//不能复制 // >
ཁྱེད་ཀྱི་གནས་ཡུལ། > གཙོ་ངོས། > ཡིག་ཚགས། > གསོ་རིག་རྒྱུད་བཞི། > མན་ངག་རྒྱུད། > ནང་དོན།

ལེའུ་སོ་གཉིས་པ། ཁ་ནད་གསོ་བ།

ཇུས་འགོད་པ། zhuomacao རྩོམ་སྒྲིག་པ། དུས་ཚོད། 2016-05-26 14:41:34 ཀློག་གྲངས། 3 

      དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ།། ཀྱེ་དྲང་སྲོང་ཆེན་པོ་ཉོན་ཅིག། ཁ་ཡི་ནད་ལ་རྒྱུ་རྐྱེན་དབྱེ་བ་དང་།། རྟགས་དང་བཅོས་ཐབས་རྣམ་པ་བཞི་རུ་བཤད།།རྒྱུ་རྐྱེན་ཟས་དང་སྤྱོད་ལམ་གདོན་ལ་སོགས།། འདུ་བ་འཁྲུགས་པས་ཁ་ནད་སྐྱེད་པར་བྱེད།།དབྱེ་བ་མཆུ་རྙིལ་སོ་ལྕེ་གྲེ་བ་རྐན།། མཆུ་ནད་གྲེ་མཆུ་ཤོ་རེ་བད་ཀན་དང་།། གཅེན་དང་ཁྲག་རྒྱས་ཁ་ཤུ་དྲུག་ཏུ་བཤད།། སོ་ནད་བད་རླུང་ཁྲག་མཁྲིས་སོ་འབྲས་སྲིན།། ལྕེ་ནད་རླུང་མཁྲིས་བད་ཀན་ལྕེ་ལྷག་སྐྲངས།། རྐན་ནད་ལྕེ་ཆུང་བབས་དང་ལྕེ་འདྲ་དང་།། རྐན་འབྲུམ་ཆུ་བུར་རུས་སྦལ་རྐན་སྨིན་ནོ།། གྲེ་བའི་ནད་ལ་རླུང་དང་མཁྲིས་པ་ཁྲག། བད་ཀན་འདུས་པ་འབྲས་དང་རྨེན་བུ་འོ།། སུམ་ཅུ་ཐམ་པ་ཁ་ནད་དབྱེ་བར་བཤད།། དེ་རྟགས་གྲེ་མཆུ་མཆུ་ནད་ཤ་རྨེན་སྐྱེས།། ཤོ་རེ་མཆུ་གས་བད་ཀན་སྐྱ་ཚོས་ཚ།། གཅེན་ནི་འབྲུམ་ཐོར་ན་ལ་ཚ་བ་འབྱུང་།། ཁྲག་རྒྱས་སྨུག་ལ་སྦོམ་པར་སྐྲངས་པ་ཡིན།། ཁ་ཤུ་མཆུ་ལ་ཤུ་བ་ཆགས་པའོ།། རྙིལ་ནད་གཡའ་ཞིང་འདྲུལ་ལ་ཁྲག་རྣག་འཛག། རླུང་གིས་སོ་ནད་བེར་བ་ལངས་ནས་ན།། འཕར་རྩ་འཁྱུག་ཅིང་གྲང་མོ་བཟོད་ཐབས་མེད།། ཁྲག་མཁྲིས་དྲོད་ཆེ་རྩ་རྒྱངས་བཅུད་ཟས་གནོད།། བད་ཀན་སོ་ནད་རྙིལ་འདྲུལ་དྲི་མི་ཞིམ།། སོ་འབྲས་སོ་རྩར་སྐྲངས་ཤིང་རྣག་ཏུ་འགྱུར།། སྲིན་ནད་ཚ་གྲང་གང་ཡང་རེག་ཐབས་མེད།། ལྡང་དུབ་བྱེད་ཅིང་ཟུག་ལངས་ལྷང་ལྷང་གཟེར།། རླུང་གི་ལྕེ་ནད་རྩུབ་འགགས་རོ་མི་ཚོར།། མཁྲིས་གྱུར་འབྲུམ་པ་དམར་པོ་ཚ་བས་ཁྱབ།། བད་ཀན་ལྕེ་ནད་སྐྱ་འཇམ་ཆེར་མི་བདེ།། ལྕེ་ལྷག་ལྕེ་འོག་ལྕེ་འདྲ་སྐྲངས་ཏེ་ན།། ལྕེ་སྐྲངས་ཁ་ཁེངས་ཆུ་འཛག་ཟས་མི་ཐར།། ལྕེ་ཆུང་བབས་པ་བ་ཡི་ནུ་ལྟར་རྒྱས།། ལྐོག་འགགས་ཟས་སྐོམ་མི་ཐར་སྣར་འོང་སྐྱུག། དེ་འདྲ་ལྕེ་ཆུང་འགྲམས་སྐྲངས་ལྕེ་འདྲ་ཡིན།། རྐན་འབྲུམ་རྐན་ཕུགས་འབྲུམ་བུ་ཆུ་སེར་འཛག། ཆུ་བུར་རྐན་དཀྱིལ་འབྲུམ་པ་སྙི་ལ་རྡོལ།། རུས་སྦལ་ན་ཚ་མེད་པར་སྐྲེད་པོར་སྐྲངས།། རྐན་སྨིན་རྐན་ལས་རྣག་འཛག་གྱུར་པའོ།། གྲེ་བ་རླུང་གྱུར་རྣ་བ་འགྲམ་པ་གཟེར།། གྲེ་བ་ནང་སྐྲངས་ཚ་ལ་སྐམ་པ་ཡིན།། ཁྲག་མཁྲིས་སྐྲངས་དམར་ཚ་སྐྱེ་རྣག་ཏུ་འགྱུར།། བད་ཀན་སྐྲངས་མདོག་སྐྱ་ལ་ལྗན་ལྗིན་མང་།། འདུས་པ་གྲ་མས་གང་སེམ་འབྲུམ་བུ་འབྱུང་།། འབྲས་ནད་ཕྱི་ནང་མྱུར་སྐྲངས་རྣག་ཏུ་འགྱུར།། རྨེན་བུ་སྲ་ལ་ཟུག་ཆུང་སྨིན་མི་བྱེད།།བཅོས་ཐབས་གྲེ་མཆུ་བྲུད་ལ་ལྕགས་ཀྱིས་བསྲེག། སེང་ཕྲོམ་འཇིབ་རྩི་འབྲས་གསུམ་སྦྲང་སྦྱར་བྱུག། ཤོ་རེ་གཡས་གཡོན་མཐའ་དྲས་མཁྲིས་པ་བྱུག། དར་གྱིས་བཙེམས་ལ་ཧེལ་སྲབ་སྤྱིན་ཆུས་བསྡམ།། གད་མོ་མི་དགོད་བལྡད་མི་དགོས་པ་བཟའ།། རྨེན་པ་འཁྲིགས་ནས་སྐུད་པ་བཏོན་ལ་གསོ།། བད་ཀན་ཨ་རུ་སྒེ་གཤེར་ཐལ་བ་བྱུག། ཡང་ན་ཨ་རུ་ར་དང་བུ་རམ་བྱུག། ཡང་ན་སྦྲང་རྩི་པ་ཋ་ཚ་གསུམ་བྱུག། སྲིན་ལག་གཡོན་གྱི་ཚིགས་བར་འོག་ངོས་བསྲེག། གཅེན་ལ་ཁྲག་དབྱུང་སེང་ཕྲོམ་ལྡེ་གུ་བྱུག། ཁྲག་རྒྱས་སྐྱུ་རུའི་ཐང་བཏང་མཆུ་རྩ་གཏར།། ཁ་ཤུ་བརྟོལ་ལ་ཁྱི་དབྲེ་ལྷམ་མཐིལ་གླན།། རྙིལ་ནད་དོམ་མཁྲིས་རྒྱ་སྐྱེགས་བ་ཤ་ཀ། ཀྱི་ལྕེ་ཧོང་ལེན་ཞུ་མཁན་ཀ་ར་མར།། སྦྱར་བ་མཁུར་བཀང་སྣ་ཡི་སྨན་དུ་བཏང་།། གླ་སྒང་སྐྱེར་པ་བཅའ་སྒ་འབྲས་བུ་གསུམ།། འཇིབ་རྩི་སྦྲང་དང་སྦྱར་བའི་མཁུར་བཀང་བཅང་།། སྐྱེར་པ་རུ་རྟ་གླ་སྒང་ཤུ་དག་བཙོད།། པ་ཋ་ཧོང་ལེན་ཡུང་བ་སྦྲང་མཁུར་བཀང་།། སོ་ནད་རླུང་གྱུར་སྣུམ་ལྡན་དུགས་ཀྱིས་བདུག། རླུང་འཇོམས་སྨན་དང་ཞུན་མར་བསྐོལ་བས་བསྲེག། ཤིང་མངར་ཏིལ་སྦྲང་འོ་མ་མཁུར་བར་བཅང་།། འཕར་རྩ་མེས་མནན་འབྲས་བུའི་སྨན་མར་སྦྱར།། ཁྲག་མཁྲིས་སོ་ནད་སྐྱུ་རུའི་ཐང་བཏང་གཏར།། འབྲས་བུ་གསུམ་དང་རུ་རྟ་བ་ཤ་ཀ། རྒྱ་སྐྱེགས་སྐྱེར་པ་ཀ་ར་མཁུར་བཀང་བཅང་།། ཙན་དན་དཀར་དམར་ལྡེ་གུ་ཕྱི་ནས་བྱུག། བད་ཀན་སོ་བྲུད་བུལ་ཏོག་སྦྲང་རྩི་བྱུག། ཡང་ན་ཅོང་ཞི་སྦྲང་སྦྱར་སྟར་བུ་བྱུག། སོ་འབྲས་སྲུབ་ཀ་རྒྱ་ཚ་ནལ་ཤམ་བྱུག། རྙིལ་ནད་ལྟར་བཅོས་མ་ཕན་བྲུད་ལ་བསྲེག། སོ་སྲིན་རྟ་སྦངས་ཕུར་མོ་སྤུ་དུགས་བྱ།། ཤིང་ཀུན་ནག་མཚུར་རུ་རྟ་བྱི་ཏང་ག། ས་རྫི་ཀ་དང་མར་སྦྱར་མཁུར་བར་དགང་།། ཏིག་ཏ་ཐང་ཕྲོམ་སག་རྩི་ཤ་ཚིལ་ལམ།། ར་ཚིལ་སྦྱར་བ་འཁར་གོང་མེས་བསྲེགས་བདུག། ཡང་ན་ཐང་ཕྲོམ་སྒོག་སྐྱ་མུ་ཟི་དང་།། གུ་གུལ་ནག་པོ་བཤུལ་ཚིལ་དེ་བཞིན་བདུག། ཤ་ཚིལ་ཤིང་ཀུན་བྱི་ཏང་ག་གླན་བསྲེག། བྱེ་སྟག་བུ་རམ་རིལ་བུ་སོ་སྟེང་བཞག། རྣ་དྲུང་སྲིན་ལག་ཕྱི་མཁྲིག་རུས་མགོ་བསྲེག། རླུང་འབྲེལ་བཙན་དུག་དྲོད་སྨན་མར་བཙོས་བདུག། ཁྲག་མཁྲིས་འབྲེལ་ན་གང་ཉེའི་རྩ་ལ་གཏར།། ལྕེ་ནད་རླུང་གྱུར་མཁུར་བཀང་སྣ་སྨན་བཏང་།། མཁྲིས་གྱུར་མངར་བས་མཁུར་བཀང་ལྕེ་རྩ་གཏར།། བད་གྱུར་སྐེ་ཚེ་ཚ་གསུམ་སྦྲང་སྦྱར་བྱུག། ལྕེ་ལྷག་ཕྱེད་བཅད་ལྕགས་བསྲེགས་ཐལ་སྨན་གདབ།། ལྕེ་སྐྲངས་སྤྱང་ལྕེ་སྦལ་པའི་ཤ་ཁུས་བདུག། མ་ཕན་ལྐོག་མར་དུགས་བྱ་སྨིན་ནས་དབྲལ།། དེ་ཤུལ་རྒྱ་ཚ་རུ་རྟ་ཤུ་དག་གདབ།། དེ་འོག་དྲོད་བཅུད་བསྟེན་པས་རྨེན་མི་ལྡང་།། རྒྱ་ཚ་ཐར་ནུ་སྔོ་ཡི་ཚ་བ་གསུམ།། སྲུབ་ཀ་གཟེ་མ་ཕུར་ཐལ་སྔོན་བུ་དང་།། རྩ་མཁྲིས་ཐལ་ཀ་རྡོ་རྗེ་སོ་མ་ར།། སྲེ་མོང་ཤ་དང་དུར་བྱིད་དར་བཙགས་ཕྱེ།། དྲི་ཆུ་སྦྱར་བ་འཇམ་ཙམ་སྲོས་ལ་མནན།། ལྕེ་ལ་བྱུག་ཅིང་རས་ལ་བསྐུས་ལ་གླན།། ཟུག་སྐྱེས་གྱུར་ནས་ལྕེ་ཡི་རྩ་ལ་གཏར།། ལྕེ་ལྷག་ལྡིབ་འཐེན་སྐྲངས་སོགས་ལྕེ་ནད་སེལ།། ལྕེ་ཆུང་བབས་ན་སྤྱི་བོའི་སྐྲ་འཐེན་བསྲེག། རུ་རྟ་རྒྱ་ཚ་ཤུ་དག་ན་ལེ་ཤམ།། གཡེར་མའི་ཕྱེ་གདབ་ཉ་ཁུའི་ཚ་བས་བདུག། ཁྲག་དབྱུང་མ་ཕན་ཕྱེད་བཅད་ལྕགས་ཀྱིས་བསྲེག། ལྕེ་འདྲ་ཁྲག་དབྱུང་ཡ་བཀྵ་ར་གདབ།། རྐན་འབྲུམ་བཞར་ལ་བུལ་ཏོག་ཕྱེ་མ་གདབ།། ཆུ་བུར་རུས་སྦལ་གཉིས་ལ་ཁྲག་ཕྱུངས་ལ།། ནག་མཚུར་སྐྱེར་པའི་ཁཎྡྲི་སྦྲང་སྦྱར་བྱུག། རྐན་རྨིན་དྲལ་ལ་གཅོད་སྨན་ཕྱེ་མ་གདབ།། རྐན་དང་རྙིལ་ནད་བད་ཀན་ཁྲག་འཕེལ་ཕྱིར།། མཁུར་བཀང་རྣོན་པོས་སྦྱང་ཞིང་གཏར་མང་གདབ།། གླ་སྒང་ཡ་བཀྵ་ར་ལྕེ་མྱང་ཚ།། སྐྱེར་ཤུན་ལྡོང་རོས་སྦྲང་རྩིའི་མཁུར་བཀང་བཅང་།། པ་ཏོལ་བཅའ་སྒ་སླེ་ཏྲེས་འབྲས་བུ་གསུམ།། ཏིག་ཏ་ཀྱི་ལྕེ་སྦྲང་རྩིའི་མཁུར་བཀང་བཅང་།། རུ་རྟ་ཤུ་དག་སྟར་བུ་འབྲས་བུ་གསུམ།། ཚ་བ་གསུམ་དང་རྒྱ་ཚ་བུལ་ཏོག་མཚུར།། སྦྲང་རྩིའི་མཁུར་བཀང་གཡའ་འདྲུལ་རྣག་འཛག་སེལ།། གྲེ་བ་རླུང་གྱུར་རླུང་འཇོམས་སྨན་མཁུར་དགང་།། ཁོང་དུ་བསྟེན་ཞིང་རིལ་བུ་མུར་བར་བྱ།། ཁྲག་མཁྲིས་མངར་བསིལ་མཁུར་བཀང་མང་དུ་གཏར།། བད་ཀན་འདུས་པ་རྩུབ་པའི་སྨན་གྱིས་བཅོས།། གྲེ་འབྲས་རྨེན་བུའི་དུགས་ལུམས་གཏར་རྗེས་བསྲེག། རྣ་ཤལ་འོག་ཤོང་མེ་བཏབ་རོ་མི་ལྡང་།། གྲེ་བའི་ནད་ཀུན་ཨ་རུ་བཙོ་བསྲེག་ཐང་།། མངར་བའི་ཐང་དང་རིལ་བུ་ཁ་མུར་བསྟེན།། ཉ་ཁུས་བདུག་ཅིང་སྒང་རྩ་སྐྱོར་གོང་གཏར།། ཞེས་གསུངས་སོ།། བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད་ལས་ཁ་ནད་གསོ་བའི་ལེའུ་སྟེ་སོ་གཉིས་པའོ།། །།

X