//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > སྡེ་སྲིད་ཁོག་འབུབས། > ནང་དོན།

(3) གསང་སྔགས་ཀྱི་སྡོམ་པ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-30 10:11:59 ཀློག་གྲངས། 169 

གསུམ་པ་རིགས་འཛིན་སྔགས་ཀྱི་སྡོམ་པ་ནི། ས་སྐྱ་པཎྜི་ཏས། རྡོ་རྗེ་ཐེག་པའི་ལམ་ཞུགས་ཏེ།། མྱུར་དུ་སངས་རྒྱས་ཐོབ་འདོད་ན།། སྨིན་གྲོལ་གཉིས་ལ་འབད་པར་བྱ།། ཞེས་དང་།སྨིན་པར་བྱེད་པའི་དབང་བསྐུར་ཡང་།། བླ་མ་བརྒྱུད་པ་མ་ཉམས་ཤིང་།། ཆོ་ག་འཁྲུགས་པར་མ་གྱུར་པ།། ཕྱི་ནང་རྟེན་འབྲེལ་བསྒྲིག་མཁྱེན་ཞིང་།། སྐུ་བཞིའི་ས་བོན་ཐེབས་ནུས་པ།། སངས་རྒྱས་གསུང་བཞིན་མཛད་པ་ཡི།། བླ་མ་བཙལ་ལ་དབང་བཞི་བླངས།། དེ་ཡིས་སྡོམ་པ་གསུམ་ལྡན་འགྱུར།། ཞེས་རྡོ་རྗེ་སློབ་དཔོན་བླ་མ་ལྔ་བཅུ་པར་གསུངས་པའི་ཁྲོ་བ་དང་ང་རྒྱལ་ལ་སོགས་པའི་སྐྱོན་དང་བྲལ་ཞིང་། སྙིང་རྗེ་དང་དེ་ཉིད་བཅུ་ལ་སོགས་པའི་ཡོན་ཏན་དང་ལྡན་པ། ཀུན་ཏུ་བཟང་པོའམ་རྡོ་རྗེ་འཆང་ནས་བརྒྱུད་པའི་ཆུ་བོ་མ་ནུབ་པ། བྱིན་རླབས་ཀྱི་ངད་མ་ཡལ་བ། གདམས་ངག་གི་ས་ཀ་མ་ལོག་པ། མོས་གུས་ཀྱི་བསམ་པ་ཚིམ་པ་སྟེ་སྙན་བརྒྱུད་བཞི་ཚང་བ། བླ་མ་གོང་མའི་ཕྱག་ལེན་ཇི་ལྟར་མཛད་པའི་བཀའ་སྲོལ་མ་འཕྱུགས་པ། སྨར་དམརའཁྲིད་ཀྱི་གསུང་རྒྱུན་ཁུངས་མའི་སྒོ་ནས་ཆོ་ག་རྣམས་མ་འཁྲུགས་པའི་དམིགས་བྱེད་པ། སྦྱང་གཞི་དང་སྦྱང་བྱ་དང་། སྦྱོང་བྱེད་དང་སྦྱང་འབྲས་རྣམས་ཐད་ཀར་ངོ་སྤྲོད་ཤེས་པ་ཞིག་དགོས་ལ། དེ་ལྟ་བུས་སློབ་མ་ལ་སྨིན་པར་བྱེད་པ་དབང་དང་། གྲོལ་བར་བྱེད་པའི་འཁྲིད། རྒྱབ་བརྟེན་ལུང་དང་བཅས་པ་དེ་ལ་བརྟེན་ནས་བསྐྱེད་རྫོགས་ཀྱི་རིམ་པ་ཉམས་སུ་བསྟར་བ་སོགས་རྗེས་སུ་འཛིན་དགོས་པ་ལས། དབང་གི་ངོ་བོ་ནི། ཐོབ་བྱའི་འབྲས་བུ་ཁྱད་པར་ཅན་མངོན་དུ་བསྐྱེད་ནུས་ལ། ངེས་ཚིག་ནི། ཀྱེ་རྡོ་རྗེའི་རྩ་རྒྱུད་ལས། གཏོར་དང་བླུགས་པ་ཞེས་བྱ་འདིས།། དེས་ན་དབང་ཞེས་བརྗོད་པར་བྱ།། ཞེས་གསུངས་ཏེ་དབང་དེ་ཡང་ཤཱཀྲྀ་འཁྲུད་པའམ་ཡང་ན་བླུགས་པའི་བྱིངས་ལ་ཤེས་བྱེད་ལོ་ཊའི་བརྟ་མ་ན་པྲ་ར་སྨེ་པཱ་དའི་སྐྱེས་བུ་དབུས་མའི་མང་མིངཚིག་ཏ་བྱིན་རྀ་རྗེས་འབྲེལ་ཨཔ྄་བི་ཀ་ར་ཎ་བྱིན་པ་ཡོན་ཏན་གྱི་ཤེཀཏ་ཞེས་པར་ཡི་གེ་རྣམ་པར་འགྱུར་དང་ཉམས་དག་གིས་ཞེས་དང་། ལྷག་མ་འཇིག་རྟེན་ལས་གྲུབ་པ་སོགས་ཀྱི་ཤེ་སེར་སོང་བར་ཉེ་བསྒྱུར་ཨ་བྷི་བཞག ཀུ་ཨི་ལ་ཥ་རུ་བྱེད་དེ་ས་ཥ་ས་ས་ཥར་བསྒྱུར་པའི་ཨ་བྷི་ཥེ་ཀ་ཏ་ཞེས་སམ། ཡང་ན་སི་ཙ་འཐོར་བའི་བྱིངས་ལ་བརྟ་མ་ན་པྲ་ན་སྨེ་པཱ་དའི་སྐྱེས་བུ་དང་པོའི་གཅིག་ཚིག་ཏིཔ྄་བྱིན་བྱེད་པ་བོ་ལ་ཨཔ྄་འོ་ཀྱི་ཨཔ྄་བི་ཀ་ར་ཎ་བྱིན་པ་རྗེས་འབྲེལ་གྱི་ཕྱིས། ཙ་ཨ་ལ་དྲངས་མུ་ཙྲ་ལ་ལ་སོགས་པ་མུམ་འོས་མུམ་བྱིན། བྱིངས་ལས་མའི་ན་འོས་མ་ན་ས་ཏུའི་ཤ་ཙུ་རྣམས་ལ་ཤ་ཙུ་འོས་ན་ཉེར་བསྒྱུར་དྲངས་པས་ཨིཥྩ

ཨ་བྷི་སྔོན་དུ་བཞག སི་གོང་ལྟར་ཥིར་བསྒྱུར་པས་ཨ་བྷི་ཥིཉྩ་ཞེས་སྔོན་མ་གཏོར་ཞིང་བླུགས་པ་སྟེ་ས་བོན་ལ་ཆུ་ལུད་ཀྱིས་བཏབ་པ་ལྟར་ལུས་གནས་ཀྱང་སྤྱི་བོ་ལྕེའམ་མགྲིན་པ་སྙིང་ག་ལྟེ་བ་གསང་གནས་ཏེ་རང་གི་གནས་རྣམས་སུ་རིམ་པ་བཞིན་གཏོར་ཞིང་བླུགས་པ་ལ་བརྟེན་ནས་དབང་བཞི་རང་སྐལ་གྱི་དྲི་མ་འཁྲུད་ཅིང་སྐུ་བཞིའི་མྱུ་གུ་འབྱུང་བའི་ཁྱད་པར་གྱི་སྐལ་བ་འཇོག་ནུས་པས་དབང་ཞེས་སམ། ཕྱི་མ་དབང་བཞི་བསྐུར་བའི་ལམ་བཞི་སྒོམ་པ་དང་འབྲས་བུ་སྐུ་བཞི་ཐོབ་པ་ལ་དབང་བར་བྱས་པའི་དབང་ཞེས་སམ། ཡང་ན་སྣ་སྒྲས་འཁྲུད་པར་བྱེད་པ་སྟེ་དབང་བཞི་བསྐུར་བས་སྒོ་གསུམ་རླུང་སེམས་དང་བཅས་པ་ངོ་བོ་ཉིད་ཀྱི་སྐུ་བཞིར་གནས་པ་ལ་གནས་པར་མ་ཤེས་པའི་དྲི་མ་འཁྲུད་པར་བྱེད་པས་ན་དབང་སྟེ། འཇིགས་མེད་འབྱུང་གནས་སྦས་པས་མཛད་པའི་མན་སྙེ་ཆུང་བ་ལས། ལུས་ངག་ཡིད་ལས་བྱུང་བ་ཡི།། དྲི་མ་དག་ཕྱིར་དབང་དུ་བརྗོད།། ཅེས་སོགས་གསུངས་པའི་དབང་སྦྱངས་གཞི་ནི། ཐོབ་བྱ་རང་གནས་ཀྱི་གཉུག་མའི་རྡོ་རྗེ་བཞི། སྦྱང་བྱ་ནི་དེ་ཉིད་སྒྲིབ་བྱེད་གློ་བུར་གྱི་དྲི་མ་ཕྲ་རགས་རྣམས་སྦྱོང་བྱེད་ནི། སློབ་བུའི་བློའི་ཐེག་ཚད་དང་སྦྱར་བའི་དབང་བསྐུར་པས་དེ་དང་རྗེས་སུ་མཐུན་པའི་ལམ་སྒོམ་རུང་དང་འབྲས་བུ་ཐོབ་རུང་དུ་སྨིན་པར་བྱེད་པ་ཡིན། སྦྱངས་འབྲས་ནི་སྐུ་བཞིའི་ས་བོན་ནམ་ནུས་པ་ཁྱད་པར་ཅན་གསོས་ཐེབས་པ་སོགས་དོན་སྦྱངས་གཞི་རྡོ་རྗེ་བཞི། སྦྱངས་འབྲས་སྐུ་བཞི་ལ་ཐོབ་པའི་དབང་དེ་བསྐུར་པས་སྣོད་རུང་གི་སློབ་མ་ལ་འབྲས་བུ་སྐུ་བཞིའི་ས་བོན་ཐེབས་པས་གསང་སྔགས་ཀྱི་རང་བཞིན་དུ་གནས་པའི་རིགས་རྒྱས་འགྱུར་གྱི་ནུས་པ་མཐུ་ཅན་དུ་གྲུབ་པའི་ཚུལ་ཡང་། ཕྱག་རྒྱ་ཆེན་པོ་ཐིག་ལེ་རྣལ་འབྱོར་མའི་རྒྱུད་ལས། དང་པོར་རེ་ཞིག་གང་ཚེ་སློབ།། ལན་ཅིག་དབང་རྣམས་ཀྱིས་ནི་བསྐུར།། དེ་ཚེ་གསང་ཆེན་བཤད་པ་ཡི།། ངེས་པར་སྣོད་དུ་འགྱུར་བའོ།། དབང་མེད་ན་ནི་དངོས་གྲུབ་མེད།། བྱེ་མ་བཙིར་ལ་མར་མེད་བཞིན།། གང་ཞིག་རྒྱུད་ལུང་ང་རྒྱལ་གྱིས།། དབང་བསྐུར་མེད་པར་འཆད་བྱེད་པ།། སློབ་དཔོན་སློབ་མ་ཤི་མ་ཐག། དངོས་གྲུབ་ཐོབ་ཀྱང་དམྱལ་བར་འགྲོ།། དེ་བས་འབད་པ་ཐམས་ཅད་ཀྱིས།། བླ་མ་ལས་ནི་དབང་དོན་ཞུ།། ཞེས་དང་། དཔལ་རྡོ་རྗེ་འཕྲེང་བ་རྣལ་འབྱོར་གྱི་རྒྱུད་ལས།དབང་བསྐུར་བ་ནི་གཙོ་བོ་སྟེ།། དངོས་གྲུབ་ཐམས་ཅད་རྟག་ཏུ་གནས།། ང་ཡིས་ཇི་བཞིན་དོན་བཤད་ཀྱིས།། དེ་ཕྱིར་ཐོག་མར་ཡང་དག་ཉོན།། ཐོག་མར་སློབ་དཔོན་གང་གི་ཚེ།། བློ་ལྡན་ཡང་དག་དབང་བསྐུར་ན།། རྫོགས་པའི་རིམ་པའི་རྣལ་འབྱོར་ལ།། དེ་ཡི་ཚེ་ན་སྣོད་དུ་འགྱུར།། ཡང་དག་དབང་བསྐུར་གྱིས་དབེན་ན།། སྒྲུབ་པོས་རྒྱུད་ཀྱི་དོན་ཤེས་ཀྱང་།། སློབ་དཔོན་སློབ་མ་མཚུངས་པར་ནི།། མི་བཟད་དམྱལ་བ་ཆེན་པོར་འགྲོ།། ཞེས་ཏེ། དབང་རྣམ་དག་མ་ཐོབ་པར་སྒྲུབ་པ་ལ་ཞུགས་པས་ནི། རྒྱུད་དོན་ཤེས་ནས་བསྒྲུབས་པས་དངོས་གྲུབ་ཕྲ་མོ་ཐོབ་ཀྱང་དཔོན་སློབ་མཚུངས་པར་དམྱལ་བར་འགྲོ་ཞེས་པའོ།། དབང་བསྐུར་པ་ཡང་། དཀྱིལ་འཁོར་དུ་འཇུག་པ་དང་། དཀྱིལ་འཁོར་མཐོང་བ་རག་ལས་ཏེ། སངས་རྒྱས་ཐམས་ཅད་དང་མཉམ་པར་སྦྱོར་བའི་རྒྱུད་ལས། དཀྱིལ་འཁོར་དུ་ནི་མ་ཞུགས་དང་།། དམ་ཚིག་རྣམས་ནི་སྤངས་པ་དང་།། གསང་བའི་དེ་ཉིད་མི་ཤེས་པས།། བསྒྲུབས་ཀྱང་ཅི་ཡང་མི་འགྲུབ་བོ།། ཞེས་དང་། དཔལ་སྡོམ་པ་ཉུང་ངུའི་རྒྱུད་ལས། སྔགས་པས་དཀྱིལ་འཁོར་མ་མཐོང་བར།། གང་ཞིག་རྣལ་འབྱོར་བ་ཉིད་འདོད།། མཁའ་ལ་ཁུ་ཚུར་གྱིས་བརྡེག་དང་།། སྨིག་རྒྱུའི་ཆུ་ནི་འཐུང་དང་མཚུངས།། ཞེས་སོ།། དེས་ན་ཐུན་མོང་བའི་དབང་བདུན་ལ་རྡུལ་ཚོན་གྱི་དཀྱིལ་འཁོར་དང་། མཆོག་གི་དབང་གོང་མ་དག་ལ། ལུས་དང་གསང་བའི་དབང་པོ་སེམས།། རྟག་ཏུ་དཀྱིལ་འཁོར་རྣམ་པ་གསུམ།། ཞེས་བྱ་བ་ལས། ཅི་ལྟར་རིགས་པར་མཐོང་བའི་སྒོ་ནས་དབང་བསྐུར་པར་བྱས་ཟིན་ནས། འཇམ་མགོན་ཆོས་ཀྱི་རྒྱལ་པོ་བཙོང་ཙོངཁ་བས། རྒྱལ་བའི་གསུང་གི་མཆོག་གྱུར་རྡོ་རྗེའི་ཐེག། བློ་ཆེན་ལྡན་ལ་རྨད་བྱུང་དགའ་བསྐྱེད་པ།། དེར་ཞུགས་རྣམས་ཀྱི་དངོས་གྲུབ་འགྲུབ་པའི་གཞི།། དཔལ་ལྡན་རྡོ་རྗེ་སེམས་དཔའི་སྡོམ་པ་ནི།། ཞེས་གསུངས་པ་བཞིན་སྔགས་སྡོམ་མམ་དམ་ཚིག་བཤད་པར་བྱ་བ་ལ། ཐོག་མར་དམ་ཚིག་དང་སྡོམ་པ་ཇི་ལྟར་ཁས་བླང་བའི་ཚུལ་དང་། ཁས་བླངས་པའི་སྡོམ་པ་དང་འགལ་བའི་ལྟུང་བ་གཏན་ལ་འབེབས་པའོ།། དང་པོ་ལ་གང་ཁས་བླང་རྒྱུའི་སྡོམ་པ་རྣམས་སློབ་མས་ཤེས་པའི་ཕྱིར་དུ་གོ་བར་སྨྲས་ཏེ་ལེན་པའི་ཚེ་ཐམ་ཐོམ་མ་ཡིན་པར་དམིགས་ཕྱེད་པར་བྱས་ནས་འཛིན་དགོས་པས་རྡོ་རྗེ་རྩེ་མོ་ལས་བཤད་པ་བཞིན་སྡོམ་པ་བསྒྲག་པ། སྡོམ་བཟུང་བཤད་པ། སྡོམ་པ་བཟུང་མ་བཟུང་ལ་དབང་ཇི་ལྟར་བསྐུར་པའི་ཚུལ་དང་གསུམ། སྡོམ་པ་བསྒྲག་པ་ལ་རིགས་ལྔ་སོ་སོའི་དང་། སྤྱིའི་དམ་ཚིག་གཉིས་ལས། དང་པོ། སངས་རྒྱས་ཆོས་དང་དགེ་འདུན་ཏེ།། དཀོན་ཅོག་གསུམ་ལ་སྐྱབས་སུ་སོང་།། འདི་ནི་སངས་རྒྱས་རིགས་དག་པའི།། དམ་ཚིག་བརྟན་པར་གྱུར་པའོ།། ཞེས་དཀོན་ཅོག་གསུམ་ལ་སྐྱབས་སུ་འགྲོ་བར་བསྐུལ་པ་འདི་འདྲ་བ་ནི་རྣམ་སྣང་གི་རིགས་ཀྱི་དམ་ཚིག་ཡིན་ལ། སངས་རྒྱས་རིགས་དག་པ་ཞེས་པའང་མང་དུ་འབྱུང་མོད་ཀྱང་། འཇམ་མགོན་བཙོང་ཁ་བ་ཆེན་པོ་དགའ་བ་ཞེས་པར་བཞེད་ཅིང་། བརྟན་པ་ནི་མི་མཐུན་ཕྱོགས་ཀྱིས་ཕྱེད་པར་དཀའ་བའི་དོན་ཡིན་ནོ།། རྡོ་རྗེ་དྲིལ་བུ་ཕྱག་རྒྱ་ཡང་།། བློ་ཆེན་གྱིས་ནི་བཟུང་བར་གྱིས།། བྱང་ཆུབ་སེམས་གང་དེ་རྡོ་རྗེ།། ཤེས་རབ་དྲིལ་བུ་ཞེས་བཤད་དོ།། སློབ་དཔོན་དག་ཀྱང་བཟུང་བར་བྱ།། བླ་མ་སངས་རྒྱས་ཀུན་དང་མཉམ།། འདི་ནི་རྡོ་རྗེའི་རིགས་དག་པའི།། སྡོམ་པ་དམ་ཚིག་ཡིན་པར་གསུངས།། ཞེས་རྡོ་རྗེ་དང་དྲིལ་བུ་དང་ཕྱག་རྒྱ་དག་བློ་གྲོས་ཆེན་པོ་ཅན་ཁྱོད་ཀྱིས་བཟུང་བར་གྱིས་ཤིག དེ་ཡང་ཇི་ལྟར་སྙམ་ན་བྱང་ཆུབ་སེམས་གང་དེ་རྡོ་རྗེ་ཞེས་སོགས་དང་། དེར་མ་ཟད་སློབ་དཔོན་དག་ཀྱང་གུས་པས་བཟུང་བ་སྟེ་རྡོ་རྗེ་མི་བསྐྱོད་པའི་དམ་ཚིག རིན་ཆེན་རིགས་མཆོག་ཆེན་པོ་ལ།། ཉིན་དང་མཚན་མོ་ལན་གསུམ་དུ།། ཟང་ཟིང་མི་འཇིགས་ཆོས་དང་བྱམས།། སྦྱིན་པ་རྣམ་བཞི་རྟག་ཏུ་སྦྱིན།། ཞེས་རིན་ཆེན་ནི་རིན་འབྱུང་གི་རིགས་ཡིན་ལ་དེར་ཉིན་ལན་གསུམ་དང་མཚན་ལན་གསུམ་སྟེ་དུས་དྲུག་ཏུ་ཟང་ཟིང་དང་། མི་འཇིགས་པ་དང་། ཆོས་དང་བྱམས་པ་བཅས་སྦྱིན་པ་རྣམ་བཞི་རྟག་ཏུ་བྱིན་པ་ནི་རིན་ཆེན་འབྱུང་གནས་ཀྱི་དམ་ཚིག ཕྱི་དང་གསང་བ་ཐེག་པ་གསུམ།། དམ་ཆོས་ཁྱོད་ཀྱིས་བཟུང་བར་བྱ།། འདི་ནི་པདྨའི་རིགས་དག་པའི།། དམ་ཚིག་སྡོམ་པ་ཡིན་པར་གསུངས།། ཞེས་ཐེག་པ་གསུམ་ལ་སོགས་པའི་དམ་ཆོས་ཐམས་ཅད་མི་སྤོང་བར་འཛིན་པ་ནི་འོད་དཔག་མེད་ཀྱི་དམ་ཚིག ལས་ཀྱི་རིགས་མཆོག་ཆེན་པོ་ལ།། སྡོམ་པ་ཐམས་ཅད་ལྡན་པར་ནི།། ཡང་དག་ཉིད་དུ་བཟུང་བལ་བརགྱིས།། མཆོད་པའི་ལས་ཀྱང་ཅི་ནུས་བྱ།། ཞེས་སྡོམ་པ་ཐམས་ཅད་ཡང་དག་པར་བཟུང་བ་དང་མཆོད་པའི་ལས་ཀྱང་ཅི་ནུས་སུ་བྱ་བ་དོན་ཡོང་ཡོདགྲུབ་པ་སྟེ། དེ་བཞིན་གཤེགས་པ། རྡོ་རྗེ། རིན་ཆེན། པདྨ། ལས་ཀྱི་རིགས་དང་ལྔའི་ལྷ་སྤྱི་བྱེ་བྲག་གི་དམ་ཚིག་དང་། དེ་དག་སྤྱི་བསྡོམས་ལ། རྩ་བ་དང་། ཡན་ལག དོན་བསྡུས་གསུམ་ལས། དང་པོ་ནི། དེ་ལས་གཞན་པ་བཅུ་བཞི་ནི། ཕས་ཕམ་པར་ནི་རབ་ཏུ་བཤད།། སྤང་ཞིང་དོར་བར་མི་བྱ་སྟེ།། རྩ་བའི་ལྟུང་བ་ཞེས་བཤད་དོ།། ཉིན་དང་མཚན་མོ་ལན་གསུམ་དུ།། ཉིན་རེ་བཞིན་ནི་བཟླ་བར་བྱ།། གང་ཚེ་ཉམས་གྱུར་རྣལ་འབྱོར་བ།། ཁ་ན་མ་ཐོ་སྦོམ་པོར་འགྱུར།། ཞེས་པ་ལྟར་རིགས་ལྔ་སོ་སོའི་དམ་ཚིག་ལས་གཞན་ལ་ཐུན་མོང་གི་དམ་ཚིག་རྣམས་ཀྱང་ཡིད་ཀྱིས་སྤང་ཞིང་ལུས་ངག་གིས་དོར་བར་མི་བྱ་ལ། དེ་དག་གང་ཞེ་ན། ཐོག་མར་རྩ་བའི་དམ་ཚིག་སྟོན་པ་ནི། ཕས་ཕམ་པར་རྒྱུད་སྡེ་རྣམས་ལས་བཤད་པའི་བཅུ་བཞི་རྣམས་ཀྱི་བཅས་པ་སྟེ་དེ་རྣམས་ལ་མིང་གཉིས་པ་རྩ་བའི་ལྟུང་བ་ཞེས་གྲགས་ཤིང་། དེས་སྡོམ་པ་གཅོད་པས་གཉེན་པོའི་ཕྱོགས་ཕམ་པར་བྱེད་ལ་དེ་ཡང་ཕ་རོལ་མི་མཐུན་ཕྱོགས་ནས་ཚུར་ལ་ཕམ་པར་བྱས་པས་ཕས་ཕམ་མོ།། བཅུ་བཞི་ཞེས་པ་ལ་ཁ་ཅིག དང་པོ་ལ་དཀོན་ཅོག་གསུམ། གཉིས་པར་རྡོར་དྲིལ་སློབ་དཔོན་གསུམ། གསུམ་པར་སྦྱིན་པ་བཞི་པར་ཆོས་གསུམ། ཐ་མ་ལ་མཆོད་པ་གཅིག་པུ་སྟེ་བཅུ་བཞི་དང་། ལ་ལ་སྲོག་ཆགས་བསད་མི་བྱ་ནས་ཆང་སྤོང་བའི་བར་ལས་ལྡོག་པ་ལ་ལྔ་སོགས་བཤད་ཀྱང་། འཇམ་མགོན་བཙོང་ཁ་བ་ཆེན་པོ་འོག་ནས་འཆད་པར་འགྱུར་བའི་རྩ་ལྟུང་བཅུ་བཞི་པར་བཞེད་པ་ལྟར་རོ།།

  ཡན་ལག་གི་དམ་ཚིག་ལ། སྤོང་བ་དང་། བསྟེན་པ་དང་། གཞན་བསྟེན་པ་གསུམ་ལས། དང་པོ། ཁྱོད་ཀྱིས་སྲོག་ཆགས་བསད་མི་བྱ།། མ་བྱིན་པར་ཡང་མི་བླང་ངོ་།། འདོད་པ་ལོག་པར་མི་སྤྱད་ཅིང་།། རྫུན་དུ་སྨྲ་བར་མི་བྱའོ།། ཕུང་ཁྲོལ་ཀུན་གྱི་རྩ་བ་ཡི།། ཆང་ནི་རྣམ་པར་སྤང་བར་བྱ།། སེམས་ཅན་འདུལ་ཕྱིར་མ་གཏོགས་པར།། བྱ་བ་མ་ཡིན་ཐམས་ཅད་སྤང་།། ཞེས་པ་སྲོག་གཅོད་པ་ནས་བརྩུན་རྫུནགྱི་བར་སྤོང་བ་བཞིའི་སྟེང་དུ་ཆང་འཐུང་བ་སྤོང་བའི་བསླབ་གཞི་ལྔ་ནི་དངོས་གྲུབ་འགྲུབ་པའི་གཞི་དང་།གཞན་ཡང་སྒོ་གསུམ་གྱི་བྱ་བ་མ་ཡིན་པ་ཐམས་ཅད་སྤང་དགོས་ལ། འོན་ཀྱང་སྔགས་སྡོམ་ཚུལ་བཞིན་བསྲུང་བའི་རྒྱལ་སྲས་འགའ་ཞིག་ལ་སེམས་ཅན་གདུལ་བའི་ཕྱིར་དུ་སྲོག་གཅོད་པ་སོགས་ལུས་ངག་གི་བདུན་ལ་གནང་པའི་སྐབས་ཡོད་པས་དེ་འདྲ་བའི་ཚེ་ནི་མ་གཏོགས་སོ།། བསྟེན་པ་ནི། དམ་པ་ཉེ་བར་བསྟེན་བྱ་ཞིང་།། རྣལ་འབྱོར་བ་རྣམས་བསྙེན་བཀུར་བྱ།། ལུས་ཀྱི་ལས་ནི་རྣམ་གསུམ་དང་།། ངག་གི་རྣམ་པ་བཞི་རྣམས་དང་།། ཡིད་ཀྱི་རྣམ་པ་གསུམ་དག་ནི།། ཅི་ནུས་པར་ནི་རྗེས་སུ་སྐྱོངས།། ཞེས་དམ་པའི་བཤེས་གཉེན་ལ་བསྟེན་ནས་སྔགས་ཀྱི་རིག་པ་སྒྲུབ་ཅིང་། རྣལ་འབྱོར་བ་རྣམས་ལ་མི་བརྙས་པར་བསྙེན་བཀུར་བ། དཀར་པོའི་ལས་ལམ་བཅུ་པོ་ཅི་ནུས་སུ་བསྟེན་པ་རྣམས་དང་། གསུམ་པ་དམ་ཚིག་གཞན་བསྟན་པ་ལ། ཐེག་པ་དམན་ལ་འདོད་མི་བྱ།། སེམས་ཅན་དོན་ལ་རྒྱབ་ཕྱོགས་མིན།། འཁོར་བ་དག་ཀྱང་སྤང་མི་བྱ།། རྟག་ཏུ་མྱ་ངན་འདས་མི་ཆགས།། ཞེས་ཐེག་པ་དམན་པ་ནི་ཆེད་དུ་བྱ་བ་གཞན་དོན་དང་འབྲས་བུ་བྱང་ཆུབ་དམན་པ་ཉན་རང་གི་ལམ་ཡིན་པས་དེས་རང་བགྲོད་པར་འདོད་པར་མི་བྱ་ཞིང་། སེམས་ཅན་གྲངས་མེད་པའི་དོན་ལ་སྒྱིད་ལུག་པ་སོགས་རྒྱབ་ཀྱིས་མི་ཕྱོགས་པ། འཁོར་བ་ཇི་སྲིད་བར་སེམས་ཅན་གྱི་དོན་བྱེད་པའི་གོ་ཆ་གྱོན་པ། རྟག་ཏུ་སྲིད་པའི་འཆིང་བ་ལས་གྲོལ་བ་ཙམ་གྱིས་མྱང་འདས་ལ་ཆགས་པ་སྟེ་ཐེག་ཆེན་ལས་ལྡོག་པའི་རྒྱུ་རྣམས་སྤོང་བ་དང་། ལྷ་དང་ལྷ་མིན་གསང་བ་བ།། ཁྱོད་ཀྱིས་བརྙས་པར་མི་བྱ་ཞིང་།། ཕྱག་རྒྱ་བཞོན་པ་མཚོན་ཆ་དང་།། མཚན་མ་འགོམ་པར་མི་བྱའོ།། ཞེས་འཇིག་རྟེན་ལས་འདས་མ་འདས་ཀྱི་ལྷ་དང་ལྷ་མ་ཡིན་རྣམས་དང་གསང་བ་བ་གནོད་སྦྱིན། ཕྱག་རྒྱ་ནི་ལྷའི་གཟུགས་བྲིས་པ། བཞོན་པ་ནི་ལྷའི་བཞོན་པའི་གཟུགས་སུ་བྱས་པ་དང་བླ་མའི་བཞོན་པ། མཚོན་ཆ་ནི་ལྷའི་ཕྱག་མཚན་རལ་གྲི་དང་མདུང་སོགས། མཚན་མ་ནི་ཕྱག་མཚན་འཁོར་ལོ་དང་རྡོ་རྗེ་སོགས་ལ་བརྙས་པ་དང་འགོམ་པའི་ཉེས་པ་རྣམས་སྤོང་བའོ།། རིགས་ལྔ་སྤྱིའི་དམ་ཚིག་གི་དོན་བསྡུས་པ་ནི། འདི་དག་དམ་ཚིག་ཡིན་པར་བཤད།། ཁྱོད་ཀྱིས་རྟག་ཏུ་བསྲུང་བར་བྱ།། ཞེས་གསུངས་པ་འདི་ནི་སྔར་བཤད་པའི་ཐུན་མོང་གི་དམ་ཚིག་བསྒྲག་པ་མན་ཆད་ཐམས་ཅད་ལ་སྦྱར་བར་བྱ་བ་ཡིན་ལ། དེ་ནས། རྗེས་མཐུན་སྡོམ་པ་རྒྱ་ཆེར་ནི།། གསང་བའི་རྒྱུད་ལས་རབ་ཏུ་བཤད།། ཅེས་པ་ནི་སྔར་བཤད་པ་དེ་དག་དང་འདྲ་བའི་སྡོམ་པ་སྟེ་བསླབ་པའི་གནས་རྒྱ་ཆེར་ནི་རྒྱུད་ཀུན་ལས་རབ་ཏུ་བཤད་དོ་ཞེས་དངོས་སུ་སྨོས་པ་དེ་ཙམ་དུ་ཟད་དམ་སྙམ་པ་སྤང་བའི་ཕྱིར་དུའོ།། སྡོམ་པ་བཟུང་བ་ལ་གསོལ་བ་བཏབ་པ་དང་། སྡོམ་བཟུང་གཉིས་ལས། དང་པོ་ནི། རྡོ་རྗེ་རྩེ་མོ་ལས། གཙོ་བོ་བདག་ལ་སྡོམ་པ་སྩོལ།། ཐུབ་པ་ཉི་མ་མ་ལུས་པའི།། སངས་རྒྱས་བདག་ལ་དགོངས་སུ་གསོལ།། ཞེས་སོགས་ཀྱིས་གསོལ་བ་འདེབས་པའི་སློབ་མ་ལ། བླ་མས། གསང་བ་ཆེན་པོའི་རིགས་དག་པའི།། གསང་བ་ཡོངས་སུ་འཛིན་པར་ནི།། བདག་ཉིད་ཆེན་པོ་ཁྱོད་འདོད་དམ།། ཞེས་སྡོམ་པ་ལེན་འདོད་ཡོད་མེད་ལེགས་པར་དྲིས་ཏེ་སྙིང་ཐག་པ་ནས་ལེན་འདོད་མེད་ན་སྡོམ་པ་མི་སྐྱེ་བས་སྤང་ཞིང་། དོན་གཉེར་འདུག་ན། འདིར་ནི་སློབ་དཔོན་བདག་ལ་གསོན།། ཞེས་སློབ་དཔོན་ལ་གསོལ་ནས་སྡོམ་པ་འཛིན་པ་ཡིན་ལ། གཉིས་པ་ནི། རྩེ་མོར། གཙོ་བོས་ཇི་ལྟར་བཀའ་བསྩལ་པ།། དེ་བཞིན་དུ་ནི་བགྱིད་པར་འཚལ།། ཞེས་ཁས་ལེན་པ་འདི་ལ། སེམས་བསྐྱེད་པ། སྡོམ་པ་བཟུང་བ་དངོས། དོན་བསྡུས་ཏེ་ཁས་ལེན་པ་དང་གསུམ་ལས། དང་པོ་ནི། ཇི་ལྟར་དུས་གསུམ་མགོན་པོ་རྣམས།། བྱང་ཆུབ་ཏུ་ནི་ངེས་མཛད་པའི།། བྱང་ཆུབ་སེམས་ནི་བླ་ན་མེད།། དམ་པ་བདག་གིས་བསྐྱེད་པར་བགྱི།། ཞེས་བདག་རྡོ་རྗེ་སེམས་པར་གྱུར་ནས་སེམས་ཅན་ཐམས་ཅད་ཀྱང་དེའི་གོ་འཕང་ལ་དགོད་འགོདཔར་བྱ་སྙམ་པའི་སྨོན་སེམས་དང་། དེའི་ལམ་སྦྱིན་སོགས་ཉམས་སུ་ལེན་པའི་རང་བཞིན་འཇུག་པ་སྟེ་སྨོན་འཇུག་དེ་གཉིས་ནི་བླ་ན་མེད་པའི་འབྲས་བུ་སྒྲུབ་པར་བྱེད་པས་བླ་ན་མེད་པ་དང་དམ་པའོ།། སྡོམ་པ་བཟུང་བ་དངོས་ནི། སངས་རྒྱས་རྣལ་འབྱོར་སྡོམ་པ་ལ།། ཚུལ་ཁྲིམས་ཀྱི་ནི་བསླབ་པ་དང་།། དགེ་བའི་ཆོས་ནི་སྡུད་པ་དང་།། སེམས་ཅན་དོན་བྱེད་ཚུལ་ཁྲིམས་གསུམ།། བདག་གིས་བརྟན་པོར་བཟུང་བར་བགྱི།། སངས་རྒྱས་ཆོས་དང་དགེ་འདུན་ཏེ།། བླ་ན་མེད་པའི་དཀོན་ཅོག་གསུམ།། དེང་ནས་བརྩམས་ཏེ་བཟུང་བར་བགྱི།། ཞེས་རྣམ་སྣང་དང་། རྡོ་རྗེ་རིགས་མཆོག་ཆེན་པོ་ལ།། རྡོ་རྗེ་དྲིལ་བུའི་ཕྱག་རྒྱ་ཡང་།། ཡང་དག་ཉིད་དུ་བཟུང་བར་བགྱི།། སློབ་དཔོན་དག་ཀྱང་བཟུང་བར་བགྱི།། ཞེས་མི་བསྐྱོད་པ།རིན་ཆེན་རིགས་མཆོག་ཆེན་པོ་ཡི།། དམ་ཚིག་ཡིད་དུ་འོང་བ་ལ།། ཉིན་རེ་བཞིན་ནི་དུས་དྲུག་ཏུ།། སྦྱིན་པ་རྣམ་བཞི་རབ་ཏུ་བྱིན།། ཞེས་རིན་འབྱུང་། བྱང་ཆུབ་ཆེན་པོ་ལས་བྱུང་བ།། པདྨའི་རིགས་ཆེན་དག་པ་ལ།། ཕྱི་ནང་གསང་བ་ཐེག་པ་གསུམ།། དམ་པའི་ཆོས་ནི་བཟུང་བར་བགྱི།། ཞེས་འོད་དཔག་མེད། ལས་ཀྱི་རིགས་མཆོག་ཆེན་པོ་ལ།། སྡོམ་པ་ཐམས་ཅད་ལྡན་པ་ནི།། ཡང་དག་ཉིད་དུ་བཟུང་བར་བགྱི།། མཆོད་པའི་ལས་ཀྱང་ཅི་ནུས་བགྱི།། ཞེས་དོན་གྲུབ་དང་ལྔའི་སྡོམ་པ་སོ་སོར་འཛིན་པ་དང་། བྱང་ཆུབ་སེམས་ནི་བླ་ན་མེད།། དམ་པ་བདག་གིས་བསྐྱེད་བགྱིས་ནས།། སེམས་ཅན་ཀུན་གྱི་དོན་གྱི་ཕྱིར།། བདག་གིས་སྡོམ་པ་མ་ལུས་བཟུང་།། མ་གྲོལ་བ་ནི་དགྲོལ་པར་བགྱི།། མ་བརྒལ་བ་ནི་བསྒྲལ་པར་བགྱི།། དབུགས་མ་ཕྱིན་པ་དབུགས་དབྱུང་ཞིང་།། སེམས་ཅན་མྱ་ངན་འདས་ལ་འགོད།། ཅེས་རྐང་པ་དང་པོ་གཉིས་སྨོན་འཇུག་དང་། དེ་ནས་གཉིས་ནི་སྡོམ་པ་ལྔའི་དོན་བསྡུ་ཡིན་ལ། གཏི་མུག་སོགས་སྒྲིབ་པ་གཉིས་ཀྱི་འཆིང་བས་བཅིངས་པ་ཚངས་པ་སོགས་མ་གྲོལ་བ་དང་། ཉན་རང་ཤེས་སྒྲིབ་ལས་མ་བརྒལ་བ། དམྱལ་བ་སོགས་དབུགས་མ་བྱིན་པ་དབྱུང་ཞིང་སེམས་ཅན་ཀུན་མི་གནས་པའི་མྱ་ངན་ལས་འདས་པ་ལ་འགོད་པའོ།། སྡོམ་པ་བཟུང་མ་བཟུང་ལ་དབང་བསྐུར་མི་བསྐུར་གྱི་ཚུལ་ལ། རྡོ་རྗེ་འབྱུང་བ་ལས། གང་ཞིག་སྡོམ་པ་འཛིན་པར་མི་བྱེད་པ་དེ་ལ་ནི་དེང་ཁྱོད་ཅེས་བྱ་བ་ལ་སོགས་པ་རྣམས་བརྗོད་པར་མི་བྱ་སྟེ་སློབ་དཔོན་དུ་རྗེས་སུ་གནང་པ་དང་། དབང་བསྐུར་པར་མི་བྱའོ།། ཞེས་པ་ལྟར་སྡོམ་པ་མི་འཛིན་པ་ལ་དབང་མི་བསྐུར་པའི་ཚུལ་དང་དེ་ལ་རྩོད་པ་སྤངས་ཏེ་དབང་བསྐུར་པས་སྡོམ་པ་འཛིན་ཚུལ། དཀྱིལ་ཆོག་རྡོར་འཕྲེང་ལས། ཕྲེང་བ་དང་ཆུ་ལ་སོགས་པ་དབང་དྲུག་པོ་འདི་རྣམས་ཀྱི་མ་རིག་པའི་གཉེན་པོ་ནུས་པ་ཉིད་དུ་སྒྲུབ་པར་བྱེད་པས་རིག་པའི་དབང་ཞེས་བརྗོད་དོ།། དབང་འདི་རྣམས་བསྐུར་པའི་སློབ་མ་བྱ་བ་དང་སྤྱོད་པའི་རྒྱུད་དག་ཉན་པ་དང་བཤད་པ་དང་སྔགས་སྒྲུབ་པ་རྣམས་ལ་དབང་བར་འགྱུར་རོ།། ཞེས་དང་། ཨ་བྷྱའི་བཞེད་པས་རྒྱུད་སྡེ་གོང་མ་གཉིས་མ་གཏོགས་པའི་འབྱུང་འདུལ་ལ་སོགས་པ་རྡོ་རྗེ་འཕྲེང་བར་གསུངས་པ་རྣམས་ཀྱི་དབང་བསྐུར་པ་ན་རིགས་ལྔའི་སྡོམ་བཟུང་དོར་ནས་ཐུན་མོང་བ་ཙམ་བཟུང་བས་ཆོག་སྟེ་སློབ་མའི་དབང་ཙམ་གྱི་བྱ་སྤྱོད་ཀྱི་རྒྱུད་འཆད་ཉན་དང་སྒྲུབ་པ་ལ་དབང་བའི་ཕྱིར་དང་སློབ་དཔོན་གྱི་དབང་མི་བསྐུར་པ་ལ་རྡོ་རྗེ་སློབ་དཔོན་གྱི་སྡོམ་པ་མི་སྟེར་བར་གསུངས་པ་སོགས་བྱ་སྤྱོད་ཀྱི་དབང་བསྐུར་པ་ལ་སྡོམ་པ་གང་འཛིན་བསྟན་པ་དང་གསུམ་ཡོད་ཅིང་། དེ་ཡང་དམ་ཚིག་བསྡུས་པར། ཐུན་མོང་གི་རྩ་ལྟུང་བཞི། ཕ་རོལ་ཏུ་ཕྱིན་པའི་རྩ་ལྟུང་བཅུ་གཉིས། ཀྲྀ་ཡའི་རྒྱུད་ཀྱི་རྩ་ལྟུང་སུམ་ཅུ། སྤྱོད་རྒྱུད་ཀྱི་རྩ་ལྟུང་བཅུ་བཞིར་བཤད་པ་སོགས་མཆིས་ལ། རྩ་བའི་ས་དཔྱད་བཅདགཉིས་པར་ཁས་བླངས་པའི་སྡོམ་པ་དང་འགལ་བའི་ལྟུང་བ་གཏན་ལ་དབབ་པ་ལ། གང་གི་རྒྱུད་ལ་ལྟུང་བ་བསྐྱེད་པའི་རྟེན་ངོས་བཟུང་བ། རྟེན་དེ་ལ་བཅས་པའི་ལྟུང་བའི་རབ་ཏུ་དབྱེ་བ། ཕྱི་ནས་སོ་སོའི་དོན་བཤད་པ་དང་གསུམ་གྱི་དང་པོ་ནི། གསང་སྔགས་ཀྱི་ཐུན་མོང་མ་ཡིན་པའི་སྡོམ་པ་ཐོབ་ནས་མ་བཏང་བ་བསམ་པ་རང་བཞིན་དུ་གནས་པ་སྟེ་ཁྱད་པར་གཉིས་དང་ལྡན་དགོས་ལ། སྡོམ་པ་དང་མི་ལྡན་ན་དེ་ལ་རང་བཞིན་གྱི་ཁ་ན་མ་ཐོ་བའི་ཉེས་སྤྱོད་བསྐྱེད་ཀྱང་བཅས་པ་དང་འགལ་བའི་ལྟུང་བ་མི་བསྐྱེད་པའི་ཕྱིར་དང་། སྨྱོ་བ་སོགས་ཀྱི་དྲན་པ་རྣལ་དུ་མི་གནས་ན་ལྟུང་མེད་དུ་གསུང་། གཉིས་པ་དབྱེ་བ་ནི། རྡོ་རྗེ་འཕྲེང་བ་ལས། རྡོ་རྗེ་སེམས་དཔའི་སྡོམ་པ་དང་ལྡན་པ་འདིའི་ལྟུང་བ་ནི་རིས་རྣམ་པ་གཉིས་ཏེ་རྩ་བའི་ལྟུང་བ་དང་སྦོམ་པོའི་ལྟུང་བའོ།། ཞེས་རིས་གཉིས་སུ་ངེས་པ་དང་། གསུམ་པ་སོ་སོའི་དོན་བཤད་པ་ལས། རྩ་ལྟུང་གིས་མ་གོས་པར་བྱ་བ་དང་། ཉམས་ན་ཕྱིར་བཅོས་པའི་ཐབས་དང་གཉིས་ལས། དང་པོར་རྩ་ལྟུང་ངོས་བཟུང་བ་དང་། དེས་མ་གོས་པར་བསྲུང་བའི་འདོད་པ་བསྐྱེད་པ། ཇི་ལྟར་བསྲུང་ཚུལ་དང་གསུམ་གྱི། དང་པོར་རྩ་ལྟུང་སོ་སོར་བཤད་པ་དང་། བསྡུས་ཏེ་བསྟན་པ་གཉིས་ཀྱི་དང་པོ། གང་ཕྱིར་རྡོ་རྗེ་འཛིན་པ་ཡི།། དངོས་གྲུབ་སློབ་དཔོན་རྗེས་འབྲང་གསུངས།། དེ་བས་དེ་ལ་བརྙས་པ་ནི།། རྩ་བའི་ལྟུང་བ་དང་པོར་བཤད།། ཅེས་གང་ལུས་ཅན་ཐམས་ཅད་སྤང་རྟོགས་མཐར་ཕྱིན་གྱི་ཟུང་འཇུག་སྐུ་བཞིའི་གོ་འཕང་ཐོབ་པར་བྱ་བའི་ཕྱིར་རྒྱལ་བ་ཁྱབ་བདག་རྡོ་རྗེ་འཛིན་པ་དེ་ཡིས་བཀའ་བསྩལ་པ་རྒྱུད་སྡེ་རིན་པོ་ཆེན་ཆེརྣམས་སུ་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་རྣམ་པ་གཉིས་འགྲུབ་པ་ནི་བླ་མའམ་སློབ་དཔོན་ཚུལ་བཞིན་བསྟེན་པའི་རྗེས་སུ་འགྲོ་བའམ་འབྲང་བར་གསུངས་པ་དེ་ལྟ་བས་ན། རང་ཉིད་ལ་དབང་བཞི་རྫོགས་པར་སྩོལ་པ་ནས་ཐ་ན་ཚིགས་བཅད་གཅིག་ཙམ་སྟོན་པའི་བར་གྱི་སློབ་དཔོན་དེའི་སྐུ་གསུང་ཐུགས་མཛད་པ་འཕྲིན་ལས་ལ་མི་ངང་དདམི་གུས་པར་བརྙས་ཐབས་བགྱིས་པ་ནི། དཔའ་བོ་བདག་གིས་སྔགས་ཀྱི་ཉེས་བྱས་ཕྲ་རགས་མང་དུ་ཡོད་པ་ལས་གཙོ་ཆེ་བ་བཅུ་བཞིར་དབྱེ་བའི་ནང་ནས་ཀྱང་རྩ་བ་ལྟ་བུའི་ཉེས་ལྟུང་ལྕི་བའི་དང་པོར་གཞུང་ཆེན་པོ་རྣམས་ལས་བཤད་པ་བཞིན་བསྡུས་ཞེས་པའོ།། བདེ་གཤེགས་བཀའ་ལས་འདས་པ་ནི།། ལྟུང་བ་གཉིས་པ་ཡིན་པར་བཤད།། ཅེས་པ་ནི་རྣམ་འགྲེལ་ལས། རྒྱུ་སྤངས་ཡོན་ཏན་གསུམ་བདེ་གཤེགས།། ཞེས་པའི་དོན་ལྟར་སྲིད་པའི་སྡུག་བསྔལ་གྱི་རྟེན་མི་བྱེད་པས་ལེགས་པར་གཤེགས་པ་དང་བདག་ལྟའི་ས་བོན་ཟད་པས་སླར་མི་ལྡོག་པར་གཤེགས་པ་དང་སྤང་བྱ་མཐའ་དག་ཟད་པས་མ་ལུས་པར་གཤེགས་པས་ན་ལམ་བདེ་བ་འཇུག་པ་བདེ་བ་ལ་ལེགས་པར་གཤེགས་པའི་སངས་རྒྱས་ཀྱི་བཀའ་རྒྱ་མཚོ་ལྟ་བུ་ལས། སྡོམ་པ་གསུམ་གང་རུང་དང་ཁྱད་པར་སྔགས་སྡོམ་གྱི་བཅས་པ་གསུངས་པོ་ལ་ཁྱད་དུ་གསོད་འདོད་ཀྱི་ཀུན་སློང་ཚང་བས་འདས་པར་བྱེད་པ་ནི། གོང་བཞིན་རྩ་བའི་ལྟུང་བ་བཅུ་བཞིར་ཕྱེ་བའི་གཉིས་པ་ཡིན་པར་བཤད་ཅེས་པའོ།། རྡོ་རྗེ་སྤུན་ལ་ཁྲོས་པས་ནི།། ཉེས་པ་བརྗོད་པ་གསུམ་པ་ཡིན།། ཞེས་སློབ་དཔོན་དང་དཀྱིལ་འཁོར་དང་རིག་པའམ་རིག་མ་རྣམས་གཅིག་ལས་དམ་ཚིག་ཐོབ་པ་ནི་ཁྱད་པར་གྱི་རྡོ་རྗེ་སྤུན་དང་། དེ་རྣམས་སོ་སོར་ཐོབ་པ་ནི་བྱེ་བྲག་གི་རྡོ་རྗེ་སྤུན་དང་། ཐེག་པ་ཆེན་པོ་ལ་ཞུགས་པ་རྣམས་ཉེ་བའི་སྤུན་ཏེ། རྡོ་བ་ཞེས་སྲ་བ་དང་མཁྲེགས་པ་ཀུན་གྱི་རྗེར་གྱུར་པས་གང་གིའང་གཞིག་པ་དང་ཕྱེད་པར་མི་ནུས་པའི་མཚོན་དོན་དུ་བྱས་པའི་ཐེག་པ་འདིའི་དཀྱིལ་འཁོར་གཅིག་ཏུ་དབང་བཞི་རྫོགས་པའམ་ཐ་ན་ཚིགས་བཅད་གཅིག་མཉམ་དུ་ཞུས་པའི་མཆེད་ལྕམ་མམ་སྤུན་དུ་གྱུར་པ་རྣམས་ལ་སྙིང་ཐག་པ་ནས་མི་དགའ་བར་ཁྲོས་པ་ནི། སྔགས་སྡོམ་གྱི་ཉེས་པར་བརྗོད་པའི་རྣམ་གྲངས་གསུམ་པའོ་ཞེས་སོ།། སེམས་ཅན་རྣམས་ལ་བྱམས་པ་སྤོང་།། བཞི་པ་ཡིན་པར་རྒྱལ་བར་གསུངས།། ཞེས་རིགས་དྲུག་པོ་གཅིག་ཏུ་མི་གནས་པར། ཡང་ནས་ཡང་དུ་འཁོར་ཞིང་འགྲོ་བས་འགྲོ་བའམ་རྣམ་པར་ཤེས་པའི་རྟེན་བྱེད་པའི་ལུས་དང་ལྡན་པས་ལུས་ཅན་བེམ་པོ་མ་ཡིན་པར་བདེ་སྡུག་ལ་སོགས་པ་ཤེས་པའི་སེམས་དང་ལྡན་པ་ཅན་གྱི་འགྲོ་བ་རྣམས་ལས། གང་ཡང་རུང་བ་གཅིག་ལ་འདི་བདེ་བ་ཐམས་ཅད་དང་བྲལ་ན་སྙམ་པའི་བྱམས་པ་རིང་དུ་འདོར་བ་སྟེ་སྤོང་བར་བྱེད་ན། རྩ་བའི་ལྟུང་བ་བཞི་པ་ཡིན་པར་བདུད་སྡེ་བྱེ་བ་ཕྲག་དུ་མའི་གཡུལ་ལས་རྣམ་པར་རྒྱལ་བ་དེས་ལེགས་པར་གསུངས་ཞེས་པའོ།། ཆོས་ཀྱི་རྩ་བ་བྱང་ཆུབ་སེམས།། དེ་སྤོང་བ་ནི་ལྔ་པ་ཡིན།། ཞེས་པ་ཕལ་བོ་ཆེའི་བམ་པོ་བརྒྱ་བཅུ་གཉིས་པར། རིགས་ཀྱི་བུ་བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ།། ཞེས་བཀའ་བསྩལ་པ་ལྟར་སངས་རྒྱས་ཀྱི་ཆོས་ཐམས་ཅད་ཀྱི་སྙིང་པོའམ་རྩ་བ་ལྟ་བུ་ནི་ཡོན་ཏན་མ་ལུས་པ་བྱང་ཞིང་ཆུབ་སྟེ་འགྲོ་བ་ཀུན་མི་གནས་པའི་མྱང་འདས་ལ་འགོད་སྙམ་པའི་སེམས་བསྐྱེད་པ་ཁོ་ན་ཡིན་པས་ན། བདག་གིས་སེམས་ཅན་མཐའ་ཡས་པའི་དོན་དུ་བྱང་ཆུབ་དེ་ཐོབ་པར་མི་ནུས་བསམས་ནས་སྨོན་སེམས་སྤོང་བ་དེ་ནི་རྩ་བའི་ལྟུང་བ་ལྔ་པ་ཡིན་ཞེས་པའོ།།རང་ངམ་གཞན་གྱི་གྲུབ་པའི་མཐའ།། ཆོས་ལ་སྨོད་པ་དྲུག་པ་ཡིན།། ཞེས་པ་དཀའ་འགྲེལ་དུ་རང་གི་གྲུབ་མཐའ་གསང་སྔགས་རྡོ་རྗེ་ཐེག་པ་དང་གཞན་གྱི་གྲུབ་མཐའ་ཕ་རོལ་ཏུ་ཕྱིན་པའི་ཐེག་པར་བཞེད་ཀྱང་ནག་པོ་བས་རང་གི་གྲུབ་མཐའ་སངས་རྒྱས་ཀྱི་རིང་ལུགས་དང་གཞན་མུ་སྟེགས་པར་མཛད་པ་འཐད་དམ་སྙམ་སྟེ།རྒྱུད་ལས། མུ་སྟེགས་ཅན་ལ་སྨད་བྱས་ན།། རྣམ་པར་སྣང་མཛད་རིང་བའི་རྒྱུ།། ཞེས་དང་། ཐེག་པ་གང་ལའང་མེད་དུ་མི་རུང་བའི་སྐྱབས་འགྲོའི་བསླབ་བྱར་ཡང་དེ་དང་ཆ་མཚུངས་སུ་བཤད་པས་ཕྱི་ནང་ངམ་མདོ་སྔགས་འཕགས་པའི་ཡུལ་དུ་གྲུབ་མཐའ་སྨྲ་བ་ཆེན་པོ་བཞི། གངས་ཅན་གྱི་ལྗོངས་སུ་དེང་སང་གྲགས་ཆེ་བ་ས་དགེ ཀར་འབྲུག དྭགས་ཤངས། ཞི་བྱེད་སོགས་ཕྱོགས་རིས་ཅན་གང་ལ་ཡང་ཐོག་མ་རང་ཉིད་དེར་ཞུགས་ནས་སླར་དེ་བས་གཞན་ལ་ཞུགས་ཏེ་ཐོག་མའི་རང་ཉིད་ཀྱི་གྲུབ་མཐའ་དེ་ལ་སྨོད་པར་གྱུར་པའམ། གཞན་ཕ་རོལ་གྱི་ཆོས་ལུགས་གྲུབ་པའི་མཐའ་སྟེ་གང་ལ་ཡང་བསམ་པ་ཐག་པ་ནས་སུན་འབྱིན་ཅིང་སྨོད་པ་ནི་རྩ་ལྟུང་དྲུག་པ་ཡིན་ཞེས་པའོ།། ཡོངས་སུ་མ་སྨིན་སེམས་ཅན་ལ།། གསང་བ་སྒྲོག་པ་བདུན་པ་ཡིན།། ཞེས་ལོག་ལྟ་ཅན་གསང་སྔགས་ཀྱི་ཆོས་ཡོངས་སུ་མ་རྫོགས་པས་སྣོད་ཀྱིས་མ་སྨིན་པ་ལོག་སྲེད་ཅན། ལོག་ལྟ་མེད་ཀྱང་ཆོ་གས་མ་སྨིན་པ་བུམ་དབང་མ་ཐོབ་པ། རྫོགས་པས་མ་སྨིན་པ་གསང་བ་ཤེས་རབ་ཡེ་ཤེས་མ་ཐོབ་པ། ཉམས་པས་མ་སྨིན་པ་རྩ་ལྟུང་ཕྱིར་བཅོས་པ། ཟབ་མོས་འཇིགས་པས་མ་སྨིན་པ་སྟེ་རྣམ་པ་ལྔས་མ་སྨིན་པའི་གང་ཟག་སེམས་ཅན་ཅི་ཡང་རུང་བ་ལ་རིམ་པ་གཉིས་ལ་སོགས་པའི་སྔགས་ཀྱི་གསང་བའི་དེ་ཁོ་ན་ཉིད་བྱུང་རྒྱལ་དུ་སྒྲོག་པ་ནི་རྩ་བའི་ལྟུང་བའི་ནང་གི་རྣམ་གྲངས་བདུན་པ་ཡིན་ཞེས་པའོ།། ཕུང་བོ་སངས་རྒྱས་ལྔ་བདག་ཉིད།། དེ་ལ་བརྙས་བྱེད་བརྒྱད་པ་ཡིན།། ཞེས་གཟུགས་དང་ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པའི་ཕུང་བོ་ལྔ་རིམ་པ་ལྟར་རྣམ་སྣང་། རིན་འབྱུང་། འོད་དཔག་མེད། དོན་གྲུབ། མི་བསྐྱོད་པ་སྟེ་རང་བཞིན་རྣམ་པར་དག་པའི་སངས་རྒྱས་དེ་བཞིན་གཤེགས་པ་ལྔའི་རང་བཞིན་བདག་ཉིད་ཅན་ཡིན་པ་དེ་ནང་གི་སྦྱིན་སྲེག་གིས་མཆོད་ཅིང་བདེ་བ་སྒྲུབས་པར་བྱ་རྒྱུ་ལ། ཐེག་ཆེན་སེམས་བསྐྱེད་ཀྱིས་མ་ཟིན་པར་རང་ཉིད་ཐར་བ་དང་མཐོ་རིས་ཐོབ་པའི་རྒྱུར་བླུན་རྟགས་ཀྱིས་འགག་པ་དང་གཡང་སར་མཆོད་པ་དང་དམན་པའི་བརྟུལ་ཞུགས་དང་གནས་མིན་གྱི་བཟོད་པ་དང་ཡན་ལག་ཉིང་ལག་མཆོད་པར་འབུལ་བ་གཅོད་པ་སྨྱུང་བར་གནས་པ་སོགས་རང་ལུས་ལ་བརྙས་པའམ་གདུང་བ་རྩོམ་པར་བྱེད་པ་ནི་རྩ་བའི་ལྟུང་བ་བརྒྱད་པ་ཡིན་ཞེས་སོ།། རང་བཞིན་དག་པའི་ཆོས་རྣམས་ལ།། སོམ་ཉི་ཟ་བ་དགུ་པ་ཡིན།། ཞེས་རང་བཞིན་མེད་པ་རྣམ་པར་དག་པའི་སྟོང་པ་ཉིད་སྤྲོས་པ་དང་བྲལ་བ་དང་། གཞན་ཡང་གོང་དུ་བརྗོད་པ་བཞིན་རང་གཞན་གྱི་གྲུབ་པའི་མཐའ་ཕྱོགས་རིས་མེད་པའི་ཆོས་རྣམ་པར་དག་པ། ཁྱད་པར་བདག་གི་བླ་མ་ལྔ་པ་ཆེན་པོས་ཚད་འཛིན་ཉམས་སུ་བཞེས་པའི་ཆོས་ཟབ་མོ་རྣམས་ལ་བདེན་རྫུན་སོམ་ཉིའམ་ཐེ་ཚོམ་ཟ་བ་ནི་ལྟུང་བ་དགུ་པ་ཡིན་ཞེས་པའོ།། གདུག་ལ་རྟག་ཏུ་བྱམས་ལྡན་པར།། བྱེད་པ་འདི་ནི་བཅུ་པར་འདོད།། ཅེས་དཀོན་ཅོག་གསུམ་དང་བླ་མ་སྨོད་པ་དང་བསྟན་པ་འཇིག་པ་སོགས་ཀྱི་སེམས་ཅན་ཞིང་བཅུ་ཚང་བ་གདུག་པ་ཅན་དག་ལའང་ངོ་བོ་བརྩེ་བ་སྙིང་རྗེ་ཆེན་པོས་རྗེས་སུ་བཟུང་བའི་རྣམ་པར་ཤེས་པ་གནས་སྤར་བ་ལ་སོགས་པ་དགོས་མོད་ཀྱང་གནས་སྐབས་སྤྱོད་པ་དེ་ལྟར་དུ་བསྐྱངས་ཀྱང་དུས་རྟག་པ་དང་ཡུན་རིང་བོ་ཞིག་ཏུ་སྙིང་རྗེའི་སེམས་ཀྱིས་བསྒྲལ་བ་ལ་སོགས་པ་མ་ནུས་པར་བྱམས་པ་དང་ལྡན་པར་སྐྱོང་བར་བྱེད་པ་འདི་ལྟ་བུ་ནི་རྩ་ལྟུང་བཅུ་པར་བྷ་བི་ལ་བདག་འདོད་དོ་ཞེས་པའོ།། མིང་སོགས་བྲལ་བའི་ཆོས་རྣམས་ལ།། དེར་རྟོག་པ་ནི་བཅུ་གཅིག་པ།། ཞེས་དོན་དམ་པར་མིང་དང་ཚིག་དང་ངག་གི་བརྗོད་པ་ལ་སོགས་པ་སྤྲོས་པ་དང་བྲལ་བའི་ཤེས་བྱའི་ཆོས་ཟབ་མོ་རྣམས་ལ། གྲུབ་མཐའི་དཔྱད་པས་མིང་སོགས་བདེན་པར་འཛིན་པའི་མཚན་མ་དེར་རྟོག་པར་བྱེད་ནའམ་ཆོས་བདག་མེད་པའི་ལྟ་བ་རྙེད་ནས་ལྟ་བ་དེ་རྒྱུན་དུ་བསྟེན་དགོས་པ་ལ་དེ་ལས་ལྡོག་པ་ནི་རྩ་ལྟུང་བཅུ་གཅིག་པའོ།། སེམས་ཅན་དད་དང་ལྡན་པ་ཡི།། སེམས་སུན་འབྱིན་པ་བཅུ་གཉིས་པ།། ཞེས་སེམས་ཅན་ཏེ་སྐྱེས་བུ་གང་ཞིག་གསང་སྔགས་རྡོ་རྗེའི་ཐེག་པ་མཆོག་གི་ལམ་ལ་དད་ཅིང་མོས་པ་དང་ལྡན་པའི་གུས་པ་ལྷག་པར་ཆེ་བ་དེ་ཡི་སེམས་ཀྱི་འདུན་པ་ཐེག་པ་དེ་ལ་མ་དད་པར་ལྡོག་འདོད་ཀྱི་བསམ་པས་བརྙས་པ་དང་སྨད་པའི་སྒོ་ནས་སུན་ཡང་ནས་ཡང་དུའམ་ལན་གཅིག་ཙམ་འབྱིན་པར་བྱེད་པ་ནི་རྩ་ལྟུང་བཅུ་གཉིས་པའོ།། དམ་ཚིག་ལ་ནི་ཇི་བཞིན་རྙེད།། མི་བདེན་པ་ནི་བཅུ་གསུམ་པ།། ཞེས་ཚོགས་འཁོར་རམ་དཔའ་བོ་ཕོ་མོའི་སྟོན་མོའི་ཆོ་ག་ཚུལ་བཞིན་དུ་བྱེད་པའི་ཚེ་དམ་ཚིག་གི་རྫས་ཤ་ལྔ་བདུད་རྩི་ལྔ་སོགས་པ་ལ་ནི་རྟོག་པས་མ་འབྱོངས་པར་ཇི་ལྟ་བ་བཞིན་དུ་མི་སྤྱོད་ལ། གཞན་ཡང་ཕྱི་དྲོའི་ཁ་ཟས་སོགས་དམ་རྫས་ཇི་སྙེད་ཅིག་མི་འདོད་པའི་བསམ་པས་བསྟེན་པར་མི་བྱེད་པ་ནི་རྩ་བའི་ལྟུང་བ་བཅུ་གསུམ་པ་ཡིན་ཞེས་སོ།། ཤེས་རབ་རང་བཞིན་བུད་མེད་ལ།། སྨོད་པར་བྱེད་པ་བཅུ་བཞི་པ།། ཞེས་པ་ཤེས་རབ་ནི་བདེ་བ་ཆེན་པོའི་ཡེ་ཤེས་ཡིན་ལ་རང་བཞིན་ནི་འདིར་འབྱུང་བའི་དོན་ཏེ་རྣལ་འབྱོར་བ་ལ་དེ་བསྐྱེད་པར་བྱེད་པ་པོ་བསྐལ་བ་དང་པོའི་དུས་ཕོ་མོའི་དབང་པོའི་སྒོ་དོད་པར་ཉེ་བའི་སྐབས་ལྦ་བ་ལྟ་བུའི་དབྱིབས་འབུར་བོ་རེ་ཡོད་པ་རེ་ཞིག་ན་ལ་ལ་ནི་སྐྱེས་ཏེ་ཕོ་མཚན་དུ་གྱུར་པས་སྐྱེས་པ། ལ་ལ་ནི་བུད་ནས་མེད་པའི་བུག་པ་ཅན་དུ་གྱུར་པས་བུད་མེད་དུ་གྲགས་པའི་ཚུལ་འཛིན་པ་འཇིག་རྟེན་ལས་འདས་པའི་རིགས་དང་བུད་མེད་མཚན་ཉིད་པ་གང་ཡང་རུང་བ་ལ། སོ་ཐར་ཆགས་བྲལ་ལ་ཨ་འཐས་པའམ་གཞན་ཡང་སྐྱོན་གདགས་འདོད་ཀྱི་ཀུན་སློང་གི་སྨོད་པར་བྱེད་པ་ནི་རྣལ་འབྱོར་བླ་མེད་ཀྱི་རྗེས་སུ་འབྲངས་པའི་རྩ་བའི་ལྟུང་བ་བཅུ་བཞི་པའོ་ཞེས་འཕགས་ཡུལ་མཁས་པའི་གཙུག་རྒྱན་སློབ་དཔོན་དཔའ་བོའམ་བྷ་བི་ལས་བསྡུ་བ་མཛད་པ་ལྟར། ཕ་རྒྱུད་རྡོ་རྗེ་སྙིང་པོ་རྒྱན་གྱི་ལེའུ་བཅུ་གཉིས་པ། བཤད་རྒྱུད་རྡོ་རྗེ་རྩེ་མོ། དགྲ་ནག་རྒྱུད་ཀྱི་རིམ་པར་ཕྱེ་བ་བཅུ་བདུན་པ། གཤེད་དམར་ལེའུ་བཅོ་བརྒྱད་པ་རྣམས་ནས་ནང་གསེས་དང་འགྱུར་ཁྱད་ཅུང་ཟད་ལས་རྐང་གྲངས་བཅུ་བཞི་ཁོ་ན་དང་། མ་རྒྱུད་གུར་གྱི་རྒྱུད་ལེའུ་བཅོ་ལྔ་པར་རྩ་ལྟུང་བཅུར་གསུངས་པ་ཡོད་ཀྱང་། དོན་གོང་དུ་བཤད་མ་ཐག་པའི་བཅུ་བཞིར་མ་འདུས་པ་མེད་ཅིང་། དེ་དག་གི་བསྡུ་བ་ནི། ལྟུང་བ་འདི་རྣམས་གསུངས་པ་ཁ་ན་མ་ཐོ་བ་ཆེན་པོ་རྣམས་དགག་པའི་ཕྱིར་དུ་བཅས་པ་ཡིན་ལ། གང་ལ་བརྟེན་ནས་ཉེས་པ་རྣམས་འབྱུང་བའི་གཙོ་བོ་ནི། འདི་ལྟར་རང་ལ་ཆོས་སྟོན་པ་བོ་དང་། ཆོས་སྒྲུབ་པའི་གྲོགས་དང་། ཉམས་སུ་བླང་བྱའི་ཆོས་དང་གསུམ་གཙོ་བོ་ཡིན་པ་ལས། དང་པོ་ལ་དམིགས་པའི་ཁ་ན་མ་ཐོ་བ་འགོག་པ་ནི་ལྟུང་བ་དང་པོའི་བཅས་པ། གྲོགས་ལ་གཉིས་ཏེ་ཡང་དག་པའི་གྲོགས་དང་ཕྱིན་ཅི་ལོག་གི་གྲོགས་པོ། དང་པོ་ལ་ལོག་པར་སྒྲུབ་པ་འགོག་པ་ནི་ལྟུང་བ་གསུམ་པ་དང་བཅུ་གཉིས་པའི་བཅས་པ། གཉིས་པ་ལ་མཛའ་བར་བྱེད་པ་འགོག་པ་ནི་བཅུ་པའི་བཅས་པ། ཆོས་ལ་ལུང་དང་སྒྲུབ་པ་གཉིས་ལས། ལུང་ལ་ཁྱད་གསོད་ཀྱིས་འཇུག་པ་དང་། བཀའ་མ་ཡིན་ཞེས་སྐུར་པ་འདེབས་པ་དང་། བསྟན་པར་མི་འོས་པ་སྟོན་པ་འགོག་པ་ནི་ལྟུང་བ་གཉིས་པ་དང་དྲུག་པ་དང་བདུན་པའི་བཅས་ལ། སྒྲུབ་པའི་ཆོས་ལ། ལམ་གྱི་རྟེན། ངོ་བོ། ཡན་ལག་དང་གསུམ་ལས། རྟེན་ལ་གང་གི་ཆེད་དུ་སེམས་བསྐྱེད་པའི་སེམས་ཅན་ལ་ལོག་པར་སྒྲུབ་པ་དང་། སེམས་རང་གི་ངོ་བོ་འདོར་བ་འགོག་པ་ནི་བཞི་པ་དང་ལྔ་པའི་བཅས་པ། ངོ་བོར་བསྐྱེད་རྫོགས་གཉིས་ཀྱི་དང་པོ་གང་ལྟར་སྒོམ་པའི་གཞི་ཕུང་བོ་ལ་བརྙས་པ་འགོག་པ་ནི་བརྒྱད་པའི་བཅས་པ། རྫོགས་རིམ་ལ་སྟོང་པ་ཉིད་དང་པོ་ནས་སྤོང་བ་དང་རྟོགས་ཀྱང་ཡིད་ལ་བྱེད་པ་འདོར་བ་འགོག་པ་གཉིས་ནི་དགུ་པ་དང་བཅུ་གཅིག་པའི་བཅས་པ། ཡན་ལག་ལ་ལམ་གྱི་གཞི་དམ་ཚིག་དང་གྲོགས་བུད་མེད་གཉིས་ལས་དམ་ཚིག་མི་བརྟེན་པ་དང་བུད་མེད་སྨོད་པ་འགོག་པ་ནི་ལྟུང་བ་བཅུ་གསུམ་པ་དང་བཅུ་བཞི་པའི་བཅས་པའོ།།

  བསྲུངས་འདོད་བསྐྱེད་པ་ལ་བསྲུངས་པའི་ཕན་ཡོན་དང་ཉེས་དམིགས་བསམ་པ་གཉིས་ལས། དང་པོ་ནི། སྔགས་པས་འདི་དག་སྤངས་ན་ནི།། དངོས་གྲུབ་ངེས་པར་ཐོབ་པར་འགྱུར།། ཞེས་དང་། གསང་བའི་མཛོད་ལས། དབང་བསྐུར་ཡང་དག་སྦྱིན་ལྡན་ན།། སྐྱེ་དང་སྐྱེ་བར་དབང་བསྐུར་འགྱུར།། དེ་ཡིས་སྐྱེ་བ་བདུན་ལ་ནི།། མ་བསྒོམས་པར་ཡང་དངོས་གྲུབ་ཐོབ།། ཅེས་སོགས་དང་། དམ་ཚིག་ལྔ་པ་ལས། གལ་ཏེ་ལྟུང་བ་མེད་གྱུར་ན།། སྐྱེ་བ་བཅུ་དྲུག་དག་ན་འགྲུབ།། ཅེས་དང་། བི་བྷུ་ཏཱི་ཙནྡྲས་ཀྱང་དེ་བཞིན་དུ་གསུངས་པས་རྩ་བ་དང་ཡན་ལག་གི་ཉེས་པས་མ་གོས་པའམ་གོས་ཀྱང་ཕྱིར་བཅོས་ཚུལ་བཞིན་དུ་བྱས་ནས་དམ་ཚིག་དང་སྡོམ་པ་ཚུལ་བཞིན་བསྲུངས་ན་སྐྱེ་བ་བཅུ་དྲུག་ཚུན་འགྲུབ་ཅིང་དེ་མ་ཐོབ་ཀྱི་བར་ཡང་རྒྱལ་བ་དང་རྒྱལ་སྲས་དཔའ་བོ་དང་དཔའ་མོའི་ཚོགས་རྣམས་ཀྱིས་དགྱེས་བཞིན་དུ་སྲུང་བས་ཡོན་ཏན་གོང་ནས་གོང་དུ་འཕེལ་བ་དང་བདུད་རིགས་ཀྱིས་གླགས་མི་རྙེད་པ་སོགས་ཕན་ཡོན་མཐའ་ཡས་པས་སྤྲོ་ཤུགས་ཆེ་བར་བྱ་བ་དང་། གཉིས་པ་ཉེས་དམིགས་ནི། གཞན་དུ་དམ་ཚིག་ལས་ཉམས་ན།། ཉམས་པ་བདུད་ཀྱིས་བཟུང་བར་འགྱུར།། དེ་ནས་སྡུག་བསྔལ་མྱོང་འགྱུར་ཞིང་།། ཐུར་དུ་བལྟས་ཏེ་དམྱལ་བར་འགྲོ།། ཞེས་དང་། ས་ར་ཧས། རེ་ཞིག་དམ་ཚིག་ཉམས་པ་ལ།། དངོས་གྲུབ་ཐོབ་པ་ལྟ་ཞོག་གི།  མི་ཡི་སྐྱེ་བའང་རྙེད་པར་དཀའ།། ཞེས་སོགས་མང་དུ་གསུངས་པ་མདོར་བསྡུ་ཚེ་དམ་ཚིག་དང་བཅས་མཚམས་ལས་འདས་ཤིང་། ཉམས་པ་ན་ཚེ་འདིར་བདུད་དང་ལོག་འདྲེན་ལ་སོགས་པས་འཛིན་པས་བཀྲ་མི་ཤིས་པའི་རྣམ་པ་སྣ་ཚོགས་བྱུང་ནས་ལུས་དང་སེམས་ལ་སྡུག་བསྔལ་མང་བ་དང་། ཕྱི་མ་རྐང་པ་སྤྱི་བོ་ཚུགས་སུ་དམྱལ་བར་འགྲོ་བ་ལ་སོགས་ཏེ་ཁེ་ཉེན་ཤིན་ཏུ་ཆེ་བས་སྤང་བླང་མ་འཛོལ་བ་བྱ་དགོས། ཇི་ལྟར་བསྲུང་བའི་ཚུལ་ནི། དེ་བས་ང་རྒྱལ་ངེས་བཅོམ་ནས།། བདག་ཉིད་མ་འཁྲུལ་ཤེས་པར་བྱ།། ཞེས་བསྲུང་ན་ཕན་ཡོན་ཤིན་ཏུ་ཆེ་ལ་མ་བསྲུངས་ན་ཉེས་དམིགས་ཀྱང་དེ་དང་འདྲ་བས་ལྟུང་བར་འགྱུར་མི་འགྱུར་གྱི་མཚམས་གང་ཡིན་མ་ཤེས་ན་མི་ཤེས་པ་ལྟུང་བ་འབྱུང་བའི་རྒྱུ་ཡིན་པས་དེའི་གཉེན་པོར་རྩ་བ་དང་ཡན་ལག་གི་ལྟུང་བ་རྣམས་ལེགས་པར་ཤེས་དགོས་པ་དང་། ཤེས་ཀྱང་གྲོགས་དང་བཅས་པ་སོགས་ལ་མི་གུས་ན་མ་གུས་པ་ལྟུང་བ་འབྱུང་བའི་རྒྱུ་ཡིན་པས་ང་རྒྱལ་ངེས་པར་བཅོམ་ནས་གུས་པར་བྱ་ལ། གུས་ཀྱང་བག་ཡོད་དང་དྲན་པ་དང་ཤེས་བཞིན་མ་བསྟེན་ན་བག་མེད་ལྟུང་བ་འབྱུང་བའི་རྒྱུ་ཡིན་པས་བདག་ཉིད་མ་འཁྲུལ་བ་སྟེ་སྤྱོད་ལམ་ཀུན་ཏུ་བག་ཡོད་སོགས་དང་ལྡན་དགོས་ཤིང་། གུས་ལ་བག་ཡོད་པར་སྤྱོད་ཀྱང་ཉོན་མོངས་ཤས་ཆེ་ན་ཉོན་མོངས་མང་བ་ལྟུང་བ་འབྱུང་བའི་རྒྱུ་ཡིན་པས་ང་རྒྱལ་གྱིས་མཚོན་ནས་ཉོན་མོངས་གཞན་གང་ཤས་ཆེ་བ་ཡང་གཉེན་པོ་བསྟེན་ནས་མཐུ་ཆུང་དུ་གཏོང་། དེ་ལྟར་ཡང་རྡོ་རྗེ་རྩེ་མོ་ལས། དམ་ཚིག་ཉིད་ནི་ཉམས་གྱུར་ན།། འབྲས་བུ་འདི་ནི་ཐོབ་མི་འགྱུར།། འདི་ནི་ཁྱོད་ཀྱི་དམྱལ་བའི་ཆུ།། དམ་ཚིག་འདས་ན་བསྲེག་པར་བྱེད།། ཅེས་སོགས་མང་དུ་གསུངས་པ་ལྟར་རོ།། ཉམས་པ་ཕྱིར་བཅོས་པའི་ཐབས་ནི། མཉམ་པར་བཞག་པས་བླ་མ་ལ།། ཅི་འབྱོར་བ་ཡིས་མཆོད་བྱས་ལ།། གསུམ་ལ་སྐྱབས་འགྲོ་ནས་བརྩམས་ཏེ།། བྱང་ཆུབ་སེམས་སོགས་སྡོམ་པ་ནི།། གལ་ཏེ་བདག་ལ་ཕན་འདོད་ན།། སྔགས་པས་འབད་དེ་བཟུང་བར་བྱ།། ཞེས་སྔར་བཤད་པ་ལྟར་བསྲུངས་གསུངསཀྱང་བག་མེད་པ་ལ་སོགས་པའི་དབང་གིས་བླ་མ་ལ་སྨོད་པ་སོགས་རྩ་ལྟུང་གང་རུང་བྱུང་ན་དེས་ཐོག་མ་ཉིད་དུ་མཉམ་པར་བཞག་པས་ཏེ་ཡིད་རྩེ་གཅིག་ཏུ་བྱས་ནས་ཚིགས་འཁོར་སོགས་སྔོན་དུ་འགྲོ་བའི་འབུལ་བ་ཅི་འབྱོར་བ་སྟེ་རང་གི་ནུས་པ་ཆེ་ཆུང་དང་འཚམ་པས་བླ་མར་མཆོད་པ་བྱས་ལ་ཉེས་པ་དེ་རྣམས་བཤགས་པར་བྱ་ཞིང་། གལ་ཏེ་བདག་ལ་འཕྲལ་ཡུན་དུ་བདེ་ཞིང་ཕན་པ་གཅིག་འདོད་ན་སླར་ཡང་སྡོམ་པ་བཟུང་བར་བྱ་བའོ།། འཇམ་མགོན་བཙོང་ཙོངཁ་བ་ཆེན་པོས། མདོ་རྒྱུད་གཞན་དང་བཤད་སྲོལ་མི་འདྲ་བའི།། ཤིང་རྟའི་སྲོལ་འབྱེད་དུས་ཀྱི་འཁོར་ལོའི་རྒྱུ།། ཅེས་པ་ལྟར་གོང་བཤད་རྣམས་དང་ཅུང་མི་མཐུན་པ་བཞེད་པ་མང་ཡང་བདག་གི་བླ་མ་ལྔ་པ་ཆེན་པོ་གཉིས་མེད་དུ་བཞེད་པ་དུས་ཀྱི་འཁོར་ལོའི་སྐོར། དབང་ལེ་ལས། འདོད་པའི་རྡོ་རྗེ་ལ་ནི་རྡོ་རྗེ་དྲིལ་བུ་ཕྱག་རྒྱ་བླ་མ་དག་ཀྱང་སྤྱི་བོས་བཟུང་བར་བགྱི། ཞེས་སོགས་སྡོམ་པ་བཟུང་ཚུལ་དང་། དཔལ་ལྡན་བླ་མའི་ཐུགས་དཀྲུགས་པ་ལས་བུ་རྣམས་ཀྱི་ནི་རྩ་བའི་ལྟུང་བ་རི་བོང་འཛིན་པར་འགྱུར། ཞེས་སོགས་རྩ་ལྟུང་རྐང་གྲངས་བཅུ་བཞི་ལ་ངོ་བོ་མི་འདྲ་བའི་ཁྱད་པར་དང་། འཕགས་ཡུལ་དུ་ཤིན་ཏུ་གསང་བས་ཆིག་བརྒྱུད་དུ་བཞུགས་ཤིང་།གངས་ཅན་དུ་འགྱུར་ཁྱད་ཀྱིས་སྔ་འགྱུར་དུ་གྲགས་པའི་ལུགས་རང་བཞིན་སྤྱིར་བསྟན་པ་ལ་དམ་ཚིག་གི་ངོ་བོ། ངེས་ཚིག དབྱེ་བ།རྟེན། ཕན་ཡོན། ཉེས་དམིགས། བསྐང་ཐབས། བསྲུང་ཐབས་དང་བརྒྱད་ལས། དང་པོ་ངོ་བོ་ནི། སྔགས་ཀྱི་སྡོམ་པས་རྒྱུད་བསྡམས་པའི་གཉེན་པོའི་དཔུང་དམ་བཅས་པ་ལས་མི་འདའ་བར་བྱེད་པ་སྟེ།དམ་ཚིག་མཆོག་གི་རྒྱུད་ལས། དམ་ཞེས་བྱ་བ་བཅིངས་པ་སྟེ།། རྡོ་རྗེ་འདའ་བཀའ་གཏན་གྱི་གཏེར།། ཞེས་སོ།། ངེས་ཚིག་ནི། དེ་ཉིད་ལས། སྤྱིར་ན་དམ་ཚིག་ཞེས་བྱ་བ། རང་སེམས་ཚིག་པ་མེད་པ་ལ།། གཡོ་སྒྱུ་རྣམས་དང་བྲལ་བའོ།། ཞེས་དང་། དབྱེ་ན་སྔགས་སྤྱིའི་ལུགས་ཀྱིས། རྩ་བ་དང་ཡན་ལག་གི་དམ་ཚིག་གཉིས་དེ་ཡང་རྩ་བ་སྐུ་གསུང་ཐུགས་གསུམ། ཡན་ལག་ཉི་ཤུ་རྩ་ལྔ་སྟེ། ཤེས་པར་བྱ་བ། དང་དུ་བླང་བ། མི་སྤང་བ། སྤྱད་པར་བྱ་བ། བསྒྲུབ་པར་བྱ་བ་རྣམས་ལ་ལྔ་ལྔའོ།། འདིར་བྱེ་བྲག་གིས་དབྱེ་ན། ལྟ་བ། སྤྱོད་པ། བསྒྲུབ་པ། ཐུན་མོང་བ། ཁྱད་པར་སྐུ་གསུང་ཐུགས།ཡན་ལག གལ་མདོ་ངེས་པའི་དམ་ཚིག་དང་བདུན་ཏེ། རང་ཤར་ལས། འབུམ་སྡེར་གསུངས་པའི་དམ་ཚིག་རྣམས།། མདོར་བསྟན་ལེགས་པར་ཡིད་ལ་བཟུང་།། དེ་ཡང་མདོར་བསྟན་འདི་ལྟ་སྟེ།། རྟོགས་བྱེད་ལྟ་བའི་དམ་ཚིག་དང་།། སྤྱོད་པ་རྒྱུན་གྱི་དམ་ཚིག་དང་།། བསྒྲུབ་པ་སྤྱི་ཡི་དམ་ཚིག་དང་།། ཐུན་མོང་སྤྱི་ཡི་དམ་ཚིག་དང་།། སྐུ་གསུང་ཐུགས་ཀྱི་དམ་ཚིག་དང་།། ཡན་ལག་གྲངས་ཀྱི་དམ་ཚིག་དང་།། གལ་མདོ་ངེས་པའི་དམ་ཚིག་གོ། དེ་ལ་སོགས་པའི་དམ་ཚིག་རྣམས།། མདོ་དང་རྒྱས་པ་ཆེན་པོའོ།། ཞེས་པ་ལྟར་དང་། རྟེན་ནི། སློབ་དཔོན་དང་སློབ་མ་མཆེད་ལྕམ་སྟེ། དེ་ཉིད་ལས། བསམ་གྱིས་མི་ཁྱབ་དམ་ཚིག་རྣམས།། རྣམ་པ་གཉིས་སུ་འདུས་པར་གསུངས།། སློབ་དཔོན་དང་ནི་སློབ་མ་གཉིས།། བསྲུང་བའི་རྒྱུ་ཞེས་ཀུན་ཏུ་གྲགས།། བསྲུང་བའི་རྒྱུ་ནི་སློབ་དཔོན་ཏེ།། བསྲུང་བར་བྱེད་པ་སློབ་མའོ།། ཞེས་དང་། མཆེད་ལྕམ་ལ་བཞིར་ངེས་པ་ཡང་།། དེ་ཉིད་ལས། རྡོ་རྗེའི་སྤུན་ལ་དོན་བཞིས་བསྟན།། སྤྱི་དང་ཉེ་དང་འདྲེས་པ་དང་།། དཀྱིལ་འཁོར་བུམ་པ་འདྲེས་པའོ།། ཞེས་པ་བསྟན་པར་ཞུགས་སོ་ཅོག་དང་ཁྱད་པར་གསང་སྔགས་ལ་ཞུགས་པ་ཐམས་ཅད་སྤྱིའི་མཆེད་དང་། ཆོས་རིགས་གཅིག་པ་རྣམས་ཉེ་བའི་མཆེད། བླ་མ་གཅིག་གིས་བསྡུས་པ་རྣམས་འདྲེས་པའི་མཆེད། དཀྱིལ་འཁོར་གཅིག་ཏུ་མར་མེ་གཅིག་བུམ་པ་གཅིག་གིས་དབང་དུས་གཅིག་ལ་བསྐུར་པ་རྣམས་ནི་ཤིན་ཏུ་འདྲེས་པའི་མཆེད་དོ།། འདི་དག་ཀྱང་ཡུན་བདུན་འགྱུར་གྱིས་གཉན་པར་ཤེས་པར་བྱའོ།། སློབ་དཔོན་ལའང་ཐམས་ཅད་ཀྱིས་སློབ་དཔོན་དུ་བསྐུར་པ་སྤྱིའི་སློབ་དཔོན་དང་། རང་ཉིད་ཆོས་ལ་སྦྱོར་བ་འདྲེན་པའི་སློབ་དཔོན་དང་། དམ་ཚིག་དང་། སྡོམ་པ་སྦྱིན་པ་དབང་གི་སློབ་དཔོན་དང་། གདམས་ངག་འབོགས་པ་ལུང་གི་སློབ་དཔོན་ཏེ། དེ་ཉིད་ལས། སློབ་དཔོན་ལ་ཡང་དོན་བཞི་སྟེ།། སྤྱི་དང་འདྲེས་དང་དམ་ཚིག་དབང་།། མན་ངག་ལུང་གི་སློབ་དཔོན་ནོ།། ཞེས་སོ།། སློབ་དཔོན་དང་། སློབ་མའི་ངེས་ཚིག་ཀྱང་། དེ་ཉིད་ལས། དེ་ཡང་ངེས་ཚིག་འདི་ལྟ་སྟེ།། མི་ཤེས་ཤེས་པར་འགྲོལ་ཕྱིར་སློབ།། རྫོགས་ཆེན་དོན་ལ་སྦྱོར་བས་དཔོན།། སློབ་མའི་ངེས་ཚིག་འདི་ལྟ་སྟེ།། མ་ཡེངས་ཚུལ་གྱིས་ཉན་པས་སློབ།། མན་ངག་སྣོད་དུ་གྱུར་པས་མ།། དེ་ལྟར་དོན་ལྡན་དཔོན་སློབ་ནི།། ཡང་དག་ས་ལ་མཉམ་པོར་གནས།། དམ་ཚིག་ལྡན་ན་དེ་བཞིན་ནོ།། ཞེས་དང་། དམ་ཚིག་བསྲུངས་པའི་ཕན་ཡོན་ནི།། དེ་ཉིད་ལས། དམ་ཚིག་སྡོམ་པ་ཇི་བཞིན་གནས།། དམ་ཚིག་ལ་ནི་གང་གནས་པ།། བསམ་པ་ཐམས་ཅད་མཐར་ཕྱིན་འགྱུར།། ཞེས་པ་དང་། སྒྱུ་འཕྲུལ་ལས། དམ་ཚིག་མཆོག་ལ་གང་གནས་པ།། དམ་པ་མཆོག་དང་དམ་པ་ཡིས།། སྲས་དང་སྤུན་དགོངས་བྱིན་གྱིས་རློབརློབས།། ཅེས་སོ།། དམ་ཚིག་ཉམས་པའི་ཉེས་དམིགས་ནི།། རང་ཤར་ལས། ཉམས་ན་གཉིས་ཀ་འཚིག་པར་འགྱུར།། སྐུ་ཡི་དམ་ཚིག་ཉམས་གྱུར་ན།། རྡོ་རྗེར་དམྱལ་བ་ཆེན་པོར་འཆད།། འོ་དོད་འབོད་པའི་གནས་སུ་སྐྱེ།། གསུང་གི་དམ་ཚིག་ཉམས་གྱུར་ན།། སྣང་བ་འགགས་པར་འགྱུར་བ་དང་།། མུན་རྡུལ་ཆེན་པོའི་གནས་སུ་སྐྱེ།། དེ་ནས་ཐོན་པར་གྱུར་ནས་ཀྱང་།། ལྐུགས་པ་དག་ཏུ་སྐྱེ་བར་འགྱུར།། ཐུགས་ཀྱི་དམ་ཚིག་ཉམས་གྱུར་ན།། ཡིད་འཁྲུག་ཆེན་པོའི་གནས་སུ་སྐྱེ།། རྟག་ཏུ་རྩོད་པ་རྒྱུན་མི་ཆད།། འཐབ་དང་སྡུག་བསྔལ་ཆེན་པོ་དང་།། ཡང་ན་དྲན་པ་མེད་པར་འགྱུར།། སྨྱོ་འབོག་ནད་ཀྱིས་ཐབས་ཐེབསཔར་འགྱུར།། ཐ་མ་ངུ་འབོད་གནས་སུ་སྐྱེ།། ཞེས་དང་། དམ་ཚིག་ཉམས་པའི་སྔ་ལྟས་སུ།།མི་བདེ་རྣམ་པ་སྣ་ཚོགས་འབྱུང་།། ཡམས་དང་འཆི་བའི་ནད་རྣམས་དང་།། རིམས་ནད་སྣ་ཚོགས་འབྱུང་བར་འགྱུར།། གདོན་དང་ལོག་འདྲེན་རྣམས་ཀྱིས་ཀྱང་།། བསད་ནས་སེམས་ཅན་དམྱལ་བར་འགྲོ།། མིག་གིས་གཟུགས་མི་མཐོང་བར་འགྱུར།། རྣ་བ་འོན་ཅིང་ལས་མི་འགྲུབ།། མཛེ་དང་ཤུ་བའི་ནད་རྣམས་འབྱུང་།། ཆོམ་རྐུན་རྒྱལ་པོའི་ཆད་པ་འབྱུང་།། གཞན་ལ་མེད་པའི་རིམས་ནད་འབྱུང་།། བུ་དང་ཆུང་མ་འཆི་བར་སྟོན།། ཡུལ་རྣམས་ཐམས་ཅད་དགྲར་ལྡང་ཞིང་།། བྱས་པ་དོན་མེད་ཆེན་པོར་འགྱུར།། ཞེས་པ་ལྟར་དང་། ཉམས་ན་བསྐང་ཐབས་ལ་གསུམ་ལས། དང་པོའི་སྐུའི་ཉམས་ན་བསྐང་བའི་ཐབས་ནི། ཡང་དེ་ཉིད་ལས། གསུང་རབ་རྒྱ་ཆེན་བཀླག་པ་དང་།། ཚོགས་ཀྱི་འཁོར་ལོ་རྒྱ་ཆེན་བསྐོར།། འཁོར་གསུམ་ཡོངས་དག་བྱ་བར་གསུངས།། ཞེས་དང་། གསུང་ཡང་དེ་ལས། དེ་ཡང་སྦྱངས་ཐབས་འདི་ལྟ་སྟེ།། མར་མེ་བརྒྱ་རྩའི་ཆོ་ག་དང་།། སྤང་བསྐོང་བརྒྱ་རྩ་གདོན་པ་དང་།། བཤགས་པ་རྣམ་པ་སྣ་ཚོགས་བྱ།། དེས་ནི་བྱང་པའི་ཡོན་ཏན་མཐོང་།། ཞེས་པའི་སྤང་བསྐོང་ནི་ན་རག་རྒྱུན་བཤགས་སོ།། ཐུགས་ཀྱང་དེ་ཉིད་ལས། དེ་ཡང་སྦྱང་ཐབས་འདི་ལྟ་སྟེ།། སློབ་དཔོན་མཉེས་པའི་རྫས་ཀྱིས་མཆོད།། འབྱོར་ཚོགས་ཅི་ཡོད་འཕགས་པ་མཆོད།། དེ་ལྟར་བཤགས་པ་བྱས་གྱུར་ན།། བསམ་པ་ཐམས་ཅད་འགྲུབ་པར་འགྱུར།། འདོད་པ་ཐམས་ཅད་བསྐོངས་པར་འགྱུར།། བྱ་བ་ཐམས་ཅད་རྫོགས་པར་འགྱུར།། ཞེས་དང་། བསྲུང་ཐབས་ནི། སྐྱོན་ཡོན་མཐོང་ནས་དྲན་པ་དང་ཤེས་བཞིན་དག་པས་རྒྱུད་སྡོམ་པ་སྟེ། དེ་ཉིད་ལས། དམ་ཚིག་ལ་ནི་ཇི་བཞིན་གནས།། བསྐལ་བ་ཞིག་ཀྱང་མི་གཏང་བ།། དམ་ཚིག་ཆེན་པོའི་བསྲུང་ཐབས་སོ།། ཞེས་པ་བཞིན་དང་། དེའང་སློབ་དཔོན་གྱིས་རྒྱུད་དང་དམ་ཚིག་གི་རིམ་པ་ཤེས་པས་ཤེས་པ་བཅུས་བསྲུང་ལ། སློབ་མས་མི་ཤེས་པས་སློབ་དཔོན་གྱི་བཀའ་བཞིན་བསྲུངས་པའོ།། ཤེས་པ་བཅུ་ནི། ཚིག་དོན་གྱི་གནས་ཤེས་པ་དང་། དྲིས་པའི་ལན་ལྡོན་པར་ཤེས་པ་དང་། དབང་དང་མན་ངག་གི་སྐབས་ཤེས་པ་དང་། ལྟ་བ་ཡངས་པར་ཤེས་པ་དང་། བསྒོམ་པའི་དད་ཆེ་བར་ཤེས་པ་དང་། ཆོས་ཉིད་ཟབ་པར་ཤེས་པ་དང་། འཁོར་བ་དང་མ་འདྲེས་པར་ཤེས་པ་དང་། འདས་པའི་ས་ལ་གནས་པར་ཤེས་པ་དང་། རང་དང་སྤྱིའི་ཆོས་དང་ཆོས་ཅན་གྱི་མཚན་ཉིད་ཤེས་པའོ།། ཡང་དེ་ཉིད་ལས། དེ་ཡང་བསྲུང་ཐབས་འདི་ལྟ་སྟེ།། ཤེས་པ་གཅིག་གི་ཁྱད་པར་གྱིས།། ཁྱད་པར་བཅུ་ཡི་བསྲུང་ཐབས་འཕགས།། གཅིག་ལ་དེ་བས་ཉུང་བའོ།། དམ་ཚིག་རྒྱལ་པོ་དེ་བཞིན་སྤྱོད།། ཅེས་དང་། གཞན་སྐུ་གསུང་ཐུགས་ཀྱི་དམ་ཚིག་བྱེ་བྲག་བཤད་པ་དང་། བླ་ན་མེད་པའི་དམ་ཚིག་མཆོག་ཏུ་བསྟན་པའི་རྒྱས་བཤད་ཡོད་ཀྱང་འདིར་དེ་ཙམ་མོ།། གཞན་ཡང་དཔལ་མགོན་འཕགས་པ་ཀླུ་སྒྲུབ་ཀྱི་བསྟན་བཅོས་ལས་སྦོམ་པོའི་ལྟུང་བ་བརྒྱད་བཤད་པའི་དང་པོ། ཤེས་རབ་སྟོབས་ཀྱིས་ལེན་པ་དང་།། ཞེས་རིག་མ་ཡོངས་སུ་མ་སྦྱངས་པར་རང་གི་མཐུའམ་སྟོབས་ཀྱིས་དབང་མེད་དུ་ལེན་པ། གཉིས་པ། དེ་ཡི་བདུད་རྩི་སྟོབས་ཀྱིས་ལེན།། ཞེས་གོང་བཤད་རིག་མའི་བདུད་རྩི་སྟོབས་ཀྱིས་ལེན་པ། གསུམ་པ་སྣོད་མིན་ལ་ནི་མི་གསང་དང་།། ཞེས་དབང་མ་ཐོབ་པ་དང་དད་པ་མེད་པའི་སྣོད་མིན་ལ་བྲིས་སྐུ་གླེགས་བམ་རྒྱན་དྲུག་སོགས་གསང་རྫས་རྣམས་སྟོན་པ། བཞི་པ། ཚོགས་ཀྱི་ནང་དུ་རྩོད་པ་དང་།། ཞེས་ཚོགས་འཁོར་རམ་དཔའ་བོ་ཕོ་མོའི་དགའ་སྟོན་གྱི་དུས་རྩོད་པ། ལྔ་པ། དད་ལྡན་ལ་གཞན་ཆོས་སྟོན་པ་དང་།། ཞེས་དཔེར་ན་དོན་དམ་པའི་མཚན་ཉིད་འདྲི་བ་ལ་ཀུན་རྫོབ་ཀྱི་མཚན་ཉིད་སྟོན་པ་ལྟ་བུ། དྲུག་པ། ཉན་ཐོས་ནང་དུ་ཞག་བདུན་གནས།། ཞེས་གསང་སྔགས་སུན་འབྱིན་བྱེད་པའི་ཉན་ཐོས་ཀྱི་ནང་དུ་ཞག་བདུན་ཕན་ཆད་གནས་པ། བདུན་པ། རྫུན་གྱི་རྣལ་འབྱོར་ང་རྒྱལ་བྱེད།། ཅེས་ལྷའི་སྒྲུབ་ཐབས་ཙམ་ཞིག་ལ་བརྟེན་ནས་དེ་ཁོ་ན་ཉིད་ཤེས་པར་ང་རྒྱལ་གྱིས་གནས་ཤིང་སྟོན་པ། བརྒྱད་པ། དད་པ་མེད་ལ་ཆོས་སྟོན་པ།། ཞེས་དབང་གིས་མ་སྨིན་པའི་སྔགས་ལ་མི་དད་པ་ལ་དབང་བསྐུར་པའམ་ཕྱིའི་ཆོས་ལ་མོས་པར་སྔགས་ཀྱི་གསང་བ་སྟོན་པ་རྣམས་སྦོམ་པོའི་ལྟུང་བ་ཡིན་ལ། ཉམས་པར་གྱུར་ན་བཤགས་པར་བྱ།། ཞེས་གསུངས་པ་མ་ཤེས་པ་སོགས་ཀྱི་དབང་གིས་ཉམས་ན་ཆོག་ཆོ་གབཞིན་དུ་བཤགས་པར་བྱའོ།། དེ་ལྟར་དམ་ཚིག་དང་སྡོམ་པ་ལ་ཚུལ་བཞིན་གནས་པས་རབ་ཚེ་འདི། འབྲིང་བར་དོ། ཐ་མ་སྐྱེ་བ་བདུན་ནམ། བཅུ་དྲུག་ཚུན་ལ་སངས་རྒྱ་བས་ན།། འཇམ་མགོན་ཆོས་ཀྱི་རྒྱལ་པོ་བཙོང་ཁ་བས།། ཤིན་ཏུ་ཕྲད་འཕྲདདཀའ་གོང་ན་མེད་པའི་ལམ།། འདི་འདྲ་ཡལ་བར་འདོར་བ་ཀྱེ་མའོ་མཚར།། དེ་ཉིད་ཕྱིར་ན་རྒྱལ་བའི་ཐེག་པ་མཆོག། སངས་རྒྱས་ལས་ཀྱང་དཀོན་པའི་རྡོ་རྗེ་ཐེག། དངོས་གྲུབ་གཉིས་ཀྱི་གཏེར་གྱུར་ཟབ་མོ་དེར།། ཞུགས་ནས་འབད་པ་ཆེན་པོས་རིང་དུ་སྦྱངས།། ཞེས་དང་། ཐུབ་པའི་ལེགས་བཤད་ཀུན་གྱི་མཐར་ཐུག་པ།། དཔལ་ལྡན་རྣལ་འབྱོར་བླ་ན་མེད་པའི་རྒྱུད།། ཅེས་སོགས་རྒྱ་ཆེར་བསྔགས་པ་དང་། རྒྱུ་མཚན་ཉིད་ཀྱི་ཐེག་པ་ལས་འབྲས་བུ་སྔགས་ཀྱི་ཐེག་པ་ཁྱད་པར་འཕགས་ཚུལ་རྒྱུད་སྡེ་རིན་པོ་ཆེ་དུ་མ་དང་རྒྱ་གར་གྱི་པཎ་གྲུབ་དུ་མས་གསུངས་པ་གཞན་དུ་རྒྱ་ཆེར་བཤད་པ་ལྟར་ཡིན་ལ། ཕལ་སྐད་ཁེ་ཆེ་སར་ཉེན་གྱི་དཔེ་བཞིན་སྡོམ་པ་གསུམ་གྱི་ནང་ནས་བསྲུང་སྡོམ་ཡང་སྔགས་ཁོ་ན་ཆེས་དཀའ་བ་ནི། བདག་ཉིད་ཆེན་པོ་དཱི་པཱཾ་ཀ་རས་ཕ་ཆོས་ཐོར་བུར། སོ་སོ་ཐར་བའི་སྡོམ་པ་ལ་ཉེས་པས་གཏན་ནས་མ་གོས་པ་བྱར་རུང་། བྱང་ཆུབ་སེམས་དཔའི་བསླབ་པ་ཉེས་པ་ཅོ་ལེ་ཙམ་གྱིས་གོས། གསང་སྔགས་ཀྱི་དམ་ཚིག་ལ་ཉེས་པ་ཅ་རེ་ཉ་རེ་བརྒྱབ་སྟེ་ཉེས་པ་དང་ཞག་ཏུ་འགྲོགས་མ་མྱོང་། ཞེས་གསུངས་པས་གོ་ནུས་པ་བཞིན་འདི་ལ་གཟབ་པར་བྱའོ།།

X