//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > སྡེ་སྲིད་ཁོག་འབུབས། > ནང་དོན།

(1) སྟོན་པ་སངས་རྒྱས་པའི་ལུགས།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-30 9:15:59 ཀློག་གྲངས། 33 

སྐོམ་ལེགས་པར་སྦྱོར་བྱེད་ན།། ལྟོར་ནི་མྱུར་དུ་འཇུ་འགྱུར་བས།། ནད་མང་དག་ནི་སྐྱེ་མི་འགྱུར།། དུས་ཚིགས་གལ་ཏེ་ལོག་འགྱུར་ཞིང་།། འབྱུང་ཆེན་བཞི་ནི་འཕོས་གྱུར་ལ།། དེ་ཚེ་གསོས་སྨན་མེད་གྱུར་ན།། ངེས་པར་ནད་ཀྱི་སྡུག་བསྔལ་སྐྱེ།། སྨན་པས་དུས་བཞི་ཤེས་བྱ་ཞིང་།། དུས་ཚིགས་དག་ཀྱང་ཤེས་པར་བྱ།། ལུས་ཀྱི་ཁམས་བདུན་རིག་བྱས་ནས།། འགལ་བ་མེད་པར་ཟས་སྨན་བཏང་།། རོ་ཡི་ཁམས་དང་ཁྲག་དང་ཤ །རུས་དང་རྐང་དང་ཀླད་རྒྱས་རྒྱུངསསུ།། ནད་ནི་འདི་དག་ཞུགས་པའི་ཚེ།། གསོར་རུང་མི་རུང་ཤེས་པར་བྱ།། ནད་ནི་ཐ་དད་རྣམ་བཞི་ཡོད།། རླུང་དང་མཁྲིས་པ་བད་ཀན་དང་།། ཀུན་འདུས་པ་ཡི་ནད་ཡིན་ཏེ།། གཡོ་བའི་དུས་ནི་ཤེས་པར་བྱ།། དཔྱིད་ཀའི་དུས་ནི་བད་ཀན་གཡོ།། དབྱར་ནི་རླུང་ནད་སྐྱེ་བར་འགྱུར།། སྟོན་གྱི་དུས་སུ་མཁྲིས་པ་རྒྱས།། དགུན་ནི་གསུམ་པོ་ཅིག་ཅར་ལྡང་།། དཔྱིད་ནི་ཚ་རྩུབ་དྲོ་བ་བཟའ།། དབྱར་ནི་སྣུམ་དྲོ་ལན་ཚྭ་སྐྱུར།། སྟོན་ནི་གྲངས་གྲངདང་མངར་དང་སྣུམ།། དགུན་ནི་རྩུབ་སྐྱུར་སྣུམ་དང་མངར།། དུས་ནི་བཞི་པོ་འདི་དག་ཏུ།། སྨན་དང་ཟས་སྐོམ་གང་བཟའ་བ།། གལ་ཏེ་དེ་བཞིན་བཟའ་བྱེད་ན།། ནད་མང་དག་ནི་སྐྱེ་མི་འགྱུར།། ཟོས་འོག་ན་བ་བད་ཀན་དང་།། ཞུ་ཚེ་ན་བ་མཁྲིས་པར་གྱུར།། ཞུ་འོག་ལྡང་བ་རླུང་གི་དབང་།། དུས་དང་སྦྱར་ལ་ནད་ཤེས་བྱ།། ནད་ཀྱི་རྩ་བ་ཤེས་གྱུར་ནས།། ནད་ནི་ཇི་བཞིན་སྨན་བཏང་བྱ།། ནད་དབྱིབས་བྱེ་བྲག་ཐ་དད་ཀྱང་།། སྔར་ནི་རྩ་བ་ཤེས་པར་བྱ།། རླུང་ནད་དག་ལ་སྣུམ་བག་བཏང་།། མཁྲིས་པའི་ནད་ནི་འཁྲུ་ན་བཟང་།། བད་ཀན་ནད་ནི་སྐྱུགས་པར་བྱ།། ཀུན་འདུས་ལ་ནི་སྨན་གསུམ་དགོས།། རླུང་མཁྲིས་བད་ཀན་གསུམ་ལྡང་བ།། དེ་ནི་ཀུན་འདུས་པར་ཤེས་བྱ།། ནད་ལྡང་དུས་ནི་ཤེས་གྱུར་ཀྱང་།། རང་བཞིན་དག་ནི་ཤེས་པར་བྱ།། དེ་ལྟར་བརྟགས་ཏེ་ཤེས་གྱུར་ནས།། དུས་བཞིན་དུ་ནི་སྨན་དཔྱད་བྱ།། ཟས་སྐོམ་སྨན་ནི་འགལ་མེད་པ།། དེ་ནི་སྨན་པ་མཁས་ཞེས་བྱ།། ཤེས་པའི་ཡན་ལག་བརྒྱད་རིག་ནས།། སྨན་དཔྱད་རྣམས་ནི་ཀུན་སྡུད་པས།། འདི་དག་ལ་ནི་གསལ་བྱས་ནས།། སེམས་ཅན་ནད་ནི་གསོ་བར་བྱ།། གཏར་བ་དང་ནི་རྨས་བསྣད་དང་།། ལུས་ཀྱི་ནད་དང་འདྲེ་གདོན་དང་།། མ་རུངས་དུག་དང་བྱིས་པ་དང་།། ཚེ་བསྲིང་དང་ནི་མཐུ་བསྐྱེད་ཡིན།། སྔར་ནི་དེ་ཡི་ཁ་དོག་དང་།། སྨྲ་ཚིག་རང་བཞིན་རབ་བརྟགས་ནས།། དེ་འོག་རྨི་ལམ་དྲིས་གྱུར་ན།། རླུང་མཁྲིས་བད་ཀན་བྱེ་བྲག་ཤེས།། སྐེམ་རིད་མགོ་ཡི་སྐྲ་ངན་ཞིང་།། སེམས་ཀྱི་རང་བཞིན་མི་བརྟན་པ།། ཚིག་མང་རྨི་ལམ་འཕུར་མཐོང་ན།། དེ་ནི་རླུང་གི་རང་བཞིན་ཅན།། གཞོན་ནུ་སྐྲ་དཀར་སྐྱེ་བ་དང་།། རྔུལ་ཆེ་གཤེར་བ་མང་བ་དང་།། ཡིད་གཞུངས་རྨི་ལམ་མེ་མཐོང་བ།། དེ་ནི་མཁྲིས་པའི་རང་བཞིན་ཅན།། སེམས་བརྟན་ལུས་ནི་མཉམ་ལ་དྲང་།། ཞིབ་རྟོག་མགོ་དང་ནིསྣུམ་ཞིང་རླན།། རྨི་ལམ་ཆུ་དང་རྫས་དཀར་མཐོང་།། བད་ཀན་རང་བཞིན་ཤེས་པར་བྱ།། ཀུན་འདུས་རང་བཞིན་གཅིག་ལྡན་པས།། ཁ་ཅིག་གཉིས་དང་གསུམ་ལྡན་པས།། ཕྱོགས་གཅིག་ལྷག་པར་གང་མང་བ།། དེ་ཡི་རང་བཞིན་ཤེས་པར་བྱོས།། རང་བཞིན་རིག་པར་གྱུར་ནས་ནི།། ནད་བཞིན་སྨན་ནི་བཏང་བར་བྱ།། འཆི་བའི་མཚན་མ་མེད་གྱུར་ན།། མི་དེ་གསོར་རུང་བ་ཞེས་བྱ་བརྙས།། དབང་པོས་ལོག་པ་ལ་འཛིན་ཞིང་།། བླ་མ་སྨན་པ་དག་ལ་བརྙས།། ཉེ་དུ་དག་ལ་ཁོང་ཁྲོ་ན།། འཆི་བའི་མཚན་མར་ཤེས་པར་བྱ།། མིག་གཡོན་ཁ་དོག་དཀར་འགྱུར་ཅིང་།། ལྕེ་གནག་སྣ་ཟུར་ཡོ་བ་དང་།། རྣ་བའི་འཁོར་ལོ་སྔོ་ལས་གྱུར།། མཆུ་ཐུར་འཕྱང་བ་འཆི་བའི་མཚན།། ཨ་རུ་ར་ནི་རྣམ་གཅིག་ལ།། རོ་ནི་རྣམ་པ་དྲུག་ལྡན་ཏེ།། ནད་ནི་ཐམས་ཅད་སེལ་བྱེད་པས།། ཉེས་མེད་སྨན་རྣམས་ཀུན་གྱི་རྒྱལ།། འབྲས་བུ་གསུམ་དང་ཚ་བ་གསུམ།། སྨན་རྣམས་ནང་ན་རྙེད་པར་སླ།། བུ་རམ་སྦྲང་རྩི་འོ་མ་མར།། འདི་དག་ནད་མང་གསོ་བར་ནུས།། དེ་ལས་གཞན་པའི་སྨན་རྣམས་ནི།། ནད་དང་སྦྱར་ཏེ་བསྐྱེད་པར་བྱ།། སྔར་ནི་བརྩེ་བའི་སེམས་བསྐྱེད་ནས།། ནོར་དང་ཁེ་ལ་བལྟ་མི་བྱ།། ངས་ནི་ཁྱོད་ལ་ནད་གསོ་བའི།། གཅེས་པའི་དོན་ནི་བསྟན་པ་ཡིན།། ཞེས་དང་། མདོ་སྡེའི་དབང་པོའི་རྒྱལ་པོ་ལེའུ་ཉེར་དགུ་པ་ཡེ་ཤེས་སྡེའི་འགྱུར་དང་། གསེར་འོད་དམ་པ་ལེའུ་ཉེར་གཅིག་པ་གཉིས་ཧ་ལམ་མཚུངས་པར་དེ་བཞིན་གཤེགས་པ་གཙུག་ཕུད་ཅན་གྱི་མཚན་ལ་རིན་ཆེན་གཙུག་ཏོར་ཅན། ཁྱེའུ་ཆུ་འབེབས་ཀྱི་ཡབ་ལ་རལ་བ་འཛིན། ཚིགས་སུ་བཅད་པའང་། ཟླ་གསུམ་དབྱར་ཏེ་ཟླ་གསུམ་སྟོན་དུ་ཤེས།། གསུམ་ནི་དགུན་ཏེ་གསུམ་ནི་དཔྱིད་ཡིན་ནོ།། ཞེས་རྒྱས་བསྡུས་དང་འགྱུར་གྱི་ཁྱད་པར་ཆེ་ཙམ་ཡོད་ལ། གང་ལྟར་སྟོན་པ་རང་ཉིད་སྔོན་ཁྱེའུ་ཆུ་འབེབས་སུ་གྱུར་དུས་ཡབ་ཚོང་དཔོན་རལ་བ་འཛིན་ལས་སྨན་དཔྱད་གསན་པའི་ཚུལ་བསྐྱར་ཏེ་གསུངས་ཤིང་སྐབས་འདི་ཉིད་དུ་གསོ་བ་རིག་པ་ཀུན་གྱི་སྙིང་པོར་གྱུར་པ་བདུད་རྩི་སྙིང་པོ་ཡན་ལག་བརྒྱད་པ་གསུང་བའི་གནས་གྲོང་ཁྱེར་ལྟ་ན་སྡུག་ཅེས་པ་སྔ་རབས་རྫ་བ་སོགས་ནུབ་ཕྱོགས་ཨོ་རྒྱན་གྱི་ཡུལ་དང་། བ་བིབྱི་སོགས་རི་རབ་ཀྱི་རྩེ་སུམ་ཅུ་རྩ་གསུམ་གྱི་དབུས་ལྟ་ན་སྡུག་དང་གཅིག་པ། སྟོད་མི་ཉག་འུག་པ་གདོང་ནག་པ་སོགས་ཐུབ་པ་གངས་ཅན་མཚོའི་ཞིང་ཁམས་གཞི་དང་སྙིང་པོ་མེ་ཏོག་གིས་བརྒྱན་པའི་གནས་ཀྱི་དུམ་བུ་གཅིག་ཡིན་ཞེས་དང་། གདོང་ནག་པ་སོགས། གངས་ཅན་འབིགས་བྱེད་རི་སོགས་དབུས་སུ་ནི།། ཞེས་གཞལ་ཡས་ཁང་རི་བཞི་བརྒྱ་དཔངས་དང་བཅས་ཞིབ་པར་བཤད་པ། བདག་ཆེན་པ་སོགས་མངོན་པ་མཛོད་ནས་གསུངས་པའི་རི་བཞི་དང་སྦྱར་བ། བྲང་ཏི་དཔལ་ལྡན་འཚོ་བྱེད་འབིགས་བྱེད་སོགས་རི་བཞི་པོའི་དབུས་ན་ཡོད་པས་སོ་སོ་སྐྱེ་བོས་བལྟ་བར་མི་ནུས་པ། ཆོས་རྒྱལ་བྱང་པ་རྡོ་རྗེ་གདན་ཁོ་ནར་བཞེད་པ། རྗེ་ཟུར་མཁར་བ་དྷརྨ་སྭ་མི་གསོ་དཔྱད་ཀུན་གྱི་རྒྱལ་པོ་དཔལ་ལྡན་རྒྱུད་བཞི་ཞེས་བཀའ་སོར་བཞག་དེ་དོན་ལྟར་བཞེད་པ་ལས་གནས་དང་བཀའ་བསྟན་སོགས་ཀྱི་བགྲོས་མི་མཛད་པ། མཚོ་སྨད་མཁན་ཆེན་དང་བྱར་པཎ་གཉི་ག་རྫ་བ་དང་མཐུན་པར་ནུབ་ཕྱོགས་ཨོ་རྒྱན་གྱི་ཡུལ། བྱར་པོས་ལུགས་གཅིག་ཏུ་ཕྱི་ནང་གསང་གསུམ་དུ་ཕྱེ་བར་ཕྱི་ལྷའི་གྲོང་ཁྱེར་ལྟ་ན་སྡུག ནང་རྡོ་རྗེ་གདན་བྱང་པ་དང་མཐུན། གསང་བ་རང་སེམས་སུ་ངོས་བཟུང་བ་དང་། བླ་རྟ་ཚེ་དབང་གིས་ཕྱི་ནང་གསང་གསུམ་གཡུ་ཐོག་ཏུ་སྨན་རྒྱལ་གྱིས་གསུངས་པ་རྗེས་མཐུན་ཁོ་ན་དང་། འབྲུག་པ་པདྨ་དཀར་པོ་འོ་སྐོལ་གྱི་སྟོན་པས་འཚོ་བྱེད་གཞོན་ནུ་རི་བོ་སྤོས་ཀྱི་ངད་ལྡང་འཁྲིད་ནས་དེའི་ཁེངས་པ་བཅག་རྗེས་ཟློས་བུར་གསུངས་པ་ཡང་མཁས་པ་ལ་ལ་དག་གནས་དེ་གདོས་བཅས་སུ་གྲུབ་པ་མེད་དེ། སྟོན་པ་སྨན་པའི་རྒྱལ་པོའི་ཐུགས་རྣམ་པར་མི་རྟོག་པའི་ཡེ་ཤེས་ཀྱི་སྤྱོད་ཡུལ་རྣམ་པ་དེ་དང་དེ་དག་ཏུ་སྣང་བ་དང་། གསུང་པ་པོའི་བདག་རྐྱེན་དུ་གྱུར་པའི་སྨན་རྒྱལ་དེ་སྟོན་པ་ཐུབ་པའི་དབང་པོས་གང་ལ་གང་འདུལ་གྱི་ཚུལ་བསྟན་པར་བཞེད་པ། སོག་སོགསབཟློག་པ་འོག་ཕྱོགས་སུ་འཇིག་རྟེན་གྱི་ཁམས་བཻ་ཌཱུརྱ་ལྟར་སྣང་བ་ཡོད་པའི་སྨན་བླ་དང་ཞིང་འདིར་གཡུ་ཐོག་མགོན་པོ་ཞེས་གྲགས་པས་སྤྲུལ་པའི་གནས་ཡིན་པ། དེ་ཉིད་བྱང་ཆུབ་སེམས་དཔའི་སྤྱོད་པ་སྤྱད་པའི་ཚེ་སྒྲུབས་པའི་དགེ་བའི་རྩ་བ་ལས་བྱུང་བའི་གནས་སུ་འདོད་པ་སོགས་ལུང་རིགས་གང་གིས་ཀྱང་མི་འགྲུབ་པ། ཁ་ཅིག་ཤར་ཕྱོགས་བཻ་ཌཱུཪྻ་སྣང་གི་ཞིང་དུ་འདོད་པ་སོགས་མཐའ་ཀླས་ཤིང་། ཟུར་མཁར་བློ་གྲོས་རྒྱལ་པོས་མེས་པོའི་ཞལ་ལུང་དུ་ལུགས་དེ་དག་ཐམས་ཅད་བཀག་ནས། བྱེ་བྲག་ཏུ་བཤད་པ་ཞེས་ཁ་ཅིག་དབྱིག་གཉེན་གྱིས་མཛད་པར་གྲགས་ཀྱང་། དོན་དགྲ་བཅོམ་པ་བདུན་གྱིས་མངོན་པ་སྡེ་བདུན་གྱི་ལུང་ཁོལ་བུར་འགྱུར་བ་བུ་སྟོན་ཆོས་འབྱུང་སོགས་སུ་དྲངས་པར། ཆོས་འཁོར་གནས་དང་ཡངས་པ་ཅན།། ས་དཀར་ཅན་དང་ལྷ་ཡི་གནས།། བྱིས་པ་གསོད་དང་ཀཽ་ཤཱ་མྦི།། འབྲོག་དང་མཆོད་རྟེན་རི་དང་ནི།། འོད་མའི་གྲོང་དང་སྒྲར་བཅས་དང་།། སེར་སྐྱའི་གནས་ཀྱི་གྲོང་ཁྱེར་དུ།། འདི་རྣམས་སུ་ནི་ཐུབ་པ་ཡི།། སྐྱེས་མཆོག་ལོ་རེ་ལོ་རེ་བཞུགས།། ཉི་ཤུ་རྩ་གསུམ་མཉན་ཡོད་དུ།། སྨན་གྱི་ནགས་སུ་ལོ་བཞི་སྟེ།། འབར་པའི་ཕུག་གི་གནས་སུ་གཉིས།། རྒྱལ་པོའི་ཁབ་ཀྱི་གྲོང་དུ་ལྔ།།

X