//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > སྡེ་སྲིད་ཁོག་འབུབས། > ནང་དོན།

(2) བྱང་སེམས་ལྷ་དང་དྲང་སྲོང་གི་ལུགས།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-30 9:44:00 ཀློག་གྲངས། 18 

རིན་ཆེན་སྤུངས་པ་ལས། སྤྲུལ་བས་རྒྱ་ནག་རི་བོ་རྩེ་ལྔ་རུ།། འཇམ་དཔལ་དབྱངས་ཀྱིས་ནེ་ཙོར་སྤྲུལ་ནས་བཤད།། རྡོ་རྗེ་གདན་དང་རི་བོ་བྱ་རྐང་དུ།། སྤྱན་རས་གཟིགས་ཀྱིས་དྲང་སྲོང་སྤྲུལ་ནས་བཤད།། ཨོ་རྒྱན་ཡུལ་དུ་གཽ་ཤན་ཏིང་ལ།། ཕྱག་ན་རྡོ་རྗེས་བདུད་དུ་སྤྲུལ་ནས་བཤད།། ཅེས་དང་། འཇམ་དཔལ་སྙིང་གི་ཟུར་ཐིག་ཏུ།། རྒྱ་གར་རྒྱ་ནག་སྟོད་ཕྱོགས་གསུམ།། ལུགས་གསུམ་བྱང་ཆུབ་ཆེན་པོ་ཡིན།། སྨན་ཀུན་བརྒྱུད་པའི་རིགས་འཛིན་ཡང་།། དང་པོ་རིགས་གསུམ་མགོན་པོས་མཛད།། ཅེས་པ་ལྟར་ས་བཅུའི་དབང་ཕྱུག་རྗེ་བཙུན་འཇམ་དཔལ་དབྱངས་ཀྱིས་མགོ་བཅོས་བདུད་རྩིའི་ལྷུང་བཟེད། རིན་ཆེན་སྒྲོམ་བུ། རྟེན་འབྲེལ་བྱང་ཁོག མངལ་ནད་གསོ་བ་འཕྲུལ་གྱི་རྒྱལ་པོ། རིན་ཆེན་བང་མཛོད་ལྔ་པ། དཀྱུས་བཟློག་མགོ་བཅོས། རྡོ་རྒྱུད་ཆེ་ཆུང་རྣམ་གསུམ། མགོ་བཅོས་བདུད་རྩི་རྒྱ་མཚོ། ཡང་ཏིག་འཕྲུལ་གྱི་བཞི་སྐོར། ཁ་སྨར་དམརགསལ་བའི་ཡིག་ཆུང་། སྲོག་བཅོས་ལྐུགས་པ་ཁ་འབྱེད། སྨན་དཔྱད་སོོ་སོམ་རཱ་ཛཛཱ སྡེ་འབུམ། འཕགས་པ་སྤྱན་རས་གཟིགས་ཀྱི་མགོ་བཅོས་རྒྱལ་མཚན་དམ་པ། དཔྱད་གཅེས་གཟུངས། བདུད་རྩི་ཐིགས་པ།རྒྱན་དམ་པ། བདུད་རྩི་ཆུ་རྒྱུན་ཆེ་ཆུང་། བྱང་ཁོག་འགྲེལ་བ་དམར་ནག གལ་མདོའི་འགྲེལ་བ་ཆེ་ཆུང་། གསལ་བྱེད་མེ་ལོང་། མཐོང་བ་དོན་གསལ། དཔལ་ཕྱག་ན་རྡོ་རྗེས་མགོའི་རྩོད་བཟློག རོ་བཀྲ་འཕྲུལ་གྱི་མེ་ལོང་། གཟའ་བརྒྱུད་འཁོར་ལོ་རིན་ཆེན། ལྕང་ལོ་ནག་པོ། པདྨ་སྦུབས་པ། ཟུག་རྔུ་རྟེན་འབྲེལ་བརྟག་པ། ཁ་ཐོར་ཀུན་འཇོམས། རྗེ་བཙུན་མ་སྒྲོལ་མས་ཟུག་རྔུ་རྩལ་ཐབས་དྲུག སྔོ་སྦྱོར། སྔོ་ཤིང་གི་འཁྲུངས་དཔེ་ལེའུ་བརྒྱ་དང་ཉི་ཤུ་པ་རྣམས་མཛད་པར་གྲགས་པ་རྣམས་ལ་རྒྱལ་སྲས་བྱང་ཆུབ་སེམས་དཔའི་ལུགས་ཀྱི་ཐ་སྙད་དུ་བཞག་པ་དང་།

བསྐལ་བཟང་ལྷའི་ལུགས་ལ། ཚངས་པས་གུ་ན་ཤ་ཏྲ་བམ་པོ་སུམ་བརྒྱ་པ་དང་གསང་བའི་སྙིང་པོའི་དོན་བསྡུས་པ། སྐྱེ་དགུའི་བདག་པོས་འཕྲུལ་གྱི་མེ་ལོང་། ཐ་སྐར་གྱི་བུ་གཉིས་ཀྱིས་གཅེས་པ་གྲུབ་པ། བརྒྱ་བྱིན་གྱིས་གཅེས་པ་བསྡུས་པ་དང་བྱང་ཁོག་ཁྲེམས་ཀྱི་ལུང་འོད་འཕྲོ་བ། སྨན་གྱི་ལྷ་མོ་ནོར་རྒྱུན་མས་རིན་པོ་ཆེའི་འཕྲེང་བ་རྣམས་མཛད།

རིག་འཛིན་དྲང་སྲོང་གི་ལུགས་སུ་གྲགས་པ་ནི། བརྒྱ་བྱིན་ལ་སློབ་མ་སྐྱ་སེང་གི་བུ་ལྟར་ཕ་ལྷའི་དྲང་སྲོང་རྒྱུན་ཤེས་དང་། འོད་ཟེར་ཅན་དང་། འོད་ཡངས་དང་། ཡན་ལག་སྐྱེས་དང་། ལྷ་མིན་འཇོམས་དང་། མཆོད་སྦྱིན་ཅན་དང་། གནས་འཇོག་སྟེ་གཙུག་ཕུད་ཅན་བདུན་དུ་འབོད་པ་དང་། མ་མིའི་བུད་མེད་ལ་བརྟེན་ནས་བྱུང་བ་ནི་རྒྱུན་ཤེས་ཀྱི་བུ་དང་མེ་བཞིན་འཇུག་པ་དང་། ཐང་ལ་འབར་དང་། དཀའ་གཉིས་སྤྱོད་དང་། མུ་ཁྱུད་འཛིན་དང་། འགྲོ་སྐྱོང་གི་བུ་དང་། ནམ་ནབསསོ་སྐྱེས་དང་། སོགས་ཁོངས་ནས་གཤོལ་འགྲོ་སྐྱེས་དང་བརྒྱད་པོ་དེས་བརྒྱ་བྱིན་ལས་ཐོས་པའི་ཚེའི་རིག་བྱེད་ཀྱི་རྒྱུད་ལ་འཇུག་པའི་འགྲེལ་བ་རེ་རེ་བརྩམས་པ། དཀོས་སྟོན་པའི་སྡེ། གཞི་སྒྲུབ་པའི་སྡེ། བདུད་རྩི་ཆེན་པོའི་སྡེ། མི་འཇིགས་མཚོན་ཆའི་སྡེ། བདུད་རྩི་སྒྲུབ་པའི་སྡེ། སྲོག་གི་སྒྲོམ་བུའི་སྡེ། གསོ་དཔྱད་སྨན་སྦྱོར་གྱི་སྡེ། སྦྱོང་བྱེད་ལས་ལྔའི་སྡེ་སྟེ་ལེའུ་བཞི་བརྒྱ་དང་ཉི་ཤུ་རྩ་ལྔའི་བདག་ཉིད་ཅན་ཙ་ར་ཀ་སྡེ་བརྒྱད་དུ་གྲགས། དེ་དག་གི་འགྲེལ་བ་དྲང་སྲོང་དཔལ་ལྡན་འཕྲེང་བས་སྟོད་འགྲེལ་ཉི་ཟླ་བར་བཀབ་བམ་པོ་བརྒྱད་ཅུ། སྨད་འགྲེལ་འཕྲུལ་གྱི་ལྡེ་མིག་བམ་པོ་བཞི་བཅུ་སྟེ་ཁྱོན་བརྒྱ་ཉི་ཤུ་ལེའུ་དྲུག་བརྒྱ་དང་བཅས་བྱས་པ་ལྟར་ལུག་ནག་དང་། རྒྱ་སྐྱེགས་སྣ་དང་། མདའི་མཆོག་དང་། ལན་ཚའི་ལག་དང་། དཔལ་ལྡན་ཕུན་ཚོགས་དང་། ཉི་མའི་སྙིང་པོ་དང་། ཟླ་བའི་སྙིང་པོ་དང་། ཟླ་བའི་འོད་ཟེར་ལ་སོགས་པ་རྨ་བྱ་ཆེན་མོར། ཀུན་དགའ་བོ་དྲང་སྲོང་རྙིང་པ་བརྟུལ་ཞུགས་དང་རིག་སྔགས་གྲུབ་པ། གྲགས་པ་འབར་བ། ཀླུང་དང་རི་ལ་གནས་པ། དམོད་པའི་མཚོན་ཆ་ཅན། དཀའ་ཐུབ་དྲག་པོ། རྫུ་འཕྲུལ་དང་ལྡན་པ། མངོན་པར་ཤེས་པ་ལྔ་དང་ལྡན་པ། ནམ་མཁའ་ལ་འགྲོ་བ་དེ་དག་གི་མིང་བརྗོད་ཀྱིས། ཞེས་འོད་ཟེར་ཅན་དང་། འགྲོ་སྐྱོང་གི་བུ་དང་། རྒྱུན་ཤེས་ཀྱི་བུ་ལ་སོགས་པ་ལུགས་འདི་དང་མིང་མཐུན་པ་ཁ་ཤས་མཆིས་པས་བདག་ཅག་གི་སྟོན་པའི་སྔོན་ནས་འཇིག་རྟེན་དུ་བྱུང་བའི་དྲང་སྲོང་རྣམས་དང་། ཤ་ལི་ཧོ་ཏྲ་དང་། ལེགས་ཐོས་དང་། ཛ་ལས་རྒྱལ་ལ་སོགས་པ་རྣམས་ཀྱིས་ཀྱང་ཚེའི་རིག་བྱེད་ཀྱི་བསྟན་བཅོས་རྒྱ་ཆེ་ཞིང་གྲངས་མང་བ་བརྩམས་པ་ལས་དར་ཞིང་རྒྱས་ཏེ་ཕྱིས་རྡོ་འཇོག་གི་སྨན་པ་རྒྱུན་ཤེས་ཀྱི་བུ་ཞེས་བྱ་བ་ཚེའི་རིག་བྱེད་རྒྱ་མཚོ་ཆེན་པོའི་ཕ་རོལ་ཏུ་སོན་ཅིང་རྒྱལ་པོ་པདྨའི་དཔལ་གྱིས་བླ་ནས་དབང་བསྐུར་ཏེ་སྙན་གྲགས་ཀྱི་ཡི་གེ་རིང་དུ་སྦྲོ་སྤྲོབ་དེའི་བར་བྱུང་བར་གྲགས། ཕྱི་བ་མུ་སྟེགས་ཀྱི་ལུགས་ནི། འཇིག་རྟེན་གྱི་ལྷ་དབང་ཕྱུག་ཆེན་པོ་ལ་འཁོར་ཁྱབ་འཇུག་དང་། ཀྲེ་ན་བ་མ་དང་། སྒྲ་གཅན་དང་། དབུ་མ་དང་། ཡཀྵ་ཀ་ལ་ལ་སོགས་པས་བསྐུལ་པས། ལྷ་ཆེན་པོའི་དབུའི་རྒྱན་ལས་ཟབ་གསང་དཀར་ནག་གི་རྒྱུད། སྙན་རྒྱན་ལས་ཁྱུག་པའི་རྒྱུད། མགུལ་རྒྱན་ལས་སྲོག་རྩ་སྔོ་དམར་གྱི་རྒྱུད། སྐ་རགས་ལས་དཔའ་བོ་འཆིང་འགྲོལ་གྱི་རྒྱུད། དཔུང་གདུབ་ལས་མེ་ལྕེ་འཁོར་ལོའི་རྒྱུད། ཞབས་གདུབ་ལས་སྦལ་བ་དཀར་ནག་གི་རྒྱུད་ལ་སོགས་པ་ཚེའི་རིག་བྱེད་དུ་མ་ཞིག་གསུངས་ལ། རྡོ་རྗེ་ཁ་སྨྲ། རི་བོ་བརྩེགས་པ། མེ་ལྟར་འབར་བ། སྐྲ་བཤད་འཛིངས་པ་རྣམས་ལྷ་ཐམས་ཅད་མཁྱེན་པས་མཛད་པར་གྲགས།རལ་པ་ཏྲས་བམ་པོ་ནག་པོ། དུམ་པ་ནག་པོ། ཟླ་ཟེར་ནག་པོ་སྟེ་རྒྱུད་གསུམ་བྱས་པ་སྟེ། མུ་སྟེགས་འཁོར་ལ་དབང་ཕྱུག་ནག་པོའི་རྒྱུད། ཅེས་གསུངས་པ་ལྟར་འདི་དག་ཕྱི་མའི་ལུགས་སོ།།

X