//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > སྡེ་སྲིད་ཁོག་འབུབས། > ནང་དོན།

(1) སྡོམ་གསུམ་གྱི་རྣམ་བཞག་ལས་སོ་ཐར་གྱི་སྡོམ་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-30 10:09:14 ཀློག་གྲངས། 438 

  རྣལ་འབྱོར་རྒྱུད་ཀྱི་བཤད་རྒྱུད་རྡོ་རྗེ་རྩེ་མོ་ལས། སོ་སོ་ཐར་དང་བྱང་ཆུབ་སེམས།། རིགས་འཛིན་སྔགས་ཀྱི་སྡོམ་པའོ།། ཞེས་སོ་ཐར་བྱང་སེམས། སྔགས་སྡོམ་དང་གསུམ་ལས། དང་པོ་ནི། པྲཱརབ་ཏུ་རྫོགས་པ་ལ་འོའི། བྱིངས་ལ། ཀྟི་འོས། ཀྟི་བྱིན། ཀ་ཡོན་ཏན་འགོག་པའི་དོན་དེ་ཕྱིས་ཚིག་ཕྲད་ལས་ཨ་ཐུང་དུར་བྱས་པས་པྲ་ཏི་དང་པོ་སོགས་ལའང་འཇུག་མོད་དེ་གཙོ་བོ་སོ་སོ། མུཙླེ་གྲོལ་བའམ་ཐར་བ་ལའོའི་བྱིངས་ལ། ཨུན་ལས་ས་འོས། ས་རྐྱེན་དང་ཨཔྲ་བི་ཀ་ར་ཎ་བྱིན། ལྀ་རྗེས་འབྲེལ་གྱི་ཕྱིས། ཨཔྲ་བི་ཀ་ར་ཎའི་ཡོན་ཏན་གྱི་ཨུ་ཨོ། ཙུའི་ཀུ་འོས། ཙ་ཀར་བསྒྱུར། ཀུ་ཨི་ལ་ལ་ཥ་རུ་བྱེད་དེ་འོས། ས་ཥར་བསྒྱུར་དྲངས་པས་བྲ་ཏི་མོཀྵ་སོ་སོ་ཐར་བ་སྟེ་སྒྲ་བཤད་ཀྱི་དབང་བཏང་ན། བྲ་ཏི་ནི་སོ་སོའམ་ཐ་དད་པ་སྟེ་སྡོམ་པ་ཐོབ་པའི་ཚེ་སྡིག་པའི་ཆོས་ཀྱི་གཉེན་པོ་སྐྱེས་པས་སྤང་བྱ་ལས་རྒྱུད་སོ་སོར་གྱུར་པའམ་འགགས་པའོ།། མོཀྵ་ནི་ཐར་བའམ་གྲོལ་བར་གྱུར་པ་སྟེ་དངོས་སུ་སྡིག་པ་ལས་ཐར་ཞིང་བརྒྱུད་ནས་ངན་སོང་དང་འཁོར་བ་ལས་གྲོལ་པ་འདི་ནི། ཆོས་ཀྱི་རྒྱལ་མོའི་མདོ་ལས། སོ་སོ་ཐར་བ་ཞེས་བྱ་བའི་ཚུལ་ཁྲིམས་འདི་བཟུང་ན། མུན་པ་ལས་སྣང་བ་ཕྲད་པ་དང་མཚུངས་སོ།། མི་དབུལ་བོས་ནོར་རྙེད་པ་དང་མཚུངས་སོ།། ནད་པས་སྨན་རྙེད་པ་དང་མཚུངས་སོ།། བཙོན་ཁྲི་མུན་ནས་ཕྱུངས་པ་དང་མཚུངས་སོ།། འདི་ནི་ཐམས་ཅད་ཀྱི་མཁན་པོ་ཆེན་པོ་ཡིན་པས་སངས་རྒྱས་འཇིག་རྟེན་ན་བཞུགས་པ་དང་མི་མཚུངས་པ་མེད་དོ་ཞེས་དང་ཚུལ་ཁྲིམས་ཡང་དག་པར་ལྡན་པའི་མདོ་ལས། ཇི་ལྟར་མིག་མེད་གཟུགས་མཐོང་མི་འགྱུར་ལྟར།། དེ་བཞིན་ཚུལ་ཁྲིམས་མེད་ན་ཆོས་མི་མཐོང་།། ཇི་ལྟར་རྐང་མེད་ལམ་འཇུག་ག་ལ་ནུས།། དེ་བཞིན་ཚུལ་ཁྲིམས་མེད་ན་ཐར་མི་འགྱུར།། ཞེས་དང་། དགེ་སློང་ལ་རབ་ཏུ་གཅེས་པའི་མདོར།། སོ་ཐར་ཚུལ་ཁྲིམས་འདི་ནི་བདེ་བའི་མཆོག། སོ་ཐར་ཚུལ་ཁྲིམས་འདི་ནི་ཐར་བའི་ལམ།། སོ་ཐར་ཚུལ་ཁྲིམས་འདི་ནི་ཡོན་ཏན་ཞིང་།། སོ་ཐར་ཚུལ་ཁྲིམས་འདི་ནི་སངས་རྒྱས་རྒྱུ།། ཞེས་དང་། སོ་སོ་ཐར་བའི་མདོ་ལས། སངས་རྒྱས་འདུལ་བ་གངས་ཅན་མཚོ།། གཏིང་མཐའ་མེད་པ་ཐམས་ཅད་ཀྱི།། གནས་པའི་སྙིང་དང་སྙིང་པོ་ནི།། སོ་སོ་ཐར་བ་འདི་ཡིན་ནོ།། ཞེས་དང་། སློབ་དཔོན་ཆོས་ཀྱི་ཚོང་དཔོན་གྱིས་འདུལ་བ་ལ་བསྟོད་པ་ལས་ཇི་ལྟར་འདི་ནི་ཤིང་རྩ་གཙོ་བོ་སྟེ། རྣམ་པར་འཕེལ་དང་ཀུན་འཛིན་གཉིས་ཀྱི་གཞི།། དེ་བཞིན་དམ་ཆོས་ཚོགས་རྣམས་ཀུན་གྱི་ཡང་།། རྒྱུ་དང་རྩ་བ་འདུལ་བ་ཡིན་པར་གསུངས།། ཞེས་དང་། རྒྱལ་བ་སྟོན་པ་དེ་ཡི་དམ་ཆོས་དག། མདོ་དང་ཆོས་མངོན་ཡིན་གསུངས་འདུལ་བ་ནི།། སྟོན་དང་བསྟན་བཅོས་དངོས་ཡིན་དེ་ཡི་ཕྱིར།། གཉིས་གྱུར་ཕྱག་བྱས་སངས་རྒྱས་ཁྱོད་གཅིག་བཞིན།། ཞེས་མངོན་པ་དང་མདོ་སྡེའི་སྡེ་སྣོད་ཀྱིས་བསྟན་པའི་གོ་ཆོད་ཀྱང་སྟོན་པའི་གོ་མི་ཆོད། འདུལ་བའི་སྡེ་སྣོད་ཀྱིས་གཉི་གའི་གོ་ཆོད་པས་གཞན་ལས་ཕུལ་དུ་བྱུང་བའི་ཆོས་འདིའི་བརྗོད་དོན་ལ་དབྱེ་བ། བསྡུ་བ། མཚན་ཉིད། གོ་རིམ། གྲངས་ངེས། སྒྲ་དོན་དང་ས་བཅད་དྲུག་གིས་གཏན་ལ་འབེབས་པ་ལ། དང་པོ་དབྱེ་བ་ནི། ལུང་ལས། རབ་བྱུང་གསོ་སྦྱོང་གཞི་དང་ནི།། དགག་དབྱེ་དབྱར་དང་ཀོ་པགས་དང་།། སྨན་དང་གོས་དང་སྲ་བརྐྱང་དང་།། ཀོ་ཤ་མྦྷཱིདང་ལས་ཀྱི་གཞི།། དམར་སེར་ཅན་དང་གང་ཟག་དང་།། སྤོ་དང་གསོ་སྦྱོང་བཞག་པ་དང་།། གནས་མལ་དང་ནི་རྩོད་པ་དང་།། དགེ་འདུན་དབྱེན་རྣམས་བསྡུས་པ་ཡིན།། ཞེས་པ་ལྟར་གཞི་བཅུ་བདུན་ཡིན་ལ། གཉིས་པ་དེ་བསྡུ་བ་ནི། རབ་བྱུང་གི་གཞིའི་སུམ་ཆ་དང་། ལས་དང་གནས་མལ་གྱི་ཆས་མ་ཐོབ་པ་ཐོབ་པར་བྱེད་པ་དང་ཕྱིར་བཅོས་ཀྱི་གཞི་བདུན་དང་ལས་ཀྱིས་ཉམས་ན་ཕྱིར་འཆོས་པ་དང་། ལྷག་མ་རྣམས་ཀྱིས་ཐོབ་པ་མི་ཉམས་པར་བསྲུང་བ་སྟེ་གསུམ་མམ། བསླབ་པ་ཡོངས་སྦྱོང་བའི་དང་། བདེ་བར་གནས་པའི་རྐྱེན་བརྟེན་པ་དང་། ཐམས་ཅད་འགྲུབ་པའི་དང་། ཕྱིར་བཅོས་པའི་དང་ཐམས་ཅད་ཀྱི་རྟེན་བྱེད་པའི་གཞི་སྟེ་ལྔར་བསྡུ། གསུམ་པ་མཚན་ཉིད་ནི། འཇུག་ལྡོག་གཉིས་ཀྱི་ནང་ནས་དང་པོ་གཙོ་བོར་གྱུར་པའི་ཚུལ་ཁྲིམས་ནི་བརྗོད་བྱའི་དང་། དེ་སྟོན་བྱེད་ནི་རྗོད་བྱེད་ཀྱི་མཚན་ཉིད་དོ།། བཞི་པ་གོ་རིམ་ནི། མ་ཐོབ་པ་ཐོབ་པར་བྱེད་པ་དང་། ཐོབ་པ་མི་ཉམས་པར་བསྲུང་བ་དང་། ཉམས་ན་ཕྱིར་འཆོས་པ་རྣམས་རབ་བྱུང་གི་གཞི་དང་། བར་སྐབས་ན་ཤས་ཆེ་བའི་གཞི་བརྒྱད་དང་། ཐ་མར་ཤས་ཆེ་བའི་བདུན་རྣམས་ཀྱིས་སྟོན་པས་རྒྱུ་འབྲས་ཀྱི་གོ་རིམ་མོ།། ལྔ་པ་གྲངས་ངེས་ནི། གང་ཟག་གཅིག་གིས་མངོན་མཐོ་ངེས་ལེགས་ཐོབ་པར་བྱེད་པ་ལ་དང་པོ་བསྟན་པར་མ་ཞུགས་པ་འཇུག ཞུགས་ནས་བསླབ་པ་བསྲུང་ཉམས་ན་ཕྱིར་འཆོས་པ་རྣམས་དགོས་པས་གཞི་བཅུ་བདུན་ལས་ཉུང་ན་མི་འདུས་ཤིང་དེ་ཙམ་གྱིས་དགོས་པ་དེ་ཕུན་སུམ་ཚོགས་པར་འགྱུར་བས་མང་མི་དགོས་པ་ཡིན་ལ། དྲུག་པ་སྒྲ་དོན་ནི། ལྷག་པ་ཚུལ་ཁྲིམས་ཀྱི་བསླབ་པ་ཕུན་སུམ་ཚོགས་པ་ཉིད་དུ་སྒྲུབ་པའི་རྟེན་ནམ་གཞིར་གྱུར་པས་གཞི་ཞེས་བྱ་བ་དང་དྲུག་གི་ནང་དུ་འདུས་པའི་རྒྱས་བཤད་བདག་གི་བླ་མ་ངེས་པ་དོན་གྱི་སངས་རྒྱས་ངག་དབང་བློ་བཟང་རྒྱ་མཚོའི་ལས་ཆོག་རྣམ་རྒྱལ་གསེར་མདོག་དང་། འཇམ་མགོན་བཙོང་ཁ་བའི་བསླབ་བྱ་ཆེ་ཆུང་། འདུལ་འཛིན་གྲགས་པ་རྒྱལ་མཚན། ཐམས་ཅད་མཁྱེན་པ་དགེ་འདུན་གྲུབ། པཎ་ཆེན་བསོད་ནམས་གྲགས་པའི་ཡིག་ཆ་སོགས་སུ་བལྟ་བར་བྱ་ལ། དོན་ཉེ་བར་བསྡུ་ན། འཇམ་མགོན་བཙོང་ཁ་བའི་འདུལ་བ་རྒྱ་མཚོའི་སྙིང་པོར། བསྙེན་གནས་དགེ་བསྙེན་ཕ་མ་དང་།། དགེ་ཚུལ་ཕ་མ་དགེ་སློབ་མ།། དགེ་སློང་མ་དང་དགེ་སློང་སྟེ།། སོ་སོ་ཐར་བ་རིགས་བརྒྱད་དོ།། ཞེས་བསྙེན་གནས། དགེ་བསྙེན། དགེ་བསྙེན་མ། དགེ་ཚུལ། དགེ་ཚུལ་མ། དགེ་སློབ་མ། དགེ་སློང་། དགེ་སློང་མ་རྣམས་དང་བརྒྱད་དམ། ཇོ་བོ་རྗེ་ལ་སོགས་པ་བསྙེན་གནས་ཡུན་ཐུང་བ་མ་བགྲངས་པའི་སོ་ཐར་རིགས་བདུན་དུ་བཞེད་པ་ཡོད་པ། ཐམས་ཅད་འཁོར་བ་ལས་ངེས་པར་འབྱུང་བའི་བློས་མྱང་འདས་དོན་དུ་གཉེར་བས་བླངས་ན་སོ་ཐར་མཚན་ཉིད་པ་དང་། ཚེ་འདིར་ནད་དང་རྒྱལ་པོའི་ཆད་པ་སོགས་ལས་ཐར་བའི་སླད་དུ་བླངས་པ་འཇིགས་སྐྱོབ་ཀྱི་ཚུལ་ཁྲིམས་དང་། ཕྱི་མར་ལྷ་མིའི་བདེ་བ་ཙམ་ཞིག་དོན་དུ་གཉེར་བས་བླངས་པ་ལེགས་སྨོན་ཏེ་ཕྱི་མ་གཉིས་སྡོམ་པ་ཉི་ཚེ་བ་ཡིན་ལ། དེ་ཡང་དགེ་སློང་ནི་ལུས་ངག་གི་མི་དགེ་བ་བདུན་སྡོམ་པའི་སྤོང་བདུན་འཁོར་བཅས་སམ་གཞན་དུ་བཤད་ཟིན་པའི་ཁྲིམས་ཉིས་བརྒྱ་ལྔ་བཅུ་རྩ་གསུམ། དགེ་ཚུལ་ནི་ལུས་ཀྱི་གསུམ་དང་རྫུན་སྤོང་བ་འཁོར་བཅས་སམ་སྤང་བྱ་རགས་པ་བཞི་བཅུ།དགེ་བསྙེན་ནི་སྲོག་གཅོད་ལྟ་བུ་གཅིག་སྤོང་བ་དང་། མ་བྱིན་ལེན་དང་གཉིས་སྤོང་བ་ཕྱོགས་གཅིག་སྤོང་བ་དང་། ལུས་ཀྱི་གསུམ་དང་རྫུན་སྤོང་བ་ཕལ་ཆེར་སྤོང་བ་དང་། ཆང་དང་ལྔ་སྤོང་བ་ཡོངས་རྫོགས་དགེ་བསྙེན་སྤོང་བ་དང་། མི་ཚངས་སྤྱོད་སྤོང་བ་ཚངས་སྤྱོད་ཀྱི་དགེ་བསྙེན། དགེ་ཚུལ་མའི་སྟེང་དུ་ཆོས་དྲུག་དང་རྗེས་སུ་མཐུན་པའི་ཆོས་དྲུག་སྤོང་བ་དགེ་སློབ་མ། རིན་པོ་ཆེ་ལེན་པ་མ་གཏོགས་དགེ་ཚུལ་དང་ཆ་མཐུན། བསྙེན་གནས་ལ་སྡོམ་པ་སྐྱེ་བའི་རྒྱུ་ནི་མདོ་སྡེ་བ་སོགས་དུད་འགྲོར་ཡང་སྐྱེ་བ་མང་ཡང་འདུལ་བ་ལུང་དང་མདོ་སྡེ་དུ་མར་བཅོམ་ལྡན་འདས་དང་དེའི་ཉན་ཐོས་དག་གིས་འཕྲོག་མ་དང་འབྲོག་གནས་ལ་སོགས་པའི་གནོད་སྦྱིན་ཕོ་མོ་དུ་མ་དང་ཀླུ་ལ་དགེ་བསྙེན་དང་བསྙེན་གནས་སོགས་ཀྱི་བསླབ་པ་ལ་བཀོད་པར་གསུངས་པ་ནི་བར་མ་དགེ་བའམ་ལེགས་པར་སྤྱད་པ་ཙམ་ལ་དགོངས་པ་ཡིན་གྱི། སྡོམ་པ་མཚན་ཉིད་པ་སྐྱེ་བའི་རྟེན་ནི་གླིང་གསུམ་གྱི་སྐྱེས་པ་བུད་མེད་གང་ཡང་རུང་བ་ལས་འགྲོ་བ་གཞན་དུ་མ་ཡིན་པར་འདུལ་འཛིན་ཀུན་བཞེད་པ་མི་འདྲ་བ་མེད། ནང་གསེས་བསྙེན་གནས་ནི། བྱེ་བྲག་སྨྲ་བ་རྣམས་དགེ་སློང་ལས་ལེན་དགོས་པར་བཤད་ཀྱང་འདུལ་བ་ལུང་ནས་ཁྱིམ་བདག་མགོན་མེད་ཟས་སྦྱིན་གྱིས་སྡོམ་པ་འཕོག་པར་གསུངས་པས་སོ་ཐར་ཁོ་ན་དགོས་པ་མིན་ལ། བླང་བའི་ཆོ་ག་སྐྱབས་འགྲོ་འཛིན་པ་སྔོན་དུ་འགྲོ་བས་ཁས་ལེན་ལན་གསུམ་བྱས་པ་ལས་སྐྱེ་ཞིང་། དེ་མཐར་བསླབ་པ་བརྗོད། ཟླ་བ་བྱུང་ངོ་དོཅོག་གམ་ལོ་གཅིག་ལ་སོགས་པ་ཉ་སྟོང་བརྒྱད་གསུམ་ལ་མ་ཆག་པར་བྱེད་ན་དུས་གཅིག་ཏུ་བླངས་པས་ཀྱང་རུང་ལ། ཉིན་ཞག་རིལ་བོའམ་ཉིན་མཚན་སོ་སོར་ཡང་ཁས་ལེན་པ་ཡོད། སྡོམ་པའི་སྤང་བྱ་རྩ་བ་བཞི་དང་། ཆང་། གར་སོགས་འཕྲང་སོགས། མལ་སྟན་ཆེ་མཐོ། དུས་མིན་གྱི་ཁ་ཟས་ཏེ་བརྒྱད་དུ་བཞེད། དགེ་བསྙེན་ནི།མིང་ཆེན་གྱི་མདོ་ལས། མིང་ཆེན་འདི་ལྟར་ཁྱིམ་པ་གོས་དཀར་པོ་བགོས་པ་སྐྱེས་པ་བོའི་དབང་པོ་དང་ལྡན་པ་ཞིག་སངས་རྒྱས་ལ་སྐྱབས་སུ་འགྲོ། ཆོས་དང་དགེ་འདུན་ལ་སྐྱབས་སུ་འགྲོ་ཞིང་བདག་དགེ་བསྙེན་དུ་བཟུང་དུ་གསོལ་ཞེས་ཚིག་ཏུ་སྨྲ་ན་འདི་ཙམ་གྱིས་དགེ་བསྙེན་དུ་འགྱུར་རོ།། ཞེས་གསུངས་པ་ལྟར་ཉི་འོག་པ་སོགས་སྐྱབས་འགྲོ་ཙམ་གྱིས་དགེ་བསྙེན་དུ་འགྱུར་བར་འདོད་པ་དང་། བྱེ་སྨྲ་བ་བསླབ་པ་ལྔ་ག་མ་ཚང་ན་དགེ་བསྙེན་མཚན་ཉིད་པར་མི་བཞེད་པ་སོགས་སྣང་ཞིང་། ལེན་པའི་ཆོ་ག་དང་པོར་སྐྱབས་འགྲོ་ལན་གསུམ། དེ་ནས་བསླབ་པ་བརྗོད་པ་ལན་གསུམ། དེ་རྗེས་བདག་སྣ་འདི་ཙམ་སྤྱོད་པའི་དགེ་བསྙེན་དུ་སློབ་དཔོན་གྱིས་གཟུང་དུ་གསོལ་ཞེས་བརྗོད་པས་སྡོམ་པ་སྐྱེ། ལྟུང་བ་ཕྲ་རགས་ནི་བསྙེན་གནས་དང་ཆོས་མཚུངས་ལ། གཏོར་བའི་རྣམ་གཞག་ཕལ་ཆེར་རབ་བྱུང་དང་འདྲའོ།། རབ་ཏུ་བྱུང་བའི་སྡོམ་པ་ཚིགས་སྔ་ཕྱི་གཉིས་ཀྱི་མ་ཐོབ་པ་ཐོབ་པར་བྱེད་པ་ལ། ལེན་པ་བོ་བུ་ལོན་ཆགས་པ་དང་། བྲན་དང་། ཕ་མས་མ་གནང་པ་དང་། རྒྱལ་པོས་མ་གནང་པ་སོགས་ལ་སྡོམ་པ་སྐྱེས་སུ་ཟིན་ཀྱང་། དེ་དག་གི་དབང་གིས་མྱུར་དུ་འབབ་དགོས་པས་གནས་པ་ལ་བར་དུ་གཅོད་པ་དང་། སྐྱེས་ཙམ་ནས་སྐྲ་སེར་པོ་དང་སེར་སྐྱར་འདུག་པ་སོགས་སྡོམ་པ་སྐྱེས་སུ་ཟིན་ཀྱང་ལུས་བྱེད་བྱདམི་སྡུག་པའི་རྐྱེན་གྱིས་ཁྱིམ་པ་རྣམས་བསྟན་པ་ལ་མི་དད་པའི་རྒྱུ་བྱེད་པས་མཛེས་པ་ལ་བར་དུ་གཅོད་པ་དང་། སྡོམ་པ་སྐྱེས་སུ་ཟིན་ཀྱང་ནད་ཀྱི་དབང་གིས་བསླབ་པ་སོགས་ལ་སྦྱོར་མི་བཟོད་པས་ཡོན་ཏན་གོང་འཕེལ་ལ་ཁྱད་པར་དུ་འགྱུར་བའི་གེགས་བྱེད་པའི་བར་དུ་གཅོད་པ་དང་། མཚམས་མེད་པ་བྱས་པ་དང་། ཕ་མ་དང་།མ་ནིང་དང་། སྤྲུལ་པ་དང་། བྱང་གི་སྒྲ་མི་སྙན་སོགས་འགྲོ་བ་རིགས་མི་མཐུན་པ་སོགས་སྡོམ་པ་སྐྱེ་བ་ལ་བར་དུ་གཅོད་པ་སྟེ་འགལ་རྐྱེན་བར་ཆད་བཞི་སྤངས་ཤིང་། ཡུལ་དང་། རྒྱུད་དང་།རྟགས་དང་། བསམ་པ་དང་། ཆོ་ག་སྟེ་མཐུན་པའི་རྐྱེན་ལྔ་ཚང་བ་ཞིག་དགོས་པ་ལས་ཡུལ་ནི། སངས་རྒྱས་ཀྱི་སྐུ་གཟུགས་བཞུགས་པ། དམ་པའི་ཆོས་མི་ནུབ་པ། ཞུ་བའི་ཡུལ་དགེ་འདུན་དུ་ལོངས་པ་སོགས་དང་། མཁན་པོ་བརྟན་པའི་ཡན་ལག་བསྙེན་པར་རྫོགས་ནས་ལོ་བཅུ་ཕྲག་ལྷག་པ་ལོན་ཞིང་། འདུལ་བའི་ཚིག་དོན་ལ་མཁས་པ་བསྙེན་པར་རྫོགས་པ་མ་ཡིན། མི་འདུག་པར་འགྲེང་བ་མ་ཡིན། གང་ལ་བྱ་བ་མ་ཡིན་པ་སོགས་ཁ་སྐོང་གི་ཆོས་བཅུ་གསུམ་དང་། ལྔ་ཕྲུགས་ཉི་ཤུ་རྩ་གཅིག་ལས་གང་ཡང་རུང་བ་རྣམས་དང་ལྡན་པ་དང་། དགེ་ཚུལ་གྱི་སློབ་དཔོན་དེའི་སྡོམ་པ་འབོག་པ་དང་བསླབ་བྱ་བརྗོད་པ་ལ་མཁས་པ། གསང་སྟོན་མཁན་པོའི་ཚིག་གིས་གསོལ་བ་བཏབ་པ་ཁས་བླངས་པ་ལ་དགེ་འདུན་གྱི་ལས་ཀྱིས་བསྐོས་ཤིང་ལྐོག་ཏུ་བར་ཆད་འདྲི་བའི་ཆོ་ག་ལ་བྱང་པ། ལས་སློབ་དགེ་འདུན་གྱི་དབུས་སུ་ལས་ཆོག་ཚིག་ཕྱེད་ཀྱང་མ་འཁྲུལ་བར་བློ་ལ་ཐོན་པ་རྣམས་དང་། ཡུལ་དབུས་སུ་བཅུ་དང་མཐའ་འཁོབ་ཏུ་ལྔས་ཉུང་མཐའ་བྱས་པའི་དགེ་འདུན་གྲངས་ཚང་བ། རྒྱུད་ནི་ཚོགས་སུ་ཚང་བ་གང་ལེན་པའི་སྡོམ་པ་དེ་སྔར་ཐོབ་ལ་ཉམས་པ་མ་ཡིན་པ། རྟགས་ནི། དགེ་ཚུལ་ལ་རབ་བྱུང་གི་རྟགས་དང་ཆ་ལུགས། དགེ་སློང་ལ་ཆོས་གོས་གསུམ་ལྷུང་བཟེད་དང་བཅས་མཁན་པོས་བྱིན་གྱིས་བརླབས་ཏེ་ཚུལ་བཞིན་བསྐོན་པ།ཁྲུས་བྱས་པ་རྣམས་དང་ལྡན་པ། བསམ་པ་ནི་རང་བཞིན་དུ་གནས་པ། སྡོམ་པ་དེ་བསམ་པ་ཐག་པ་ནས་ལེན་པར་འདོད་ཅིང་། སྡོམ་པ་ཐོབ་དུས་ཤེས་པ་ངེས་འབྱུང་གི་བསམ་པས་ཟིན་པ་རྣམས་དང་ལྡན་པའི་སྒོ་ནས་བསྟན་པའི་རྩ་བ་ཚིགས་སྔ་ཕྱིའི་སྡོམ་པ་ངེས་པར་ཐོབ་པ་ཞིག་དགོས། ཐོབ་པ་མི་ཉམས་པར་བསྲུང་བ་ནི། དགེ་བའི་བཤེས་གཉེན་ཁྱད་པར་ཅན་ལ་བརྟེན་ཏེ་བསྲུང་བ། རང་གི་བསམ་པ་རྣམ་པར་དག་པའི་སྒོ་ནས་བསྲུང་བ། བསླབ་པ་ཡོངས་སུ་སྦྱོང་བའི་སྒོ་ནས་བསྲུང་བ། བདེ་བར་གནས་པའི་རྐྱེན་བརྟེན་པའི་སྒོ་ནས་བསྲུང་བ། མི་མཐུན་ཕྱོགས་ངོ་ཤེས་པར་བྱས་ཏེ་བསྲུང་བ་སྟེ་ཡན་ལག་ལྔའི་སྒོ་ནས་བསྲུང་བ་ཡིན་ལ། དེ་ཡང་དགེ་ཚུལ་ནི་བསྟན་པ་ལ་ཞུགས་ཀྱང་མ་རྫོགས་པ་ཡིན་པས་བསླབ་པ་དང་འགལ་བའི་ལྟུང་བ་ལ་སྡེ་ཚན་རིགས་མི་གཅིག་པ་དུ་མ་མེད་ཀྱི། ལྟུང་བ་ཐམས་ཅད་ཉེས་བྱས་བྱ་བའི་མིང་རིགས་གཅིག་ཏུ་ཟད་ལ། དངོས་སུ་བླངས་པ་ལས་འདས་པའི་ལྟུང་བ་སུམ་ཅུ་རྩ་དྲུག་ལས། རྩ་ལྟུང་བཞི་ཕམ་པ་དང་འདྲ་བའི་ཉེས་བྱས། དེ་དག་དང་ཆང་སྤང་སོགས་ལྟུང་བ་ཕྱེད་དང་བཅོ་བརྒྱད་དགེ་ཚུལ་ལ་ལྟུང་མེད་ཡིན་པས་དེ་དག་མ་གཏོགས་པ་དགེ་སློང་གི་བསླབ་པའི་གཞི་ཇི་སྙེད་ཡོད་པ་དེ་དག་ལས་དགེ་ཚུལ་གྱིས་འདས་པ་ལ་ཡང་བསྡམ་པའི་ཉེས་བྱས་ཡིན་ཞིང་། དགེ་སློང་གི་བསླབ་པ་དང་འགལ་བའི་ལྟུང་བ་ནི་ཕམ་པ་དང་། ལྷག་མ་དང་། ལྟུང་བྱེད་དང་། སོ་སོར་བཤགས་པར་བྱ་བ་དང་། ཉེས་བྱས་ཏེ་སྡེ་ཚན་ལྔར་མཐའ་དག་འདུས་ཤིང་། བསླབ་པ་ཉིས་བརྒྱ་ལྔ་བཅུ་རྩ་གསུམ་གཞིས་བསྡུས་ཀྱི་ཉེས་བྱས་དང་བཅས་པ་ཐམས་ཅད་ཀྱི་བསྲུང་མཚམས་དང་ལྟུང་བའི་རྒྱུ་ཚོགས་ཞིབ་པར་ཤེས་པ་དགོས། ཉམས་པ་ཕྱིར་བཅོས་ལ། ཕམ་པ་འཆབ་བཅས་ཀྱིས་ཉམས་པ་ནི། ཤིང་ཏ་ལའི་མགོ་བཅད་པ་ལྟར་ཆོས་འདུལ་བ་འདི་ལ་སྐྱེར་མི་རུང་བའི་ཆོས་ཅན་ཡིན་པས་ལྡང་བའི་ཐབས་ཀྱི་ཕྱིར་བཅོས་པའི་ཆོ་ག་མེད་ཅིང་། འཕམ་པ་འཆབ་སེམས་མ་བསྐྱེད་པས་ཉམས་པ་མན་ཆོད་ཀྱི་ལྟུང་བ་རྣམས་ལས་ཆོག་རྣམས་བཤད་པ་ལྟར་ཕྱིར་འཆོས་པར་བྱེད་པ་རྣམས་དང་ལྡན་ན་དུས་དབང་གི་བསླབ་པ་སྣ་གཅིག་བསྲུང་བའི་ཕན་ཡོན་ཡང་བསམ་གྱིས་མི་ཁྱབ་སྟེ། ཏིང་འཛིན་རྒྱལ་པོའི་མདོ་ལེའུ་སོ་དྲུག་པ་ལས། བསྐལ་བ་བྱེ་བ་གངྒཱའི་བྱེ་སྙེད་དུ།། དང་བའི་སེམས་ཀྱིས་ཟས་དང་སྐོམ་རྣམས་དང་།། གདུགས་དང་བ་དན་མར་མེའི་འཕྲེང་བ་ཡིས།། སངས་རྒྱས་བྱེ་བ་ཁྲག་ཁྲིག་རིམ་གྲོ་བྱས།། གང་གིས་དམ་ཆོས་རབ་ཏུ་འཇིག་པ་དང་།། བདེ་གཤེགས་བསྟན་པ་འགགས་པར་གྱུར་པའི་ཚེ།། ཉིན་མཚན་དུ་ནི་བསླབ་པ་གཅིག་སྤྱོད་པ།། བསོད་རྣམས་ནམསའདི་ནི་དེ་བས་ཁྱད་པར་འཕགས།། ཞེས་དང་། སྔོན་གྱི་སངས་རྒྱས་བདག་གིས་བསྟོད་པ་ཡི།། ཚུལ་ཁྲིམས་དྲི་མ་མེད་པ་སུས་བསྲུང་བ།། དེ་དག་གིས་ནི་སེམས་ཅན་མང་པོ་ཡང་།། དམྱལ་བ་དང་ནི་སྡིག་པའི་ཆོས་ལས་འདྲེན།། གང་གིས་ཚུལ་ཁྲིམས་དྲི་མ་མེད།། སངས་རྒྱས་བསྔགས་པ་བསྲུངས་པ་ནི།། དེ་ཡིས་ཇི་སྙེད་སྔོན་བྱུང་བ།། བདེ་གཤེགས་ཐམས་ཅད་རི་མོར་བྱས།། ཞེས་དང་། དཀོན་བརྩེགས་འདུས་པ་ཉེར་གཉིས་པ་ལྷའི་བུ་དེད་དཔོན་གྱིས་ཞུས་པ་ལས། གང་དག་སྔན་སྔོནཆད་བྱུང་བའི་སངས་རྒྱས་དང་།། གང་དག་མ་བྱོན་འབྱུང་དང་བཞུགས་པ་རྣམས།། དེ་དག་སྐྱོན་མང་ཁབ་ནི་མ་སྤངས་པར།། བླ་མེད་བྱང་ཆུབ་ཞི་བ་ཐོབ་པ་མེད།། རབ་བྱུང་དེ་བཞིན་གཤེགས་པ་ཐམས་ཅད་ཀྱིས།། རབ་ཏུ་བསྟོད་ཅིང་བསྔགས་ལ་བཀུར་བ་སྟེ།། གང་ཞིག་སངས་རྒྱས་ཀུན་ལ་མཆོད་འདོད་པ།། རྒྱལ་བའི་བསྟན་ལ་རབ་འབྱུང་གཟུང་བར་གྱིས།། ཞེས་སོགས་དུ་མར་གསུངས་པ་ལྟར་དང་།

X