//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > སྡེ་སྲིད་ཁོག་འབུབས། > ནང་དོན།

(3) བསྟན་བཅོས་ཀྱི་དབྱེ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-30 9:57:33 ཀློག་གྲངས། 64 

གསུམ་པ་དབྱེ་བ་ལ། མཆོག་དམན། བྱེད་ལས། བརྗོད་བྱ།བཤད་བྱ་བཀའ་རྣམས་ཀྱི་སྒོ་ནས་དང་། བསྟན་བཅོས་ཀྱི་རིགས་བསྡུ་བ་སྟེ་ལྔ་ལས། དང་པོ་ནི། སློབ་དཔོན་ཐོགས་མེད་ཀྱིས་ས་སྡེའི་ནང་ཚན་ས་གཏན་ལ་དབབ་པ་བམ་པོ་ཉེར་གཉིས་པ་ལས། བསྟན་བཅོས་ནི་གསུམ་སྟེ། ཐོས་པ་ལྷུར་ལེན་པའི་བསྟན་བཅོས་དང་། རྩོད་པ་ལྷུར་ལེན་པའི་བསྟན་བཅོས་དང་། སྒྲུབ་པ་ལྷུར་ལེན་པའི་བསྟན་བཅོས་སོ།། དེ་ལ་ཐོས་པ་ལྷུར་ལེན་པའི་བསྟན་བཅོས་ནི་འདི་ལྟ་སྟེ། བྲམ་ཟེའི་གསང་ཚིག་རྣམས་སོ།། རྩོད་པ་ལྷུར་ལེན་པའི་བསྟན་བཅོས་ནི་འདི་ལྟ་སྟེ། འདི་ལས་ཕྱི་རོལ་བ་རྣམས་ཀྱི་གཏན་ཚིགས་ཀྱི་བསྟན་བཅོས་སོ།། དེ་ལ་སྒྲུབ་པ་ལྷུར་ལེན་པའི་བསྟན་བཅོས་ནི་འདི་ལྟ་སྟེ། སངས་རྒྱས་ཀྱི་བཀའོ།། གཞན་ཡང་བསྟན་བཅོས་གསུམ་སྟེ། དོན་མེད་པའི་བསྟན་བཅོས་དང་། དོན་ལོག་པའི་བསྟན་བཅོས་དང་། དོན་དམ་པའི་བསྟན་བཅོས་སོ།། དེ་དག་ཀྱང་སྔ་མ་རྣམས་དང་ཅི་རིགས་པར་སྦྱར་བར་རིག་པར་བྱའོ།། གཞན་ཡང་བསྟན་བཅོས་གསུམ་སྟེ། ངན་གཡོའི་བསྟན་བཅོས་དང་། སྙིང་པོ་མེད་པའི་བསྟན་བཅོས་དང་། སྡུག་བསྔལ་ལས་ངེས་པ་འབྱུང་བའི་བསྟན་བཅོས་སོ།། དེ་དག་ཀྱང་སྔ་མ་རྣམས་དང་ཅི་རིགས་པར་སྦྱར་བ་རིག་པར་བྱའོ།། ཞེས་གསུངས་པའི་དོན་སྔོན་གྱི་མཁས་པས་བསྡེབས་ཤིང་བཀྲལ་པ་བོད་རྩོམས་རྣམས་སུ་འདྲེན་རྒྱུན་ལྟར་ན། དོན་མེད་དོན་ལོག་དོན་དང་ལྡན།། ངན་གཡོ་སྙིང་མེད་སྡུག་བསྔལ་སྤོང་།། ཐོས་རྩོད་སྒྲུབ་པ་ལྷུར་ལེན་པ།། བསྟན་བཅོས་དྲུག་བྲལ་གསུམ་དུ་འདོད།། ཅེས་བྱ་རོག་གི་སོ་བརྟག་པ་ལྟ་བུ་དོན་མེད་པའི་བསྟན་བཅོས། མཐོ་རིས་ཀྱི་ཐབས་སུ་སྲོག་གཅོད་པའི་མཆོད་སྦྱིན་ལྟ་བུ་ལོག་པ། ཕུང་ཁམས་སྐྱེ་མཆེད་རྫོགས་པར་སྟོན་པ་མངོན་པ་མཛོད་ལྟ་བུ་དོན་དང་ལྡན་པ། སྒྱུ་མ་དང་མིག་འཕྲུལ་གྱི་ཐབས་སྟོན་པ་ལྟ་བུ་ངན་གཡོ། ངལ་ཞིང་དུབ་པ་ལུས་ལ་མེ་ལྔ་བསྟེན་པའི་བསྟན་བཅོས་ལྟ་བུ་སྙིང་པོ་མེད་པ། བྱམས་པའི་ཆོས་ལྔ་ལྟ་བུ་སྡུག་བསྔལ་སྤོང་བ། ཉན་ཐོས་སེནྡེ་པའི་བསྟན་བཅོས་ལྟ་བུ་ཐོས་པ་ལྷུར་ལེན་པ། རྟོག་གེའི་ཚིག་དོན་བརྒྱད་ལྟ་བུ་རྩོད་པ་ལྷུར་ལེན། སྤྱོད་འཇུག་ལྟ་བུ་སྒྲུབ་པ་ལྷུར་ལེན་གྱི་བསྟན་བཅོས་ཏེ། དོན་ལྡན་སྡུག་བསྔལ་སྤོང་བ་སྒྲུབ་པ་ལྷུར་ལེན་གསུམ་མཆོག་དང་གཞན་དྲུག་པོ་དམན་པ་བསྟན་བཅོས་ལྟར་སྣང་དུ་བཞེད། གཉིས་པ་བྱེད་ལས་ཀྱིས་དབྱེ་ན། བཀའ་རྒྱ་ཆེན་པོ་སྡུད་པ་སློབ་དཔོན་ཡོན་ཏན་འོད་ཀྱི་འདུལ་བ་མདོ་རྩ་ལྟ་བུ། ཟབ་མོ་རྣམ་པར་འབྱེད་པ་རྒྱལ་བ་བྱམས་པའི་མངོན་རྟོགས་རྒྱན་ལྟ་བུ། འཁྲུགས་པ་སྡེབ་པའི་བསྟན་བཅོས་མདོ་སྡེ་རྒྱན་ནམ་བསླབ་བཏུས་ལྟ་བུ། གསུམ་པ་བརྗོད་བྱའི་སྒོ་ནས་དབྱེ་བ་ལ། ཤེས་བྱ་ཇི་སྙེད་པ་སྟོན་པ་དང་། ཇི་ལྟ་བ་སྟོན་པ། ཐར་བ་དང་ཐམས་ཅད་མཁྱེན་པ་སྟོན་པ་གསུམ་ལས། དང་པོ་ལའང་ཕལ་བ་དང་ཁྱད་པར་ཅན་གཉིས་ཀྱི་དང་པོ་ནི། བརྟག་པ་བརྒྱད་དམ་བཅོ་བརྒྱད་ལ་སོགས་པ་འཇིག་རྟེན་ལུགས་ཀྱི་བསྟན་བཅོས་རྣམས་དང་། རིག་གནས་ལྔ་སྟོན་བྱེད་ཀྱི་བསྟན་བཅོས་ཏེ་གཉིས་སུ་བཤད། གཉིས་པ་ཤེས་བྱ་ཇི་ལྟ་བ་སྟོན་བྱེད་ནི། བདེན་བཞི་རྣམ་པ་བཅུ་དྲུག་ཏུ་སྟོན་པའམ། གཟུང་འཛིན་གཉིས་མེད་ཀྱི་དོན་སྟོན་པའམ། རང་བཞིན་མེད་པའི་བདེན་པ་སྟོན་པ་སྟེ་རྣམ་ངེས་དང་སུམ་ཅུ་པ་དང་དབུ་མ་རྒྱན་ལྟ་བུའོ།། གསུམ་པ་ཐར་བ་དང་ཐམས་ཅད་མཁྱེན་པ་སྟོན་བྱེད་ནི་སྤྱོད་འཇུག་ལྟ་བུའོ།། བཞི་པ་བཤད་བྱ་བཀའི་སྒོ་ནས་དབྱེ་ན། བཀའ་སྤྱིའི་དགོངས་འགྲེལ་དང་། བྱེ་བྲག་གི་དགོངས་འགྲེལ་གཉིས་ལས། དང་པོ་ནི། བཀའ་སྤྱིའི་ཚིག་གི་ཆ་གསལ་བར་བྱེད་པ་ལ་སྒྲ་དང་། དོན་གྱི་ཆ་གསལ་བར་བྱེད་པ་ཚད་མ་ལ་གྲགས་ཀྱང་། ཕྱི་རོལ་བའི་སྒྲ་ཚད་སོགས་ཀྱིས་མ་ངེས་པའི་ཕྱིར་རོ།། གཉིས་པ་བཀའ་བྱེ་བྲག་གི་དགོངས་འགྲེལ་ལ་གསུམ་ལས། འཁོར་ལོ་དང་པོའི་ལྟ་བའི་ཆ་གསལ་བར་བྱེད་པ་ཁ་ཆེ་བྱེ་བྲག་སྨྲ་བ་བཀའ་དང་མདོ་སྡེ་བའི་བསྟན་བཅོས་སུ་བཞེད་པ་མངོན་པ་སྡེ་བདུན། དེ་དག་གི་དོན་བསྡུས་བྱེ་བྲག་བཤད་མཛོད་ཆེན་མོ། དེ་ལས་ཀྱང་བསྡུས་པ་དབྱིག་གཉེན་གྱི་མཛོད་ལྟ་བུ། གཉིས་པ་སྤྱོད་པའི་ཆ་གསལ་བར་བྱེད་པ། གཞི་བཅུ་བདུན་གྱི་རབ་བྱུང་གི་གཞི་དང་པོར་བསྟན་ནས་རྣམ་འབྱེད་དང་གཞི་བཅུ་དྲུག་སྟོན་པ་གཞིར་བྱས་པ་ལ། གཞུང་དམ་པའི་ཞུ་བ་འདུལ་བྱེད་སོགས་དང་ཕྲན་ཚེགས་ཀྱི་སྐབས་ནས་འབྱུང་བ་རྣམས་ཇི་ལྟར་རིགས་པར་སྦྱར་བ་མདོ་རྩ་དང་། རྣམ་འབྱེད་གཞིར་བཞག་ནས་གཞན་ཇི་ལྟར་རིགས་པར་སྦྱར་བ་མེ་ཏོག་འཕྲེང་རྒྱུད་དང་སུམ་བརྒྱ་པ་ལྟ་བུའོ།། གཉིས་པ་བཀའ་བར་བའི་ལྟ་བའི་ཆ་གསལ་བར་བྱེད་པ་ལ། ཤིང་རྟའི་སྲོལ་འབྱེད་བཞིར་གྲགས་པ་ལས། མདོ་ལས་དངོས་སུ་བརྗོད་པའི་དོན་ནམ་སྙིང་པོའི་དོན་སྟོན་པ་དབུ་མ་རྩ་བ་ཤེས་རབ་དེའི་རབ་བྱེད་དང་པོ་ལས་འཕྲོས་པ་རྩོད་བཟློག བདུན་པ་ལས་འཕྲོས་པ་སྟོང་ཉིད་བདུན་ཅུ། རང་སྡེ་བྱེ་བྲག་ཏུ་འགོག་པ་རིགས་པ་དྲུག་ཅུ་པ། སྒྲུབ་བྱེད་རྟོག་གེའི་ཚིག་དོན་བཅུ་དྲུག་འགོག་པ་ཞིབ་མོ་རྣམ་འཐག་སྟེ་རིགས་ཚོགས་ལྔ་རྩོད་མེད་ཀྱི་སྟེང་། སྔ་རབས་རྣམས་ཐ་སྙད་གྲུབ་པ་དང་རིན་ཆེན་འཕྲེང་བ་ག་ལས་འཇིགས་མེད་གསུམ་གང་རུང་དུ་སྦྱར་པའི་སོ་སོའི་བཞེད་པའི་རིགས་ཚོགས་དྲུག་འདྲེན་པ་དང་། མཐའ་དག་བགྲངས་ན་རིགས་ཚོགས་བརྒྱད་དུའང་བཞེད་དགོས་པ་ལྟ་བུ་དང་། འཇམ་མགོན་ཆོས་ཀྱི་རྒྱལ་པོ་བཙོང་ཁ་བས་སྔ་རྩོམ་གསེར་འཕྲེང་དུ་སྔ་རབས་ཀྱི་བཞེད་པ་བཞིན་མཛད་ནའང་། ཕྱིས་རྩོམས་རིགས་པའི་རྒྱ་མཚོར་རིན་ཆེན་འཕྲེང་བ་བསྣན་པའི་ཡོངས་གྲགས་དྲུག་ཏུ་བཞེད་པ་དང་། ཤུགས་བསྟན་གྱི་དོན་ནམ་མངོན་པར་རྟོགས་པའི་དོན་གཙོ་བོར་དངོས་པོ་བརྒྱད་ཀྱི་སྒོ་ནས་སྟོན་པ་མངོན་རྟོགས་རྒྱན་ལྟ་བུའོ།། སྤྱོད་པའི་ཆ་གསལ་བར་བྱེད་པ། མདོ་ཀུན་ལས་བཏུས་དང་སྒོམ་རིམ་ལ་སོགས་པ་ལྟ་བུའོ།། གསུམ་པ་བཀའ་ཐ་མའི་ཆ་གསལ་བར་བྱེད་པ། མདོ་སྡེ་དགོངས་པ་ངེས་འགྲེལ་གྱི་འགྲེལ་བ་ཐོགས་མེད་ཀྱིས་མཛད་པ། བློ་གྲོས་མི་ཟད་པའི་མདོ་འགྲེལ་དབྱིག་གཉེན་གྱིས་མཛད་པ། སངས་རྒྱས་ཀྱི་སའི་རྣམ་གཞག་ངང་ཚུལ་བཟང་པོས་མཛད་པ། དཀོན་བརྩེགས་འོད་སྲུངས་ལེའུའི་རྣམ་བཤད་བློ་བརྟན་པའི་ཆ་ཙམ་སྟོན་པ་དང་། རགས་པའི་དུས་བྱམས་པ་དང་འབྲེལ་བའི་ཆོས་སྡེ་རྣམས་ཐེག་ཆེན་ཐམས་ཅད་ཀྱི་དགོངས་པ་འགྲེལ་ཞིང་འཁོར་ལོ་གསུམ་པའི་དོན་གཙོ་བོར་སྟོན་པ་ཙམ་ལ་བརྟེན་ནས་འཁྱོག་བཤད་ཀྱི་རིགས་སྣང་ཡང་། མངོན་རྟོགས་རྒྱན་ནི་ཞིབ་ཆའི་དུས་ནམ་ཡང་འཁོར་ལོ་བར་བ་ལས་མ་འདས་སོ།། ལྔ་པ་བསྟན་བཅོས་ཀྱི་རིགས་བསྡུ་བ་ལ་གསུམ་སྟེ་བཀའ་ལ་བརྟེན་པ་དང་། མི་བརྟེན་པ། བཀའ་བསྟན་གྱི་ཁྱད་པར་བཤད་པའོ།།

དང་པོ་ལ། བཀའ་ཉིད་ལ་འགྲེལ་བ་བཏབ་པ་དང་། བཀའི་དོན་རྒྱུད་དུ་བརྩམས་པ་གཉིས། དང་པོ་ལ། ཚིག་གི་ཆ་དོན་གོ་དཀའ་བའི་དོན་རྣམ་པར་འབྱེད་པ་སྡུད་འགྲེལ་གཉིས་ལྟ་བུའི་དཀའ་འགྲེལ། ཚིག་གི་ཆ་སྤྲོས་པ་དང་བཅས་ནས་འཆད་པ་ཆེད་དུ་བརྗོད་པའི་ཚོམས་ཀྱི་འགྲེལ་བ་ལྟ་བུའི་ཚིག་འགྲེལ། དོན་གྱི་གཙོ་བོ་བསྡུས་ནས་སྟོན་པ་སྡུད་པའི་དོན་བསྡུས་ལྟ་བུའི་བསྡུས་དོན་གྱི་འགྲེལ། ངག་དོན་དྲིལ་ནས་སྟོན་པ་དག་ངགདོན་གྱི་འགྲེལ་བ། ཚིག་དོན་གཉི་ག་རྒྱ་ཆེར་འགྲེལ་བ་སོ་སོ་ཐར་བའི་འགྲེལ་བ་བམ་པོ་ལྔ་བཅུ་པ་ལྟ་བུའི་རྒྱ་ཆེར་འགྲེལ་བ་དང་ལྔར་འདུས། གཉིས་པ་བཀའི་དོན་རང་རྒྱུད་དུ་བརྩམས་པ་ལ། བཀའ་གཅིག་གི་དོན་རྫོགས་པར་སྟོན་པ་མངོན་རྟོགས་རྒྱན་ནམ་མདོ་རྩ་ལྟ་བུ། ཐོར་བུ་སྟོན་པ་དགེ་ཚུལ་གྱི་ཀ་རི་ཀ་ལྟ་བུ། བཀའ་མང་པོའི་དོན་སྟོན་པ་བསླབ་བཏུས་དང་བཤེས་སྤྲིང་ལྟ་བུ། སྤྱིར་གྱི་འགྲེལ་བ་ཙམ་དང་། བཤད་པ་དང་། རྣམ་བཤད་དང་། བཤད་སྦྱར་དང་། དོན་བསྡུས་དང་། དཀའ་འགྲེལ་དང་། རྒྱ་ཆེར་འགྲེལ་དང་། ལེགས་པར་སྦྱར་བ་དང་། རྣམ་པར་ཕྱེ་བ་ལ་སོགས་ཏེ་མིང་གིས་དབྱེ་བ་མང་དུ་འབྱུང་ལ། དེའི་ཁོངས་ནས་བསྟན་བཅོས་ཡང་དག་དང་ལྟར་སྣང་གི་ཁྱད་པར་ཤེས་པར་བྱ་ཞིང་། གཉིས་པ་བཀའ་ལ་མི་བརྟེན་པའི་བསྟན་བཅོས་ནི། ཐུན་མོང་བའི་དུས་སྒྲ་ཚད་དུ་བཞེད་ནའང་། ཐུན་མོང་མིན་པར་ཚད་མ་ལ་འཇམ་མགོན་ཆོས་ཀྱི་རྒྱལ་པོ་བཙོང་ཁ་བའི་དགོངས་པ་སོགས་སྒྲ་ཚད་གཉི་ག་ལ་དོན་གྱི་བཀར་མི་བཞེད་པ་དཀའ་གཤིས་དཔེར་བརྗོད་ཙམ་དུ་སྙན་ངག་མེ་ལོང་དང་ཟློས་གར་ལྟ་བུའོ།། གསུམ་པ་ཁྱད་པར་ནི། སངས་རྒྱས་ཀྱིས་དངོས་སུ་གསུངས་པ་ལྟ་ཅི་སྨོས། བདག་རྐྱེན་ཙམ་མཛད་ནས་འཁོར་གྱིས་སྤོབས་པ་བསྐྱེད་དེ་བཤད་པ་དང་། འདི་ལྟར་གྱིས་ཞེས་གདམས་པ་རྣམས་བཀའ་ཡིན་ཞིང་། དེ་ལས་གཞན་པ་རྣམས་བསྟན་བཅོས་ཡིན་ལ། དེ་དག་རྩོམ་པ་ལ་ཐེག་ཆེན་གྱི་དབང་དུ་བཏང་ན། འཕགས་པ་ཐོགས་མེད་ཀྱིས་ས་གཏན་ལ་དབབ་པ་བམ་པོ་ཉེར་གཉིས་པར། བསྟན་བཅོས་ཉེ་བར་སྦྱོར་བར་འདོད་པས་རྒྱུ་རྣམ་པ་དྲུག་གིས་བསྟན་བཅོས་ཉེ་བར་སྦྱར་བར་འོས་པ་ཡིན་ཏེ། ཆོས་ཀྱི་དོན་མང་དུ་བྱས་པར་འགྱུར་རོ་སྙམ་པ་དང་། སེམས་ཅན་རྣམས་ལ་མོས་པ་སྣ་ཚོགས་ཡོད་པའི་ཕྱིར་དེ་དག་ཁ་ཅིག་འདིས་འཇུག་པར་འགྱུར་རོ་སྙམ་པ་དང་། དོན་ཉམས་པ་རྣམས་རབ་ཏུ་དབྱེ་བར་བྱའོ་སྙམ་པ་དང་། དོན་འཐོར་བ་རྣམས་བསྡུ་བར་བྱ་བའི་ཕྱིར་རོ་སྙམ་པ་དང་། དོན་ཟབ་མོ་རྣམས་གསལ་བར་བྱ་བའི་ཕྱིར་རོ་སྙམ་པ་དང་། ཚིག་འབྲུ་མཛེས་པས་མཛེས་པ་བསྐྱེད་པར་བྱའོ་སྙམ་པས་སོ།། ཞེས་རྒྱུ་བསམ་པའི་ཁྱད་པར་དྲུག་དང་། དེ་ཉིད་ལས། བསྟན་བཅོས་ཉེ་བར་སྦྱོར་པར་འདོད་པས་བདག་ཉིད་ཡོན་ཏན་བཞི་དང་སྦྱར་ནས་བསྟན་བཅོས་ཉེ་བར་རྩོམ་པར་བྱ་སྟེ། སྔོན་གྱི་སློབ་དཔོན་རྣམས་ལ་བརྒྱལ་ང་རྒྱལམི་བྱེད་པ་དང་། སེམས་ཅན་རྣམས་ལ་སྙིང་རྗེ་བ་དང་། ཆོས་མཐུན་པ་རྣམས་ལ་བྱམས་པ་དང་། བདག་ཉིད་མི་སྒྲོག་པའོ།། ཞེས་བསྟན་བཅོས་རྩོམ་པ་པོར་ཡོན་ཏན་བཞི་ཚང་དགོས་པ་དང་། ཐ་སྙད་མཁན་པོའི་དབང་བཏང་ན། སློབ་དཔོན་དབྱུག་པ་ཅན་གྱིས། རང་བཞིན་གྱིས་གྲུབ་སྤོབས་པ་དང་།། མང་དུ་ཐོས་དང་དྲི་མེད་དང་།། མངོན་པར་སྦྱོར་བ་མི་དམན་པ།། སྙན་ངག་ཕུན་སུམ་ཚོགས་པའི་རྒྱུ།། ཞེས་པ་འདི་ལ་མཆོག་དམན་ནམ་སྒྲ་ཡངས་དོག་གཉིས་ཀྱི་ཡངས་པའི་དབང་བཏང་ན། སྐྱེ་བ་གོང་མ་གཞན་དུ་རྒྱལ་བའི་གསུང་རབ་ཕྱི་ནང་རིག་པའི་གནས་རྣམས་ལ་གོམས་པ་སྔོན་དུ་བྱས་པའི་མཐུ་ཡོངས་སུ་སད་པའི་བག་ཆགས་ཀྱིས་ཚེ་འདིར་རང་བཞིན་གྱིས་གྲུབ་པའི་སྤོབས་པ་སྟེ་སྐྱེ་བས་ཐོབ་པའི་ཤེས་རབ་ཟབ་མོ་དང་། བྱེ་བྲག་སྤྱིར་གོང་ལྟར་དང་ཁྱད་པར་རིག་གཞུང་འདི་གའི་གཞུང་དང་བསྟན་བཅོས་ཀྱི་ཚོགས་དེ་དང་འབྲེལ་བའི་སྔོན་གྱི་གཏམ་རྒྱུད་མིང་གི་མངོན་བརྗོད་ལ་སོགས་པ་ལེགས་བཤད་ཀྱི་ཚོགས་མང་དུ་ཐོས་པ་དེས་ཀྱང་མི་ཆོག་པར་ཐེ་ཚོམ་གྱི་དྲི་མ་མེད་པ། དེ་སེམས་པ་དང་གོམས་པ་ལ་མངོན་པར་སྦྱོར་བའི་གུས་སྦྱོར་དང་རྟག་སྦྱོར་གྱི་བརྩོན་འགྲུས་མི་དམན་པ་སྟེ་གསུམ་ནི་སྐབས་དོན་སྙན་ངག་དང་གཞུང་ལུགས་གང་གིའང་རིག་ཚུལ་ཕུན་སུམ་ཚོགས་པ་རྒྱུད་ལ་བསྐྲུན་པའི་རྒྱུར་བཤད་པ་དང་། གསོ་བ་རིག་པ་འདི་དང་གསང་སྔགས་བླ་ན་མེད་པའི་ལུགས་ལ། ཁ་ཆེའི་པཎྜི་ཏ་ཟླ་དགའི་ཟླ་ཟེར་དུ། བླ་མའི་ལུང་དང་ཡང་དག་དོན།། གསལ་བར་རྟོགས་ནས་རྩོམ་པར་བྱ།། ཞེས་རབ་ཆོས་ཉིད་ཀྱི་བདེན་པ་མཐོང་བ་དང་། དཔལ་ལྡན་དྲི་མེད་ལྷ་ཡིས་ནི།། ཡིད་ནི་རྣམ་པར་དྲངས་པས་ན།། ཞེས་འབྲིང་ཡི་དམ་ལྷའི་གནང་པ་ཐོབ་པ་སོགས་དང་། ཐ་མ་དབང་ལུང་ལག་འཁྲིད་སོགས་བརྒྱུད་པའི་ཆུ་བོ་མ་ཆད་ཅིད་ཅིངརང་བསྒྲུབ་ཕྱོགས་ཀྱི་ཤེས་བྱ་དང་དགག་ཕྱོགས་བཞགསྤོང་བར་མཁས་ལ། ལུང་ལ་འདྲིས་པ་དང་སྒྲ་ཚད་སྙན་ངག་ལ་བྱང་ཆུབ་པས་བསྟན་བཅོས་རྩོམ་རུང་བར་གསུངས།

X