//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > སྡེ་སྲིད་ཁོག་འབུབས། > ནང་དོན།

གསོ་བ་རིག་པའི་ཁྱད་ཆོས།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-30 9:10:45 ཀློག་གྲངས། 32 

དེའི་ནང་ཚན་གསོ་བ་རིག་པ་ནི། མདོ་དྲིན་ལན་བསབ་པ་ལས། བྱང་ཆུབ་སེམས་དཔས་ཅིའི་ཕྱིར་སྨན་དཔྱད་ཀྱི་རིག་པའི་བསྟན་བཅོས་སློབ་ཅེ་ན། སེམས་ཅན་རྣམས་མི་དགེ་བའི་ནད་བཞི་བརྒྱ་རྩ་བཞི་དང་དབྲལ་པར་བྱ་བ་དང་། སེམས་ཅན་ཐམས་ཅད་ལ་བྱམས་ཤིང་སྙིང་བརྩེ་བའི་ཕྱིར་སེམས་ཅན་རྣམས་དད་པའི་སེམས་བསྐྱེད་པར་བྱ་བ་དང་། དེ་ལྟར་ནད་དང་བྲལ་པས་དགའ་བའི་སེམས་བསྐྱེད་པར་བྱེད་པ་དང་། དེ་ལྟར་དགའ་བའི་སེམས་སྐྱེས་པས་རྟག་ཏུ་སངས་རྒྱས་དྲན་པར་འགྱུར་ཏེ། སྙིང་རྗེ་ཆེན་པོས་སེམས་ཅན་རྣམས་ཕ་རོལ་ཏུ་ཕྱིན་པར་བྱ་བའི་ཕྱིར། བྱང་ཆུབ་སེམས་དཔས་སྨན་དཔྱད་ཀྱི་རིག་པ་སློབ་པར་བྱེད་དོ།། ཞེས་དང་། རྣལ་འབྱོར་སྤྱོད་པའི་སའི་ཐོས་པ་ལས་བྱུང་བའི་སར། གསོ་བའི་རིག་པ་གང་ཞེ་ན། དེ་ནི་རྣམ་པ་བཞིར་བལྟ་བར་བྱ་སྟེ། འདི་ལྟ་སྟེ། ནད་ལ་མཁས་པ་དང་། ནད་ཅི་ལས་བྱུང་བ་ལ་མཁས་པ་དང་། ནད་བྱུང་བ་བསལ་བ་ལ་མཁས་པ་དང་། ནད་བསལ་ནས་ཕྱིས་མི་འབྱུང་བར་བྱ་བ་ལ་མཁས་པའོ།། མཁས་པ་འདི་དག་གི་རྣམ་པར་དབྱེ་བ་ནི་མདོ་ལས་ཇི་སྐད་འབྱུང་བ་ཁོ་ན་བཞིན་དུ་རིག་པར་བྱའོ།། ཞེས་དང་། ལེའུ་བརྒྱད་པ་ལས། གསོ་བའི་བསྟན་བཅོས་ནི་རྣམ་པ་བཞིར་འཇུག་སྟེ། ནད་ལ་མཁས་པའི་རྣམ་པ་དང་། ཅི་ལས་བྱུང་བ་ལས་མཁས་པར་སྟོན་པའི་རྣམ་པ་དང་། ནད་བྱུང་བ་བསལ་བ་ལ་མཁས་པར་སྟོན་པའི་རྣམ་པ་དང་། ནད་བསལ་ནས་ཕྱི་མ་མི་འབྱུང་བར་བྱ་བ་ལ་མཁས་པར་སྟོན་པའི་རྣམ་པའོ།། ཞེས་དང་། གསོ་རིག་རྩ་བའི་རྒྱུད་ལས། མི་ན་བར་གནས་པར་འདོད་པ་དང་ན་བ་གསོ་བར་འདོད་པའི་གང་ཟག་གིས་གསོ་བ་རིག་པའི་མན་ངག་ལ་བསླབ་པར་བྱའོ།། ཚེ་རིང་བར་འདོད་པའི་གང་ཟག་གིས་གསོ་བ་རིག་པའི་མན་ངག་ལ་བསླབ་པར་བྱའོ།། ཆོས་དང་ནོར་དང་བདེ་བ་སྒྲུབ་པར་འདོད་པའི་གང་ཟག་གིས་གསོ་བ་རིག་པའི་མན་ངག་ལ་བསླབ་པར་བྱའོ།། འགྲོ་བ་གང་ཞིག་ནད་ཀྱི་སྡུག་བསྔལ་ལས་ཐར་བར་འདོད་པ་དང་། གཞན་གྱི་སྤྱི་བོས་བཀུར་བར་འདོད་པའི་གང་ཟག་གིས་གསོ་བ་རིག་པའི་མན་ངག་ལ་བསླབ་པར་བྱའོ།། ཞེས་དང་། བཤད་རྒྱུད་ལས། འགྲོ་དྲུག་གཙོ་བོར་གྱུར་པ་མི་ལུས་ལ།། མི་ན་གནས་དང་ན་བ་གསོ་བ་དང་།། ཚེ་རིང་ཆོས་ནོར་བདེ་བ་སྒྲུབ་པའི་ཕྱིར།། གསོ་བ་རིག་པའི་དོན་རྣམས་མདོར་བསྡུ་ན།། ཞེས་དང་། ཕྱི་རྒྱུད་ལས། འདི་ནི་སྔགས་མེད་པ་ཡི་སྲུང་སྐུད་ཡིན།། འཆི་བདག་བདུད་སྡེ་བཟློག་པའི་འཕྲུལ་འཁོར་ཡིན།། ནད་ཀྱི་དགྲ་དཔུང་འཇོམས་པའི་དཔའ་བོ་ཡིན།། འདུ་བ་འཕེལ་ཟད་སྙོམས་པའི་སྤྱི་བ་ཡིན།། དུས་མིན་འཆི་ཞགས་གཅོད་པའི་རལ་གྲི་ཡིན།། ནད་ཀྱི་ཟུག་གཟེར་གཅོག་པའི་ཐོ་བ་ཡིན།། སྡུག་བསྔལ་འདམ་ནས་འདྲེན་པའི་ལྕགས་ཀྱུ་ཡིན།། འཆི་བའི་སྲོག་སྐྱོབ་མི་འཇིགས་སྦྱིན་པ་ཡིན།། ཞེས་དང་། མཁས་མཆོག་བྱེ་བའི་གཙུག་རྒྱན་དཔལ་ལྡན་ཕ་ཁོལ་གྱིས།། ཚེ་ནི་རིང་བར་འདོད་པ་ཡིས།། ཆོས་དང་ནོར་དང་བདེ་བ་སྒྲུབ།། ཚེ་ཡི་རིག་བྱེད་ལུང་བཤད་པ།། རབ་ཏུ་གུས་པར་བྱ་བ་གྱིས།། ཞེས་དང་། རྗེ་བླ་མ་སྲིད་ཞིའི་གཙུག་རྒྱན་ལྔ་པ་ཆེན་པོས།། འཛད་མེད་བསྐལ་བར་གནས་པའི་རིང་པོའི་ཚེ།། སྒྲུབ་པའི་སྲོག་འཚོའི་བཅུད་ལེན་བདུད་རྩིའི་གཏེར།། མི་འཇིགས་སྦྱིན་པའི་སྒོ་འཕར་ལེགས་ཕྱེ་བ།། རིས་མེད་སྐྱེ་དགུའི་བསོད་ནམས་ཟོང་གིས་རྙེད།། ཅེས་དང་། རིན་ཆེན་སྤུངས་པས། མཐར་བྱེད་གདངས་ཁར་བཅར་བའི་ཟུག་རྔུ་ཡིས།། ལྐོག་མའི་བར་དུ་སྲོག་རྒྱུ་ཤུགས་རིང་དབུགས།། ལན་མང་བརྩེགས་པ་དེ་ཀུན་གདུང་སེལ་དུ།། ཚེ་ཡི་རིག་བྱེད་དྲན་དབང་ཚངས་པ་རང་།། ཞེས་དང་། སྟག་ལོས། འགྲོ་ཀུན་ལུས་ནད་སྣ་ཚོགས་ཀྱིས་གཟིར་ཕྱིར།། གསོ་དཔྱད་དོན་དུ་མི་གཉེར་སྲིད་མཐའ་ཙམ།། དེ་ཕྱིར་རིག་གནས་གཉིས་པ་འདི་ཉིད་ནི།། དོན་གཉེར་རྗེས་སུ་འཛིན་པའི་མཆོག་ཏུ་གྲུབ།། ཅེས་ཐོག་མ་མེད་པ་ནས་ཉོན་མོངས་པ་དུག་ལྔས་གཟིར་ཅིང་། ནག་པོའི་ལས་ཆེས་ཆེར་བརྩེགས་པའི་འབྲས་བུ་དང་འཕྲལ་རྐྱེན་སྣ་ཚོགས་ལ་བརྟེན་ནས་འདུ་བ་རྣམ་བཞི་འཁྲུགས་པའི་ནད་མ་བཅོས་རང་གར་བཞག་ཀྱང་འཚོ་བ་བརྒྱ་རྩ་གཅིག གདོན་བཅོས་པས་འཚོ་བ་བརྒྱ་རྩ་གཅིག བཅོས་ན་འཚོ་ལ་མ་བཅོས་ན་མི་འཚོ་བ་བརྒྱ་རྩ་གཅིག བཅོས་ཀྱང་མི་འཚོ་བ་བརྒྱ་རྩ་གཅིག་སྟེ་མུ་བཞིར་གསུངས་པའི་སྨན་དཔྱད་སོགས་ཀྱིས་འཆི་བདག་གཤིན་རྗེའི་ཞགས་པ་ལས་གྲོལ་པར་བྱེད་པའི་ཚུལ་སྐྱེ་དགུ་ཀུན་ལ་མི་འཇིགས་པའི་སྦྱིན་པ་རླབས་པོ་ཆེས་གཞན་ཕན་གྱི་ཐབས་རྒྱལ་བའི་སྲས་ཀྱི་སྤྱོད་པའི་ཡན་ལག་ཏུ་ངེས་པར་འགྱུར་བ་ཤེས་ལྡན་རྣམས་ཀྱིས་གཅིག་ཏུ་གཞོལ་པའི་གནས་ལེགས་པར་སྦྱར་པའི་སྐད་དུ་ཨཱོ་ཡུ་ཪྦེ་དཿ ཚེ་དང་སྲོག་དོན་གཅིག་མིང་གི་རྣམ་གྲངས་ཡིན། འཚོ་བ་ནི་རྣམ་ཤེས་ཀྱི་རྟེན་ཏེ། འདོད་པ་དང་གཟུགས་ཀྱི་ཁམས་ན་དྲོད་དང་རྣམ་པར་ཤེས་པའི་རྟེན་གཉིས་ཀ་བྱེད་པ་གཟུགས་མེད་ན་རྣམ་པར་ཤེས་པའི་རྟེན་ཁོ་ན་བྱེད་པ། དེ་རིག་པར་བྱེད་པ་ན་ཚེའི་རིག་བྱེད་བི་ཙི་ཀནྶི་ཏཾ་ཞེས་པ་གསོ་བའི་དཔྱད་དེ་ཡང་ཁམས་སམ་འདུ་བ་མི་སྙོམས་པ་བསལ་ནས་སྙོམས་པར་བྱ་བའི་རྣམ་དཔྱད་ཡིན་པས་གསོ་དཔྱད་ཅེས་བྱ་དང་ཙི་ཀིཏྶ་བི་ཏྱཱ་སྟེ་གསོ་བ་རིག་པ་ཞེས་པ་འདི་ཡིན་ལ།

གོང་ངོས། གླེང་གཞི།
X