//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > སྡེ་སྲིད་ཁོག་འབུབས། > ནང་དོན།

(1) སྟོན་པ་སངས་རྒྱས་པའི་ལུགས།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-30 9:15:59 ཀློག་གྲངས། 30 

སྟོན་པ་སངས་རྒྱས་པའི་ལུགས་སུ་བཞེད་པ་ནི། བསྐལ་བ་བཟང་པོ་འདི་ལ་མཚོན་ན་སངས་རྒྱས་འོད་སྲུངས་ཀྱི་བསྟན་པ་ཡིན་ལ་སངས་རྒྱས་ཀྱིས་བཀའ་བསྩལ་པ་དང་གཞན་དག་གིས་བཤད་པ་སོགས་མེད་པའི་མཐའ་མ་བཀག་ཀྱང་དིང་སང་འདིའོ་ཞེས་གསལ་བར་བརྗོད་པའི་སྐབས་མ་འཚལ་ཞིང་། སྟོན་པ་ཤཱཀྱའི་དབང་པོས་འཁོར་ལོ་དང་པོ་ཝ་ར་ཎཱ་སིར་བདེན་བཞིའི་ཆོས་འཁོར་གྱི་སྐབས་གསོ་དཔྱད་བི་མ་ལ་མུཏྲ་ལེའུ་བདུན་ཁྲི་ཉིས་སྟོང་ཡོད་པ་དང་ཡན་ལག་བརྒྱད་པ་བམ་པོ་ཉི་ཁྲི་བ་ཞིག་གསུངས་པར་གྲགས་ལ། འདུལ་བ་སྨན་གྱི་གཞི་ལས། དགེ་སློང་ནད་པས་ནི་སྨན་པ་ལ་དྲིས་ཏེ་བྱའོ།། ཞེས་པ་ལྟ་བུའི་འཕྲོས་ལ་བརྟེན་ནས་འདུལ་བ་ལུང་གི་དུམ་བུ་གསུམ་པར་སྨན་དང་མས་བཏང་བའི་དཔྱད་ལ་སོགས་པ་ཉུང་ངུ་ཙམ་ཞིག་བཤད་ཅིང་གཙོ་བོར་སྨོས་པ་ནི། སྨན་ནི་རྗེས་སུ་གནང་པ་དང་།། ཚིལ་དང་གཡན་པ་མིག་སྨན་དང་།། སྨྱོན་པ་དང་ནི་ཕི་ལིན་ད།། ནམ་གྲུ་དང་ནི་སྐྱུར་ཁུའོ།། ཞེས་པའི་སྡོམས་བཞིན་བཅོམ་ལྡན་འདས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་པའི་ཚེ་དགེ་སློང་རྣམས་སྟོན་ཀའི་བྲོ་ནད་ཀྱིས་སྐྱ་བོ་སེང་སེང་བོར་གྱུར་པའི་ཚེ་སྨན་སོ་སོར་བསྟེན་པར་གསུངས་ཀྱང་དུས་སུ་མ་གཏོགས་དེ་ལས་ཡོལ་བར་མི་བསྟེན་པར་སྲ་མོར་གྱུར་བ་ལ། ཀུན་དགའ་བོ་དེ་ལྟ་བས་ན་རྗེས་སུ་གནང་སྟེ། དགེ་སློང་རྣམས་ཀྱིས་སྨན་རྣམ་པ་བཞི་པོ་དུས་སུ་རུང་བ་དང་། ཐུན་ཚོད་དུ་རུང་བ་དང་། ཞག་བདུན་པ་དང་། ཇི་སྲིད་འཚོའི་བར་དུ་བཅང་བ་སོ་སོར་བསྟེན་པར་བྱའོ།། དེ་ལ་དུས་སུ་རུང་བ་ནི་ལྡེ་གུ་དང་། འབྲས་ཆན་དང་། ཟན་དྲོན་དང་། ཤ་དང་། སྣུམ་ཁུར་རོ།།ཐུན་ཚོད་དུ་རུང་བ་ནི། ཤིང་ཏོག་ཙའི་བཏུང་བ་དང་། ཆུ་ཤིང་གི་འབྲུའི་བཏུང་བ་དང་། རྒྱ་ཤུག་གི་བཏུང་བ་དང་། ཨ་ཤྭད་ཐའི་བཏུང་བ་དང་། ཨུ་དུམ་ཝཱ་རའི་བཏུང་བ་དང་། བ་རུ་ཤ་ཀའི་བཏུང་བ་དང་། རྒུན་འབྲུའི་བཏུང་བ་དང་། འབྲ་གོའི་བཏུང་བའོ།། ཞག་བདུན་པ་ནི་མར་དཀར་དང་། ཏིལ་མར་དང་། བུ་རམ་གྱི་དབུ་བ་དང་། སྦྲང་རྩི་དང་། ཤ་ཁ་རའོ།། འཚོ་བའི་བར་དུ་བཅང་བ་ནི། རྩ་བའི་སྨན་དང་། སྡོང་བུའི་སྨན་དང་། ལོ་མའི་སྨན་དང་། མེ་ཏོག་གི་སྨན་དང་། འབྲས་བུའི་སྨན་དང་། ཧྲང་ཆུ་ལྔ་དང་། ཐལ་བ་ལྔ་དང་། ལན་ཚྭ་ལྔ་དང་། བསྐ་བ་ལྔའོ།། དེ་ལ་རྩ་བའི་སྨན་ནི་གླ་སྒང་དང་། ཤུ་དག་དང་། ཡུང་བ་དང་། སྒེའུ་གཤེར་དང་། བོང་ང་དཀར་པོ་དང་། གཞན་ཡང་རྩ་བའི་སྨན་གྱི་ནང་དུ་གཏོགས་པ་ཟས་ཀྱི་དོན་དུ་མི་འགྱུར་བ་གང་ཡིན་པའོ།། སྡོང་བུའི་སྨན་ནི། ཙན་དན་དང་། དབྱི་མོ་མོངདང་། ཤུག་པ་དང་། ཐང་ཤིང་དང་། སླེ་ཏྲེས་དང་། སྐྱེར་བ་དང་། གཞན་ཡང་སྡོང་བུའི་སྨན་གྱི་ནང་དུ་གཏོགས་པ་གང་ཡིན་པའོ།། ལོ་མའི་སྨན་ནི། པ་ཏོ་ལའི་ལོ་མ་དང་། བ་ཤ་ཀའི་ལོ་མ་དང་། ནིམ་པའི་ལོ་མ་དང་། ཀོ་ཤ་ཏ་ཀའི་ལོ་མ་དང་། སབ་ཏ་པརྣའི་ལོ་མ་དང་། གཞན་ཡང་ལོ་མའི་སྨན་གྱི་ནང་དུ་གཏོགས་པ་ཐམས་ཅད་དོ།། མེ་ཏོག་གི་སྨན་ནི། བ་ཤ་ཀའི་མེ་ཏོག་དང་། ནིམ་པའི་མེ་ཏོག་དང་། ཨོཾ་ན་ཀའི་མེ་ཏོག་དང་། ཤ་ཏའི་མེ་ཏོག་དང་། པདྨ་ཀེ་ས་རའི་མེ་ཏོག་དང་། གཞན་ཡང་མེ་ཏོག་གི་སྨན་གྱི་ནང་དུ་གཏོགས་པ་ཐམས་ཅད་དོ།། འབྲས་བུའི་སྨན་ནི། ཨ་རུ་ར་དང་། སྐྱུ་རུ་ར་དང་། བ་རུ་ར་དང་། ན་ལེ་ཤམ་དང་། པི་པི་ལིང་དང་། གཞན་ཡང་འབྲས་བུའི་སྨན་གྱི་ནང་དུ་གཏོགས་པ་ཐམས་ཅད་དོ།། ཧྲང་ཆུ་ལྔ་ནི། ཤིང་ཀུན་དང་། སྲ་རྩི་དང་། རྒྱ་སྐྱེགས་དང་། པྲ་ཚིལ་དང་། དྲོད་སྨན་ནོ།། ཐལ་བ་ལྔ་ནི། ནས་ཀྱི་ཐལ་བ་དང་། ནས་ཀྱི་ཕུབ་མའི་ཐལ་བ་དང་། ཤིང་ས་རྫི་ཀའི་ཐལ་བ་དང་། ཏིལ་གྱི་ཐལ་བ་དང་། ཤིང་འབའ་ཤིག་ཀའི་ཐལ་བའོ།། ལན་ཚ་ཚྭལྔ་ནི། རྒྱམ་ཚ་དང་། ལན་ཚ་ཚྭསྨུག་པོ་དང་། ཁ་རུ་ཚ་དང་། ལན་ཚ་ཚྭདང་། རྒྱ་མཚོའི་ལན་ཚའོ་ཚྭའོ།། བསྐ་བ་ནི། ཨ་མྲིའི་མྲྀའིབསྐ་བ་དང་། ནིམ་པའི་བསྐ་བ་དང་།འཛམ་བུའི་བསྐ་བ་དང་། ཤི་རི་ཤའི་བསྐ་བ་དང་། ཀོ་ཤམ་པའི་བསྐ་བའོ།། ཞེས་སོགས་སྨན་བསྟེན་ཚུལ་ལ་སོགས་པ་བྱིན་གྱིས་བརླབ་ཚུལ་དང་བཅས་ཏེ་བཀའ་བསྩལ། འཁོར་ལོ་བར་བ་མཚན་ཉིད་མེད་པའི་ཆོས་བྱ་རྒོད་ཕུང་རིར་གསུངས་པའི་དུས་སུ་ལྷ་ཆེན་པོ་ཚངས་པ་ལ་གསོ་དཔྱད་འབུམ་པ་གསུངས་ཤིང་། དུས་དེར་ལྷོ་ཕྱོགས་བེ་ཏའི་ཚལ་གྲོང་ཁྱེར་བདེ་སྐྱིད་བྱ་བར་རྒྱལ་པོ་པདྨའི་དཔལ་གྱིས་སངས་རྒྱས་དབྱར་གནས་ལ་སྤྱན་དྲངས་པའི་ཚེ། སྤྱན་རས་གཟིགས་དང་ཚངས་པ། ཤཱ་རིའི་བུ་སོགས་ཐེག་པ་ཆེན་པོའི་རིགས་ཅན་ལ། གཅེར་མཐོང་རིག་པའི་རྒྱུད་ལེའུ་སུམ་སྟོང་ལྔ་བརྒྱ་བ་ཤློ་ཀ་འབུམ་པ་གསུངས་པ་འདི་དང་གསོ་དཔྱད་འབུམ་པ་གཅིག་པར་བཞེད་པའང་སྣང་། གནས་བྱ་རྒོད་ཕུང་བོའི་རི་ཡིན་ཀྱང་འཁོར་ལོ་ཐ་མའི་དུས་སུ་གསེར་འོད་དམ་པ་རྒྱ་ནག་འགྱུར་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོའི་ནད་རབ་ཏུ་ཞི་བར་བྱས་པའི་ལེའུ་ཉི་ཤུ་རྩ་བཞི་པ་ལས། རིགས་ཀྱི་ལྷ་མོ་སྔོན་བྱུང་བ་འདས་པའི་དུས་ཀྱི་བསྐལ་བ་གྲངས་མེད་བསམ་གྱིས་མི་ཁྱབ་པ་དེའི་ཚེ་དེའི་དུས་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པའི་སྐྱེས་བུ་ཁ་ལོ་བསྒྱུར་པ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རིན་ཆེན་གཙུག་ཕུད་ཅན་ཞེས་བྱ་བ་འཇིག་རྟེན་དུ་བྱུང་ལ། དེའི་ཆོས་ཀྱི་གཟུགས་བརྙན་ལ་སྤྱོད་པའི་ཚེ། རྒྱལ་པོ་ལྷའི་དབང་ཕྱུག་འོད་ཀྱི་ཡུལ་ན་ཚོང་དཔོན་ཆུ་འཛིན་ཞེས་བྱ་བ་སྨན་གྱི་རིགས་ལ་ཤིན་ཏུ་མཁས་པ་ཤེས་པའི་ཡན་ལག་བརྒྱད་ལེགས་པར་ཁོང་དུ་ཆུད་པ། སེམས་ཅན་གྱི་ནད་ཀྱི་སྡུག་བསྔལ་འབྱུང་བ་ཆེན་པོ་བཞི་མི་མཐུན་པ་ལས་གྱུར་པ་ཐམས་ཅད་སྐྱོབ་ཅིང་གསོ་བར་བྱེད་པ་ཞིག་ལ་བུ་ཁྱེའུ་ཆུ་འབེབས་ཞེས་བྱ་བ་བྱད་བཞིན་སྡུག་ཅིང་མཛེས་པ་མང་པོ་ཀུན་གྱིས་མོས་པར་བལྟ་བ། རང་བཞིན་གྱིས་སེམས་མྱུར་བ། གཙུག་ལག་རྣམས་ལེགས་པར་རྟོགས་པ་ཡི་གེ་དང་། རི་མོ་དང་། རྩིས་དང་། གྲངས་རྣམས་མངོན་པར་མི་རྟོགས་པ་མེད་པ་ཞིག་ཡོད་པར་གྱུར་ཏོ།། དེའི་ཚེ་རྒྱལ་པོ་དེའི་ཡུལ་ཁམས་ན་སེམས་ཅན་བརྒྱ་སྟོང་ཚད་མེད་སྙེད་ནད་ཀྱི་སྡུག་བསྔལ་སྣ་ཚོགས་ཀྱིས་གཟིར་བར་གྱུར་པས་ཐ་ན་དགའ་བའི་སེམས་ཅུང་ཟད་ཀྱང་མེད་པར་གྱུར་པ་ལ་ཚོང་དཔོན་གྱི་བུ་ཆུ་འབེབས་སྙིང་རྗེ་སྐྱེས་ཏེ། ཕ་སྨན་པའི་རྒྱལ་པོ་ཆེན་པོ་ནི་རྒས་འཁོགས་གཏུགས་པས་སེམས་ཅན་མང་པོའི་དོན་བྱ་བར་རྔོ་མི་ཐོག་གི བདག་གིས་རང་གི་ཕ་ལས་ནད་གསོ་བའི་སྨན་དཔྱད་གསང་བ་དྲིས་ཏེ། སེམས་ཅན་རྣམས་ཀྱི་ནད་རྣམ་པ་སྣ་ཚོགས་གསོས་ལ་ཡུན་རིང་བོར་བདེ་བ་མྱོང་བར་བྱའོ་སྙམ་ནས། ཕའི་ཐད་དུ་སོང་སྟེ་ཕྱག་བྱས་ཚིགས་སུ་བཅད་པས་འདི་སྐད་ཅེས་དྲིས་སོ།། བདག་ནི་སེམས་ཅན་སྐྱོབ་པའི་སླད།། སྨན་དཔྱད་རྣམས་ནི་ཞུ་ལགས་ན།། བྱམས་པའི་ཡབ་ཀྱིས་བརྩེར་དགོངས་ཏེ།། བདག་ལ་བཀས་ནི་བཤད་དུ་གསོལ།། ཞེས་གསོལ་བ་བཏབ་པ་ཐོས་པ་དང་། ཚིགས་སུ་བཅད་དེ་སྨྲས་པ། ངས་དེ་དྲང་སྲོང་སྙིང་པོ་ཡི།། ནད་གསོ་དཔྱད་ལ་བརྟེན་ནས་ནི།། རིམ་བཞིན་ཁྱོད་ལ་རབ་བསྟན་གྱིས།། ལེགས་པར་ཉོན་ལ་སེམས་ཅན་སྐྱོབ།། ཟླ་བ་གསུམ་ནི་དཔྱིད་ཀྱི་དུས།། ཟླ་བ་གསུམ་ནི་དབྱར་ཞེས་གྲགས།། ཟླ་བ་གསུམ་ནི་སྟོན་གྱི་ཕྱོགས།། ཟླ་བ་གསུམ་ནི་དགུན་ཞེས་བྱ།། འདི་ནི་ལོ་གཅིག་ལས་བརྩམས་པས།། གསུམ་གསུམ་སོ་སོར་བཤད་པར་བྱ།། གཉིས་གཉིས་དུས་ཚིགས་གཅིག་བྱས་ནས།། ལོ་གཅིག་དུས་ནི་དྲུག་ཏུ་འགྱུར།། དང་པོ་གཉིས་ནི་མེ་ཏོག་དུས།། གསུམ་དང་བཞི་ནི་ཚ་བའི་དུས།། ལྔ་དང་དྲུག་པ་ཆར་བའི་དུས།། བདུན་དང་བརྒྱད་པ་སྟོན་གྱི་དུས།། དགུ་དང་བཅུ་པ་གྲང་བར་གྱུར།། ཕྱི་མ་གཉིས་ནི་ཁ་བའི་དུས།། དེ་ལྟར་བྱེ་བྲག་ཤེས་གྱུར་ན།། འགལ་བ་མེད་པར་སྨན་བཏང་བྱ།། དུས་ནི་འདི་དག་རྗེས་མཐུན་པར།། ཟས་

X