པ་ཡིས།། མི་ཆོམས་འདྲ་ཡང་བསྟུད་ན་ནུས་པ་ཐོན།། གྲང་རྒྱས་ལྕི་བ་གཉེན་པོས་ཆོམས་དཀའ་སྟེ།། གོ་མཆོན་མཚོནབཅས་པའི་ཚོང་པ་དཔུང་བཅས་འདྲ།། དེ་ལ་གཉེན་པོ་ཚན་ཆེ་དར་དྲག་དགོས།། བརྒྱ་དང་རྩ་གཅིག་གཞན་དབང་སྔོན་གྱི་ལས།། བཅོས་ཀྱང་མི་ཐུབ་འཆི་བའི་ནད་ཡིན་ལ།། དེ་ཡང་བསྡུ་ན་སྲོག་གཅོད་ནད་དགུར་འདུས།། ཚ་བ་ལ་ལས་འདས་དང་མ་འདས་གཉིས།། དཔེར་ན་མེ་ལོང་ཐབ་ཏུ་བཅུག་པ་འདྲ།། མ་ཞུ་ཆུས་སླེབ་ཞུ་ནས་དེས་མི་བཟློག། གྲང་བ་གཏིང་ནས་འཁར་དང་མ་འཁར་གཉིས།། དཔེར་ན་ལྡུམ་བུ་དང་ནི་སྡོང་རྒན་འདྲ།། དང་པོ་ཚོས་སླ་གཉིས་པ་ཚོས་མི་འགྱུར།། རླུང་ནད་སྲོག་རྟེན་ཆད་དང་མ་ཆད་གཉིས།། དཔེར་ན་རྐོན་པ་ནང་གི་བྱ་དང་འདྲ།། མ་ཤོར་ཟིན་ལ་ཤོར་ན་ཟིན་ཐབས་མེད།། ཟུངས་ཟད་ནད་ལ་དེ་སྲོག་གནས་པ་སྟེ།། ནད་བཅོམ་གྱུར་ན་སྲོག་ཀྱང་འཇིག་པའི་ཕྱིར།། དཔེར་ན་རྨང་གིས་མ་ཐུབ་རྩིག་པ་འདྲ།། རྣམ་པར་འཚེ་བ་གདོན་གྱིས་བླ་ཁྱེར་བ།། འཚོ་བ་འདྲ་ཡང་ངེས་པར་འཆི་བ་སྟེ།། དཔེར་ན་རྒྱུ་མ་ཕུག་པའི་མི་དང་འདྲ།། འཚོ་བའི་ཚེ་ལས་བསོད་ནམས་གསུམ་ཟད་པ།། ནད་གྲོལ་རྩ་ཤོར་འབྱུང་བ་འགག་པའི་ཕྱིར།། དཔེར་ན་ནམ་གཞུག་ཆད་པའི་ཆར་པ་འདྲ།། གཤེད་དུ་བབས་པ་ཚ་གྲང་གཉིས་འདོམ་པས།། གཅིག་བཅོས་གཅིག་སྐྱེ་གཉེན་པོ་ཀུན་མི་ལེན།། དཔེར་ན་ཐག་ཆོད་མི་ལ་གྲོས་འདེབས་འདྲ།། སྦྱོར་བ་མཚུངས་པ་རྒྱུ་རྐྱེན་གཉེན་པོ་ལོག། གང་བཅོས་གྲོགས་ཀྱི་ཐོག་ཏུ་བབ་པ་སྟེ།། དུག་ཟིན་མི་ལ་བཙན་དུག་བླུད་པ་འདྲ།། གནད་དུ་བབས་བ་སྲོག་གནས་བཅོམ་པ་སྟེ།། སྲོག་རྩ་ཆད་པས་བཅོས་ཐབས་ཅི་ལ་རྙེད།། གྲས་ཁ་བཙན་པོ་དགྲ་ལ་ཤོར་བ་འདྲ།། དྲང་སྲོང་ཆེན་པོ་ཐེ་ཚོམ་སྐྱེ་མི་རུང་།། གསོ་བྱས་མ་བྱས་མཉམ་པོར་བྱ་མི་རིགས།། འཚོ་འཆི་ཀུན་ལས་སྨན་ཡོད་མ་ཡིན་ཏེ།། ཀུན་ཏུ་སྨན་མེད་ཅེས་སྨྲ་དེ་མ་ཡིན།། མེ་སྟེང་ཆུ་བླུག་མི་སོད་ག་ལ་སྲིད།། དེ་ཡང་དམན་ན་སོད་པ་ཤིན་ཏུ་དཀའ།། རྩམ་པས་ལྟོགས་པ་མི་སེལ་ག་ལ་སྲིད།། ཆུ་ཡིས་སྐོམ་པ་མི་སེལ་ག་ལ་སྲིད།། གག་ལྷོག་གསོ་བ་མེད་པར་སུ་བདེར་འགྱུར།། ཆུ་འགགས་སྨན་དཔྱད་མེད་པར་ཅི་ལ་ཐོན།། གཉེན་པོ་མེད་པར་དུག་ཟ་སུ་ཡིས་ནུས།། མཆོག་སོགས་ནུས་པ་ལུང་ལས་གྲགས་བཞིན་སེལ།། དེ་ཕྱིར་གསོ་བ་ཐེ་ཚོམ་བཅས་མི་བྱ།། ཞེས་གསུངས་སོ།། དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་དྲང་སྲོང་ཆེན་པོ་རིག་པའི་ཡེ་ཤེས་ལགས།། མི་ན་གནས་དང་ན་བ་གསོ་དགོས་པས།། དགོས་བའི་ཐབས་ལ་འབྲེལ་བ་ཡོད་དམ་མེད།། འབྲེལ་མེད་ཆོས་ལ་སྤྱད་པས་ཅི་ཞིག་འགྲུབ།། མར་འདོད་བྱེ་མ་བཙིར་བར་མི་འགྱུར་རམ།། འདི་ལ་སྨན་པའི་རྒྱལ་པོས་བཀའ་སྩོལ་ཞིག། ཅེས་ཞུས་པ་ལས། སྟོན་པས་གསུངས་པ། ཀྱེ་དྲང་སྲོང་ཆེན་པོ་ཡིད་ལས་སྐྱེས།། ཐབས་དང་ཐབས་བྱུང་འབྲེལ་བ་ཅི་སྟེ་མེད།། འགྲོ་བའི་ལུས་འདི་འབྱུང་བ་བཞི་ལས་གྲུབ།། གསོ་བྱའི་ནད་ཀྱང་འབྱུང་བ་བཞི་ཡིས་བསྐྱེད།། གཉེན་པོའི་སྨན་ཡང་འབྱུང་བཞིའི་ངོ་བོ་ཉིད།། ལུས་ནད་གཉེན་པོ་བདག་ཉིད་གཅིག་པར་འབྲེལ།། གནོད་བྱ་གནོད་བྱེད་རྟེན་དང་བརྟེན་པར་འབྲེལ།། གསོ་བྱ་གསོ་བྱེད་བསོད་ནམས་ལས་ཀྱིས་འབྲེལ།། རིན་པོ་ཆེ་དང་ཀླུ་ཡི་རྒྱལ་པོ་འདྲ།། མི་ཤེས་ཤེས་བྱེད་གསོ་རིག་ཐབས་སུ་འབྲེལ།། ཐབས་ལས་བྱུང་བ་འདུ་བ་སྙོམས་པར་འབྲེལ།། འདུ་བ་སྙོམས་པ་ནད་མེད་བདེ་བར་འབྲེལ།། ཐབས་དང་ཐབས་བྱུང་དེ་ལས་བྱུང་བར་འབྲེལ།། ཅི་ཕྱིར་དོན་བྱེད་ནུས་ཕྱིར་རག་ལུས་ཕྱིར།། ཞེས་གསུངས་སོ།། དེ་ནས་དྲང་སྲོང་ཡིད་ལས་སྐྱེས་ལ་སོགས་པ་རྣམས་ཀྱིས་མགྲིན་གཅིག་ཏུ་བསྡེབས་ནས་སྟོན་པ་ལ་བསྟོད་པ། ཀྱེ་སྟོན་པ་འཚོ་མཛད་སྨན་པའི་རྒྱལ་པོ་ཉིད།། སྟོན་པའི་ཐུགས་ལ་མ་རིག་མུན་པ་མེད།། རྟོག་མེད་སྤྲོས་བྲལ་རིག་པའི་ཡེ་ཤེས་ཉིད།། ཐུགས་རྗེའི་འོད་ཀྱིས་འགྲོ་བའི་མུན་པ་སེལ།། ཐམས་ཅད་འདུས་པའི་རྩ་རྒྱུད་ཐུགས་ལས་བྱུང་།། མཉམ་ཉིད་ཆོས་ཀྱི་སྐུ་ལ་ཕྱག་འཚལ་ལོ།། སྟོན་པའི་སྐུ་ལ་འགྲེས་རྒུད་བསྙེལ་བ་མེད།། གསལ་སྟོང་སྤྲོས་བྲལ་བཻ་ཌཱིརྱ་འདྲའི་སྐུ།། སྐུ་ཡི་འོད་ཟེར་འགྲོ་བའི་ནད་རྣམས་སེལ།། ཐ་སྙད་མ་རྨོངས་བཤད་རྒྱུད་སྐུ་ལས་བྱུང་།། མཚན་དཔེ་ལོང་ལོངསསྤྱོད་རྫོགས་ལ་ཕྱག་འཚལ་ལོ།། སྟོན་པའི་ཡོན་ཏན་ཟད་མེད་འཕེལ་བ་མེད།། ཐམས་ཅད་མཁྱེན་པ་སངས་རྒྱས་སྨན་གྱི་བླ།། ཡོན་ཏན་འོད་ཟེར་འགྲོ་བའི་སྡུག་འཕོངས་སེལ།། མན་ངག་རྒྱུད་ནི་ཡོན་ཏན་ཉིད་ལས་བྱུང་།། རིན་ཅེན་འབྱུང་གནས་སྐུ་ལ་ཕྱག་འཚལ་ལོ།། སྟོན་པའི་ཕྲིན་ལས་གང་ཡང་ཐོགས་པ་མེད།། ཞི་རྒྱས་དབང་དྲག་བཞི་རྫོགས་རྒྱལ་ཆེན་པོ།། ཕྲིན་ལས་འོད་ཟེར་འགྲོ་བའི་ནད་གདོན་སེལ།། ཕྱི་མ་རྒྱུད་ནི་ཕྲིན་ལས་ཉིད་ལས་བྱུང་།། དཔའ་བོ་སྤྲུལ་པའི་སྐུ་ལ་ཕྱག་འཚལ་ལོ།། སྟོན་པའི་གསུང་ནི་འགག་མེད་ཚངས་པའི་གསུང་།། གཅིག་ལ་ཀུན་གོ་འཁོར་ཚོགས་འདོད་པ་སྐོང་།། གསུང་གི་འོད་ཟེར་འགྲོ་བའི་ངག་སྒྲིབ་སེལ།། རྒྱུད་བཞིའི་ཞུས་ལན་སྟོན་པའི་གསུང་ལས་བྱུང་།། གསལ་དག་པདྨའི་སྐུ་ལ་ཕྱག་འཚལ་ལོ།། ཞེས་མངོན་པར་བསྟོད་དོ།། དེ་ནས་སྟོན་པ་དྲང་སྲོང་རིག་པའི་ཡེ་ཤེས་ཀྱིས་རྒྱུད་ལ་བསྔགས་པ་འདི་ཆེད་དུ་བརྗོད་དོ།།ཨེ་མ་ཧོ་དྲང་སྲོང་ཡིད་ལས་སྐྱེས།། རྩ་བ་ཐུགས་ཀྱི་རྒྱུད་འདི་ས་བོན་འདྲ།། འདི་ལས་མ་སྐྱེས་གསོ་དཔྱད་ཡོད་མ་ཡིན།། སྐུ་ཡི་བཤད་རྒྱུད་བར་སྣང་ཉི་ཟླ་འདྲ།། ཚིག་དོན་མ་ལུས་སྒྲིབ་མེད་གསལ་བར་སྟོན།། མན་ངག་ཡོན་ཏན་རྒྱུད་འདི་ནོར་བུ་འདྲ།། དགོས་པ་མ་ཚང་བ་ནི་གཅིག་ཀྱང་མེད།། ཕྱི་མ་ཕྲིན་ལས་རྒྱུད་འདི་ཕ་ལམ་འདྲ།། ནད་ཀྱི་སྟེང་དུ་ཐོགས་པ་ཡོད་མ་ཡིན།། རིག་པའི་ཡེ་ཤེས་ནམ་མཁའི་མཛོད་དང་འདྲ།། དྲིས་པའི་ལན་ལ་ཟད་མི་ཤེས་པར་སྟོན།། གསུང་སྤྲུལ་ཡིད་ལས་སྐྱེས་ནི་སེང་གེ་འདྲ།། ཞུ་བའི་ཚིག་ལ་ཞུམ་ཞིང་སྐྲག་པ་མེད།། ཐམས་ཅད་འདུས་པའི་རྒྱུད་འདི་ཁྱུང་ལྡིང་འདྲ།། ནད་ཀྱི་གཡང་སར་ཉམ་ང་བག་ཚ་མེད།། ཡིད་དུ་འོང་བས་ཁུ་བྱུག་གསུང་སྙན་འདྲ།། འགྲོ་བ་གང་གིས་ཐོས་པས་སྤྲོ་བ་སྐྱེད།། ཀུན་ཏུ་དཀོན་པས་ཨུ་དུམ་ཝ་ར་འདྲ།། ཐོས་མཐོང་སྤྱོད་པ་སྐལ་ལྡན་རེ་རེ་ཙམ།། ཉི་མའི་འོད་ཀྱིས་ཟླ་སྐར་ཟིལ་གནོན་བཞིན།། རྒྱུད་རྒྱལ་འདི་ཡིས་གསོ་རིག་ཀུན་ཟིལ་གནོན།། འདི་ནི་སྔགས་མེད་པ་ཡི་སྲུང་སྐུད་ཡིན།། འཆི་བདག་བདུད་སྡེ་བཟློག་པའི་འཕྲུལ་འཁོར་ཡིན།། ནད་ཀྱི་དགྲ་དཔུང་འཇོམས་པའི་དཔའ་བོ་ཡིན།། འདུ་བ་འཕེལ་ཟད་སྙོམས་པའི་སྤྱི་པ་ཡིན།། དུས་མིན་འཆི་ཞགས་གཅོད་པའི་རལ་གྲི་ཡིན།། ནད་ཀྱི་ཟུག་གཟེར་གཅོག་པའི་ཐོ་བ་ཡིན།། སྡུག་བསྔལ་འདམ་ནས་འདྲེན་པའི་ལྕགས་ཀྱུ་ཡིན།། འཆི་བའི་སྲོག་སྐྱོབ་མི་འཇིགས་སྦྱིན་པ་ཡིན།། འཆི་བ་སློང་བྱེད་བདུད་རྩི་བུམ་པ་ཡིན།། དྲང་སྲོང་རྣམས་ཀྱིས་འདི་ལ་གཅེས་པར་ཟུང་།། ཞེས་གསུངས་སོ།། དེ་ནས་ཡང་དྲང་སྲོང་ཡིད་ལས་སྐྱེས་ཀྱིས་འདི་སྐད་ཅེས་ཞུས་སོ།། ཀྱེ་སྟོན་པ་དྲང་སྲོང་རིག་པའི་ཡེ་ཤེས་ལགས།། རྒྱུད་ཀྱི་རྒྱལ་པོ་གསང་བ་མན་ངག་རྒྱུད།། དུས་ཀྱི་ཐ་མ་ཇི་ལྟ་བུ་ལ་གཏད།། མི་བསྟན་སྦ་བའི་སྣོད་ངན་གང་ལ་གསང་།། གསང་དང་གཏད་པའི་སྐྱོན་དང་ཡོན་ཏན་གང་།། འཚོ་མཛད་ཁྱོད་ཀྱིས་བདག་ལ་ལུང་སྟོན་ཅིག། ཅེས་ཞུས་པ་ལས། སྟོན་པ་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཁྱོད་ཉོན་ཅིག། གཏད་པའི་སྣོད་ལ་བཟང་ངན་ཅི་སྟེ་མེད།། སྣོད་ངན་རྣམས་ཀྱིས་གདམས་པའི་བཅུད་མི་ཐུབ།། དཔེར་ན་སེང་གེ་དཀར་མོའི་འོ་མ་དེ།། རིན་ཆེན་མ་ཡིན་སྣོད་ངན་ཕལ་པར་བླུག། སྣོད་ཀྱང་ཆག་ལ་འོ་མའི་བཅུད་ཀྱང་འབོ།། དེ་ཕྱིར་གསང་བའི་སྣོད་ངན་འདི་ལྟ་བུ།། སློབ་དཔོན་གསང་ཞིང་རང་ཆེ་འབྱིན་པ་དང་།། ཐབས་ཀྱིས་བརྐུ་ཞིང་གཞོགས་སློང་བྱེད་པ་དང་།། དྲིན་མེད་ཁྱད་སོད་བྱེད་ལ་ཤོར་ར་རེ།། གཡོ་སྒྱུས་འགྲོ་བའི་ནོར་ལ་འཇབ་པ་དང་།། ང་རྒྱལ་དྲེགས་པས་བཅིངས་དང་སྙིང་རྗེ་མེད།། ཚེ་འདི་གཙོར་འཛིན་ལག་ཏུ་ཤོར་ར་རེ།། གསེར་གཡུ་རྟ་ཁྲབ་ཡོན་གྱིས་མི་སླུ་བར།། ཁ་འཇམ་བྲིད་པོའི་ལག་ཏུ་ཤོར་ར་རེ།། དེ་ལྟར་སྐལ་མེད་སྣོད་དང་མི་ལྡན་ན།། ཆུ་སྲིན་གྲེ་བར་རིན་ཆེན་ཚུད་པ་བཞིན།། བསྐལ་པ་འཁྲུགས་ཀྱང་ཁ་རུ་མི་དབྱུང་གསང་།། སྲོག་སེར་གཏད་དང་དུག་སྦྱོར་ལ་སོགས་པ།། མུ་སྟེགས་ཆོས་དང་རིག་པ་འདི་མི་རྗེ།། རྫུན་ལུང་མོ་གཤེན་གསེར་འགྱུར་བཟོ་ཡི་རིགས།། ཁ་གཤགས་ཐ་སྙད་ཆོས་དང་འདི་མི་རྗེ།། དེ་ལྟར་སྣོད་ངན་རྣམས་ལ་མ་གསངས་སྐྱོན།། གདམས་པ་མ་ཐུབ་སྤེལ་བས་མཁས་ཁྱད་མེད།། དུག་དང་འདྲེས་པས་ཀུན་ལ་ཕན་མི་ཐོགས།། ཁོང་དུ་རུལ་བས་གདམས་པའི་མགོ་མི་ཐོན།། དམ་ཚིག་ཉམས་པས་ཕྱི་མ་ངན་འགྲོར་ལྟུང་།། དེ་ཕྱིར་ཤིན་ཏུ་སོངས་ཤིག་དྲང་སྲོང་རྣམས།། རྒྱུད་འདི་གཏད་པར་བྱ་བའི་སྣོད་ལྡན་ནི།། དམ་ཚིག་ལྡན་པས་བླ་མ་སྤྱི་བོར་འཁུར།། ནོར་དང་སྲོག་ལ་ཕོངས་མེད་གཏང་གཏོངཕོད་ནུས།། ཤེས་རབ་ཆེ་བས་ཚིག་དོན་འགལ་འབྲེལ་འབྱེད།། བྱམས་སེམས་ཆེ་བས་གཞན་དོན་གཙོ་བོར་ལེན།། ཆོས་ལ་བྲང་གཏད་གཡོ་སྒྱུ་ཟོལ་ཟོག་མེད།། སྨན་པའི་རྒྱུ་དྲུག་ཚོགས་པའི་སྐལ་ལྡན་ལ།། དྲང་སྲོང་ཆེན་པོའི་རྒྱུད་འདི་གཏད་པར་བགྱི།། དེས་ཀྱང་མཉེས་པའི་ཡོན་གྱིས་མི་སླུ་ན།། བྱིན་པར་མི་བྱ་དམ་པར་འཛིན་མི་འགྱུར།། དེ་ལྟར་སྣོད་ལྡན་གཅིག་ལས་གཅིག་བརྒྱུད་ནས།། རྒྱུན་མི་ཆད་པར་འགྲོ་དོན་བྱེད་པར་བསྔོ།། སྣོད་དང་ལྡན་པས་རྒྱུད་འདི་སུས་འཆང་བ།། ཚེ་འདིར་བཙན་ཕྱུག་ཕན་དར་འཛོམ་པ་དང་།། འགྲོ་བ་སྤྱིས་འཁུར་དཔལ་གྲགས་ཐོབ་པ་དང་།། ཕྱི་མ་བྱང་ཆུབ་གོ་འཕང་འགྲུབ་པར་བསྔོ།། འགྲོ་ཀུན་ནད་ཀྱི་སྡུག་བསྔལ་བྲལ་བ་དང་།། དུས་མིན་འཆི་བའི་རྐྱེན་ལས་ཐར་བར་བསྔོ།། ང་ཡི་བཀའ་བཙན་བྱིན་ཆེ་དར་བ་དང་།། ཇི་ལྟར་བཏབ་པའི་སྨོན་ལམ་འགྲུབ་པར་བསྔོ།། ཞེས་གསུངས་ནས་དྲང་སྲོང་རིག་པའི་ཡེ་ཤེས་དེ་བཅོམ་ལྡན་འདས་སྨན་གྱི་བླ་བཻ་ཌཱིཪྻ་འོད་ཀྱི་རྒྱལ་པོའི་སྐུའི་གསང་བར་ཐིམ་པར་གྱུར་ཏོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་རྒྱུད་ཡོངས་སུ་གཏད་པའི་ལེའུ་སྟེ་ཉི་ཤུ་རྩ་བདུན་པའོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ཅེས་བྱ་བ་སངས་རྒྱས་སྨན་གྱི་བླ་བཻ་ཌཱིཪྻ་འོད་ཀྱི་རྒྱལ་པོའི་བྱིན་རླབས་ལས་སྤྲུལ་པའི་སྟོན་པ་དྲང་སྲོང་རིག་པའི་ཡེ་ཤེས་དང་དྲང་སྲོང་ཡིད་ལས་སྐྱེས་ཀྱིས་ཞུས་ལན་དུ་མཛད་པ་གསོ་དཔྱད་ཀུན་གྱི་རྒྱལ་པོ་ཞེས་བྱ་བ་ཡོངས་སུ་རྫོགས་སོ།། །།སཽ་སྟི་པྲ་ཛཱ་བྷྱཿ སྲིད་པའི་རྒྱུ་འབྲས་དུཿཁ་དྲུངས་འབྱིན་པའི།། ཟླ་མེད་ཐུགས་རྗེ་ཆེན་པོའི་རང་གཟུགས་གང་།། བཻ་ཌཱིརྱ་སྣང་ཞིང་དུ་རྣམ་རོལ་པའི།། སྨན་པའི་རྒྱལ་པོས་འགྲོ་འདི་དགེ་ལེགས་མཛོད།། དེ་ལ་འདིར་ཤེས་བྱ་རིག་པའི་གནས་ལྔའི་ནང་ཚན་ལས་གཞན་རྗེས་སུ་འཛིན་པ་ལ་ཕྱིའི་རིག་གནས་ཀྱི་གཙོ་བོར་གྱུར་པ་གསོ་བ་རིག་པ་འདི་ལ་འཕགས་བོད་རྒྱ་ནག་ལ་སོགས་པའི་ཡུལ་དུ་དྲང་སྲོང་དང་པཎྜཾ་ཏ་ལ་སོགས་པས་བརྩམས་པའི་བསྟན་བཅོས་མང་དུ་བྱུང་བ་ལས། རང་ཅག་ཁ་བ་ཅན་པ་ཉིད་དང་ཉེ་བར་འཚམ་པའི་གསོ་རིག་གི་གཞུང་ཁྱད་པར་དུ་འཕགས་པ། དཔལ་ལྡན་རྒྱུད་བཞི་ཞེས་ཡོངས་སུ་གྲགས་པ་འདི་ཉིད། ཆོས་རྗེ་རང་བྱུང་བ་དང་། བུ་སྟོན་ཐམས་ཅད་མཁྱེན་པ་དང་། སྟག་ཚང་ལོ་ཙྪ་ཤེས་རབ་རིན་ཆེན། དུས་ཕྱིས་ཟུར་མཁར་བློ་གྲོས་རྒྱལ་པོ་སོགས།། གཡུ་ཐོག་པ་ཉིད་ཀྱིས། ཡན་ལག་བརྒྱད་པ་སོགས་འཕགས་ཡུལ་གྱི་གཞུང་དང་། སོ་མ་རཱ་ཛ་སོགས་རྒྱ་ནས་བསྒྱུར་བའི་གཞུང་དང་། འཁོར་ལོ་རྒྱལ་པོའི་བེ་བུམ་སོགས་ཞང་ཞུང་ནས་བསྒྱུར་བའི་གཞུང་རྣམས་ཀྱི་དགོངས་པ་བླངས་ནས་བརྩམས་པར་བཞེད་པ་དང་། འགའ་ཞིག་གིས་བདག་ཅག་གི་སྟོན་པ་སྨན་རྒྱལ་གྱི་སྐུར་བཞེངས་ནས། རྗེས་སུ་གནང་བའི་བཀའ་དངོས་སུ་བཞེད་པ་དང་། འགའ་ཞིག་གིས། དཀའ་དངོས་ཡིན་ཀྱང་། སྔོན་སློབ་དཔོན་པདྨས་བསམ་ཡས་དབུ་རྩེར་གཏེར་དུ་སྦས་པ། གྲྭ་མངོན་དབང་ཕྱུག་འབར་གྱིས་ཕྱུང་བའི་གཏེར་མར་བཞེད་པ་སོགས་སྣ་ཚོགས་ཡོད་པ་དོན་ལ་ཇི་ལྟར་ཡང་། སྙིགས་མའི་དུས་ཀྱི་མི་བཟད་པའི་ཟུག་རྔུ་དྲག་པོ་དུས་མིན་དུ་རྣམ་པར་ལྡང་པའི་གཉེན་པོར་གྱུར་བས།སྐྱེ་དགུའི་ལུས་སེམས་ལ་སྨན་བདེའི་བཅུད་ལེན་སྟེར་བར་བྱེད་པའི་ཚིག་དོན་གྱི་ཆ། ཆོས་ཕུན་སུམ་ཚོགས་པར། མཁས་པ་རྣམས་བཞེད་པ་མཐུན་པ་ལྟར། གངས་ཅན་གྱི་ལྗོངས་འདིར་གསོ་བ་རིག་པའི་ཁུར་འཛིན་ཐམས་ཅད་ཀྱིས་བསྟེན་བྱ་གཅིག་པུར་གྱུར་པ་ཡིན་མོད། འོན་ཀྱང་བར་སྐབས་དུས་དབང་གིས་སྨན་པ་རྣམས་ཁོ་ནར་མ་ཟད། རིག་གནས་གང་ལའང་ཚུལ་བཞིན་སློབ་པ་མི་འབྱུང་ཞིང་། བསླབ་ཀྱང་ཤེས་པ་ཉུང་བས། གཞུང་འདིའང་འཆད་ཉན་གྱི་སྲོལ་ཇི་ལྟ་བ་ནུབ་པ་ལ་ཕྱོགས་པའི་ཚེ། ཟུར་མཁར་བ་མཉམ་ཉིད་རྡོ་རྗེའི་རིགས་ཆོས་ཀྱི་དབོན་པོ་མཁས་དབང་བློ་གྲོས་རྒྱལ་པོས་འགྲེལ་བཤད་དང་། ཞུ་ཆེན་གྱི་གཏན་ལ་ཕབ་པ་བཞིན། ནང་སོ་ཡར་རྒྱབ་པས་པར་དུ་བརྐོས་པ་དང་། དེ་ལའང་དཔྱད་པས་མ་ཁྱབ་པའི་ནོར་ལུས་ཀྱི་རྙོག་མ་ཕྲན་བུ་བྱུང་བ་རྣམས། མི་དབང་སངས་རྒྱས་རྒྱ་མཚོའི་རྣམ་དཔྱོད་ཀྱི་ཀེ་ཏ་ཀས་བགྲུངས་པའི། ལྷ་ལྡན་པོ་ཊ་ལའི་པར་མ་འདི་ཉིད་ཀུན་གྱིས་ཡིད་རྟོན་པའི་གནས་སུ་རུང་བར་འདུག་པ་ལྟར། དེ་ཉིད་ལས་འབྲུ་ལེན་གྱི་ཕྱི་མོ་ཞུས་ཏེ། སྡེ་དགེ་བསྟན་པ་ཚེ་རིང་གི་ལྷག་བསམ་རྣམ་པར་དཀར་བས་སྐྱེ་དགུ་རྣམས་ཀྱི་ཕན་བདེ་དང་། གསོ་བ་རིག་པའི་བསྟན་པ་གོང་ནས་གོང་དུ་རྒྱ་ཆེར་སྤེལ་བའི་སླད་དུ། རབ་ཉིའི་ཆུ་གླང་ལོར་ལྷུན་གྲུབ་སྟེང་གི་ཆོས་གྲྭ་ཆེན་པོར་པར་དུ་བསྒྲུབས་པ་འདིའི་དགེ་བས། ལུས་ཅན་ཀུན་གྱི་འཁོར་བའི་རྒྱུ་དུག་གསུམ་གྱིས་ཀུན་ནས་བསླངས་པའི་མི་དགེ་བ་དང་། འབྲས་བུ་ཚོར་བ་སྡུག་བསྔལ་སྐྱེད་པའི་རྣམ་འགྱུར་འཕེལ་ཟད་འཁྲུགས་པའི་རང་བཞིན་གྱི་གདུང་བ་མཐའ་དག་མྱུར་དུ་ཞི་ནས། སྨན་པའི་རྒྱལ་པོའི་གོ་འཕང་ལ་གནས་པར་གྱུར་ཅིག མངྒལཾ།།

     

X