//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > སྡེ་སྲིད་ཁོག་འབུབས། > ནང་དོན།

(2)ཐེག་ཆེན་གྱི་ལུགས།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-30 9:53:59 ཀློག་གྲངས། 17 

ཐེག་ཆེན་གྱི་ལུགས་ལ། དབུ་མ་བ་ཆོས་ཀྱི་བཤེས་གཉེན་གྱིས་མཛད་པ་མངོན་རྟོགས་རྒྱན་གྱི་འགྲེལ་བ་ཚིག་གསལ་ལས། སྤྱོད་པའི་གཉེན་པོར་ཞེས་པ་ནི་འདོད་ཆགས་ལ་སོགས་པ་རྩ་བའི་སྤྱོད་པ་བཞི་དང་། རེ་རེ་ཡང་ཕྱེ་བས་བརྒྱད་ཁྲི་བཞི་སྟོང་རྣམས་སོ།། དེ་དག་གི་གཉེན་པོར་གྱུར་པ་ནི་ཐུབ་པ་ཆེན་པོའི་ཆོས་ཀྱི་འཁོར་ལོ་མ་ལུས་པ་སྟེ། ཆོས་ནི་བསྟན་པའི་ཆོས་གཙོ་བོར་བྱས་པའོ།། འཁོར་ལོ་ནི་གདུལ་བྱའི་རྒྱུད་ལ་འཕོ་བར་སྣང་བས་སམ་ཚོགས་ཀྱི་དོན་གྱི་འཁོར་ལོ་སྟེ་སྒྲའི་དོན་ནི་དེ་དག་དང་ཉེ་བའི་ཕྱིར་རོ།། མ་ལུས་པ་ནི་ཆོས་ཀྱི་ཕུང་བོ་བརྒྱད་ཁྲི་བཞི་སྟོང་སྟེ། དེ་ལ་ཆོས་ཀྱི་ཕུང་བོ་གཅིག་གི་ཚད་ཇི་ཙམ་ཞེ་ན། དེ་གཅིག་ལ་ནི་ཚིག་ལེའུར་བྱས་པ་སྟོང་ཉིད་དེ་ཚིགས་སུ་བཅད་པ་རེ་རེ་ལ་ཡང་ཡི་གེའི་འབྲུ་སུམ་ཅུ་རྩ་གཉིས་ཉིད་དོ།། དེ་ལྟར་ན་ཆོས་ཀྱི་ཕུང་བོ་ཐམས་ཅད་ལ་ནི་ཚིགས་སུ་བཅད་པ་བྱེ་བ་ཕྲག་བརྒྱད་དང་འབུམ་ཕྲག་བཞི་བཅུར་འགྱུར་རོ།། འདི་ནི་རེ་ཞིག་ཐུན་མོང་གི་གྲངས་སུ་བགྲང་བའོ།། ཐེག་པ་བླ་ན་མེད་པའི་དབང་དུ་བྱས་ཏེ། དབང་པོའི་གླང་བོ་ཆེ་རབ་བརྟན་གྱིས་འཁུར་བར་འོས་པའི་སྣག་ཚས་ནི་ཆོས་ཀྱི་ཕུང་བོ་གཅིག་འདྲི་བར་ནུས་སོ།། ཞེས་གསུངས་ཏེ། དེ་ལྟར་བྱས་ན་མདོ་གང་དག་ལས་འཕགས་པ་ལྷས་བྱིན་གྱིས་གླང་བོ་ཆེ་ལྔ་སྟོང་གིས་འཁུར་བར་འོས་པའི་གླེགས་བམ་རྣམས་ཁ་ཏོན་དུ་བརྗོད་པར་བྱེད་དོ།། ཞེས་གསུངས་པ་འདི་ཡང་རིགས་པར་འགྱུར་རོ།། ཞེས་དང་། ཆོས་ཀྱི་ཕུང་བོ་དེ་དག་ཀྱང་སྡེ་སྣོད་གསུམ་ཉིད་དུ་རྣམ་པར་གཞག་བཞགསྟེ། ཞེས་བཤད་པའི་མདོ་གང་དག་ཅེས་པ་དྲིན་ལན་བསབ་པ་དང་། སྡེ་སྣོད་གསུམ་ནི་འདུལ་བ་མདོ་སྡེ་མངོན་པ་གསུམ་ཡིན་ལ། ཐེག་ཆེན་ཐུན་མོང་མིན་པའི་ལུགས་ལ། སྤྲིན་ཆེན་པོའི་མདོའི་དམ་པའི་ཆོས་ཀྱི་དཀྱིལ་འཁོར་གྱི་ཕུང་བོ་ཞེས་བྱ་བ་ལེའུ་སུམ་ཅུ་རྩ་བདུན་པ་ལས། མདོ་སྡེ་རྣམས་ནི་རེ་རེ་ལ།། གངྒཱའི་ཀླུང་གི་བྱེ་སྙེད་ཀྱིས།། བསྒྱུར་པའི་དོན་ནི་མང་ཡོད་ཅེས།། ཆོས་གསུངས་པས་ནི་ངེས་པར་བསྟན།། ཞེས་སོགས་གཞན་དུ་བཤད་ཟིན་པ་དང་། དཔའ་བར་འགྲོ་བའི་ཏིང་འཛིན་གྱི་མདོ་ལས། ལྷའི་བུ་དེ་བཞིན་གཤེགས་པས་ཆོས་ཇི་སྙེད་མངོན་པར་རྫོགས་པར་སངས་རྒྱས་པའི་ཆོས་དེ་ལས་བྱེ་བའི་ཆའམ། བྱེ་བ་སྟོང་གི་ཆའམ་བྱེ་བ་བརྒྱ་སྟོང་གི་ཆའི་ཆ་ཤས་ཀྱང་ངས་མ་བཤད་དོ།། གང་ངས་བཤད་པ་དེ་ལས་བྱེ་བ་བརྒྱ་སྟོང་གི་ཆ་ཤས་ཀྱང་དགེ་སློང་ཀུན་དགའ་བོས་མ་གཟུང་ངོ་།། ཞེས་དང་། ཕལ་བོ་ཆེའི་སངས་རྒྱས་ཀྱི་ཆོས་བསམ་གྱིས་མི་ཁྱབ་པའི་ལེའུ་བམ་པོ་དྲུག་ཅུ་རེ་དྲུག་པ་ལས། སངས་རྒྱས་བཅོམ་ལྡན་འདས་རྣམས་ནི་སྐུ་གཅིག་ལ་དབུ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བྱིན་གྱིས་བརླབས་ཏེ། དབུ་རེ་རེར་ཡང་ལྗགས་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་སྙེད་བྱིན་གྱིས་བརླབས་ནས། དེ་དག་རེ་རེས་ཀྱང་དབྱངས་ཀྱི་ཡན་ལག་དང་། སྒྲ་སྐད་ཀྱི་གསུང་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་རེ་རེ་བརྗོད་དེ། ཆོས་ཀྱི་དབྱིངས་མ་ལུས་པའི་སེམས་ཅན་གྱི་ཁམས་ཐམས་ཅད་གོ་བར་མཛད་ཅིང་དབྱངས་ཀྱི་ཡན་ལག་དང་སྒྲ་སྐད་ཀྱི་གསུང་རེ་རེས་ཀྱང་མདོ་སྡེ་སངས་རྒྱས་ཀྱི་ཞིང་བརྗོད་དུ་མེད་པའི་ཡང་བརྗོད་དུ་མེད་པའི་རྡུལ་ཤིན་ཏུ་ཕྲ་བ་སྙེད་བཤད་ལ། ཞེས་བསམ་གྱིས་མི་ཁྱབ་པའི་སྤྱོད་ཡུལ་དུ་བཞག་ཅིང་། བཅོམ་ལྡན་རལ་གྲིས་མངོན་པ་ཀུན་ལས་བཏུས་ཀྱི་འགྲེལ་བར། དེས་ཚིག་ནི་འཕོ་བ་དང་གཅོད་པ་དང་སྔོན་དུ་འགྲོ་བར་འཁོར་ལོ་རིན་པོ་ཆེ་དང་འདྲ་བས་ཆོས་ཀྱི་འཁོར་ལོའམ། རྗོད་བྱེད་ཀྱི་ཆོས་དུ་མ་སྤུངས་པ་ལ་ཆོས་ཀྱི་ཕུང་བོའི་གསུང་རབ་ཀྱི་ཚོགས་ཞེས་བྱའོ།། ཞེས་པའི་བཀའ་དེ་དག་གྲོ་ག་གའིཤིང་ཤུན་ཤོག་བུ་ལ་སོགས་པ་མདོག་བསྒྱུར་པ་དང་མ་བསྒྱུར་པ་གང་རུང་དུ་གླེགས་བམ་མམ་ལེགས་པར་སྦྱར་པ་ལྷའི་སྐད་ཀྱི་དབང་དུ་བཏང་ན། པཱུ་ལ་དང་བུ་སྟ་བུསྟབི་ཌི་ཚོགས་པ་ལའོ།། ཞེས་པའི་བྱིངས་བུསྟ་ལ། ཀྲྀཏྲ་གཉིས་པར། ཏྲི་པུཎྱཱ་དག་གོས། རྐྱེན་བུ་བྱིན། ཀྲྀཏྲ་དྲུག་པར། ཡུ་བུ་ཛྷ་རྣམས་ཀྱི་ཨན་ཨ་ཀ་ཨནྟ་རྣམས་སོ།། ཞེས་པས་བུ་བྱིན་ཨ་ཀར་བསྒྱུར་གོང་གི་བྱིངས་མཐའ་ཏའི་ཨ་བརྗོད་དོན་ཡིན་པས་ཕྱིས། ཏྲ་སྲོག་མེད་ཨ་ལ་དྲངས། མཐར་དོན་ཙམ་གྱི་རྣམ་དབྱེ་དང་པོ་སི་བྱིན་པས། ས་ར་དག་གི་རྣམ་བཅད་བྱས་པས་པུསྟ་ཀཿ ཞེས་དེང་སང་ཟུར་ཆག་པའི་པོ་ཏིའམ་གླེགས་བམ་དུ་གྲགས་པ་སོགས་འབྱུང་བར་སྒྲ་དོན་ནི། འཕགས་པ་ཐོགས་མེད་ཀྱིས་གཏན་ལ་དབབ་པ་བམ་པོ་ཉེར་གཅིག་པང་བར རིག་པའི་གནས་ལྔ་བསྟན་པ་གང་ཡིན་པ་དེ་ལ་ནང་རིག་པ་ནི་རིག་པའི་གནས་ཐམས་ཅད་དང་། བསྟན་བཅོས་ཐམས་ཅད་དང་། གཞུང་ལུགས་ཐམས་ཅད་ཀྱི་ནང་ན་མཆོག་དང་གཙོ་བོ་ཡིན་ནོ།། ཞེས་དང་། སངས་རྒྱས་ཀྱི་བཀའ་དེ་ཡང་མདོར་བསྡུ་ན་ཚུལ་དྲུག་གིས་ཁོང་དུ་ཆུད་པར་བྱ་སྟེ། དེ་ཁོ་ནའི་དོན་གྱི་ཚུལ་དང་། ཐོབ་པའི་ཚུལ་དང་། བཤད་པའི་ཚུལ་དང་། མཐའ་གཉིས་རྣམ་པར་སྤངས་པའི་ཚུལ་དང་། བསམ་གྱིས་མི་ཁྱབ་པའི་ཚུལ་དང་། དགོངས་པའི་ཚུལ་གྱིས་སོ།། ཞེས་ཚུལ་དྲུག་གམ། གྲགས་ཆེ་བ་མཁས་མཆོག་དབྱིག་གཉེན་གྱི་རྣམ་བཤད་རིག་པའི་ལེའུ་དང་པོར། ཆོས་ནི་ཤེས་བྱ་ལམ་དང་ནི།། མྱ་ངན་འདས་པ་ཡིད་ཀྱི་ཡུལ།། བསོད་ནམས་ཚེ་དང་གསུང་རབ་དང་།། འབྱུང་འགྱུར་ངེས་དང་ཆོས་ལུགས་ལའོ།། ཞེས་ཆོས་གང་ལ་འདུས་བྱས་སམ་འདུས་མ་བྱས་ཞེས་པ་ལྟ་བུ་ཤེས་བྱ་དང་། ཡང་དག་པའི་ལྟ་བ་ནི་ཆོས་ཞེས་པ་ལམ། སྐྱབས་སུ་སོང་བ་མྱང་འདས། སྐྱེ་མཆེད་ཡིད། འཁོར་དང་ལྷན་ཅིག་སྤྱོད་པ་བསོད་ནམས། མཐོང་ཆོས་གཅེས་པར་འཛིན་པའི་ཚེ། མདོ་སྡེ་དང་ཞེས་སོགས་གསུང་རབ། ལུས་འདི་ནི་རྒ་བའི་ཆོས་ཅན་སོགས་འབྱུང་འགྱུར། ཆོས་བཞི་ཞེས་ངེས་པ། ཡུལ་ཆོས་རིགས་ཆོས་ཞེས་པ་ཆོས་ལུགས་ཏེ་བཅུ་ལ་སོགས་པ་སྒྲ་དོན་དང་། མཚན་ཉིད་ནི། ཇི་སྐད་དུ། སྡུག་བསྔལ་དག་ནི་ཐམས་ཅད་དང་།། སྒྲིབ་ཀུན་སེལ་བྱེད་དམ་པའི་ཆོས།། ཞེས་པ་ལྟ་བུ། དབྱེ་བ་ནི། ངོ་བོས་དབྱེ་ན། མཛོད་གནས་བརྒྱད་པ་ལས། སྟོན་པའི་དམ་ཆོས་རྣམ་གཉིས་ཏེ།། ལུང་དང་རྟོགས་པའི་བདག་ཉིད་དོ།། ཞེས་པ་ལྟར་ལུང་རྟོགས་གཉིས། གདུལ་བྱའི་སྒོ་ནས་དབྱེ་ན། མདོ་སྡེ་རྒྱན་ལས། སྡེ་སྣོད་དག་ནི་གསུམ་མམ་གཉིས་ཀྱང་རུང་། ཞེས་འདུལ་བ་མདོ་སྡེ་མངོན་པ་གསུམ་མམ་མདོར་བསྡུ་ན་དམན་པ་ལ་མོས་པར་ཉན་ཐོས་ཀྱི་སྡེ་སྣོད་ཐེག་དམན་དང་། རྒྱ་ཆེ་བ་ལ་མོས་པར་ཐེག་ཆེན་གཉིས་སུ་ཐམས་ཅད་འདུས་པ་དང་། རྒྱུ་འབྲས་ཀྱི་སྒོ་ནས་དབྱེ་ན། ལོ་ཆེན་རིན་བཟང་དང་བུ་སྟོན་སོགས་གདམས་ངག་འབོགས་པའི་རྒྱལ་པོར་བཞེད་པ་དང་། ཚིག་དངོས་གནས་སློབ་དཔོན་ཛྙཱ་ན་ཤྲིས་མཐའ་གཉིས་སེལ་བར་དྲངས་པའི་གསང་བ་ལུང་བསྟན་ལས་འབྱུང་བ། འདྲེན་པའི་ཐེག་པ་གསུམ་པོ་དག། བཅོམ་ལྡན་ངེས་པར་གསུངས་ལགས་ན།། རྒྱུ་འབྲས་ལྷུན་གྲུབ་ཏུ་སྤྱོད་ཅིང་།། སངས་རྒྱས་གཞན་ནས་མི་ཚོལ་བའི།། ངེས་པའི་ཐེག་པ་ཅིས་མ་གསུངས། ཞེས་ཞུས་པའི་ལན་དུ། རྒྱུ་ལ་མོས་པ་རྒྱུའི་ཆོས་ཀྱི།། འཁོར་ལོ་རབ་ཏུ་བསྐོར་བྱས་ནས།། འབྲས་བུ་ཐེག་པ་ཉེ་ལམ་ཞིག། མ་འོངས་དུས་ན་འབྱུང་བར་འགྱུར།།ཞེས་པ་ལྟར་དབང་བརྟུལ་རྒྱུ་ལ་མོས་པས་རྒྱུ་ལམ་དུ་བྱེད་པ་མཚན་ཉིད་ཀྱི་ཐེག་པ་དང་། དབང་རྣོན་རྒྱུ་འབྲས་ལྷུན་གྲུབ་ལ་མོས་པས་འབྲས་བུ་ལམ་དུ་བྱེད་པ་སྔགས་ཀྱི་ཐེག་པ་གཉིས།བརྗོད་བྱའི་སྒོ་ནས་དབྱེ་བ་ནི། སངས་རྒྱས་རྣམས་ཀྱིས་ཆོས་བསྟན་པ།། བདེན་པ་གཉིས་ལ་ཡང་དག་བསྟན།། ཞེས་པ་ལྟར་ཀུན་རྫོབ་རིག་པས་མི་གནས་པར་སྟོན་པ་དང་། དོན་དམ་རིག་པས་འཐད་པར་སྟོན་པ་གཉིས། གཉེན་པོའི་སྒོ་ནས་དབྱེ་བ་ལ། སྡེ་སྣོད་གསུམ་དུ་འཇོག་པའི་རྒྱུ་མཚན། དེའི་ངེས་ཚིག ཡན་ལག་བཅུ་གཉིས་བསྡུ་ཚུལ། སོ་སོའི་ངེས་ཚིག་དང་བཞིས་འཆད་པ་སོགས་མཐའ་ཀླས་ཤིང་། དུས་ཀྱི་སྒོ་ནས་དབྱེ་ན། དུས་དང་པོར་གསུངས་པ་ལ་བདེན་བཞིའི་ཆོས་འཁོར། བར་དུ་གསུངས་པ་ལ་མཚན་ཉིད་མེད་པའི་ཆོས་འཁོར། ཐ་མར་གསུངས་པ་ལ་དོན་དམ་རྣམ་པར་ངེས་པའི་ཆོས་འཁོར་དང་གསུམ་སྤྱིར་བཏང་མདོ་སྡེ་དགོངས་པ་ངེས་འགྲེལ་ལས་བཤད། རྗོད་བྱེད་ཀྱི་སྒོ་ནས་དབྱེ་བ་ནི། སློབ་དཔོན་ཤནྟི་པས་བརྒྱད་སྟོང་འགྲེལ་བ་སྙིང་པོ་མཆོག་ལས། མདོ་སྡེ་དབྱངས་བསྙད་ལུང་བསྟན་དང་།། ཚིགས་བཅད་ཆེད་བརྗོད་གླེང་གཞི་དང་།། རྟོགས་བརྗོད་དེ་ལྟ་བུ་བྱུང་དང་།། སྐྱེས་རབས་ཤིན་ཏུ་རྒྱས་པ་དང་།། རྨད་བྱུང་གཏན་ལ་དབབ་པ་དང་།། གསུང་རབ་ཡན་ལག་བཅུ་གཉིས་ཡིན།། ཞེས་པ་ལྟར་ཡན་ལག་བཅུ་གཉིས་སམ་དུས་འཁོར་འགྲེལ་ཆེན་སོགས་ལས་གྲངས་མི་གཅིག་པ་གཞན་གསུངས་པ་རྣམས་དང་། བདག་རྐྱེན་གྱི་སྒོ་ནས་དབྱེ་བ་ལ་ཞལ་ནས་གསུངས་པ། བྱིན་གྱིས་བརླབས་པ། རྗེས་སུ་གནང་པ་སྟེ་གསུམ་ལས། ཞལ་ནས་གསུངས་པ་མདོ་སྡུད་པ་ལྟ་བུ། བྱིན་གྱིས་བརླབས་པ་དེ་ལ་ཡང་སྐུས་བྱིན་གྱིས་བརླབས་པ་ས་བཅུ་པའི་མདོ་ལྟ་བུ།གསུང་གིས་བྱིན་གྱིས་བརླབས་པ་མ་སྐྱེས་དགྲའི་འགྱོད་པ་བསལ་པ་ལྟ་བུ། ཐུགས་ཀྱིས་བྱིན་གྱིས་བརླབས་པ་ཀུན་ཏུ་བཟང་པོ་རང་རྟགས་ཀྱི་སྤྱོད་པ་སྟོན་པ་ཕལ་བོ་ཆེའི་མདོ་ལྟ་བུ། དེ་ལ་ཡང་ཐུགས་ཏིང་ངེ་འཛིན་གྱིས་བྱིན་གྱིས་བརླབས་པ་ཤེས་རབ་སྙིང་པོ་ལྟ་བུ། ཐུགས་ཐུགས་རྗེས་བྱིན་གྱིས་བརླབས་པ་ནི་ལྷ་ཀླུ་གནོད་སྦྱིན་ལ་སོགས་པས་སྔགས་སྨྲས་པ་རྣམས་འབྲས་བུ་ཁྱད་པར་ཅན་འབྱུང་བར་བྱིན་གྱིས་བརླབས་པ་ལྟ་བུ། ཐུགས་བདེན་པའི་སྟོབས་ཀྱིས་བྱིན་གྱིས་བརླབས་པ་ནི་བཅོམ་ལྡན་འདས་ཀྱིས་བདེན་སྟོབས་ཐུགས་ཀྱིས་བརྗོད་པས་རི་དང་རྩི་ཤིང་སོགས་ལས་སྒྲ་བྱུང་བ་ལྟ་བུ་སྟེ་གསུམ་དུ་བཤད། རྗེས་སུ་གནང་པ་གླེང་གཞི་དང་མཚམས་སྦྱོར་གྱི་ཚིག་རྣམས་ཆུག་ཆུགསལ་བཀའ་ཐམས་ཅད་བསྡུས་ཤིག་དང་འདི་ལྟར་རྩོམས་ཤིག་གསུངས་པ་ལྟ་བུ།།

X